1۔ محکم آیات کا مفہوم: سورۂ آل عمران کی آیت نمبر7 میں بیان کیا گیاہے کہ قرآن کریم کی بعض آیات محکم ہیں اور بعض دوسری متشابہ ۔لغوی لحاظ سے تو محکم ہراس چیز کو کہا جاسکتاہےجسے حکمت ،دانائی اور تجربہ سے اس کو ساخت میں مضبوط بنادیا گیا ہو جیسے ارشاد باری ہے"ثُمَّ یُحْكِمُ اللّٰهُ اٰیٰتِهٖ"(22: 52)اور جب محکم کے مقابلے میں تشابہ کا لفظ آئے تو محکم کا معنی ایسی آیات ہیں جن میں کوئی لفظی یا معنوی اشتباہ نہ ہو۔(تیسیر القرآن)

ـــــ قرآن مجید کی ایک خصوصیت یہ ہے کہ تعلیم وتربیت کے نقطۂ نظر سے اس کی تعلیمات پہلے گٹھے ہوئے مختصر اور جامع جملوں کی شکل میں نازل ہوئیں،پھر بتدریج واضح اور مفصل ہوتی گئیں۔چنانچہ مکہ کے ابتدائی دور کی سورتیں اختصار، جامعیت اور اعجاز بیان کا کامل نمونہ ہیں۔ مدنی دور میں دین کی وہی بنیادی باتیں ایک جامع اور ہمہ گیر نظام زندگی کی شکل میں نمایاں ہوگئیں۔(ترجمہ:مولانا امین احسن اصلاحیؒ)

۔ الرٰ اس سورة کا قرآنی نام ہے۔ یہی نام پچھلی سورة کا بھی ہے اور یہ اس بات کا قرینہ ہے کہ عمود و مضمون کے اعتبار سے دونوں سورتیں باہم ملتی جلتی ہیں چنانچہ آگے آپ دیکھیں گے کہ ان دونوں میں فرق صرف اجمال و تفصیل کا ہے۔ پچھلی سورة میں جو پہلو مجمل رہ گئے تھے وہ اس میں وضاحت سے سامنے آگئے ہیں۔ یہ فرق یوں تو ہر پہلو میں نمایاں ہے لیکن خاص طور پر واقعات کے بیان میں یہ فرق بہت زیادہ نظر آئے گا۔ اجمال کے بعد تفصیل کا یہ طریقہ، جو قرآن نے اختیار کیا ہے، یہ صرف تنوع کی خاطر نہیں اختیار کیا ہے بلکہ تعلیم و تربیت اور تبلیغ وو دعوت کے نقطہ نظر سے یہی طریقہ مفید اور بابرکت ہے۔ (تدبرِقرآن)

2۔ یعنی اللہ تعالیٰ توبہ و استغفار کرنے اور نیک اعمال بجالانے والوں کا بڑا قدردان ہے کسی نے جتنے بھی نیک اعمال کیے ہوں گےاللہ تعالیٰ اسے اتناہی بلند درجہ عطافرمائے گاواضح رہے کہ توبہ استغفار کرتے رہنا بجائے خود بہت بڑا نیک عمل ہے۔(تیسیر القرآن)

۔نذیر کا ترجمہ ڈرانے والے کا کیا جاتا ہے لیکن یہ لفظ ڈرانے والے دشمن یا درندے یا دوسرے نقصان پہنچانے والوں کے لئے نہیں بولا جاتا، بلکہ نذیر اس شخص کے لئے بولا جاتا ہے جو کسی اپنے عزیز کو شفقت و محبت کی بناء پر ایسی چیزوں سے ڈرائے اور بچائے جو اس کے لئے دنیا یا آخرت یا دونوں میں مضرت پہنچانے والی ہیں۔ (معارف القرآن)

3۔ یعنی دنیا میں تمہارے ٹھیرنے کے لیے جو وقت مقرر ہے اس وقت تک وہ تم کو بری طرح نہیں بلکہ اچھی طرح رکھے گا۔ اس کی نعمتیں تم پر برسیں گی۔ اس کی برکتوں سے سرفراز ہوگے۔ خوش حال و فارغ البال رہو گے۔ زندگی میں امن اور چین نصیب ہوگا۔ ذلت و خواری کے ساتھ نہیں بلکہ عزت و شرف کے ساتھ جیو گے۔۔۔۔۔۔۔۔ایک وہ سروسامان ہے جو خدا سے پھرے ہوئے لوگوں کو فتنے میں ڈالنے کے لیے دیا جاتا ہے اور جس سے دھوکا کھا کر ایسے لوگ اپنے آپ کو دنیا پرستی و خدا فراموشی میں اور زیادہ گم کردیتے ہیں۔ یہ بظاہر تو نعمت ہے مگر بباطن خدا کی پھٹکار اور اس کے عذاب کا پیش خیمہ ہے۔ قرآن مجید اس کو " مَتَاعٌ غُرُوْرٌ " کے الفاظ سے یاد کرتا ہے۔ دوسرا وہ سروسامان ہے جس سے انسان خوشحال اور قوی بازو ہو کر اپنے خدا کا اور زیادہ شکر گزار بنتا ہے، خدا اور اس کے بندوں کے اور خود اپنے نفس کے حقوق زیادہ اچھی طرح ادا کرتا ہے، خدا کے دیے ہوئے وسائل سے طاقت پا کر دنیا میں خیر و صلاح کی ترقی اور شروفساد کے استیصال کے لیے زیادہ کارگر کوشش کرنے لگتا ہے۔ یہ قرآن کی زبان میں "مَتَاعٌ حَسَنٌ " ہے، یعنی ایسا اچھا سامان زندگی جو محض عیش دنیا ہی پر ختم نہیں ہوجاتا بلکہ نتیجہ میں عیش آخرت کا بھی ذریعہ بنتا ہے۔ (تفہیم القرآن)

۔ بزرگوں نے فرمایا ہے کہ آئندہ کو گناہ سے بچنے کا پختہ عزم اور اہتمام کئے بغیر محض زبان سے استغفار کرنا کذابین یعنی جھوٹے لوگوں کی توبہ ہے (قرطبی) اور ایسے ہی استغفار کے متعلق بھی بعض حضرات نے فرمایا ہے کہ "معصیت را خندہ می آیدز استغفار ما"  یا  یہ کہ ایسی توبہ خود قابل توبہ ہے۔ (معارف القرآن)

5۔ اِنَّهُمْ۔۔ مِنْهُ۔ رسول اللہؐ کو بھی ہر مزاج و طبیعت اور ہرذہنیت کے مخالفین سے سابقہ پڑا تھا ایک گروہ ان عقلمندوں   میں ایسا بھی تھا کہ جب یہ لوگ آپس میں چپکے چپکے اسلام و رسول اسلام کے خلاف سازشیں کرتے،تو ان سرگوشیوں کے وقت افراط سعی اخفاء میں اس اس طرح سمٹ سمٹ کر رہتے کہ گویا اپنے سینوں کو دہراکئے ڈالتے ہیں اور کپڑے اپنے اوپر ڈالتے چلے جاتے ،بلکہ نام بھی اخنس بن شریق اور بعض دوسرے منافقوں کے روایتوں میں آئے۔قرآن مجید نے ان کی ہئیت کذائی کو بے نقاب کردیا،اور ان پر گرفت ہوئی کہ کیا تمہاری یہ رازداری حق تعالیٰ عالم الغیب کے مقابلہ میں بھی چل جائے گی؟۔(تفسیر ماجدی)

ــــاس آیت کا مقصد تو اللہ تعالیٰ کے علم محیط کی وسعت کو بیان کرناہے کہ کھلی اور چھپی چیزیں تو کجا وہ تو دلوں کے ارادوں تک سے واقف ہے مگر اس آیت کے ابتدائی جملہ کی تفسیر میں مفسرین نے بہت اختلاف کیا ہے ان میں سے ہم صرف سیدنا ابن عباسؓ کی بخاری میں مذکور روایت پر اعتماد کرتے ہیں جو درج ذیل ہے:۔محمد بن عبید بن جعفر کہتے ہیں کہ میں نے ابن عباسؓ سے پوچھا کہ یہ آیت کس باب میں اتری ہے تو انہوں نے کہا: کچھ لوگ رفع حاجت کے وقت یا اپنی بیویوں سے صحبت کرتے وقت آسمان کی طرف ستر کھولنے سے (پروردگارسے)شرماتے اور شرم کے مارے جھکے جاتے تھے اس وقت یہ آیت نازل ہوئی۔(بخاری،کتاب التفسیر)یعنی اگر تمہیں بوقت ضرورت بدن کھولنے  میں اللہ سے حیا آتی ہے اور اس طرح جھکے جاتے ہوتو کیا جس وقت کپڑے اتارتے اور پہنتے ہو اس وقت تمہارا ظاہر و باطن اللہ کے سامنے نہیں ہوتا؟اور جب انسان اللہ سے کسی وقت بھی چھپ نہیں سکتا تو پھر ضرورت بشریہ سے متعلق اس قدر غلو سے کام لینا درست نہیں۔(تیسیر القرآن)

6۔ قرآن کے الفاظ ہیں مُسْتَقَرّ(قرارگاہ)اور مُسْتَوْدَع(سونپے جانے کی جگہ )اور مستودع اس گودام کو بھی کہتے ہیں جہاں کوئی چیز ذخیرہ کی جاتی ہے یا امانتیں بطور حفاظت رکھی جاتی ہیں ان دونوں الفاظ کی تعبیر میں مفسرین کا خاصا اختلاف ہے ان میں سے ہم ابن عباسؓ کے قول کو اختیار کرتے ہیں۔ ان کے نزدیک مستقر سے مراد وہ جگہ ہے جہاں کسی نے اس دنیا میں زندگی (کا اکثر حصہ)بسر کیا ہو اور مستودع سے مراد وہ جگہ ہے جہاں وہ دفن ہوا اور ہرجاندار کے ان دونوں مقامات کا اللہ کو پوری طرح علم ہے۔(تیسیر القرآن)

۔ مُسْتَقَرّ، اور مستودع پر انعام آیت 98 کے تحت بحث گزر چکی ہے۔ مستقر، سے مراد وہ ٹھکانا ہے جہاں انسان زندگی کے دن گزارتا ہے۔ اور مستودع سے مراد وہ جگہ ہے جہاں وہ مرنے کے بعد زمین کے سپرد کیا جاتا ہے۔ (تدبرِ قرآن)

7۔ آیت کے اس جزء سے ادھر بھی اشارہ ہوگیا کہ عرش الٰہی قدیم تر ہے ،زمین و آسمان کا ہم عمر نہیں ،جب زمین تھی نہ آسمان ،تب وہ عالم آب پر اسی طرح قائم تھا۔(تفسیر ماجدی)

ــــ آسمانوں اور زمین کی پیدائش سے پہلے تو اللہ کا عرش پانی پر تھا اور تخلیق کے بعد یہ عرش سات آسمانوں اور کرسی کے بھی اوپر ہے۔(تیسیر القرآن)

11۔ اس جگہ صبر کا لفظ مزاج کے استقلال کے معنوں میں استعمال ہواہےیعنی وہ لوگ جو نہ تو دل برداشتہ اور مایوس ہوں بلکہ اسے صبر استقلال سے برداشت کریں اور نہ ہی کسی خوشی کے موقعہ پر آپے سے باہر ہوں بلکہ اپنے آپ کو قابومیں رکھیں اور ہر حال میں اللہ کا شکر بجالائیں اور مصیبت یا خوشی کے مواقع پر ان کی طبیعت میں غیر سنجیدہ قسم کا اتار چڑھاؤ نمایاں نہ ہو بلکہ وہ ہرحال میں اپنے ذہنی توازن کو برقرار رکھتے ہیں نہ مال و دولت اور آسودگی ان کا مزاج خراب کرتی ہے اور نہ ہی تنگی ترشی کے دوران اپنی ہمت ہاربیٹھتے ہیں ایسے لوگوں کے اللہ قصور بھی معاف کرتاہے اور ان کے نیک کاموں کے عوض انہیں بہت زیادہ اجر بھی عطافرماتاہے۔(تیسیر القرآن)

13۔ قرآن جیسی سورت بنا لانے کا چیلنج:۔ واضح رہے کہ یہاں تو کفار سے دس سورتیں بناکر لانے کا مطالبہ کیا گیا ہے جبکہ سورۂ یونس کی آیت نمبر37، 38 میں صرف ایک سورت بنالانے کا مطالبہ ہے جس کا مطلب یہ ہے کہ سورۂ یونس ،سورۂ ہود کے بعد نازل ہوئی تھی اسی طرح سورۂ بقرہ کی آیت نمبر 23 میں بھی صرف ایک ہی سورت بنالانے کا مطالبہ کیا گیا ہے اور یہ سورۂ ہود اور سورۂ یونس کے بعد نازل ہوئی۔ یہ دونوں سورتیں مکی ہیں جبکہ سورۂ بقرہ مدنی سورتوں میں سے پہلی سورت ہے اور قرآن جیسی سورت بنالانے کے چیلنج اور قرآن کی امتیاز کی خصوصیات کی تفصیل کیلئے سورہ بقرہ کی آیت نمبر 23 پر حاشیہ نمبر 27 ملاحظہ فرمائیں۔(تیسیر القرآن)

17۔ دونوں شہادتوں کے بعد ایمان نہ لانے والے:۔ یہاں واضح دلیل سے مراد داعیہ فطرت یا عہد الست ہے جو ہر انسان کے تحت الشعور میں موجود ہے(تفصیل کیلئے دیکھئے الاعراف کی آیت نمبر172، 173)اب اگر اس آیت میں شخص سے مراد رسول اللہؐ کی ذات لی جائے تو شاہد سے مراد جبرائیل ؑ ہیں اور اگر شخص سے مراد عام آدمی لیا جائے تو شاہد سے مراد رسول اللہ ؐ ہیں۔یعنی یہ داعیہ فطرت ہر انسان کے تحت الشعور میں پہلے سے ہی موجود ہے کہ اس کائنات کا اور خود ہمارابھی خالق و مالک اللہ تعالیٰ ہے جس کے سوا کوئی معبود برحق نہیں ہوسکتا پھر اس داعیہ کی تائید میں خارج سے دوقوی شاہد بھی مل جائیں جن میں سے ایک تو رسول اللہؐ اور قرآن ہے اور دوسرے تورات جو آپ سے مدتوں پہلے نازل ہوئی تھی تو کیا ایسے شخص کے ایمان لانے میں کوئی چیزآڑے آسکتی ہے۔اسے فوراً اس داعیہ فطرت پر لبیک کہتے ہوئے ایمان لے آنا چاہیے اور جو پھربھی ایمان نہیں لاتااس کا علاج دوزخ کے سوا اور کیا ہوسکتاہے خواہ وہ شخص کسی بھی مذہب اور فرقہ سے تعلق رکھتاہو؟ (تیسیر القرآن)

19۔ یعنی وہ اس سیدھی راہ کو جو ان کے سامنے پیش کی جا رہی ہے پسند نہیں کرتے اور چاہتے ہیں کہ یہ راہ کچھ ان کی خواہشات نفس اور ان کے جاہلانہ تعصبات اور ان کے اوہام و تخیلات کے مطابق ٹیڑھی ہوجائے تو وہ اسے قبول کریں۔ (تفہیم القرآن)

21۔یعنی وہ سب نظریات پا در ہوا ہوگئے جو انہوں نے خدا اور کائنات اور اپنی ہستی کے متعلق گھڑ رکھے تھے، اور وہ سب بھروسے بھی جھوٹے ثابت ہوئے جو انہوں نے اپنے معبودوں اور سفارشیوں اور سرپرستوں پر رکھے تھے، اور وہ قیاسات بھی غلط نکلے جو انہوں نے زندگی بعد موت کے بارے میں قائم کیے تھے۔ (تفہیم القرآن)

22۔ لَا جَرَمَ۔ کا مفہوم عربی میں وہی ہے جو جو اردو میں لامحالہ یا "ناگزیر ہے"سے ظاہر کیا جاتاہے ۔(تفسیر ماجدی)

25۔  ۔۔وہ آنے والے خطرے کا اس طرح اعلان کرتا ہے گویا اپنی دونوں آنکھوں سے اس کو دیکھ رہا ہے۔ یہاں لفظ مبین میں ایک لطیف تلمیح بھی ہے اس کو بھی نگاہ میں رکھیے۔ عرب میں دستور رہا ہے کہ ہر قوم کے لوگ کسی بلند ٹیلہ یا پہاڑی پر دیدبان بناتے جہاں ہر وقت ایک نگران مقرر رہتا جس کا کام یہ ہوتا کہ جب وہ دیکھتا کہ کسی طرف سے حملہ آوروں کی کوئی جماعت اس کی قوم پر حملہ کیا چاہتی ہے تو وہ اپنے کپڑے پھاڑ کر ننگا ہوجاتا اور واصباحا کا نعرہ لگاتا۔ یہ پوری قوم کے لیے الارم ہوتا اور سب تلواریں سونت سونت کر مدافعت کے لیے باہر نکل آتے۔ اس کو " نذیر عریاں " کہتے تھے۔ خدا کے رسول بھی اپنی قوم کو آنے والے عذاب سے آگاہ کرنے کے لیے آئے اور انہوں نے بالکل اس طرح لوگوں کو اس سے آگاہ کیا گویا وہ عقب سے نمودار ہی ہونے والا ہے اس وجہ سے قرآن میں ان کے لیے نذیر مبین کے الفاظ استعمال ہوئے۔ (تدبرِ قرآن)

26۔قوم نوحؑ اپنے پانچ فوت شدہ بزرگوں کے مجسموں کی پجاری تھی یعنی وہ ود،سواع،یغوث،یعوق اور نسرکے مجسموں کو پوجتے تھے۔اس کی تفصیل پہلے سورۂ اعراف میں گذرچکی ہے اور سورۂ نوح میں بھی یہ ذکر آئےگا۔(تیسیر القرآن)

۔ حضرت نوح کی دعوت :  اَنْ لَّا تَعْبُدُوْٓا اِلَّا اللّٰهَ ۭ اِنِّىْٓ اَخَافُ عَلَيْكُمْ عَذَابَ يَوْمٍ اَلِيْمٍ۔ یہ حضرت نوح ؑ کی دعوت کا نقطہ آغاز ہے۔ پیچھے مڑ کر اس سورة کی آیت 3 پر نظر ڈالیں تو معلوم ہوگا کہ بعینہ اسی نقطہ سے نبی کریم ﷺ نے بھی اپنی دعوت کا آغاز فرمایا پھر مزید آگے بڑھیے تو معلوم ہوگا کہ جس قسم کا معارضہ قوم نوح نے حضرت نوح ؑ کے ساتھ کیا اسی قسم کا معارضہ نبی ﷺ کی قوم نے آپ کے ساتھ کیا۔ حالات واقعات کی یہ مطابقت ہی ہے جس کو دکھانے کے لیے یہ سرگزشتیں سنائی جا رہی ہیں کہ نبی اور اس کی قوم دونوں کے سامنے ماضی کے آئینے میں   حاضر اور مستقبل کا پورا نقشہ آجائے۔ تاریخ کی جو قدروقیمت ہے وہ اسی پہلو سے ہے۔ اگر یہ پہلو نگاہوں سے اوجھل ہوجائے تو تاریخ کی حیثیت مجرد داستان سرائی کی رہ جاتی ہے۔ (تدبرِ قرآن)

27۔ ۔لفظ " مَلَاُ " کی تحقیق ہم دوسرے مقام میں بیان کرچکے ہیں کہ اس سے مراد کسی قوم کے لیڈر، سرپنچ، زعماء اور اکابر ہوتے ہیں۔۔۔۔۔۔ قومِ نوح کے ان لیڈروں نے حضرت نوح کی دعوت کے جواب میں بیک وقت تین معارضے پیش کیے۔ایک یہ کہ مَا نَرٰىكَ اِلَّا بَشَرًا مِّثْلَنَا، یعنی تم تو ہمارے ہی جیسے انسان ہو۔ دوسرا یہ کہ وَ مَا نَرٰىكَ اتَّبَعَكَ اِلَّا الَّذِیْنَ هُمْ اَرَاذِلُنَا بَادِیَ الرَّاْیِ یعنی تمہارے پیرو ہمارے اندر کے صرف وہ لوگ بنے ہیں جو رذالے اور ادنیٰ درجہ کے لوگ ہیں۔۔۔۔۔۔۔۔ تیسرا یہ کہ وَ مَا نَرٰى لَكُمْ عَلَیْنَا مِنْ فَضْلٍ یعنی اگر تم خدا کے ایسے ہی چہیتے ہو کہ اس نے تم کو رسول بنا کر بھیجا تو چاہیے تو یہ تھا کہ تم پر اور تمہارے ساتھیوں پر ہُن برستا، تم خزانوں کے مالک ہوتے اور خدم و حشم تمہارے ہم رکاب چلتے۔۔۔(تدبرِ قرآن)

۔ ۔۔خلاصہ یہ ہے کہ غرباء و فقراء کو رذیل سمجھنا ان کی جہالت تھی، حقیقت میں رذیل تو وہ ہے جو اپنے پیدا کرنے والے اور پالنے والے مالک کو نہ پہچانے، اس کے احکام سے روگردانی کرے اسی لئے سفیان ثوری ؒ سے کسی نے پوچھا کہ کمینہ اور رذیل کون ہے ؟ تو فرمایا وہ لوگ جو بادشاہوں اور افسروں کی خوشامد میں لگے رہیں، اور ابن الاعرابی نے فرمایا وہ شخص جو اپنا دین برباد کرکے کسی دوسرے کی دنیا سنوارے، امام مالک ؒ نے فرمایا کہ کمینہ وہ شخص ہے جو صحابہ کرام کو برا کہے کیونکہ وہ پوری امت کے سب سے بڑے محسن ہیں جن کے ذریعہ دولت ایمان و شریعت ان کو پہنچی ہے۔ (معارف القرآن)

28۔مطلب یہ کہ تم نے اپنی ناشکریوں اور بداعمالیوں سے اپنی فطرت کے نور کو گل کردیا ہے جس کے باعث تمہارے اندر قبول ہدایت کی صلاحیت سرے سے باقی ہی نہیں رہ گئی ہے۔اس صورت میں میں تم پر اس ہدایت کو کس طرح چپکا دوں جو مجھے اپنے رب کی طرف سے عطاہوئی ہے اور جو اس کی رحمت کا خاص مظہر ہے؟(ترجمہ: مولانا امین احسن اصلاحیؒ)

۔ اب اس آیت میں اور آگے کی آیت میں مذکورہ بالا معارضات میں سے ایک ایک کا جواب آرہا ہے۔ حضرت نوح نے پہلی بات تو یہ فرمائی کہ میں جو کچھ تمہارے سامنے پیش کر رہا ہوں اس کی بنیاد دو چیزوں پر ہے۔ ایک تو اس نور فطرت (بینہ) پر جو میرے اندر پہلے سے موجود تھا اور دوسرے اس وحی الٰہی (رحمت) پر جس سے میرے رب نے مجھے نوازا۔۔۔ (تدبرِ قرآن)

30۔ یعنی اگر میں تمہاری نازبرداری میں اللہ پر ایمان لانےوالے ان غریبوں کو دھتکاروں تو کل کو خدا کی پکڑ سے مجھے کون بچانے والاہوگا؟۔(ترجمہ: مولانا امین احسن اصلاحیؒ)

33۔مرشد تھانویؒ نے فرمایا کہ ایسا ہی کہنا اہل حق کی شان ہے ورنہ اہل باطل کی زبان پر توبڑے بڑے دعوے رہتے ہیں کہ جومیرا مخالف ہے اس کا حال یہ کردوں گا اور وہ کردوں گا۔(تفسیر ماجدی)

35۔ انداز کلام سے ایسا محسوس ہوتا ہے کہ نبی ﷺ کی زبان سے حضرت نوح ؑ کا یہ قصہ سنتے ہوئے مخالفین نے اعتراض کیا ہوگا کہ محمد ﷺ یہ قصے بنا بنا کر اس لیے پیش کرتا ہے کہ انہیں ہم پر چسپاں کرے۔ جو چوٹیں وہ ہم پر براہ راست نہیں کرنا چاہتا ان کے لیے ایک قصہ گھڑتا ہے اور اس طرح ”در حدیث دیگراں“ کے انداز میں ہم پر چوٹ کرتا ہے۔ لہٰذا سلسلہ کلام توڑ کر ان کے اعتراض کا جواب اس فقرے میں دیا گیا۔ (تفہیم القرآن)

37۔ الْفُلْك۔ مسیحی علماء کی تحقیق کے مطابق یہ کشتی  طول میں 535 فٹ،عرض میں 87 و نصف فٹ اور بلندی میں 52و نصف فٹ ۔۔۔توریت میں ہے:۔"تو اپنے واسطے گوپھر کی لکڑی کی ایک کشتی بنا،اس کشتی میں کوٹھریاں تیار کر اور اس کے باہر اور بھیتررال لگا اور اس کو ایسی بنا کہ اس کی لمبائی تین سو ہاتھ اور اس کی چوڑائی پچاس ہاتھ اور اس کی اونچائی تیس ہاتھ کی ہو اور اس کشتی میں ایک روشندان بنا ۔اوپر سے لے کر ہاتھ بھر میں اسے تمام کر اور کشتی کے ایک طرف دروازہ بنا اور نیچے کا طبقہ اور دوسرا اور تیسرا بھی بنا۔" (پیدائش۔6: 14- 16)(تفسیر ماجدی)

۔ تورات کی تصریح کے مطابق اس کشتی کی لمبائی تین سو ہاتھ ،چوڑائی پچاس ہاتھ  اور اونچائی تیس ہاتھ تھی اور اس کے تین درجے یا منزلیں تھیں اور اس میں روشن دان اور دروازے اور کھڑکیاں اور کوٹھڑیاں تھیں اور اندر و باہر رال لگادی گئی تھی۔ گویا یہ موجودہ دور کے لحاظ سے بھی ایک درمیانے درجے کا بحری جہاز تھا جسے بنی نوع انسان کی تاریخ میں سیدنا نوحؑ نے غالباً پہلی بار بنایا تھا اور اس کے بنانے کا طریقہ اللہ تعالیٰ نے خود بذریعہ وحی سکھلایاتھا۔(تیسیر القرآن)

38۔اس کا یہ مطلب لازمی طور پر نہیں کہ خود اپنے ہاتھ سے بنانے لگے ،اپنی نگرانی میں کاریگروں سے بنوانا بھی اپنے ہی بنانے کے حکم میں داخل ہے ۔خیر وہ کشتی یا جہاز اپنے ہاتھ سے بنا ہویا اپنی نگرانی میں دوسروں سے بنوایا ہو بہرحال اس کی دلیل صریح ہے کہ حضرت نوحؑ انجینرنگ کے اس شعبہ یعنی فن جہاز سازی سے خوب واقف تھے اور یہ صاف نظر آتا ہے کہ کوئی بڑی سے بڑی بھی صناعی یا صنعت کاری مرتبہ نبوت کے منافی نہیں اور مرتبہ ولایت کے غیر منافی ہونا تو اور بھی ظاہر ہے۔۔۔۔(کہ یہ کیسے خبطی ہیں پانی کا نام نہ نشا ن اور یہ خواہ مخواہ اپنے کو اس زحمت میں ڈالے ہوئے ہیں)اور کوئی کوئی اس طرح کے فقرہ بھی کہہ گزرتا کہ واہ نبوت کرتے کرتے نجّاری بھی کرنے لگے۔یقولون لہ صرت نجارا بعدماکنت نبیاً(بیضاوی)۔۔۔۔رہایہ شبہ کہ تمسخرپیغمبری کی شان سے فروتر ہے اور تمسخر بالکل ہی سطحی ہے جواب و مقابلہ کے موقع پر اس قسم کے الفاظ کا استعمال محاورۂ قرآنی میں عام ہے۔۔۔مرشدتھانویؒ نے فرمایا کہ انتقام کے موقع پر جواب بالمثل سےکام لینا مکارم اخلاق کے منافی نہیں ۔(تفسیر ماجدی)

40۔ تَنُّوْرُ۔ اہل لغت نے یہ بھی کہا ہے کہ یہ لفظ اصلاً عربی نہیں بلکہ فارسی سے معرب ہوکر آیا ہے۔۔۔تاج العروس میں ہے کہ دیباج ۔دینار ۔سندس ۔ استبرق وغیرہ کی طرح اس باہر سے آئے ہوئے لفظ کو بھی عرب اپنا چکے ہیں۔۔۔تنورکے دوسرے معنی وہی ہیں جو اردو میں متداول ہیں، یعنی وہ تندور جس میں روٹیاں لگائی جاتی ہیں اور بہت سے مفسرین نے یہی معنی لئے ہیں۔۔۔اور یہ معنی لے کر بعض لوگوں نے مخصوص و متعین تنور مراد لیاہے ،اور بعض نے جنس تنور ،یعنی وہاں کے جتنے تنور تھے سب سے پانی ابلنا شروع ہوگیا۔۔۔یہ صراحت کہ اس چھوٹے جہاز میں پاک و ناپاک پرندے اور چارپائے اور حشرات الارض ہرقسم کے جانور آگئے تھے،صرف بائبل میں ملتی ہے،وہاں وعدۂ الٰہی بھی یہی ملتا ہے کہ سب وہ جاندار موجودات کو جنہیں میں نے بنایا زمین پر سے مٹا ڈالوں گا۔"(پیدائش7: 4)اور عمل بھی اسی وعید کے مطابق ہوا چنانچہ "سب جاندار جو زمین پر چلتے تھے،چرندے اور پرندے اور جنگلی جانور ،اور کیڑے مکوڑے جو زمین پر رینگتے تھے،اور سب انسان مرگئے،سب جن کے نتھنوں میں زندگی کا دم تھا ان میں سے جو خشکی پر رہتے تھے مرگئے ،بلکہ سب موجودات جوروئے زمین پر جان رکھتی تھیں مٹ گئیں ،انسان سے لے کر حیوان تک اور کیڑے مکوڑوں اور آسمان کے پرندوں تک وہ سب زمین سے مٹ گئیں"۔(پیدائش7: 21- 23)۔۔۔ وَ مَا اٰمَنَ مَعَهٗۤ اِلَّا قَلِیْلٌ۔ابن عباسؓ کی روایت میں تعداد 80 کی آتی ہے(قرطبی)(تفسیر ماجدی)

۔ اس سے ان مؤرخین اور علماء انساب کے نظریہ کی تردید ہوتی ہے جو تمام انسانی نسلوں کا شجرہ نسب حضرت نوح ؑ کے تین بیٹوں تک پہنچاتے ہیں۔ دراصل اسرائیلی روایات نے یہ غلط فہمی پھیلا دی ہے کہ اس طوفان سے حضرت نوح ؑ اور ان کے تین بیٹوں اور ان کی بیویوں کے سوا کوئی نہ بچا تھا (ملاحظہ ہو بائیبل کی کتاب پیدائش 6:1 و 7:7   و 1:9 و  19:9)لیکن قرآن متعدد مقامات پر اس کی تصریح کرتا ہے کہ حضرت نوح ؑ کے خاندان کے سوا ان کی قوم کی ایک معتدبہ تعداد کو بھی اگرچہ وہ تھوڑی تھی، اللہ نے طوفان سے بچا لیا تھا۔ نیز قرآن بعد کی نسلوں کو صرف نوح ؑ کی اولاد نہیں بلکہ ان سب لوگوں کو اولاد قرار دیتا ہے جنہیں اللہ تعالیٰ نے ان کے ساتھ کشتی میں بٹھایا تھا، ذُرِّیَّۃَ مَنْ حَمَلْنَا مَعَ نُوْحٍ (بنی اسرائیل آیت 3) اور مِنْ ذُرِّ یَّۃِ اٰدَمَ وَمِمَّنْ حَمَلْنَا مَعَ نُوْحٍ (مریم، آیت 58)۔ (تفہیم القرآن)

۔ مَجْرٖؔىهَا۔عربی تلفظ میں ی کی آواز صرف یاء معروف کی ہے چناچہ قرآن مجید کے قاری بھی ہرجگہ اسی قاعدہ کا لحاظ رکھتے ہیں،لیکن اس خاص موقع پر مجری کی ی کی آواز یائے مجہول کی نکلے گی اور اسے بجائے "مجریٰ"کے"مجرے"ہی بڑھاجائے گا۔(تفسیر ماجدی)

۔اس سے معلوم ہوا کہ کشتی نوح میں ساری دنیا بھر کے جانور جمع نہیں کئے گئے تھے بلکہ صرف وہ جانور جو نر و مادہ کے جوڑے سے پیدا ہوتے ہیں اور پانی میں زندہ نہیں رہ سکتے، اس لئے تمام دریائی جانور اس سے نکل گئے اور خشکی کے جانوروں میں بھی بغیر نر و مادہ کے پیدا ہونے والے حشرات الارض سب نکل گئے صرف پالتو جانور گائے، بیل بھینس، بکری وغیرہ رہ گئے۔۔۔۔۔ اس سے وہ شبہ دور ہوگیا جو سطحی نظر میں پیدا ہوسکتا ہے کہ کشتی میں اتنی وسعت کیسے ہوگئی کہ دنیا بھر کے جانور سما گئے۔ (معارف القرآن)

42۔ آخر یہ بھی تو ممکن تھا کہ یہ منظر ان کو نہ دکھایا جاتا، جس طرح دوسرے بہت سارے کفار ان کی نگاہوں سے اوجھل رہ کر ڈوبے اسی طرح یہ بھی نگاہوں سے دور کہیں کسی موج کا لقمہ بن جاتا۔ لیکن نہیں، اللہ تعالیٰ نے چاہا کہ حضرت نوح بیٹے کے ڈوبنے کا عبرت انگیز تماشا اپنی آنکھوں سے دیکھیں۔ یہ حضرت نوح ؑ کی وفاداری کا آخری امتحان تھا۔ جس سے اندازہ ہوتا ہے کہ حضرات انبیاء کیسے کیسے امتحانوں سے گزارے جاتے ہیں لیکن اللہ کی توفیق سے وہ ہر امتحان میں ثابت قدم رہتے ہیں۔ نیز اس سے یہ حقیقت بھی واضح ہوتی ہے کہ خدا کا قانون جب اتنا بےلاگ ہے نوح کا بیٹا بھی نافرمان ہو تو وہ اس کی گردن بھی عین باپ کے سامنے دبا دیتا ہے تو تابہ دیگراں چہ رسد۔ (تدبرقرآن)

44۔ الْجُوْدِیِّ کوہستان اراراط کی ایک چوٹی کا نام ہے۔اس سے طوفان کی ہولناکی کا اندازہ کیا جاسکتاہے کہ چند دنوں میں پانی کہاں سے کہاں تک پہنچ گیا۔ (تدبرقرآن)

۔ یہ طوفان جس کا ذکر یہاں کیا گیا ہے، عالمگیر طوفان تھا یا اس خاص علاقے میں آیا تھا جہاں حضرت نوح ؑ کی قوم آباد تھی ؟ یہ ایک ایسا سوال ہے جس کا فیصلہ آج تک نہیں ہوا۔ اسرائیلی روایات کی بنا پر عام خیال یہی ہے کہ یہ طوفان تمام روئے زمین پر آیا تھا (پیدائش 7: 18-24) مگر قرآن میں یہ بات کہیں نہیں کہی گئی ہے۔ قرآن کے اشارات سے یہ ضرور معلوم ہوتا ہے کہ بعد کی انسانی نسلیں انہی لوگوں کی اولاد سے ہیں جو طوفان نوح سے بچالیے گئے تھے، لیکن اس سے یہ لازم نہیں آتا کہ طوفان تمام روئے زمین پر آیا ہو، کیونکہ یہ بات اس طرح بھی صحیح ہوسکتی ہے کہ اس وقت بنی آدم کی آبادی اسی خطہ تک محدود رہی ہو جہاں طوفان آیا تھا، اور طوفان کے بعد جو نسلیں پیدا ہوئی ہوں وہ بتدریج تمام دنیا میں پھیل گئی ہوں۔ اس نظریہ کی تائید دو چیزوں سے ہوتی ہے ایک یہ کہ دجلہ وفرات کی سرزمین میں تو ایک زبردست طوفان کا ثبوت تاریخی روایات سے آثار قدیمہ سے اور طبقات الارض سے ملتا ہے۔ لیکن روئے زمین کے تمام خطوں میں ایسا کوئی ثبوت نہیں ملتا جس سے کسی عالمگیر طوفان کا یقین کیا جاسکے۔ دوسرے یہ کہ روئے زمین کی اکثر وبیشتر قوموں میں ایک طوفان عظیم کی روایات قدیم زمانے سے مشہور ہیں، حتیٰ کہ آسٹریلیا، امریکہ اور نیوگنی جیسے دور دراز علاقوں کی پرانی روایات میں بھی اس کا ذکر ملتا ہے۔ اس سے یہ نتیجہ نکالا جاسکتا ہے کہ کسی وقت ان سب قوموں کے آباؤ و اجداد ایک ہی خطہ میں آباد ہوں گے جہاں یہ طوفان آیا تھا۔ اور پھر جب ان کی نسلیں زمین کے مختلف حصوں میں پھیلیں تو یہ روایات ان کے ساتھ گئیں۔ (ملاحظہ ہو سورة اعراف 47) (تفہیم القرآن)

ـــــ ایک دفعہ عرب کے فصحا و بلغانے قرآن کی مثل پیش  کرنے کا عزم کر لیا۔ چالیس روز تک شراب و کباب سے اپنی فصاحت و بلاغت کی قوتوں کو تیز بلکہ برافروختہ کرتے رہے۔ اچانک یہ آیت ان کے کان میں پڑی تو ہتھیار ڈال دیے اور کہنے لگے ھذا الکلام لا یشبہ کلام المخلوقین۔ ابن مقفع ایک ملحد جو عہد عبا سی کا نامور عالم و ادیب تھا اس کے بارے میں مشہور ہے کہ اس کے زمانہ میں فصاحت و بلاغت میں کوئی اس کا ہم پلہ نہ تھا۔ اس نے بڑی دماغ سوزی، دیدہ ریزی اور جگر کاری سےایک سورۃ بنائی تاکہ اسے قرآن کے مقابلہ میں پیش کرے۔ ایک روز اس کا گزر ایک مکتب کے پاس سے ہوا جہاں بچے قرآن حفظ کر رہے تھے۔ کوئی بچہ یہ آیت پڑھ رہا تھا، اسے سن کر دم بخود ہو گیا۔ الٹے پاؤں واپس گھر پہنچا اور اپنی تحریر کو دھو ڈالا اور کہا کہ اس کلام کا مقابلہ ممکن نہیں۔(روح المعانی)۔(ضیاء القرآن)

ـــــ قِيلَ۔یہ ارشاد اس وقت ہو جب طوفان اپنا کام کرچکا اور منکروں کو ڈبو چکا تھا۔ تو ریت میں اس طوفان کی مدت ایک جگہ چالیس دن درج ہے ،اور ایک جگہ 5 مہینہ چالیس دن طوفان کی باڑھ زمین پر رہی"(پیدائش7: 17)اور" پانی کی باڑھ ڈیڑھ سو دن تک زمین پر رہی"۔(پیدائش7: 24)۔۔۔۔اس آیت کی معجزانہ فصاحت و بلاغت کی دادمنکرین اسلام نے بھی دی ہے ،ابن مقفع نامی ایک ملحد طبع شخص گذراہے،اس نے بہ زعم خود قرآن کا جواب لکھنا شروع کیا تھا جیسے ایک دوسرے کے جواب میں شاعر اپنا کلام پیش کرتے  ہیں،جب اس آیت پر پہنچا ،تو قلم جواب سے رُک گیا ،عاجز ہوکر بولا کہ اس کلام کا جواب بشر کی طاقت سے باہر ہے۔(بحر) (تفسیر ماجدی)

۔  سیلاب کے اترنے کے متعلق تورات میں ہے:سمندر کے سوتے اور آسمان کے دریچے بند کیے گئے اور آسمان سے جو بارش ہو رہی تھی تھم گئی اور پانی زمین پر سے گھٹتے گھٹتے ایک سو پچاس دن کے بعد کم ہوا اور ساتویں مہینے کی سترہویں تاریخ کو کشتی اراراط کے پہاڑوں پر ٹک گئی اور پانی دسویں مہینے تک برابر گھٹتا رہا اور دسویں مہینے کی پہلی تاریخ کو پہاڑوں کی چوٹیاں نظر آئیں ۔(پیدائش باب 8، آیت 2 تا 5) (ضیاء القرآن)

45۔ یہ دعا حضرت نوح نے اس وقت فرمائی ہے جب بیٹے کو ڈوبتے دیکھا اس وجہ سے بظاہر اس کا حوالہ آیت 43 کے ساتھ آنا تھا لیکن بلاغت کلام کے اقتضا سے اس کا ذکر مؤخر ہوگیا۔ گویا خدا کی نگاہوں میں یہ شخص، حضرت نوح کا بیٹا ہونے کے باوجود ایسا نابکار تھا کہ جب تک خدا نے اس کو غرق نہیں کرلیا۔ اس کے باب میں حضرت نوح کی دعا کو زیر بحث لانا بھی پسند نہیں فرمایا۔ اس غضب کی وجہ ظاہر کہ اس دنیا میں اگر کسی انسان کو سب سے بڑی سعادت اور خوش بختی حاصل ہوسکتی ہے تو وہ یہی ہوسکتی ہے کہ اللہ تعالی اس کو کسی پیغمبر کے گھر میں جنم دے لیکن یہی خوش بختی سب سے بڑی بد بختی بھی ہو سکتی ہے اگر وہ اس کی قدر نہ کرے اور ولی کے گھر میں شیطان بن کر اٹھے۔ چنانچہ کلام کی ترتیب ہی سے یہ بات صاف عیاں ہے کہ اس شخص کو خدا نے سب سے زیادہ مبغوض قرار دیا۔ گویا سارے طوفان کا اصلی ہدف تھا ہی یہی کہ جب یہ ڈوب گیا تو معاً طوفان کے خاتمہ کا اعلان ہوگیا۔(تدبرقرآن)

ـــــ ص 365 (جلد دوم)پر۔۔۔۔۔اگر کوئی نعمتِ ایمان سے محروم ہے تو اس کو کسی بزرگ کا بیٹا ہونا کوئی فائدہ نہ دے گا خواہ وہ باپ نوحؑ جیسا عظیم المرتبت نبی ہو۔۔۔۔اس غلط نظریہ نے ان شریف خاندانوں کو جتنا نقصان پہنچایا ہے شاید ہی کسی اور حادثہ نے پہنچایا ہو۔(ضیاء القرآن)

46۔ (ہمارے علم ازلی میں)اہل سے مراد وہی اہل ایمان گھر والے ہیں جن کیلئے نجات کا وعدہ ہوچکا تھا۔اور یہیں سے علماء محققین نے یہ نکالا ہے کہ شریعت میں معتبر قرابتِ ایمانی ہے نہ کہ قرابتِ نسبی۔۔۔(اور آئندہ پھر کبھی ایسی ہی درخواست پیش کرنے لگو۔)منشائے خداوندی یہ معلوم ہوتاہے کہ اے نوحؑ ہماراوعدۂ نجات جو تمہارے گھروالوں کیلئے تھا،وہ اِلَّا مَنْ سَبَقَ عَلَیْهِ الْقَوْلُ کے ساتھ مقید تھااور اس کے مصداق کو عمداً مبہم و غیر متعین رکھا گیا تھا،سوتمہارایہ فرزند اسی استثناء کے تحت میں آجاتاہے ایسے مشتبہ اشخاص کے حق میں دعاکرنے سے احتیاط مناسب تھی ۔(تفسیر ماجدی)

46۔ نبی کا گھرانہ ایمان و عملِ صالح سے بنتاہے۔(تدبر قرآن)

ـــــ آج کل جو وطنی،لسانی یا لونی بنیادوں پر قومیت کی تعمیر کی جاتی ہے، عرب برادری ایک قوم، ہندی، سندھی دوسری قوم قرار دی جاتی ہے۔یہ قرآن و سنت کے خلاف اور رسولِ کریمؐ کے اصولِ سیاست سے بغاوت کے مترادف ہے۔

؎ یوں تو سید بھی ہو مرزا بھی ہو افغان بھی ہو

   تم سبھی کچھ ہو، بتاؤ تو مسلمان بھی ہو؟                                                                                 (علامہ اقبال)          

48۔ اهْبِطْ۔ جہاز سے کوہ جودی پر اترنے کا حکم تو اوپر مل چکا تھا اب حکم ہورہاہے کہ پہاڑ سے زمین پر اترو۔(روح )۔۔۔آیت میں مِنَّا کا اضافہ حضرت نوحؑ کے مرتبہ عرفان و صدیقیت کے لحاظ سے ہے۔ اُمَم۔تقدیر کلام یوں سمجھی گئی ہےواُمَمٌ مِنھُم اور مفسرین محققین نے لکھا ہے کہ آیت کے دونوں مکررات میں ایک طرف مؤمنین قیامت تک کیلئےاور دوسری طرف کفار قیامت تک کیلئے شامل ہوگئے ایک کیلئے سلامتی کا وعدہ اور دوسرے کیلئے عذاب کی وعید۔(تفسیر ماجدی)

49۔ فخر المفسرین امام رازی ؒ نے آیت کے تحت میں اپنی سیاحت  ہند کا ذکر کیاہے، اور اپنا مشاہدہ درج کیاہے کہ وجود باری کے منکر مشرکین ہند بھی نہ تھے،صرف اس کی توحید کے منکر تھے اور بت پرستی میں مبتلا۔۔۔یہی بیماری پہلے بھی تھی ،اوریہی آج بھی ہے، کاش کوئی صاحب ذرا تلاش کرکے اس کا پتہ لگاتے کہ امام موصوف ہندوستان میں کب آئے تھے، اور کہاں کہاں کی سیاحت کی تھی کس کس کی عملداری دیکھی ۔کل کتنے دن رہے تھے ۔وقس علیٰ ہذا۔یہ خدمت دین کی نہیں تو ایک بڑے خادم دین کی ضرور ہوجاتی۔امام کی وفات 606ہجری میں ہوئی تھی اور ہندوستان غوریوں کے قبضہ میں 558ہجری میں آیا ہے،امام نے اگر سیاحت ہند اپنی عمر کے اخیر حصوں میں کیا ہے۔یہاں غوریوں ہی کی حکومت ہوگی۔(تفسیر ماجدی)

ــــکیا نوحؑ کے آدمؑ ثانی ہونے کا نظریہ درست ہے؟:۔ اور دوسری قابل تحقیق بات یہ ہے کہ طوفان نوح کے بعد نسل انسانی صرف نوحؑ کی اولاد سے ہی پھیلی تھی یا یہ ان تمام لوگوں کی اولاد سے ہے جو کشتی میں سوار تھے؟عام مورخین کا خیال ہے کہ اس طوفان کے بعد صرف نوحؑ کے تین بیٹوں حام،سام،یافث سے ہی پھیلی ہے اور اس خیال کی تائید قرآن کریم کی اس آیت سے بھی ہوجاتی ہے۔"وَ جَعَلْنَا ذُرِّیَّتَهٗ هُمُ الْبٰقِیْنَ"(37، 77)اور ہم نے دنیا میں نوح کی اولاد کو ہی باقی رکھا )  اسی لحاظ سے نوح ؑ کو آدم ثانی بھی کہا جاتاہے۔لیکن قرآن کریم کی ہی دوآیات ایسی ہیں جن سے پتہ چلتاہےہے کہ طوفان نوح کے بعد نسل انسانی ان تمام لوگوں کی اولاد سے چلی جو اس کشتی میں سوار تھے مثلاً(1)"ذُرِّیَّةَ مَنْ حَمَلْنَا مَعَ نُوْحٍ"(17: 3)تم ان لوگوں کی اولاد ہو جنہیں ہم نے نوحؑ کے ساتھ  سوار کرلیا تھا۔اور(2)"مِنْ ذُرِّیَّةِ اٰدَمَۗ-وَ مِمَّنْ حَمَلْنَا مَعَ نُوْحٍ"(19: 58)آدم کی اولاد سے اور ان لوگوں کی اولاد سے جنہیں ہم نے نوحؑ کے ساتھ سوار کرلیا تھا۔اس دوسری آیت سے ضمناً یہ بھی معلوم ہوتاہے کہ طوفان نوح پوری دنیا پر نہیں آیاتھا۔واللہ اعلم بالصواب۔زیادہ قرین قیاس بات یہی ہے کہ اس طوفان کے بعد نسل انسانی ان تمام لوگوں سے چلی جو کشتی میں سوار تھے۔(تیسیر القرآن)

52۔ توبہ کی دعوت اور اس کی برکات :  یہ قوم کو توبہ کی دعوت ہے کہ شرک اور نافرمانی سے تائب ہو کر خالص اپنے رب سے اپنے تعلق کو استوار کرو ہم دوسرے مقام میں واضح کرچکے ہیں کہ توبہ کے دو رکن ہیں۔ ایک منفی دوسرا مثبت۔ منفی تو یہ ہے کہ آدمی نے جو غلط عقائد و اعمال اختیار کر رکھے ہیں ان سے دست بردار ہو، مثبت یہ ہے کہ ان کی جگہ صحیح عقائد و اعمال اختیار کرے۔ پہلے کے لیے استغفار کا لفظ ہے۔ جس کا مفہوم یہ ہے کہ بندہ اپنے رب سے ملتجی ہو کہ وہ اس کے گناہوں سے درگزر فرمائے اور ان پر اپنے عفو و کرم کا پردہ ڈالے۔ دوسرے کے لیے توبہ کا لفظ ہے جس کے معنی رجوع کرنے کے ہیں۔ یعنی بندہ زندگی کی اس صراط مستقیم کی طرف رجوع کرے جو خدا نے اس کو بتائی ہے اور جو اس کو خدا تک پہنچانے والی ہے۔ ان میں سے پہلے کی بنیاد خشیت پر ہے اور دوسرے کی محبت پر، پھر شعور اور احساس ان کا لازمی جزو ہے۔ جب تک یہ تمام عناصر جمع نہ ہوں۔ مجرد، توبہ توبہ، یا استغفر اللہ، کے ورد سے وہ توبہ وجود میں نہیں آتی جو خدا کے ہاں قبولیت کا درجہ پائے  یُرْسِلِ السَّمَآءَ عَلَیْكُمْ مِّدْرَارًا وَّ یَزِدْكُمْ قُوَّةً اِلٰى قُوَّتِكُمْ۔ خوب خوب بارش برسانا رزق و فضل میں زیادتی کی تعبیر ہے۔ وَ یَزِدْكُمْ قُوَّةً اِلٰى قُوَّتِكُمْ سے سیاسی قوت و شوکت میں اضافہ کی طرف اشارہ ہے۔ یہ اجتماعی توبہ کی برکتیں بیان ہوئی ہیں۔ مطلب یہ کہ یہ خیال نہ کرو کہ آسمان سے بارش تمہارے دیوتا برساتے ہیں اور میدان جنگ میں فتح تمہیں وہ دلاتے ہیں اس وجہ سے اگر تم نے ان کو چھوڑ دیا تو رزق سے بھی محروم ہوجاؤ گے اور تمہاری سیاسی جمعیت بھی پارہ پارہ ہوجائے گی۔ تمہارے یہ خیالات بالکل وہم پر مبنی ہیں۔ ۔ (تدبرِ قرآن)

55۔ اعلان براءت کے ساتھ یہ چیلنج ہے کہ اگر تمہارا گمان یہ ہے کہ تمہارے یہ معبود مجھے کوئی ضرر پہنچا سکتے ہیں تو تم اور تمہارے یہ سارے معبود مل کر میرے ساتھ جو داؤ گھات کرنا چاہتے ہو کر ڈالو اور پھر مجھے ذرا مہلت نہ دو۔ یعنی اپنے ترکش کے آخری تیر بھی آزما دیکھو کہ دل میں کوئی ارمان باقی نہ رہ جائے۔ (تدبرِ قرآن)

56۔ یہ ہے مومن و موحد کی وہ ڈھال جس کے بل پر حضرت ہود نے مذکورہ بالا چیلنج دیا۔ فرمایا کہ میرا بھروسہ اللہ پر ہے جو میرا رب بھی ہے۔ (تدبرِ قرآن)

61۔ ۔۔۔ مندرجہ بالا مفہوم کے لحاظ سے اس جملہ میں قریب اور مجیب دونوں اللہ تعالیٰ کی الگ الگ صفات ہیں لیکن بعض لوگوں نے قریب کو بھی مجیب کی صفت قراردیا ہے ۔اس صورت میں ترجمہ یہ ہوگا:"بلاشبہ میرا پروردگار جلد ہی (دعائیں )قبول کرنے والا ہے"(تیسیر القرآن)

۔۔۔ عاد کے بعد عرب کی قدیم اقوام میں ثمود نے اپنی تمدنی و تعمیری ترقیوں کے اعتبار سے بڑی شہرت حاصل کی۔ اعراف 74 کے تحت ان کی تعمیری ترقیوں کا ذکر گزر چکا ہے۔۔۔۔۔۔۔تم کو تعمیر و تمدن میں جو ترقی نصیب ہوئی ہے تو یہ بھی خدا ہی کا عطیہ ہے۔ (تدبرِ قرآن)

62۔ ۔۔انبیاء کی قوموں کا معاملہ بالعموم اس کے برعکس رہا ہے۔ جس شخص کو وہ زندگی بھر صادق اور امین مانتے رہے جو نہی اس نے اپنی نبوت کا اظہار کیا اس کو کذاب اور مفتری کہنے لگے۔۔ (تدبرِ قرآن)

 ـــیعنی تمہیں عقل مند ،ہونہار اور دیانتدار سمجھ کر ہم نے تم سے اپنی بہت سی توقعات وابستہ کررکھی تھیں کہ تم باپ دادا کا نام روشن کروگے تم نے تو باپ دادا کے دین سے کنارہ کشی اختیار کرلی ہے ۔بلکہ ہمیں بھی اس سے روک رہے ہو۔جس کا مطلب یہ ہے کہ ہم اور ہمارے آباو اجداد سب کے سب غلط کارہیں۔)تیسیر القرآن(

64۔ نَاقَةُ اللّٰهِ۔اضافت تعظیم و احترام کیلئے جیسے بیت اللہ،کعبۃ اللہ وغیرہ میں۔)تفسیر ماجدی(

66۔جزیرہ نمائے سینا میں جو روایات مشہور ہیں ان سے معلوم ہوتا ہے کہ جب ثمود پر عذاب آیا تو حضرت صالح ؑ ہجرت کر کے وہاں سے چلے گئے تھے۔ چنانچہ حضرت موسیٰ ؑ والے پہاڑ کے قریب ہی ایک پہاڑی کا نام نبی صالح ہے اور کہا جاتا ہے کہ یہی جگہ آنجناب کی جائے قیام تھی۔ (تفہیم القرآن)

67۔ اس قوم پر اللہ تعالیٰ نے سرما کی بادِ صر صر اور کڑک دمک، اولے اور زلزلے کا عذاب بھیجا۔ (تدبرِ قرآن)

69۔حضرت ابراہیم ؑ وہ   پہلے  انسان ہیں جنہوں نے دنیا میں مہان نوازی کی رسم جاری فرمائی (قرطبی) ان کا معمول یہ تھا کہ کبھی تنہا کھانا نہ کھاتے بلکہ ہر کھانے کے وقت تلاش کرتے تھے کہ کوئی مہمان آجائے تو اس کے ساتھ کھائیں۔۔۔۔۔۔۔۔قرطبی نے بعض اسرائیلی روایات سے نقل کیا ہے کہ ایک روز کھانے کے وقت حضرت ابراہیم ؑ نے مہمان کی تلاش شروع کی تو ایک اجنبی آدمی ملا جب وہ کھانے پر بیٹھا تو ابراہیم ؑ نے فرمایا کہ بسم اللہ کہو، اس نے کہا کہ میں جانتا نہیں اللہ کون اور کیا ہے ؟ ابراہیم ؑ نے اس کو دسترخوان سے اٹھا دیا، جب وہ باہر چلا گیا تو جبریل امین آئے اور کہا کہ اللہ تعالیٰ فرماتے ہیں کہ ہم نے تو  کفر کے باوجود ساری عمر اس کو رزق دیا اور آپ نے ایک لقمہ دینے میں بھی بخل کیا، یہ سنتے ہی ابراہیم ؑ اس کے پیچھے دوڑے اور اس کو واپس بلایا، اس نے کہا کہ جب تک آپ اس کی وجہ نہ بتلائیں کہ پہلے کیوں مجھے نکالا تھا اور اب پھر کیوں بلا رہے ہیں میں اس وقت تک آپ کے ساتھ نہ جاؤں گا۔۔۔۔۔۔۔۔حضرت ابراہیم ؑ نے واقعہ بتلا دیا تو یہی واقعہ اس کے مسلمان ہونے کا سبب بن گیا، اس نے کہا کہ وہ رب جس نے یہ حکم بھیجا ہے بڑا کریم ہے میں اس پر ایمان لاتا ہوں، پھر حضرت ابراہیم ؑ کے ساتھ گیا اور مومن ہو کر باقاعدہ بسم اللہ پڑھ کر کھانا کھایا۔ (معارف القرآن)

۔ یہ ضیافت نہایت فیاضانہ تھی کہ تین آدمیوں کی میزبانی کے لیے حضرت ابراہیم نے گلے کا ایک بچھڑا ذبح کرادیا۔ ان کی اس فیاضی کو نمایاں کرنے کے لیے گوشت کے بجائے بچھڑے کا ذکر فرمایا۔ (تدبرِ قرآن)

70۔ فَلَمَّا رَاٰۤ اَیْدِیَهُمْ لَا تَصِلُ اِلَیْهِ ۔ توریت موجود ہ میں یہ فقرہ کہ "انہوں نے کھایا"قطعاً ایک ایجاد بندہ ہے اور قرآن مجید کو اسی بیان کی تردید کیلئے یہ تصریح کرنی پڑی ۔)تفسیر ماجدی(

۔ اس انداز کلام سے صاف ظاہر ہوتا ہے کہ کھانے کی طرف ان کے ہاتھ نہ بڑھنے سے ہی حضرت ابراہیم ؑ تاڑ گئے تھے کہ یہ فرشتے ہیں۔ اور چونکہ فرشتوں کا علانیہ انسانی شکل میں آنا غیر معمولی حالات ہی میں ہوا کرتا ہے اس لیے حضرت ابراہیم ؑ کو خوف جس بات پر ہوا وہ دراصل یہ تھی کہ کہیں آپ کے گھر والوں سے یا آپ کی بستی کے لوگوں سے یا خود آپ سے کوئی ایسا قصور تو نہیں ہوگیا ہے جس پر گرفت کے لیے فرشتے اس صورت میں بھیجے گئے ہیں۔ اگر بات وہ ہوتی جو بعض مفسرین نے سمجھی ہے تو فرشتے یوں کہتے کہ ”ڈرو نہیں ہم تمہارے رب کے بھیجے ہوئے فرشتے ہیں“۔ لیکن جب انہوں نے آپ کا خوف دور کرنے کے لیے کہا کہ ”ہم تو قوم لوط کی طرف بھیجے گئے ہیں“ تو اس سے معلوم ہوا کہ ان کا فرشتہ ہونا تو حضرت ابراہیم ؑ جان گئے تھے، البتہ پریشانی اس بات کی تھی کہ یہ حضرات اس فتنے اور آزمائش کی شکل میں جو تشریف لائے ہیں تو آخر وہ بدنصیب کون ہے جس کی شامت آنے والی ہے۔ (تفہیم القرآن)

71۔ امْرَاَتُهٗ۔مراد حضرت ابراہیمؑ کی زوجۂ اُولیٰ حضرت سارہؑ ہیں۔مفسرتھانویؒ نے فرمایا کہ ظاہراً حضرت سارہؑ پہلے اس جگہ نہ تھیں شاید وہ پردہ میں ہوں پھر جب معلوم ہوگیا کہ فرشتے ہیں ان سے کیا پردہ سامنے چلی آئیں ،جیساکہ ایک دوسری جگہ قرآن کے لفظ فاقبلت سے معلوم ہوتاہے۔)تفسیر ماجدی(

72۔محاورہ سے مقصود اظہار حیرت تو ظاہرہی ہے ۔ساتھ ہی ایک ہلکاسا پہلو ذم کا بھی اپنے متعلق سے نکلتاہے زیادہ سن میں عورت کے اولاد ہونے سے اس کو طبعی طورپر شرمندگی بھی ہوتی ہے۔)تفسیر ماجدی(

۔ بائیبل سے معلوم ہوتا ہے کہ حضرت ابراہیم ؑ کی عمر اس وقت 100 برس اور حضرت سارہ کی عمر 90 برس کی تھی۔ (تفہیم القرآن)

73۔ اھل البیت۔اس آیت نے اسے صاف کردیا کہ پیمبرؑ کے زوج پر"اہل بیت" کا اطلاق تو بہرحال ہوتاہےبلکہ اہل بیت نبوی کا مفہوم اول توازواج نبی ہی ہوتے ہیں۔(جصاص))تفسیر ماجدی(

74۔جھگڑے " کا لفظ اس موقع پر اس انتہائی محبت اور ناز کے تعلق کو ظاہر کرتا ہے جو حضرت ابراہیم ؑ اپنے خدا کے ساتھ رکھتے تھے۔ (تفہیم القرآن)

76۔ پچھلی تاریخ کے یہ واقعات یہاں بیان کیے جا رہے ہیں۔ اس کی مناسبت سمجھنے کے لیے حسب ذیل دو باتوں کو پیش نظر رکھیے۔ (1) مخاطب قریش کے لوگ ہیں جو حضرات ابراہیم ؑ کی اولاد ہونے کی وجہ ہی سے تمام عرب کے پیرزادے، کعبۃ اللہ کے مجاور اور مذہبی و اخلاقی اور سیاسی و تمدنی پیشوائی کے مالک بنے ہوئے ہیں اور اس گھمنڈ میں مبتلا ہیں کہ ہم پر خدا کا غضب کیسے نازل ہوسکتا ہے۔(2) اس تقریر میں یہ بات بھی قریش کے ذہن نشین کرنی مقصود ہے کہ اللہ تعالیٰ کا وہ قانون مکافات جس سے لوگ بالکل بےخوف اور مطمئن بیٹھے ہوئے تھے، کس طرح تاریخ کے دوران میں تسلسل اور باقاعدگی کے ساتھ ظاہر ہوتا رہا ہے اور خود ان کے گردوپیش اس کے کیسے کھلے کھلے آثار موجود ہیں۔ (تفہیم القرآن)

77۔حضرت لوطؑ نے فرشتوں کی آمد سے اندازہ لگالیا کہ یہ عذاب کے فرشتے ہیں اور اب قوم کے لیے دعا و سفارش کا وقت گزرچکا ہے۔(ترجمہ: مولانا امین احسن اصلاحیؒ) 

78۔ پہلے مرحلے میں حضرت لوطؑ کو یہ معلوم نہ تھا کہ ان کے مہمان حقیقت میں فرشتے ہیں۔ ان کی پریشانی کی وجہ یہ تھی کہ فرشتے خوبرو نوجوانوں کی شکل میں آئے جو گویا شہر کے سارے غنڈوں کو دعوت دینے کے ہم معنی تھا۔ حضرت لوطؑ کا یہ اندیشہ صحیح ثابت ہوا ۔ فرشتوں کا اس شکل میں آنا قوم پر اتمام حجت کے لیے تھا۔(ترجمہ: مولانا امین احسن اصلاحیؒ)

 ۔ ہوسکتا ہے کہ حضرت لوط کا اشارہ قوم کی لڑکیوں کی طرف ہو، کیونکہ نبی اپنی قوم کے لیے بمنزلہ باپ ہوتا ہے اور قوم کی لڑکیاں اس کی نگاہ میں اپنی بیٹیوں کی طرح ہوتی ہیں، اور یہ بھی ہوسکتا ہے کہ آپ کا اشارہ خود اپنی صاحبزادی کی طرف ہو، بہرحال دونوں صورتوں میں یہ گمان کرنے کی کوئی وجہ نہیں ہے کہ حضرت لوط نے ان سے زنا کرنے کے لیے کہا ہوگا، یہ تمہارے لیے پاکیزہ تر ہیں، کا فقرہ ایسا غلط مفہوم لینے کی کوئی گنجائش نہیں چھوڑتا۔ حضرت لوط کا منشا صاف طور پر یہ تھا کہ اپنی شہوت نفس کو اس فطری اور جائز طریقے سے پورا کرو جو اللہ نے مقرر کیا ہے اور اس کے لیے عورتوں کی کمی نہیں ہے۔ (تفہیم القرآن)

83۔ اس آیت کے دومطلب ہوسکتے ہیں اور دونوں ہی درست ہیں۔ایک کی تو ترجمہ میں ہی قوسین کے ذریعے وضاحت کردی گئی ہے اس صورت میں خطہ سے مراد قوم لوط کا تباہ شدہ خطہ اور ظالموں سے مراد دور نبوی کے منکرین حق ہیں یعنی یہ برباد شدہ علاقہ ان ظالموں سے کچھ دور نہیں یہ سب کچھ وہ بچشم خود ملاحظہ کرسکتے ہیں اور دوسرا مطلب یہ ہے کہ ایسا عذاب کچھ قوم لوطؑ سے ہی مخصوص نہیں بلکہ ظالموں اور منکرین حق اور بدکرداروں کو آج بھی ایسا عذاب دینے پر اللہ تعالی پوری قدرت رکھتاہےاور یہ کوئی بعید از عقل بات نہیں۔)تیسیر القرآن(

84۔ناپ تول میں کمی  ۔۔۔۔اس فن میں ایک سے بڑھ کر ایک ماہر ان میں پیدا ہونے لگا اور کسی کے اندر اس امر کا احساس بھی باقی نہیں رہاکہ یہ ترقی و کامرانی کی راہ نہیں بلکہ فساد فی الارض  کی راہ ہے۔(تدبر قرآن)

ــــ شرک اُم الامراض ہے:۔  سیدنا شعیبؑ کا قصہ بھی سورۂ الاعراف کی آیت نمبر 84تا 95 میں گزرچکا ہے۔لہذا وہ حواشی بھی پیش نظر رکھنے چاہئیں۔شرک ایسی بیماری ہےجو تقریباً ہر قوم میں پائی جاتی ہے اور بالخصوص ان اقوام میں ضرور موجود تھی جن کی طرف انبیاء مبعوث ہوتے رہے باقی تمام اخلاقی ،معاشرتی بیماریاں اور برائیاں اسی شرک سے ہی پھوٹتی ہیں گویا جس طرح جسمانی بیماریوں میں قبض کو ام الامراض قراردیا گیاہے اسی طرح روحانی بیماریوں میں شرک ام الامراض ہے۔)تیسیر القرآن(

۔ اس میں حضرت شعیب ؑ نے پہلے تو اپنی قوم کو توحید کی دعوت دی کیونکہ یہ لوگ مشرک تھے، درختوں کی پوجا پاٹ کیا کرتے تھے، جس کو قرآن میں لفظ ایکہ سے تعبیر کیا گیا ہے اور اسی کی نسبت سے اہل مدین کو اصحب الایکہ کا بھی لقب دیا گیا ہے، اس کفر و شرک کے ساتھ ان میں ایک اور عیب و گناہ نہایت سخت یہ تھا کہ بیو پار اور لین دین کے وقت ناپ تول میں کمی کرکے لوگوں کا حق مار لیتے تھے، حضرت شعیب ؑ نے ان کو اس سے منع فرمایا۔۔۔۔ فائدہ: یہاں یہ بات خاص طور سے قابل غور ہے کہ کفر و شرک سب گناہوں کی جڑ ہے جو قوم اس میں مبتلا ہے اس کو پہلے ایمان ہی کی دعوت دی جاتی ہے، ایمان سے پہلے دوسرے معاملات اور اعمال پر توجہ نہیں دی جاتی، دنیا میں ان کی نجات یا عذاب بھی اسی ایمان و کفر کی بنیاد پر ہوتا ہے، تمام انبیاء سابقین اور ان کی قوموں کے واقعات جو قرآن میں مذکور ہیں اسی طرز عمل کے شاہد ہیں، صرف دو قومیں ایسی ہیں جن پر عذاب نازل ہونے میں کفر کے ساتھ ان کے اعمال خبیثہ کو بھی دخل رہا ہے، ایک لوط ؑ کی قوم، جس کا ذکر اس سے پہلے آچکا ہے کہ ان پر جو عذاب پوری بستی الٹ دینے کا واقع ہوا اس کا سبب ان کے عمل خبیث کو بتلایا گیا ہے، دوسری قوم شعیب ؑ کی ہے جن کے عذاب کا سبب کفر و شرک کے علاوہ ناپ تول میں کمی کرنے کو بھی قرار دیا گیا ہے۔ (معارف القرآن)

86۔ بقیّۃ اللہ سے مراد جائز منافع(بچت)ہے۔اگر ایک تاجر ناپ تول میں ٹھیک ٹھیک عدل کوملحوظ رکھے،جھوٹ،فریب،ملاوٹ اور اس قسم کے دوسرے ہتھکنڈوں سے بچے ،دوسروں کی ریس میں غلط راستے اختیار نہ کرے تو گو وہ اتنا زیادہ منافع نہ لوٹ سکے جتنا دوسروں نے جنہوں نے حرام و حلال کی تمیز اٹھا دی لوٹا ہو لیکن اس کا حاصل کیا ہوا نفع بقیۃ اللہ کی حیثیت رکھتا ہے اور وہ قلیل بھی ہو تو دوسروں کے کثیر سے ہزار درجہ افضل ہے اس لیے کہ اس میں دنیا اور آخرت دونوں میں برکت ہوگی۔۔۔۔(تدبرقرآن)

87۔ یہ اسلام کے مقابلے میں جاہلیت کے نظریہ کی پوری ترجمانی ہے۔اسلام کا نقطۂ نظر یہ ہے کہ اللہ کی بندگی کے سوا جو طریقہ بھی ہے غلط ہے اور اس کی پیروی نہ کرنی چاہئے کیونکہ دوسرے کسی طریقہ عقل ، علم اور کتب آسمانی میں کوئی دلیل نہیں اور یہ کہ اللہ کی بندگی صرف ایک محدود مذہبی دائرے ہی میں نہیں ہونی چاہئے بلکہ تمدن، معاشرت،معیشت،سیاست غرض زندگی کے تمام شعبوں میں ہونی چاہئے۔۔۔۔زندگی کو مذہبی اور دنیاوی دائروں میں الگ الگ تقسیم کرنے کا تخیل آج کوئی نیا تخیل نہیں ہے بلکہ آج سے تین ساڑھے تین ہزار برس پہلے حضرت شعیبؑ کی قوم کو بھی اس تقسم پر ویسا ہی اصرار تھا جیسا آج اہلِ مغرب اور اُن کے مشرقی شاگردوں کو ہے۔ یہ فی الحقیقت کوئی نئی ”روشنی“ نہیں ہے جو انسان کو آج ”ذہنی ارتقاء“ کی بدولت نصیب ہو گئی ہو۔ بلکہ یہ وہی پرانی تاریک خیالی ہے جو ہزار ہا برس پہلے کی جاہلیت میں بھی اسی شان سے پائی جاتی تھی۔ اور اس کے خلاف اسلام کی کش مکش بھی آج کی نہیں ہے، بہت قدیم ہے۔ (تفہیم القرآن)

ـــــ لادینیت محض دین سے انکار کا نام نہیں بلکہ دین کو دنیاوی معاملات سے نکال دینے کا نام ہے اور بدنصیبی کی بات یہ ہے کہ بہت سے خود ساختہ اور بہ خود غلط نیم ملاؤں نے اسے دل و جان سے قبول کرلیا ہے۔ہمارے ہاں اسلامی بھکشوؤں کا ایک گروہ  موجود ہے جو اس لادینیت کو ہی عین دین سمجھتاہے اور اس نے تبلیغ و جہاد کا راستہ مؤثر انداز میں روک رکھاہے۔۔۔۔۔ص۔272تا 273 ۔۔۔۔بہت مؤثر خطاب ۔(انوار القرآن)

88ــــ رزق حسن سے مراد وحی الٰہی ہے۔جس طرح مادی رزق انسان کی مادی زندگی کی بقاکے لیے ضروری ہے اسی طرح وحی الٰہی اس کی روحانی زندگی کے لیے ضروری ہے۔(ترجمہ: مولانا امین احسن اصلاحیؒ)

89۔ حضرت عمر بن عبدالعزیز کی خلافت کے زمانہ میں ایک شخص کو اس جرم میں گرفتار کیا گیا کہ وہ درہم کو کاٹ رہا تھا، موصوف نے اس کو کوڑوں کی سزا دی اور سر مونڈھوا کر شہر میں گشت کرایا۔ (تفسیر قرطبی)۔ (معارف القرآن)

90۔یہ حقیقت پیشِ نظر رہے کہ توبہ کے دوبنیادی رکن ہیں۔ ایک استغفار ، دوسرا اصلاح۔یعنی اپنے رب سے اپنے جرائم کی معافی بھی مانگے اور صحیح راہ اختیار کرکے عملاً اپنے رویہ کی اصلاح کا ثبوت بھی دے۔ اس کے بغیر کوئی توبہ اللہ کے ہاں درخورِ قبول نہیں ہوگی۔(تدبرقرآن)

94۔اہل مدین پر عذاب کی نوعیت:۔یہاں قوم شعیب کا چنگھاڑ (فرشتہ کی چیخ)سے ہلاک ہونا مذکور ہے اور اعراف میں زلزلہ کا ذکر ہواہے اور سورۂ شعراء میں عذاب یوم الظلۃ کا ذکر ہے یعنی عذاب کے بادل سائبان کی طرح ان پر محیط ہوگئے تھےگویا اس قوم پر تینوں قسم کا عذاب آیا ہے اور قرآن نے ہرمقام پر صرف اس عذاب کا ذکر فرمایا جیساکہ مضمون چل رہاتھا مثلاً اس سورۂ میں قوم کا لہجہ تلخ اور باتیں گستاخانہ تھیں جو سنگسار کرنے کی دھمکی دے رہے تھے تو یہاں سخت قسم کے جگر خراش عذاب یعنی چنگھاڑ کا ذکر فرمایا ۔سورۂ اعراف میں یہ ذکر تھا کہ قوم نے دھمکی دی تھی کہ ہم تمہیں اور تمہارے ساتھیوں کو اس سرزمین سے نکال دیں گے تو وہ خود اسی سرزمین کے زلزلے سے ہلاک ہوئے تھے اور سورۂ شعراء میں یہ مضمون ہے کہ قوم نے شعیبؑ سے کہا :"اگر تم سچے ہو تو ہم پر آسمان کا کوئی ٹکڑا گرادو"اسی مناسبت سے وہاں عذاب کے بادلوں کا ذکر فرمایا اور یہ ممکن ہے کہ ہرمقام پر عذاب کی مختلف اوقات کی کیفیت  مذکور ہو۔)تیسیر القرآن(

96۔ سلطان مبین۔عام مفسرین کا خیال ہے کہ اس سے اشارہ عصائے موسوی کی جانب ہے اور اسے اس کے امتیاز خصوصی کی بناپر دوسرے خوارق (باٰیتنا)سے الگ کرکے بیان کیا ہے۔)تفسیر ماجدی(

98۔ اسی مضمون کی ترجمانی نبی ﷺ کے اس ارشاد میں پائی جاتی ہے کہ امرا ؤ القیس حامل لوا ء شعر ا ء الجا ھلیۃ الی النار، یعنی” قیامت کے روز جاہلیت کی شاعری کا جھنڈا امرا ؤ القیس کے ہاتھ میں ہو گا اور عرب جاہلیت کے تمام شعراء اسی کی پیشوائی میں دوزخ کی راہ لیں گے“۔ (تفہیم القرآن)

100۔ مِنْهَا قَاۗىِٕمٌ وَّحَصِيْد ٌ یعنی ان بستیوں میں سے بعض قائم ہیں جن کو دیکھ سکتے ہو اور بعض ان میں سے بالکل ملیا میٹ ہوگئیں۔ حصید، کٹی ہوئی فصل کو کہتے ہیں۔ یہاں یہ ان بستیون کے لیے استعمال ہوا ہے جو عذاب الٰہی سے یک قلم نیست و نابود ہوگئیں۔ قائم کی ایک مثال مصر ہے جس کے اندر سے فرعون اور اس کی قوم کو خدا نے نکالا اور لے جا کر سمندر میں غرق کردیا۔ مکان قائم رہ گئے۔ مکین ناپید ہوگئے۔ حصید سے مراد قوم ہود اور قوم لوط وغیرہ کی بستیاں ہیں جن کے مکان و مکین سب ناپید ہوگئے۔ صرف کسی کسی کے کچھ آثار اپنے مکینوں کی بدبختی کی داستانِ عبرت سنانے کے لیے رہ گئے۔ یہ بات قریش کو سنا کر اس لیے کہی گئی ہے کہ اگر وہ اپنی اس ضدم ضدا کی روش پر قائم ہیں تو لازماً انہیں ان دو فہرستوں میں سے کسی ایک میں اپنا نام لکھانا پڑے گا۔ ان کے اندر رسول کی بعثت کے بعد اب ان کا فیصلہ بھی لازماً ہونا ہے۔ (تدبرِ قرآن)

104۔ وَمَا نُؤَخِّرُهٗٓ اِلَّا لِاَجَلٍ مَّعْدُوْدٍ۔ یعنی یہ نہ سمجھو کہ اس دن کے آنے میں اتنی غیر محدود مدت باقی ہے کہ اس کے اندیشہ میں ابھی سے اپنا عیش مکدر کرنے کی ضرورت نہیں ہے۔ یہ مدت غیر محدود نہیں، بلکہ شمار کی ہوئی مدت ہے۔ شمار کی ہوئی مدت۔ نہ کوئی مبالغہ کا اسلوب بیان ہے اور نہ یہ بات علم الٰہی کے اعتبار سے ارشاد ہوئی ہے بلکہ یہ ایک حقیقت نفس الامری کا اظہار ہے اس لیے کہ جو شخص مرا تو، جیسا کہ حدیث میں ارشاد ہے، من مات فقد قامت قیامتہ، اس کی قیامت آگئی۔ برزخ میں جو مدت گزرے گی نفخ صورت کے وقت اس کا کوئی احساس باقی نہیں رہے گا۔ ہر شخص یہ محسوس کرے گا کہ ابھی سوئے تھے ابھی اٹھ بیٹھے ہیں۔ (تدبرَ قرآن)

106۔ دوزخیوں کے چیخنے چلانے کی تعبیر :  جو بدبخت ہوں گے وہ دوزخ میں پڑیں گے اور اس میں ان کا حال یہ ہوگا کہ لہم فیہا زفیر و شہیق، زفیر اور شہیق دونوں لفظ گدھے کی چیخ کے لیے آتے ہیں جب وہ چیختا ہے تو جو سانس وہ باہر کی طرف نکالتا ہے اس کو زفیر کہتے ہیں اور جو سانس اندر کی طرف لے جاتا ہے اس کو شہیق کہتے ہیں۔ یہ دوزخیوں کے چیخنے چلانے اور رونے گھگھیانے کی تعبیر ہے اور ان لفظوں میں جو حقارت کا پہلو ہے وہ بالکل واضح ہے۔ (تدبرِ قرآن)

107۔ یہ الفاظ بطور محاورہ استعمال کیے گئے ہیں کیونکہ اہل عرب دوام اور لامحدود مدت بیان کرنے کیلئے یہی الفاظ استعمال کرتے تھے ورنہ یہ موجودہ زمین و آسمان تو قیامت کے وقت ختمم کردیے جائیں گے۔البتہ ظاہری الفاظ کا لحاظ رکھتے ہوئے ان سے عالم اخروی کے زمین و آسمان مراد لیے جاسکتے ہیں۔)تیسیر القرآن(

108۔مذہب اہل سنت کا یہ متفقہ مسئلہ ہے کہ عاصی مسلم بہرحال خلودِ نار کا مستوجب نہیں،اگر بالکل معافی نہ ہوئی جب بھی کچھ سزا جھیلنے کے بعد جنت میں لے آیا جائے گا،احادیث میں یہ مضمون بہت صراحت کے ساتھ آیا ہے مفسر نسفی نے لکھا ہے کہ معتزلہ کو جب ان احادیث سے مفر نہ ملا تو خود ان احادیث کی صحت ہی سے انکار کربیٹھے۔)تفسیرماجدی(

۔جو نیک بخت ہوں گے جنت میں داخل ہوں گے اور اسی میں رہیں گے جب تک آسمان و زمین قائم ہیں مگر جو تیرا رب چاہے " مگر تیرا رب جو چاہے " کے استثناء سے یہ اشارہ نکلتا ہے کہ ان کے احوال و مراتب میں بھی تبدیلیاں ہوں گی لیکن یہ تبدیلیاں خیر سے شر کی طرف کی نوعیت کی نہیں، بلکہ خوب سے خوب تر کی طرف کی نوعیت کی ہوں گی۔ (تدبرِ قرآن)

109۔اسلام دوسرے مذہبوں کے باطل ہونے کے باب میں کسی گومگو ،تذبذب اور صلح کل پالیسی کا حامی نہیں اسے اصرار ہے کہ سفید کو سفید اور سیاہ کو سیاہ ہی کہا جائے ۔)تفسیر ماجدی(

۔ ہم یہ اسلوب متعدد مقامات میں واضح کرچکے ہیں کہ بعض مرتبہ خطاب بظاہر الفاظ تو آنحضرت ﷺ سے ہوتا ہے لیکن اس کے اندر جو عتاب مضمر ہوتا ہے اس کا رخ مخالفین کی طرف ہوتا ہے۔ وہ چونکہ اپنی ضد کے سبب سے لائق خطاب نہیں رہ جاتے۔ (تدبرِ قرآن)

112۔  اس دنیا میں سب سے زیادہ دشوار کام استقامت ہی ہے اسی لئے محققین صوفیاء نے فرمایا ہے کہ استقامت کا مقام کرامت سے بالاتر ہے، یعنی جو شخص دین کے کاموں میں استقامت اختیار کئے ہوئے ہے، اگرچہ عمر بھر اس سے کوئی کرامت صادر نہ ہو، وہ اعلی درجہ کا ولی ہے۔۔۔۔۔ اور غور کیا جائے تو پورے قرآن میں عام طور پر یہی طرز استعمال ہوا ہے کہ امر کا مخاطب نبی کریم ﷺ کو بنایا گیا ہے اور نہی و ممانعت کا مخاطب امت کو۔۔۔۔۔ (معارف القرآن)

114۔اس میں بدرجۂ اجمال دن رات کی پانچوں فرض نمازیں آگئیں۔طَرَفَیِ النَّهَارِ۔یادن کے دونوں سروں سے مراد ایک طلوع فجر ہے دوسرے بعد زوال پھر بعد زوال بجائے خود ظہر و عصرکے دوحصوں پر شامل ہے۔اور   زُلَفًا مِّنَ الَّیْلِ۔کے اندر مغرب و عشاء کے اوقات آگئے قرآن مجید میں جہاں جہاں بھی اوقات نماز کا ذکر ہے بدرجۂ اجمال ہی ہے تفصیلات صرف سنت رسول کی طرف رجوع کرنے سے معلوم ہوں گی ہمارے زمانہ کے جن علماء متجددین نے محض قرآن مجید سے پوری تفصیلات نکالنی چاہی ہیں،انہوں نے عجب عجب مضحکہ خیز غلطیاں کی ہیں۔۔۔(اس لئے ہر نیکی کی کوشش کرتے رہو)یہ صحیفۂ اسلامی کی عجیب و غریب دفعہ ہے،جس کی نظیر مشکل ہی سے کسی دوسرے صحیفۂ دینی میں ملے گی۔ارشاد ہوتاہے کہ ہرحسنہ بجائے خود تو خیر نیکی ہے ہی،ایک خاصہ اذہاب سیّئہ (بدی کو مٹانے )کا بھی رکھتی ہے نیکیوں کی افزائش کی ترغیب کا س سے بہتر نسخہ اور کیا ہوسکتاہے۔اگر بندے اپنے باہمی معاملات میں اللہ کے اس قانون کو یادرکھتے تو آج آپس کی رنجشوں اور شکایتوں کا دفتر کتنا مختصر ہوگیا ہوتا۔۔۔اللہ تو اپنے ہا ں کا یہ قاعدہ رکھے کہ نیکیوں کے ہوتے ہوئے بدیوں پر نظر نہ کی جائے اور بندے اس کے برعکس یہ عمل جاری رکھیں کہ اپنے بھائیوں کی کمزوریوں، لغزشوں ،خطاؤں کے آگے ان کی خوبیوں پر برابر خاک ہی ڈالے رہیں۔مرشد تھانویؒ نے فرمایا کہ طاعت کے انوار سے معصیت کی ظلمتیں دورہوجاتی  ہیں اور ملکۂ طاعت کے غلبہ سے مادۂ معصیت مضمحل ہوتاجاتاہے۔)تفسیر ماجدی(

116۔ الْفَسَاد فِی الْاَرْضِ۔قرآن مجید کی اس جامع اصطلاح میں ہر قسم کی بے دینی اور بددینی آجاتی ہے۔ )تفسیر ماجدی(

117۔ ان آیات میں نہایت سبق آموز طریقے سے ان قوموں کی تباہی کے اصل سبب پر روشنی ڈالی گئی ہے جن کی تاریخ پچھلے چھ رکوعوں میں بیان ہوئی ہے۔ایک یہ کہ ہر اجتماعی نظام میں ایسے نیک لوگوں کا موجود رہنا ضروری ہے جو خیر کی دعوت دینے والے اور شر سے روکنے والے ہوں۔دوسرے یہ کہ جو قوم اپنے درمیاں سب کچھ برداشت کرتی ہو مگر صرف انہی چند گنے چنے لوگوں کو برداشت کرنے کے لیے تیار نہ ہو جو اسے برائیوں سے روکتے اور بھلائیوں کی دعوت دیتے ہوں، تو سمجھ لو کہ اس کے برے دن قریب آگئے ہیں۔تیسرے یہ کہ ایک قوم کے مبتلائے عذاب ہونے یا نہ ہونے کا آخری فیصلہ جس چیز پر ہوتا ہے وہ یہ ہے کہ اس میں دعوت خیر پر لبیک کہنے والے عناصر کس حد تک موجود ہیں۔۔۔۔ (تفہیم القرآن)

120۔ حضورؐ کے دل کو مضبوط بنانا، اور مومنین کے لئے حق پر مبنی معلومات، پند و نصیحت اور یادہانی۔(تدبرقرآن)

خلاصہ ۔۔۔۔۔(ر۔10)   (i)انفرادی خرابیاں عذابِ الٰہی کا باعث نہیں ہوتیں۔عذاب الٰہی اس وقت نازل ہوتاہے جب قوم کی غالب اکثریت کا مزاج فاسد ہوجاتاہے۔(ii)آخر میں سارا معاملہ اللہ کے حوالے کرنے، ہمہ تن اس کی عبادت میں سرگرم رہنے اور اس پر پورا پورا بھروسہ کرنے کی ہدایت۔(تدبر قرآن)

ـــــ قوموں کی تباہی کا معیار:     (i) جب کوئی انسانی گروہ اہل خیر سے خالی ہوجائے(یا چند اہل خیر، اور وہ بھی بہت کمزور)اور صرف شریر لوگ باقی رہ جائیں۔(ii) برائیوں کو روکنے اور بھلائیوں کی دعوت دینے والوں کو برداشت نہ کیا جائے۔(iii)فساد کو مٹانے اور نظامِ صالح قائم کرنے والے بے حد کم رہ جائیں۔(تفہیم القرآن)

ــــ  انبیاء کے باربار تذکرہ کے تین فائدے:۔ انبیاء کے حالات باربار بیان کرنے کیلئے اللہ تعالیٰ نے تین فائدے بتلائے ہیں۔ایک یہ کہ جن مشکلات سے آپؐ اور آپ کے صحابہ کرامؓ دوچار ہیں ایسے ہی حالات سے تمام سابقہ انبیاء اور ان پر ایمان لانے والوں کو بھی دوچار ہونا پڑاتھا۔آخر اللہ نے مخالفین کا سرتوڑ دیا اور انبیاء اور مومنوں کو بچالیا اور کامیاب کیا لہذا آپؐ صبر سے کام لیں اور اپنے عزم کو مضبوط رکھیں ۔دوسرے یہ کہ آپ اور آپ کے پیروکار وں تک سابقہ انبیاء کے صحیح صحیح حالات پہنچ جائیں جن کی آپ کو پہلے سے خبر نہیں تھی۔تیسرے یہ کہ ان لوگوں کے حالات میں آپ سب کے لیے بہت سے اسباق موجود ہیں یعنی اللہ کے نافرمانوں کا بلآخر کیا انجام ہوتاہے اور فرماں برداروں کا کیا؟)تیسیر القرآن(