3۔ احسن القصص:۔  سورۃ تقریباً ایک مسلسل قصہ پر شامل ہے۔اسے بہترین قصہ کیوں فرمایا گیاہے؟ قصہ سے بہترین اخلاقی سبقوں کا نکلنا ظاہر ہی ہے،باقی مختلف اہل تفسیر نے اس کی مختلف توجیہیں اپنے اپنے مذاق کے لحاظ سے کی ہیں ۔عجب نہیں جو بڑی وجہ یہ ہوکہ جو متعدد اور مختلف بصیرتیں مختلف قصوں سے مقصود رہی ہیں۔وہ سب اس میں یکجا کردی گئی ہوں،اور یہ توبہرحال واقعہ ہے کہ فطرتِ بشری کی کارفرمائیاں اور اس کے جتنے حقائق اور اسرار اس ایک سورۂ میں اکٹھے مل جاتے ہیں ان کے لحاظ سے تو یہ سورت بس اپنی نظیرآپ ہے۔ہوسکتا ہے کہ أحسن القصص میں یہ پہلو بھی ہو کہ حضرت یوسفؑ اور برادران یوسفؑ کے درمیان جو واقعات پیش آئے وہ اس صورت حال کا نقشہ پیش کررہے تھے جو رسول اللہؐ اور قریش کے مابین پیش آنے والی تھی۔(تفسیر ماجدی)

4۔ اِنِّیْ رَاَیْتُ۔یعنی خواب میں دیکھا ،رأیت "رویت"سے بھی ہوسکتاہے اور رؤیا سے بھی، لیکن مفسرین کا اتفاق ہے کہ یہاں رؤیا ہی ہے۔اور مفسرین کے اتفاق سے قطع نظر خود قرآن مجید کی تصریح اگلی ہی آیت میں آرہی ہے ۔"لَا تَقْصُصْ رُءْیَاكَ"  تورات میں بھی ذکر خوابوں ہی کا ہے۔(تفسیر ماجدی)

5۔ فَیَكِیْدُوْا لَكَ كَیْدًا۔آیت اس امر کی واضح دلیل ہے کہ شیطان کے اثر اور کید کے اخلاقی مرض سے محفوظ رکھنے کیلئے پیمبرزادگی ہی ہر گز کافی نہیں،چہ جائیکہ محض بزرگ زادگی ۔یوسفؑ کا خاندان پیمبرزادگی میں بھی ممتاز تھا،آپ کے والد ماجد ،دادا،پرداد ،سب پیمبر ہوتے چلے آرہے تھے،پیمبری روایتیں  گھروالوں کے نس نس میں پیوست تھیں۔اس پر بھی بشری لغزشوں اور نفسانی کمزوریوں سے مطلق پناہ نہ مل سکی، سورۂ احسن القصص کے اور بھی جتنے سبق ہوں وہ اپنی جگہ پر لیکن یہ ایک بڑا اور گہراسبق شروع ہی میں مل گیا۔(تفسیر ماجدی)

ــــ سجدہ تعظیمی؟  رہی یہ بات کہ غیر اللہ کو سجدہ کرنا تو شرک ہے پھر باپ نے جو نبی تھے اور بیٹے نے جو نبی ہونے والے تھے ۔اس بات کو درست کیسے تسلیم کرلیا تو اس کا جواب بعض علماء نے یہ دیا ہے کہ یہ سجدہ تعظیمی ہے جو پہلی شریعتوں میں تو جائز تھا مگر ہماری شریعت محمدیہ میں ایسا تعظیمی سجدہ بھی حرام قراردیا گیاہے اور بعض علماء کے نزدیک یہاں سجدہ سے مراد اصطلاحی سجدہ نہیں جو نماز میں اداکیا جاتاہے بلکہ سجدہ سے مراد محض جھک جانا ہے اور یہی اس کا لغوی معنی ہے۔مگر اسی سورہ کے آخر میں "خَرُّوْا لَهٗ سُجَّدًا"کے الفاظ آئے ہیں اور لفظ"خروا"سے پہلے قول کی ہی تصدیق ہوتی ہے۔(تیسیر القرآن)

6۔ سیدنا یوسفؑ کے خواب کے واضح نتائج:۔اس خواب سے سیدنا یعقوبؑ نے خود نتائج نکالے اور سیدنا یوسفؑ کو بتائے وہ یہ تھے کہ اللہ تعالیٰ سیدنا یوسفؑ سے اپنے دین کی خدمت کا کام لے گا اور انہیں تاویل الاحادیث سکھائے گا۔تاویل الاحادیث سے مراد صرف خوابوں کی تعبیر ہی نہیں بلکہ ہر بات کے موقع و محل کو سمجھنا ، معاملات کے نتائج کو فوراًپرکھ لینا ، اللہ تعالیٰ کے ارشادات کے مضامین کی تہ تک پہنچ جانا وغیرہ سب کچھ شامل ہے اور تیسرا یہ کہ اللہ انہیں نعمت نبوت سے فیض یاب فرمائے گاجوان کے دوباپوں سیدنا اسحٰقؑ اور سیدنا ابرہیمؑ کو عطا کرچکاہے۔اس مقام پر سیدنا یعقوب ؑ نے ازراہ تواضع اور انکساری اپنا نام لینا مناسب نہ سمجھا  ورنہ آپ خود بھی جلیل القدر نبی تھے اور آپ کی اولاد ہی میں آئندہ سلسلہ نبوت جاری رہا۔ماسوائے نبی آخر الزمانؐ کے جو سیدنا اسماعیلؑ کی اولاد سے تھے۔  اسی حقیقت پر درج ذیل حدیث سے روشنی پڑتی ہے:۔سیدنا یوسف ؑ سب سے مکرم:۔  سیدنا ابوہریرۃؓ فرماتے ہیں کہ لوگوں نے پوچھا ":یارسول اللہؐ سب سے زیادہ مکرم کون ہے؟ آپؐ نے فرمایا:جو سب سے زیادہ متقی ہے۔انہوں نے کہا کہ ہم یہ نہیں پوچھتے ۔ پھر آپؐ نے فرمایا یوسفؑ اللہ کے نبی، اللہ کے نبی کے بیٹے،اللہ کے نبی کے پوتے، اللہ کے نبی کے پڑپوتے ،سب سے زیادہ مکرم ہیں۔(بخاری ، کتاب الانبیاء،باب قول اللہ تعالیٰ واتخذ ابراہیم خلیلاً)(تیسیر القرآن)

7۔ قصہ یوسف اور سائلین یعنی کفار ِ کے حالات میں مماثلت کی وجوہ:۔یہ پوچھنے والے کفار مکہ تھے انہیں یہ معلوم نہیں تھا کہ اس کے جواب میں جو سیدنا یوسفؑ اور ان کے بھائیوں کے حالات زندگی آئے ہیں وہ خود انہی کے حالات پر منطبق ہونے والے ہیں کفارمکہ اور برادران یوسف کے تقابلی مطالعہ میں جو عبرت کی نشانیاں یا وجوہ مماثلت پائی جاتی ہیں ان کا ذکر پہلے کیا جاچکاہے۔(تیسیر القرآن) 

8۔ لیکن عجیب بات ہے کہ بائیبل میں برادران یوسف ؑ کے حسد کی ایک ایسی وجہ بیان کی گئی ہے جس سے الٹا الزام حضرت یوسف ؑ پر عائد ہوتا ہے۔ اس کا بیان ہے کہ حضرت یوسف ؑ بھائیوں کی چغلیاں باپ سے کھایا کرتے تھے اس وجہ سے بھائی ان سے ناراض تھے۔۔۔۔۔ ا س فقرے کی روح سمجھنے کے لیے بدویانہ قبائلی زندگی کے حالات کو پیش نظر رکھنا چاہیے۔ جہاں کوئی ریاست موجود نہیں ہوتی اور آزاد قبائل ایک دوسرے کے پہلو میں آباد ہوتے ہیں، وہاں ایک شخص کی قوت کا سارا انحصار اس پر ہوتا ہے کہ اس کے اپنے بیٹے، پوتے، بھائی، بھتیجے بہت سے ہوں جو وقت آنے پر اس کی جان و مال اور آبرو کی حفاظت کے لیے اس کا ساتھ دے سکیں۔۔۔۔۔۔۔ (تفہیم القرآن)

۔ اور اپنے والد کے بارے میں جو یہ کہا کہ   اِنَّ اَبَانَا لَفِیْ ضَلٰلٍ مُّبِیْنِۚ     اس میں لفظ ضلال کے لغوی معنی گمراہی کے ہیں مگر یہاں گمراہی سے مراد دینی گمراہی نہیں ورنہ ایسا خیال کرنے سے یہ سب کے سب کافر ہوجاتے کیونکہ یعقوب ؑ اللہ تعالیٰ کے برگزیدہ پیغمبرا ور نبی ہیں ان کی شان میں ایساخیال قطعی کفر ہے۔ (معارف القرآن)

10۔ قَآىٕلٌ مِّنْهُمْ سے بعض اہل تفسیر نے یہ استنباط کیا ہے کہ جس نے قتل کی رائے دی تھی ،وہ ان بھائیوں میں سے نہ تھا، کوئی  غیر تھا۔۔۔ غَیٰبَتِ الْجُبِّ۔توریت میں ہے کہ یہ ایک اندھا کنواں تھا ،جس میں پانی مطلق نہ تھا، اور اسے اٹھا کر گڑھے میں ڈال دیا، وہ گڑھا سوکھا تھا ،اس میں ذرا بھی پانی نہ تھا۔(پیدائش 37: 24)(تفسیر ماجدی) 

15۔ متن میں وَ هُمْ لَا یَشْعُرُوْنَ کے الفاظ کچھ ایسے انداز سے آئے ہیں کہ ان سے تین معنی نکلتے ہیں اور تینوں ہی لگتے ہوئے معلوم ہوتے ہیں۔ ایک یہ کہ ہم یوسف ؑ کو یہ تسلی دے رہے تھے اور اس کے بھائیوں کو کچھ خبر نہ تھی کہ اس پر وحی جاری ہے۔ دوسرے یہ کہ تو ایسے حالات میں ان کی یہ حرکت انہیں جتائے گا جہاں تیرے ہونے کا انہیں وہم و گمان تک نہ ہوگا۔ تیسرے یہ کہ آج یہ بےسمجھے بوجھے ایک حرکت کر رہے ہیں اور نہیں جانتے کہ آئندہ اس کے نتائج کیا ہونے والے ہیں۔ (تفہیم القرآن)

18۔  انا ڑی مجرم:۔  سیدنا یعقوبؑ ان کی طرف سے پہلے ہی مشکوک تھے۔ جب قمیص کو دیکھا تو انہیں پختہ یقین ہوگیا کہ یہ سب مکراور فریب کاری ہے۔کیونکہ قمیص کسی جگہ سے بھی نوچی ہوئی یا پھٹی ہوئی نہ تھی۔ان نو آموز مجرموں کو یہ خیال ہی نہ آیا کہ اگر قمیص کو خون لگانا ہی ہےتو اسے پہلے بے ترتیبی سے کچھ پھاڑ بھی لیں تاکہ وہ کسی درندے کی نوچی ہوئی معلوم ہوسکے۔یہ قمیص دیکھ کر سیدنا یعقوبؑ کہنے لگے وہ بھیڑیا یا تو بڑا سمجھدار ہوگا جس نے پہلے آرام سے یوسف کی قمیص کو اتارا پھر انہیں پھاڑ کھانے کے بعد کچھ لہو بھی اس پر لگادیا۔حقیقت حال کا تو اللہ ہی کو معلوم ہے۔مگر معلوم یہی ہوتاہے کہ تم نے یوسف کو کہیں گزند پہنچایا ہے یا غائب کردیا ہے اورتمہاری یہ آہ و بکا اور قمیص کو خون آلود کرکے دکھانا اپنے جرم پر پردہ ڈالنے کیلئے ملمع سازیاں ہیں۔(تیسیر القرآن)

20ــــ یوسف کو بیچنے والے کون تھے؟  برادران یوسف یا قافلے والے:۔ بائبل کی روایت کے مطابق تو قرآن کے لفظ "وَ شَرَوْهُ"کی ضمیر کا مرجع برادران یوسف ہیں۔یعنی برادران یوسف نے سیدنا یوسفؑ کو معمولی سی قیمت کے عوض قافلہ والوں کے ہاتھ بیچ ڈالا۔ کیونکہ وہ یوسف کی خبرگیری رکھتے تھے اور بروقت جھگڑا کھڑا کردیا کہ یہ لڑکا ہماراغلام ہے  جو گھر سے بھاگ آیا تھا اور ہم اس کی تلاش میں تھے۔بلآخر انہوں نے ان قافلہ والوں سے معمولی سی قیمت کے عوض اس کی سودا بازی کرلی۔ کیونکہ یہ جو رقم انہیں مل رہی تھی مفت میں مل رہی تھی  ۔لہذا انہوں نے اتنی قیمت کو بھی غنیمت سمجھا ۔ان کی اصل غرض تو یہی تھی کہ یوسف یہاں سے دور کسی  ملک میں پہنچ جائے اور یہ مقصد پورا ہورہاتھا۔اور یہی قصہ عوام میں زبان زدعام ہے۔ لیکن قرآن کا سیاق و سباق اس مفہوم کی تائید نہیں کرتا۔ قرآن کے مطابق اس آیت کا مفہوم یہ ہے کہ قافلہ والوں نے مصر میں جاکر اس لڑکے(یوسفؑ )کو فروخت کرڈالا اور اسے معمولی قیمت میں اس لیے بیچ ڈالا کہ انہیں بھی یہ مال مفت میں ہاتھ لگ گیا تھا۔ لہذا زیادہ قیمت لگانے میں ان کی کوئی دلچسپی نہ تھی۔(تیسیر القرآن)

21۔ بائیبل میں اس شخص کا نام فوطیفار لکھا ہے۔ قرآن مجید آگے چل کر اسے ”عزیز“ کے لقب سے یاد کرتا ہے، اور پھر ایک دوسرے موقع پر یہی لقب حضرت یوسف ؑ کے لیے بھی استعمال کرتا ہے۔ اس سے معلوم ہوتا ہے کہ یہ شخص مصر میں کوئی بہت بڑا عہدہ دار یا صاحب منصب تھا، کیونکہ ”عزیز“ کے معنی ایسے بااقتدار شخص کے ہیں جس کی مزاحمت نہ کہ جاسکتی ہو۔ بائیبل اور تلمود کا بیان ہے کہ وہ شاہی جلوداروں (باڈی گارڈ) کا افسر تھا، اور ابن جریر حضرت عبداللہ بن عباس ؓ سے روایت کرتے ہیں کہ وہ شاہی خزانے کا افسر تھا۔ (تفہیم القرآن)

۔ لِامْرَاَتِهٖ۔عزیز کی اس بیوی کا نام توریت میں تو نہیں البتہ روایات یہود  میں زلیخاآیاہے اور وہیں سے مسلمانوں میں بھی چل پڑا ۔ ان کے لئے عام طور پر یہ مشہور ہے کہ بعد کو حضرت یوسفؑ کے عقد نکاح میں آگئی تھیں۔لیکن اس کی سند نہ قرآن مجید سے ملتی ہے ،نہ حدیث صحیح سے ،نہ توریت سے۔۔۔تاویل الاحادیث۔ پر حاشیہ ابھی اوپر گذرچکا ۔الفاظ قرآن کی جامعیت اور عموم حضرت یوسفؑ کے ہر قسم کے انتظامی تجربے ،علم حقائق اشیاء اور واقفیت تدبیر منزل پر شامل ہے ۔محض خوابوں کی تعبیر تک ہرگز محدود نہیں۔ توریت میں :"اوریوں ہواکہ جس وقت  سے اس نے اسے گھر پر اور اپنی سب چیزوں پر مختار کیا خداوند نے اس مصری کے گھر میں یوسفؑ کے سبب سے برکت بخشی اور اس کی سب چیزوں میں جو گھر میں اور کھیت میں تھیں ،خدا کی طرف سے برکت ہوئی اور اس نے اپنا سب کچھ یوسفؑ کے قبضہ میں کردیا اور اس نے روٹی کے سوا جسے کھالیتا تھا کسی چیز سے کام نہ رکھا اور یوسفؑ خوبصورت اور نور پیکر تھا۔ "(پیدائش 39=4-6) (تفسیر ماجدی)

ـــــ تاویل الاحادیث سے مراد رموزِ مملکت اور اصول حکمرانی ہیں:۔  عزیز مصر کے ہاں سیدنا یوسفؑ کو اس طرح کا باوقار مقام حاصل ہوجانا اس مستقبل کی طرف پہلا زینہ تھا جس میں آپ کو پورے ملک مصر کی حکومت اللہ کی طرف سے عطا ہونے والی تھی۔ آپ کی سابقہ زندگی خالصتاً بدوی ماحول میں گزری تھی  اس سابقہ زندگی میں بدوی زندگی کے محاسن اور سیدنا ابراہیمؑ کے خاندان سے ہونے کی وجہ سے صرف اکیلے اللہ کی پرستش اور دینداری کے عنصر ضرور شامل تھے مگر اللہ تعالیٰ اس وقت کے سب سے زیادہ متمدن اور ترقی یافتہ ملک یعنی مصر میں آپ سے جو کام لینا چاہتا تھا اور اس کام کیلئے جس واقفیت تجربے اور بصیرت کی ضرورت تھی وہ آپ کو عزیز مصر کے گھر میں مختار کی حیثیت سے رہنے میں میسر آگئی۔اس آیت میں تاویل الاحادیث سے مراد یہی رموزِ مملکت ہیں اور اس غرض کیلئے اللہ تعالیٰ نے جس طرح اسباب کے رخ کو موڑدیا وہ اکثرلوگوں کے وہم و گمان میں بھی نہیں آسکتا۔(تیسیر القرآن)

24ــــ واضح نشانی سے مراد وہ نوریز دانی ہے جو اللہ تعالیٰ ہر انسان کی فطرت کے اندر ودیعت فرماتاہے۔جن لوگوں کے اندر یہ نور قوی ہوتاہے وہ نہایت سخت آزمائش کے موقع پر بھی اس کی رہنمائی میں نفس اور شیطان کے فتنوں میں مبتلا ہونے سے بچ جاتے ہیں۔ حضرت یوسفؑ کا یہی نور اس موقع پر ان کے باطن میں چمکا اور ان کو گناہ سے محفوظ رکھنے کا باعث ہوا۔(ترجمہ: مولانا امین احسن اصلاحیؒ)

27۔ اس آیت میں "شَهِدَ شَاهِدٌ مِّنْ اَهْلِهَا"کے الفاظ آئے ہیں یعنی زلیخا کے گھر والوں میں سے ایک گواہ نے گواہی دی۔حالانکہ موقع پر کوئی گواہ موجود نہ تھا۔بعض مفسرین نے لکھا ہے کہ یہ شہادت ایک شیر خوار بچے نے دی تھی مگر اس روایت کی سند درست نہیں ۔دوسرے یہ کہ اگر یہ روایت صحیح تسلیم کی جائے تو یہ معجزہ کی صورت ہوگی اور معجزہ کی صورت میں عقلی دلیل دینے کی کوئی ضرورت نہ تھی۔تیسرے یہ کہ جس صحیح روایت میں تین شیر خوار بچوں کے بولنے کا ذکر ہے وہاں اس بچے کا ذکر مفقود ہے۔لہذا یہ روایت ہر لحاظ سے ناقابل اعتماد ہے۔(تیسیر القرآن)

28۔ ۔۔۔بعض مفسرین کا خیال ہے کہ اس آیت میں "اِنَّ كَیْدَكُنَّ عَظِیْمٌ"عزیز مصر کا قول نہیں بلکہ اللہ تعالیٰ کا فرمان ہے۔ چنانچہ کسی بزرگ سے منقول ہے وہ کہا کرتے تھے کہ میں شیطان سے زیادہ عورتوں سے ڈرتاہوں۔اس لیے کہ جب اللہ تعالیٰ نے شیطان کا ذکر کیا تو فرمایا کہ شیطان کا مکر کمزور ہے۔ (4: 76)اور جب عورتوں کا ذکر کیا تو فرمایا کہ تمہارا مکربہت بڑا ہے اور درج ذیل حدیث بھی اسی مضمون پر دلالت کرتی ہے۔سیدنا اسامہ بن زیدؓ کہتے ہیں کہ رسول اللہؐ نے فرمایا :"میں نے اپنے بعد مردوں کیلئے عورتوں سے زیادہ سخت کوئی فتنہ نہیں چھوڑا"(بخاری،کتاب النکاح،باب مایتقی من شؤم المرأۃ)اسی طرح "وَ اسْتَغْفِرِیْ لِذَنْۢبِكِ"سے مراد یہ بھی ہوسکتی ہے کہ یوسف سے اپنے گناہ کی معافی مانگواور یہ بھی کہ اللہ سے اپنے گناہ کی معافی مانگو۔(تیسیر القرآن)

35۔ اس سے یہ بھی معلوم ہوا کہ کسی شخص کو شرائط انصاف کے مطابق عدالت میں مجرم ثابت کیے بغیر، بس یونہی پکڑ کر جیل بھیج دینا، بےایمان حکمرانوں کی پرانی سنت ہے۔ اس معاملہ میں بھی آج کے شیاطین چار ہزار برس پہلے کے اشرار سے کچھ بہت زیادہ مختلف نہیں ہیں۔ فرق اگر ہے تو بس یہ کہ وہ ”جمہوریت“ کا نام نہیں لیتے تھے، اور یہ اپنے ان کرتوتوں کے ساتھ یہ نام بھی لیتے ہیں۔ وہ قانون کے بغیر اپنی غیر قانونی حرکتیں کیا کرتے تھے، اور یہ ہر ناروا   زیادتی کے لیے پہلے ایک ”قانون“ بنا لیتے ہیں۔ وہ صاف صاف اپنی اغراض کے لیے لوگوں پر دست درازی کرتے تھے اور یہ جس پر ہاتھ ڈالتے ہیں اس کے متعلق دنیا کو یقین دلانے کی کوشش کرتے ہیں کہ اس سے ان کو نہیں بلکہ ملک اور قوم کو خطرہ تھا۔ غرض وہ صرف ظالم تھے۔ یہ اس کے ساتھ جھوٹے اور بےحیا بھی ہیں۔ (تفہیم القرآن)

36۔ان میں سے ایک بادشاہ کا ساقی تھا، دوسرا شاہی نان پُز ،الزام دونوں پر یہ تھا کہ انہوں نے بادشاہ کو زہردینا چاہاتھا ،تحقیقات اسی جرم کی ہورہی تھی،اور یہ لوگ جیل کی حوالات میں بند کردئیے گئے تھے۔توریت میں ہے:۔ "بعد ان باتوں کے یوں ہواکہ شاہ مصر کا ساقی اور نان پُز اپنے خداوند شاہ مصر کے مجرم ہوئے،اور فرعون اپنے دوسرداروں پر جن میں ایک ساقیوں کا دوسرانان پُزوں کا داروغہ تھاغصہ ہواور اس نے ان کی نگہبانی کیلئے جلوداروں کے سردار کے گھر میں اسی جگہ جہاں یوسف ؑ بند تھا،قید خانہ میں ڈالا"۔(پیدائش:40: 1۔3)۔۔۔آپ کو ضرور تعبیر رویا میں دخل ہوگا۔حُسن وجمال کی طرح اخلاقی فضل و روحانی کمال بھی چھپنے والی چیزنہیں، اور اس کا اثر منکر اور بیگانے تک محسوس کرلیتے ہیں، قدیم قوموں میں" غیب دانی"کی باقاعدہ و متعین شکل معروف و متعارف بھی بہت تھی۔جیل کے جو قیدی ساتھ میں تھے ظاہرہے کہ ان میں، مسلم و موحد کوئی نہ تھا،سب شرک ہی کے پیرو تھے ،لیکن حضرت یوسفؑ ؑ کی روحانیت کا یہ ایک معجزہ تھا کہ آپ کے فضائل اخلاق و اطوار سے وہ منکرین بھی مسخر اور آپ کی بزرگی کے قائل ہوگئے تھے۔ ایک معجزہ کمالِ صفت و تقویٰ کا مصر لیڈیوں پر ضیافت زلیخا کے موقع پر ہواتھا ،دوسرا یہ کمال توریت میں ہے:۔"وہ وہاں قید خانہ میں رہاکرتاتھا،لیکن خداوند یوسفؑ کے ساتھ تھا۔"(پیدائش39: 2۔ 21)قتادہ ؒ تابعی کے قول میں ہے کہ آپ مریضوں کا علاج کرتے تھے،غمگینوں کو تسلّی دیتے تھے،اور عبادت میں منہمک رہتے تھے،اور دوسرے اقوال بھی ایسے ہی نقل ہوئے ہیں۔(تفسیر ماجدی)

ــــ دو قیدیوں کا اپنے اپنے خوابوں کی تعبیر پوچھنا:۔  اسی زمانہ میں دو اور قیدی قید خانہ میں ڈالے گئے،ان میں ایک شاہ مصرکا نانبائی تھااور دوسرا اس کا ساقی یعنی شراب پلانے والا تھا۔ ان دونوں پر الزام یہ تھا کہ  انہوں نے بادشاہ کو زہر دینے کی کوشش کی ہے اور بقول بعض مفسرین ،الزام یہ تھا کہ انہوں نے ایک دعوت کے موقعہ پر صفائی کا پورا خیال نہیں رکھا تھا۔کچھ دنوں  کے بعدان دونوں نے ایک ہی رات الگ الگ خواب دیکھا اور چونکہ سیدنا یوسفؑ پورے قید خانہ میں اپنی پاک سیرت، بلندی اخلاق اور اعلیٰ کردار کی وجہ سے مشہور ہوچکے تھے۔لہذا  ان قیدیوں نے اپنے اپنے خواب کی تعبیر معلوم کرنے کیلئے انہی کی طرف رجوع کیا۔ ساقی نے اپنا خواب بیان کیا کہ میں نے خواب دیکھا ہے کہ میں انگوروں سے شراب نچوڑ رہاہوں اوریہ خواب اس کے پیشہ سے تعلق رکھتا تھا اور نانبائی نے کہا کہ میں نے خواب دیکھا کہ میرے سرپر بہت سی روٹیاں رکھی ہوئی ہیں اور پرندے ان روٹیوں کو نوچ نوچ کرکھارہے ہیں اور یہ خواب اس کے پیشہ سے تعلق رکھتاتھا ۔اپنے اپنے خواب بیان کرکے ان سے التجا کی کہ اس کی تعبیر بتائی جائے۔(تیسیر القرآن) 

41۔ یہ تقریر جو اس پورے قصے کی جان ہے اور خود قرآن میں بھی توحید کی بہترین تقریروں میں سے ہے، بائیبل اور تلمود میں کہیں اس کی طرف ادنیٰ اشارہ تک نہیں ہے۔۔۔۔۔۔یہ تقریر ایسی نہیں ہے کہ اس پر سے یونہی سرسری طور پر گزرا  جائے۔ اس کے متعدد پہلو ایسے ہیں جن پر توجہ اور غور و فکر کرنے کی ضرورت ہے۔۔۔۔۔یہ پہلا موقع ہے جبکہ حضرت یوسف ؑ ہم کو دین حق کی تبلیغ کرتے نظر آتے ہیں۔۔۔۔۔یہ بھی پہلا موقع ہے کہ انہوں نے لوگوں کے سامنے اپنی اصلیت ظاہر کی۔۔۔۔۔۔۔پھر حضرت یوسف ؑ نے جس طرح اپنی تبلیغ کے لیے موقع نکالا اس میں ہم کو حکمت تبلیغ کا ایک اہم سبق ملتا ہے۔۔۔۔۔اس سے یہ بھی معلوم کیا جاسکتا ہے کہ لوگوں کے سامنے دعوت دین پیش کرنے کا صحیح ڈھنگ کیا ہے۔۔۔۔۔۔حضرت یوسف دین کے اس نقطہ آغاز کو پیش کرتے ہیں جہاں سے اہل حق کا راستہ اہل باطل کے راستوں سے جدا ہوتا ہے، یعنی توحید اور شرک کا فرق۔ (تفہیم القرآن)

42۔حضرت یوسف نے اس خواہش کا اظہار اس توقع کی بنا پر کیا ہوگا کہ جہاں داد فریاد اور عدل و انصا ف کے سارے دروازے بند ہیں، شاید اسی راہ سے اس مظلومانہ قید سے چھوٹنے کی کوئی شکل پیدا ہو۔ کسی جائز مقصد کے لیے جائز تدابیر و وسائل کا اختیار کرنا توکل اور اعتماد علی اللہ کے منافی نہیں ہے۔ (تدبرِ قرآن)

ــــتوریت میں غالباً فرعونِ موسیٰ پر قیاس کرکے اس بادشاہ کا لقب بھی فرعون ہی درج کیا ہے(پیدائش باب۔40-41)لیکن تاریخ سے پتہ چلتاہے کہ فرعون  اس وقت تک شاہی لقب نہیں تھا ،یہ لقب فرمانروان ِ مصر کا بہت بعد کو چلا۔قرآن مجید توریت مروجہ کی کیسی کیسی باریک غلطیوں کی بھی اصلاح کرتاجاتاہے۔قرآن مجید اسی لئے بجائے اس اصطلاحی سرکاری لقب فرعون کے محض عام لفظ ملک لایا ہے۔آج کوئی بادشاہ ایسا خواب دیکھے تو شاید پرواہ بھی نہ کرے،لیکن اس وقت مصر میں سحر ،نجوم و کہانت کے علوم کے ساتھ ساتھ خوابوں کی بڑی اہمیت تھی،ملاحظہ ہوانگریزی تفسیر القرآن۔توریت میں ہے:۔"اور فرعون جاگا اور دیکھا کہ وہ خواب تھا، اور یوں ہواکہ صبح کو اس کا جی گھبرایا ،تب اس نے مصر کے سارے جادوگروں اور اس کے سب دانشمندوں کو بلا بھیجا اور فرعون نے اپنا خواب اُن سے کہا پر ُان میں سے کوئی فرعون کے خواب کی تعبیر نہ کرسکا "۔(پیدائش:41۔8) (تفسیر ماجدی)

ـــــ "بِضْعَ سِنِیْنَ"کا لفظ استعمال کیا ہے۔ جس کا اطلاق دس سے کم طاق اعداد پر ہوتاہے اور مفسرین کے اقوال کے مطابق آپ کی قید کی مدت 7 سال یا 9 سال تھی۔(تیسیر القرآن)

45۔ قرآن نے یہاں اختصار سے کام لیا ہے۔ بائیبل اور تلمود سے اس کی تفصیل یہ معلوم ہوتی ہے (اور قیاس بھی کہتا ہے کہ ضرور ایسا ہوا ہوگا) کہ سردار ساقی نے یوسف ؑ کے حالات بادشاہ سے بیان کیے، اور جیل میں اس کے خواب اور اس کے ساتھی کے خواب کی جیسی صحیح تعبیر انہوں نے دی تھی اس کا ذکر بھی کیا اور کہا کہ میں ان سے اس کی تاویل پوچھ کر آتا ہوں، مجھے قید خانہ میں ان سے ملنے کی اجازت عطا کی جائے۔ (تفہیم القرآن)

49۔ ۔۔۔(مصر میں سیرابی و شادابی یقیناً بارش کے پانی سے نہیں ہوتی بلکہ دریائے نیل کی طغیانی سے ہوتی ہے ،لیکن خود نیل  میں طغیانی کہاں سے آتی ہے،دریاکا منبع سوڈان میں ہے اور سوڈان میں بارش ہی کے پانی سے نیل میں طغیانی آجاتی ہے۔)(تفسیر ماجدی)

۔ " یَعْصِرُوْنَ " کے لفظ سے بھی مقصود اس کے لازم کی طرف اشارہ کرنا ہے۔ یعنی خوب بارش ہوگی۔ انگور کی بیلیں خوب پھلیں پھولیں گی، لوگ خوب انگور نچوڑیں گے۔ ساتھ ہی اس میں ایک لطیف تلمیح بھی پیدا ہوگئی ہے۔ وہ یہ کہ پوچھنے والا جیسا کہ اوپر گزرا ہے، بادشاہ کا خاص ساقی تھا۔ اس مناسبت سے " یعصرون " کے لفظ نے کلام میں ایک خاص لطف پیدا کردیا ہے جو اہل ذوق سے مخفی نہیں ہے۔ (تدبرِ قرآن)

50۔ حضرت یوسف ؑ نے اپنی رہائی اور بادشاہ کے تقرب کے مقابلہ میں زیادہ اہمیت اس الزام سے براءت کو دی جس کو بہانہ بناکر ان کو جیل بھیجا گیا تھا۔۔۔۔۔گویا عورتوں کا اپنے ہاتھوں کو زخمی کرنا ایک چال کے طورپر تھاتاکہ حضرت یوسفؑ کو اپنے ڈھب پر لاسکیں ۔(ترجمہ: مولانا امین احسن اصلاحیؒ)

نوٹ: حضرت یوسفؑ سے بادشاہ کی ملاقات کی خوبصورت تصویر  کشی  کے لیے ملاحظہ ہو تفہیم القرآن صفحہ 407

 52۔ حاشیہ نمبر 39 میں بیان ہوچکاہے کہ مصری تہذیب و تمدن میں زنا بجائے خود کوئی جرم نہ تھا،جتنا ایک شادی شدہ عورت کا اپنے شوہر کے حقوق خصوصی میں خیانت ۔(تفسیر ماجدی)

54۔(اور اونچے اور بھروسہ کے عہدہ و منصب کے لائق)بادشاہ اس انٹرویو سے بالکل مطمئن ہوگیا،اور یوسفؑ کا انتخاب کسی اعلیٰ منصب کیلئے کرلیا ،بادشاہ اور پھر مشرک بادشاہ سے اگر ملنا جلنااور سرکاری تعلقات قائم کرنا مطلق اور ہرصورت میں حرام ہوتاتو ظاہرہے کہ ایک پیمبربرحق اسے اپنے لئے کیوں کر روارکھتے؟سرکاری تعلق جب نبوت کے ساتھ جمع ہوسکتاہےتو ولایت و عام صالحیت کے ساتھ بدرجہ اولیٰ۔بادشاہ دین و عقیدہ میں یوسفؑ سے بالکل جداتھا اور نسل و نسب میں بھی ۔توریت میں ہے:۔"اور فرعون نے یوسف ؑ سے کہا از بسکہ خدانے اس سبب میں تجھے بینائی دی ہے سو کوئی تجھ ساعاقل و دانشور نہیں ہے،میرے گھر کا مختار ہو۔اور اپنا حکم میری سب رعیت پر جاری کر،فقط تخت نشینی میں میں تجھ سے بزرگ تر رہوں گا"۔(پیدائش: 41: 39، 40)۔(تفسیر ماجدی)

55ــــ بادشاہ نے حضر ت یوسفؑ کے سامنے حکومت میں بڑے سے بڑے منصب کی پیش کش کی تو انہوں نے اپنے علم و تجربہ کے مطابق ملک کے ذرائع پیداوار کا اہتمام و انصرام سنبھالنا پسند کیا جو مملکت کو درپیش سب سے بڑا مسئلہ تھا۔(ترجمہ: مولانا امین احسن اصلاحیؒ)

ــ سیدنا یوسف نے شاہ مصر سے کس چیز کا مطالبہ کیا تھا:۔  اس کے جواب میں سیدنا یوسفؑ نے کہا کہ پھر آپ مجھے ملک کے سیاہ و سفید کا مالک بنادیجئے اور یہ بات تو آپ لوگ بھی سمجھ چکے ہیں کہ میں اس نظم و نسق کو پوری احتیاط کے ساتھ چلانے کی اہلیت رکھتاہوں۔بادشاہ سے آپ کے اس مطالبہ سے متعلق چند امور غور طلب ہیں:بعض مفسرین نے خَزَآىٕنِ الْاَرْضِ کے مطالبہ سے یہ سمجھا کہ آپ نے محکمہ مال کے افسر اعلیٰ یا وزیر خزانہ کا عہدہ طلب کیا تھا۔ جو ملکی معیشت سے تعلق رکھتاتھاکیونکہ آپ نے خواب کی جو تعبیر بتلائی تھی وہ اسی شعبہ سے تعلق رکھتی تھی اور آئندہ جو برادران یوسفؑ کے مصر میں آنے کا ذکر ہے وہ بھی اسی شعبہ سے متعلق ہے لیکن اس پر یہ اعتراض ہوتاہے کہ آیا ایک نبی کسی کافرانہ حکومت کا کل پرزہ بن کر رہ سکتاہے؟ظاہرہے کہ ایک نبی کیلئے کسی بھی صورت یہ شایان شان نہیں کہ وہ اس بات کو گوارا کرلے۔لہذا یہاں خزائن الارض سے مراد مکمل اقتدار یا ملک کے سیاہ و سفید کا مختار ہونا ہے۔بالخصوص اس لحاظ سے کہ ان الفاظ میں اس معنی کی بھی گنجائش موجود ہے اور اس لیے بھی کہ اس سے اگلی آیت میں واضح طورپر یہ الفاظ موجود ہیں۔"وَ كَذٰلِكَ مَكَّنَّا لِیُوْسُفَ فِی الْاَرْضِۚ-یَتَبَوَّاُ مِنْهَا حَیْثُ یَشَآءُ"لہذا عَلٰى خَزَآىٕنِ الْاَرْضِ سے محض وزارت خزانہ یا شعبہ مالیات مراد لینا درست نہیں۔۔۔۔قرآن نے بھی اس منتقلی اقتدار کے بعد بادشاہ کیلئے ملک کا لفظ استعمال نہیں کیا۔نیز دیکھئے سورہ بنی اسرائیل آیت نمبر 82 کا حاشیہ(تیسیر القرآن)

56ــــ بادشاہ نے اپنے اختیارات حضرت یوسفؑ کو تفویض کردیے۔وہ جس حصۂ ملک میں جانا چاہتے چلے جاتے۔جہاں جو نظم و نسق ضروری سمجھتے اس کے لیے احکام دیتے۔حکومت کے عمال بے چون وچرا ان کے احکام کی تعمیل کرتے۔(ترجمہ: مولانا امین احسن اصلاحیؒ)

۔۔۔۔۔ یہ گویا اس کامل تسلط اور ہمہ گیر اقتدار کا بیان ہے جو حضرت یوسف ؑ کو اس ملک پر حاصل تھا۔۔۔۔۔۔۔دوسرا قول علامہ موصوف نے مجاہد کا نقل کیا ہے جو مشہور ائمہ تفسیر میں سے ہیں۔ ان کا خیال ہے کہ بادشاہ مصر نے یوسف ؑ کے ہاتھ پر اسلام قبول کرلیا تھا۔ (تفہیم القرآن)

۔۔۔۔تفصیل اس کی یہ ہے کہ بادشاہ مصر نے ایک سال تجربہ کرنے کے بعد دربار میں ایک جشن منایا جس میں تمام عمال دولت اور معززین حکومت کو جمع کیا اور یوسف ؑ کے سر پر تاج رکھ کر اس مجلس میں لایا گیا اور صرف خزانہ کی ذمہ داری نہیں بلکہ پورے امور مملکت کو عملاً ان کے سپرد کر کے خود گوشہ نشین ہوگیا (قرطبی ومظہری وغیرہ) (معارف القرآن)

57۔ یہ  تنبیہ ہے اس امر پر کہ  کوئی شخص دنیوی حکومت و اقتدار کو نیکی و نیکو کاری کا اصلی اجر اور حقیقی اجرِ مطلوب نہ سمجھ بیٹھے بلکہ خبردار رہے کہ بہترین  اجر اور وہ اجر جو مومن کو مطلوب ہونا چاہیے ، وہ ہے جو اللہ تعالیٰ آخرت میں عطا فرمائے گا۔ (تفہیم القرآن)

62۔ بِضَاعَتَهُمْ۔بضاعتہ کے معنی نقدی کے نہیں جیساکہ اس تفسیر کے طبع اول میں لکھدیا گیا تھا،بلکہ پونجی یا مال تجارت کے ہیں ۔۔۔دنیا ئے قدیم میں خرید و فروخت ہمیشہ روپئے پیسے کے ذریعہ سے نہ تھی ۔نقدی اور سکّہ کا رواج تو بہت بعد کو عام ہوا ،ایک زمانہ تک تو صرف مبادلۂ اجناس ہی ذریعہ تجارت تھا، پھر ایک عرصہ تک دونوں طریقے ساتھ ساتھ چلے ۔اس زمانۂ قحط مصر میں معلوم ہوتاہے کہ شاہی گودام سے جو راشن ملتا تھا وہ نقد قیمت کے معاوضہ میں نہیں بلکہ(BARTER SYSTEM)(مبادلۂ اجناس)کے ماتحت ملتا  تھا ۔اللہ اکبر قرآن مجید کا یہ اعجاز کچھ تھوڑا ہے کہ ہر زمانہ کا ذکر کرتے ہوئے ،تاریخی ،معاشی وغیرہ جزئیات کا کتنا لحاظ رکھا ہے۔(تفسیر ماجدی)

۔ اس حیرت انگیز خاموشی کا ہمیشہ یہی جواب دل میں آیا کرتا تھا کہ غالباً اللہ تعالیٰ نے اپنی حکمت بالغہ کے ما تحت یوسف ؑ کو اپنے اظہار سے روک دیاہو گا تفسیر قرطبی میں اس کی تصریح مل گئی کہ اللہ تعالیٰ نے بذریعہ وحی حضرت یوسف ؑ کو روک دیا تھا کہ اپنے گھر اپنے متعلق کوئی خبر نہ بھیجیں۔ (معارف القرآن)

63۔فرزندان یعقوبؑ نے آکر اپنے والد ماجد سے عرض کیا ہے کہ ہمیں اپنے گیارہویں بھائی کا حصہ  تو ملا نہیں، بلکہ آئندہ کیلئے یہ فرمان ہواہے کہ ہم لوگ اگر اسے نہ لے گئے تو یہ سمجھا جائے گا کہ ہم لوگ دغا سے گیارہویں کا حصہ وصول کرنا چاہتے تھےاور اس کی سزا میں غلہ کا حصہ ہم میں سے کسی ایک کو بھی نہ ملے گا،تو اب اس کا علاج صرف یہ ہے کہ اب کی بن یامین کو بھی ہمارے ہمراہ کردیجئے۔ (تفسیر ماجدی)

65۔ رقم واپس مل جانےکے بعد برادران یوسف نے نعرہ لگایا کہ اب ہماری راہ میں کیا رکاوٹ باقی رہی! اب تو ہم ضرورہی جائیں گے اور اپنے اہل و عیال کے لیے غلہ لائیں گے ۔ان کی خوشی فقرے  فقرے سے ابلی پڑتی ہے۔(ترجمہ: مولانا امین احسن اصلاحیؒ)

67۔ یہ ایک تدبیر تھی حضرت یعقوبؑ کے خیال میں مختلف مکروہات مثلاً شبہ جاسوسی اور نظر بدوغیرہ سے بچنے کی ۔۔۔غیر ملکی واردین و صادرین آج جو ملک میں جس بدگمانی اور بے اعتباری کی نظر سے دیکھے جاتے ہیں اس وقت بھی اسی نگاہ سے دیکھے جاتے تھے۔۔۔ مِنْ اَبْوَابٍ مُّتَفَرِّقَةٍ۔زمانۂ قدیم میں ہر بڑے شہر کے گردا گرد شہرپناہ یا فصیل ہوتی تھی اور اس میں شہر کے اندر داخلہ کے پھاٹک متعدد ہوتے تھے۔نظربد کا اعتقاد قدیم شریعتوں میں عام تھا،اور اس عقیدہ کے خلاف کوئی عقلی و تجربی دلیل اب بھی قائم نہیں اس لئے اگر اس سے تحفظ حضرت یعقوبؑ کی غرض مانی جائے جب بھی کوئی مضائقہ نہیں ،لیکن ایک دوسرے معنی بھی ممکن ہیں،حضرت یعقوبؑ گویا یہ فرمارہے ہیں کہ اب مصر کے لوگ تمہیں جان پہچان گئے ہیں اور عزیز مصر کی نظر عنایت تم پر معلوم و معروف ہوچکی ہے ،اب شہر پناہ کے ایک ہی دروازہ سے داخل ہوگئے تو تم ٹھہرے غیر ملکی تمہاری وجاہت،تمہاری جمعیت،خوامخواہ اہل مصر کی نظر میں کھٹکے گی اور ان کے جذباتِ حسد کو حرکت میں لائے گی ،اس لیے بہتر یہ ہے کہ تم لوگ بجائے ایک ساتھ کے، الگ الگ متفرق پھاٹکوں سے داخل ہو تو ممکن ہے لوگوں کی نظر نہ پڑے اور تم ہدف حسد ہونے سے بچ جاؤ۔(تفسیر ماجدی)

68۔ یعنی سیدنا یعقوبؑ کے دل کا ارمان یہ تھا کہ یہ سب بھائی بخیر و عافیت مصر جائیں اور وہاں سے غلہ لے کر بخیر و عافیت واپس پہنچ جائیں۔سیدنا یعقوبؑ کی تدبیر اور ان کا بھروسہ اس اندیشے میں توکام آگیا کہ انہیں نظر نہیں لگی۔لیکن ان کے دل کا ارمان پورا نہ ہوسکا ۔کیونکہ اللہ کو کچھ اور ہی منظورتھا ۔لہذا ان کی یہ تدبیر اللہ کی اس تقدیر کے مقابلہ میں کچھ کام نہ آسکی ۔جس کے متعلق انہیں خیال تک بھی نہیں آسکتا تھا۔(تیسیر القرآن)

۔ ان میں سے جس کے ذہن پر ظاہر کا غلبہ ہوتا ہے وہ توکل سے غافل ہو کر تدبیر ہی کو سب کچھ سمجھ بیٹھتا ہے اور جس کے دل پر باطن چھا جاتا ہے وہ تدبیر سے بےپروا ہو کر نرے توکل ہی کے بل پر زندگی کی گاڑی چلانا چاہتا ہے۔ (تفہیم القرآن)

69۔ ۔۔۔جب یہ لوگ مصر میں داخل ہوئے تو سیدنا یوسفؑ نے ان کا استقبال کیا اور شاہی مہمان خانہ میں ٹھہرایا۔دودو بھائیوں کو الگ الگ کمرہ رہنے کو دیا۔بن یمین اکیلا رہ گیا تو آپ نے اسے کہا میں تمہارے پاس رہوں گا۔چنانچہ جب تنہائی میسر آئی تو سیدنا یوسفؑ نے بن یمین کو بتایا کہ میں ہی تمہارا گم شدہ بھائی ہوں۔(تیسیر القرآن)

70۔یہ ندا کرنے والا یقیناً مہمان خانہ کا کوئی افسر ہوگا ،اب سوال یہ ہے کہ یہ اس نے بطور خود کہا،یا حضرت یوسفؑ کے حکم سے؟ قرینہ تو یہ کہتاہے کہ از خود کہا ہوگا، وزیر تک اس صاف اور باضابطہ کارروئی کیلئے جانے کی ضرورت کیا تھی،اور نہ قرآن مجید ہی میں اس کی طرف کوئی اشارہ ہے،صرف بعض مفسرین کی یہ رائے ہے،اور اگر اسے تسلیم کرلیا جائے تو زیادہ سے زیادہ صورت توریہ کی لازم آتی ہے یعنی سرقہ سے حقیقۃً مراد وہ سرقہ تھا کہ یوسفؑ کو حضرت یعقوبؑ سے غائب کردیا تھا، لیکن سامعین معنی قریب یعنی پیمانہ کا سرقہ سمجھے۔لیکن اگر یوسفؑ کا اذن و حکم نہ فرض کیا جائے تو اس توجیہ و تاویل کی ضرورت نہیں، اور اس صورت میں بات بالکل صاف ہوکر رہتی ہے کہ مہمان خانہ کے اہل کاروں اور عملہ والوں نے از خود قیاس کرکے یہ صدا اٹھائی ۔۔۔حضرت یوسفؑ کو ملزم قرار دینے کی ذمہ داری توریت کے بیان پرہے،چنانچہ اس میں ہے:۔ "جوں ہی صبح کی روشنی ہوئی، وہ سب اپنے گدھے لیکر چل نکلے جب وہ شہر سے تھوڑی دورباہر گئے ،یوسفؑ نے اپنے گھر کے داروغہ کو کہا کہ اُٹھ اور ان لوگوں کا پیچھا کر،اور جب تو انہیں پاوے تو انہیں کہہ کہ تم نے کس لئے نیکی کے عوض یہ بدی کی"(پیدائش۔ 44: 4، 5)(تفسیر ماجدی)

72۔ صُوَاع  کے معنیٰ ۔نیز ان آیات میں دوبار صواع کا لفظ آیا ہے۔صواع کو بعض لوگوں نے صاع سے مشتق سمجھ کر اس کا معنیٰ غلہ ماپنے کا معروف پیمانہ(پنجابی ٹوپہ)کردیا ہے۔حالانکہ یہ لفظ صاع سے مشتق یا ماخوذ نہیں ہے ۔بلکہ اس کا معنی پانی پینے کا ایسا پیالہ ہے جس میں جواہرات وغیرہ جڑے ہوئے ہوں اور اگر یہ پیالہ شیشہ کا ہو تو اسے قدح ،لکڑی کا ہو تو عُس ،چمڑے کا ہو تو علبہ اور مٹی کا ہو تو مرکن کہتے ہیں۔(الجمال والکمال ص74 از سلمان منصور پوری)(تیسیر القرآن)

75۔یعنی ہماری شریعت اسرائیلی میں چور کی سزا یہی ہے ۔توریت میں جوسزائیں درج ہیں،خیال رہے کہ وہ شریعت موسوی کی ہیں،شریعتِ اسرائیلی اس سے مدتوں قبل کی ہے۔(تفسیر ماجدی)

76ــــ یہ تدبیر جو مصلحت حق کی خاطر اختیار کی گئی توریہ کی قسم کی تھی جس میں ہر بات بجائے خود سچی اور صحیح تھی لیکن اس کے کہنے یا کرنے کے انداز سے فریق  ثانی کو مغالطہ ہوا۔ اس میں نہ حضرت یوسفؑ کسی جھوٹ میں ملوث ہوئے نہ ان کے آدمی۔البتہ وقتی طورپر بن یمین پر ایک الزام کا دھبالگالیکن انہی کو سوتیلے بھائیوں کے ظلم و ستم سے بچانے ہی کے لیے تو یہ تدبیر اختیار کی گئی تھی اور ان کو پہلے آگاہ بھی کردیا گیا تھا۔اس تدبیر سے ملکی قانون کا احترام باقی رہا اور بھائیوں کے اپنے قول کی روسے حضرت یوسفؑ بن یمین  کو روک لینے کے مجاز ہوگئے۔ان وجوہ کی بناپر اس تدبیر کو اللہ تعالیٰ نے اپنی طرف منسوب فرمایا۔(ترجمہ: مولانا امین احسن اصلاحی)

۔ یہاں یہ امر غور طلب ہے کہ اس پورے سلسلہ واقعات میں وہ کون سی تدبیر ہے جو حضرت یوسف کی تائید میں براہ راست خدا کی طرف سے کی گئی ؟۔۔۔۔۔۔۔۔برادران یوسف مصری رعایا نہ تھے، ایک آزاد علاقے سے آئے ہوئے لوگ تھے، لہذا اگر وہ خود اپنے ہاں کے دستور کے مطابق اپنے آدمی کو اس شخص کی غلامی میں دینے کے لیے تیار تھے جس کا مال اس نے چرایا تھا، تو پھر مصری قانون تعزیرات سے اس معاملہ میں مدد لینے کی کوئی ضرورت ہی نہ تھی، یہی وہ چیز ہے جس کو بعد کی دو آیتوں میں اللہ تعالیٰ نے اپنے احسان اور اپنی علمی برتری سے تعبیر فرمایا ہے۔ (تفہیم القرآن)

۔اور بعض حضرات کی یہ توجیہ کہ منادی کا ان کو چور کہنا یوسف ؑ کے علم و اجازت سے نہ ہوگا ایک بےدلیل دعوٰی اور صورت واقعہ کے لحاظ سے بےجوڑ بات ہے۔ اسی طرح یہ تاویل کہ ان بھائیوں نے یوسف ؑ کو والد سے چرایا اور فروخت کیا تھا اس لئے ان کو چور کہا گیا یہ بھی ایک تاویل ہے۔۔۔۔۔ اس آیت میں واضح طور پر اس حیلہ و تدبیر کو حق تعالیٰ نے اپنی طرف منسوب کیا ہے کہ یہ سب کام جب کہ بامر خداوندی ہوئے تو ان کو ناجائز کہنے کے کوئی معنی نہیں رہتے ان کی مثال ایسی ہی ہوگی جیسے حضرت موسیٰ ٰاور خضر (علیہما السلام) کے واقعہ میں کشتی توڑنا، لڑکے کو قتل کرنا وغیرہ جو بظاہر گناہ تھے اسی لئے موسیٰ ؑ نے ان پر نکیر کیا مگر خضر ؑ یہ سب کام باذن خداوندی خاص مصالح کے تحت کر رہے تھے اس لئے ان کا کوئی گناہ نہ تھا۔ (معارف القرآن)

77۔(اس لئے اس کی چوری پر کچھ ایسا تعجب نہیں)برادرانِ یوسف کی سیرت شروع سے نمودار ہورہی ہے،اب اس میں ایک اور عنوان کا اضافہ ہوا، جھٹ ایک الزام یوسفؑ پر اور دھردیا،روایتوں میں آیاہے (مگر کوئی روایت بھی  مستند نہیں) کہ انہوں نے اپنے بچپنے میں اپنے ناناکے یہاں ایک سونے کی مورتی اٹھا کر غائب کردی تھی،اس خیال سے کہ اب تو بت پرستی سے بازرہیں گے،تو بھائیوں نے یہ حوالہ اس واقعہ کا دیا۔۔۔باقی برادران یوسف کی جو سیرت شروع سے اب تک ظاہر ہوئی ہے اس کے بعد اس چھان بین کی ضرورت ہی باقی نہیں رہ جاتی۔(تفسیر ماجدی)

۔ یوسف ؑ کے جانے کے بعد یہ شہرت دی کہ میرا پٹکا چوری ہوگیا پھر تلاشی لی گئی تو وہ یوسف کے پاس نکلا، شریعت یعقوب ؑ کے حکم کے مطابق اب پھوپھی کو یہ حق ہوگیا کہ یوسف ؑ کو اپنا مملوک بنا کر رکھیں یعقوب ؑ نے جب یہ دیکھا کہ شرعی حکم کے اعتبار سے پھوپھی یوسف ؑ کی مالک بن گئی تو ان کے حوالے کردیا اور جب تک پھوپھی زندہ رہیں یوسف ؑ انہی کی تربیت میں رہے۔ (معارف القرآن)

79۔ احتیاط ملاحظہ ہو کہ " چور " نہیں کہتے بلکہ صرف یہ کہتے ہیں کہ " جس کے پاس ہم نے اپنا مال پایا ہے " اسی کو اصطلاح شرع میں " توریہ " کہتے ہیں، یعنی حقیقت پر پردہ ڈالنا، یا امر واقعہ کو چھپانا۔ (تفہیم القرآن)

80ــــ بڑے سے عمر میں بڑا مراد لینا ضروری نہیں بلکہ درجہ اور مرتبہ یا عقل ورائے میں بڑا مرادلینا زیادہ ا قرب ہے۔ تورات میں اس بھائی کانام یہوذاآیاہے۔معلوم ہوتاہے اس کے دل میں حضرت یوسفؑ  کے لیے کوئی نرم گوشہ تھا۔ غالباً اسی نے ان کے قتل کے بجائے کنویں میں ڈالنے کا مشورہ بھی دیا ہوگا تاکہ قتل کے گناہ سے بچ جائیں۔(ترجمہ: مولانا امین احسن اصلاحیؒ)

83۔ گمشدہ سامان کی برآمدگی سے چوری ثابت نہیں ہوجاتی:۔ یہ بعینٖہ وہی الفاظ ہیں جو سیدنا یعقوبؑ نے اس وقت بھی کہے تھے جب برادران یوسف نے یوسفؑ کو کنویں میں ڈالنے کے بعد رات کو روتے ہوئے باپ کے پاس آئے تھے اور ایک چھوٹا ساواقعہ بناکر انہیں سنادیا تھا۔اب کی بار آپ نے بیٹوں سے پورا واقعہ سننے کے بعد جو انہیں تنبیہ کی تو اس سے ان کی مرادیہ تھی کہ کیا تم یہ نہیں کہہ سکتے تھے کہ کسی شخص کے سامان سے کسی گم شدہ چیز کا برآمد ہونا اس بات کا یقینی ثبوت کب ہوتاہے کہ اس شخص نے ضرور چوری کی ہے ۔ممکن ہے کسی دوسرے نے اس کے سامان میں وہ چیز رکھ دی ہو؟پھر تم نے یوسف پر چوری کا مزید الزام لگاکر بن یمین پر لگے ہوئے الزام کو پختہ تربنادیا۔ اس تنبیہ سے دوباتوں کا پتہ چلتاہے ایک یہ کہ سیدنا یعقوبؑ کو اس بات کا پختہ یقین تھا کہ میرے بیٹے چور نہیں ہوسکتے اور دوسرے یہ کہ برادران یوسف اپنے ان دونوں چھوٹے بھائیوں سے ہمیشہ بدگمان ہی رہتے تھے۔۔۔۔سب سے مراد یوسف بن یمین اور ان کا وہ بڑا بھائی ہے جو شرم و ندامت کے مارے مصر میں ہی رہ گیا تھا۔(تیسیر القرآن) 

۔ حضرتِ یعقوبؑ نے جب یہ دیکھا کہ یوسفؑ کے بعد وہ بن یامین اور یہودہ سے بھی محروم ہو گئے تو انہیں دفعتہً یہ  روشنی نظر آئی کہ اب انشا اللہ سب کے جمع ہو جانے کا وقت قریب آ گیا ہے۔ (تدبرِ قرآن)

84۔جسے فطرت بشری سے ذرابھی واقفیت ہے،وہ جانتاہے کہ نئی چوٹ سے پرانی چوٹ تازہ ہوجاتی ہے ،اور تازہ غم سے پرانا غم ہراہوجاتاہے،یہ امر انسان کیلئے طبعی ہے،چنانچہ اسی کے اقتضاء سے آپؑ بھی حضرت یوسفؑ کو از سرنوشدت کے ساتھ یادکرنے لگے۔پیمبر اپنے جذبات و احساسات کے لحاظ سے بالکل بشر ہوتاہے،مافوق البشر نہیں ہوتا،یہ سبق قصّہ یوسفی کے ایک ایک جزئیہ سے باربار دہرایا جارہاہے۔(تفسیر ماجدی)

ــــ رونا دھونا وہ برا ہوتاہے جو خدا کے سواکسی اور کے آگے ہو، جو امید کے بجائے یاس کا مظہر ہواور جس میں انسان اپنی بے صبری کا اظہار اس طرح کرے جس سے ایمان اور توکل مجروح ہو۔ اللہ کے آگے رونا اس کی رحمت کو جوش میں لانے کا باعث ہوتاہے۔(ترجمہ: مولاناامین احسن اصلاحیؒ)

86۔ یعنی خدا کے معاملہ میں میرا تجربہ یہ ہے کہ وہ مشکل کشا ہے اور مجھے اس کی رحمت کی روشنی نظر آرہی ہے۔(ترجمہ: مولانا امین احسن اصلاحیؒ)

88۔اپنی پیش کردہ رقم کو حقیر و ناقص کہہ کر پیش کرنا،عزیز پر اور زیادہ اپنی مسکنت و احتیاج کا اظہار کرنا تھا، یوسفؑ اپنے بھائیوں کے مزاج کی تمکنت و خودداری بلکہ اکڑ سے خوب واقف تھے، اب جو ان کا لہجہ گدایانہ اور سائلانہ دیکھا ،نہ رہا گیا ،دل پگھل گیا، شفقتِ پیمبری تو غیروں تک کا دکھ نہیں دیکھ سکتی ،چہ جائیکہ یہ تو اپنے بھائی ہی تھے۔(تفسیر ماجدی)

89ــــ بھائیوں کی بدحالی و پریشانی اور ان کی اس لجاجت آمیز درخواست ، بالخصوص صدقہ کی درخواست، نے حضرت یوسفؑ کے دل کو ہلادیا ۔ بیگانگی کا جو پردہ ان کے اور ان کے بھائیوں کے درمیان اب تک حائل تھا اس کو مزید برقرار رکھنا انہوں نے مناسب خیال نہ فرمایا،اس لیے ان کے رویہ کا شکوہ زبان پر لائے۔(ترجمہ: مولانا امین احسن اصلاحیؒ)

۔ حضرت یوسف ؑ بھائی اور شریف بھائی تھے۔ بھائیوں کی اس بدحالی اور پریشانی اور ان کی اس لجاجت آمیز درخواست بالخصوص درخواست صدقہ نے ان کے دل کو ہلا دیا۔ یہ بڑے طنطنہ کے لوگ تھے لیکن اب حالات نے اس طرح ان کے اعصاب ڈھیلے کردیے تھے کہ صدقہ کے لیے درخواست کرنے میں بھی انہیں عار نہ تھا۔ (تدبرِ قرآن)

90۔ عزیز کے زبان سے یہ سوال اداہوتے ہی ان بھائیوں کے سامنے پچھلے واقعات کی یاد بجلی کی تیزی کے ساتھ آگئی ،وہ اپنے رشک و حسد کے جذبات،وہ یوسف کے خواب سے ان جذبات میں ترقی،اور یوسف و بن یامین کے ساتھ غرض دلی بغض ،عداوت، وہ ان کا یوسف کو گھر سے جنگل میں لے جانا،وہاں کنوئیں میں گرانا،پھر انہیں غلام کہہ کر قافلہ والوں کے ہاتھ فروخت کرڈالنا ،غرض اپنی بدسلوکیاں ایک ایک کرکے یاد آگئیں ،اور ساتھ ہی یہ خیال بھی تازہ ہوگیا کہ یوسف کا خواب جھوٹا نہیں ہوسکتا تھا، عجب نہیں کہ یہی اس کی تعبیر ہورہی ہو۔(تفسیر ماجدی)

ــــ یہ حقیقت اس ساری سرگزشت کی روح ہے۔وہ تقویٰ اور صبر، جس کے اندر احسان کی روح ہو،بندے پر دنیا اور آخرت دونوں میں خدا کے فضل کا ضامن ہے۔(ترجمہ: مولاناامین احسن اصلاحیؒ)

92۔ ہاں یہ بات یاد رکھنے کی ہے کہ یہی الفاظ حضور نبی کریم ﷺ نے فتح مکہ کے دن قریش کے ان سرغنوں کو خطاب کر کے فرمائے جو برابر آپ کی دشمنی میں سرگرم رہے تھے۔۔۔۔۔وہ بولے کہ آپ شریف بھائی اور شریف بھائی کے بیٹے ہیں۔ آپ نے فرمایا کہ میں تم سے وہی بات کہتا ہوں جو میرے بھائی یوسف نے اپنے بھائیوں سے کہی تھی، اب تم پر کوئی الزام نہیں، جاؤ تم آزاد ہو۔ (تدبرِ قرآن)

93۔ بِاَهْلِكُمْ اَجْمَعِیْنَ۔ اس وقت تک حضرت یعقوبؑ کا کنبہ اچھا خاصہ وسیع ہوچکا تھا،بیٹے،بہویں،پوتیاں سب ملاکر بائبل کے حسب بیان ستر نفوس تھے اور شاہ مصر نے ان کا سامان باربرداری لانے کیلئے سرکاری گاڑیاں بھیج دی تھیں۔توریت میں ہے:۔"اور یعقوبؑ اپنی سب نسل سمیت مصر میں آیا،وہ اپنے بیٹوں اور بیٹیوں کے بیٹوں کو جو اس کے ساتھ تھے،اور اپنی بیٹیوں کی بیٹیوں کو اور اپنی نسل کو اپنے ساتھ مصر لایا۔"(پیدائش46: 6و7)"سووہ سب جو یعقوبؑ کے گھرانے کے تھے ،اور مصر آئے ،ستر جانیں تھیں۔"(پیدائش46: 27)"اور اسرائیل کے بیٹے ،اپنے باپ یعقوبؑ کو اور اپنے ماں بچوں اور اپنی بیویوں کو اُن گاڑیوں پر لے گئے،جو فرعون نے ان کو لانے کو بھیجی تھیں۔"(پیدائش 46۔6)(تفسیر ماجدی)

۔ چنانچہ انہوں نے اپنا کرتا بھائیوں کو دیا کہ اس کو لے جاؤ، میرے باپ کے منہ پر اس کو ڈال دینا۔ اس سے ان کی آنکھیں روشن ہوجائیں گی۔ یہاں یہ بات یاد رکھنے کی ہے کہ حضرت یعقوب کے سامنے زندگی کا سب سے بڑا غم بھی پیراہن یوسف ہی کی شکل میں آیا تھا جب کہ بھائیوں نے اس پر خون لگا کر بوڑھے باپ کے سامنے پیش کیا کہ یوسف کو بھیڑیا کھا گیا اور اب زندگی کی سب سے بڑی خوشی بھی پیراہن یوسف ہی کی شکل میں نمودار ہونے والی تھی۔ (تدبرِ قرآن)

۔ اور ضحاک اور مجاہد وغیرہ ائمہ تفسیر نے فرمایا کہ یہ اس کرتے کی خصوصیت تھی کیونکہ یہ عام کپڑوں کی طرح نہ تھا بلکہ حضرت ابراہیم ؑ کے لئے جنت سے اس وقت لایا گیا تھا جب ان کو برہنہ کر کے نمرود نے آگ میں ڈالا تھا۔۔۔۔۔ان کی وفات کے بعد حضرت اسحاق ؑ کے پاس رہا ان کی وفات کے بعد حضرت یعقوب ؑ کو ملا آپ نے اس کو ایک بڑی متبرک شے کی حیثیت سے ایک نلکی میں بند کر کے یوسف ؑ کے گلے میں بطور تعویذ کے ڈال دیا تھا تاکہ نظر بد سے محفوظ رہیں۔۔۔۔۔۔جبرئیل امین ہی نے یوسف ؑ کو یہ مشورہ دیا کہ یہ جنت کا لباس ہے اس کی خاصیت یہ ہے کہ نابینا کے چہرے پر ڈال دو تو وہ بینا ہوجاتا ہے اور فرمایا کہ اس کو اپنے والد کے پاس بھیج دیجئے تو وہ بینا ہوجائیں گے۔ (معارف القرآن)

94۔حضرت یعقوبؑ نے یہ بات اپنے آس پاس کے لوگوں سے فرمائی ،اور چونکہ جانتے تھے کہ لوگ آسانی سے باور نہ کریں گے،پیرایۂ بیان بھی اُسی قسم کا اختیار فرمایا۔ لَوْ لَا اَنْ تُفَنِّدُوْنِ۔حضرات ِ انبیاء کی لطافتِ احساس اور قوت ِادراک کا کیا کہنا !مصر سے کنعان صدہا میل کے فاصلہ پر، ادھرقافلہ کو حرکت ہوئی ،اُدھر اتنی دورآپ ؑکو پیراہن یوسفی کی خوشبو محسوس  ہوگئی ، لیکن یہ حیرت انگیزذکاوتِ حس بھی ان حضرات کی اپنی اختیاری چیز نہیں ہوتی ،اور اسی لئے ہروقت قائم نہیں رہتی،محض فیضانِ الٰہی کے تابع ہے، کشفِ تکوینی ہی کی ایک قسم ہے۔۔۔مرشدتھانویؒ نے فرمایا کہ چونکہ ملاقات کا وقت موعود قریب آلگا تھا،یہ خوشبو اتنے فاصلہ سے مدرک ہوگئی اور جب وہ کنوئیں میں نسبۃً بہت قریب تھے، چونکہ وقت نہ آیا تھا،یہ خوشبو مدرک  نہ ہوئی اور یہی حال حضرات اولیاء کے مکاشفات کاہے۔(تفسیر ماجدی) 

۔ شہر مصر سے کنعان تک ابن عباس ؓ کی روایت کے مطابق آٹھ دن کی مسافت کا راستہ تھا اور حضرت حسن ؓ نے فرمایا کہ اسی (80 )  فرسخ یعنی تقریبا ڈھائی سو میل کا فاصلہ تھا اللہ تعالیٰ نے اتنی دور سے قمیص یوسف ؑ کے ذریعہ حضرت یوسف ؑ کی خوشبو یعقوب ؑ کے دماغ تک پہنچا دی اور یہ عجائب میں سے ہے کہ جب حضرت یوسف ؑ اپنے وطن کنعان ہی کے ایک کنویں میں تین روز تک پڑے رہےتو اس وقت یہ خوشبو محسوس نہیں ہوئی۔ یہیں سے معلوم ہوتا ہے کہ کوئی معجزہ پیغمبر کے اختیار میں نہیں ہوتا بلکہ در حقیقت معجزہ پیغمبر کا اپنا فعل و عمل بھی نہیں ہوتا یہ براہ راست فعل اللہ ہوتا ہے۔۔۔۔ (معارف القرآن)

95۔ ضَلٰلِكَ الْقَدِیْمِ۔ضلال کا ترجمہ ہرجگہ گمراہی نہیں ہوتا،یہاں مفہوم ضلال عقلی ہے، اور اس کیلئے اردو میں"وہم یاخبط"ہی آئے گا۔(تفسیر ماجدی)

98۔ حضرت یعقوب نے ان کی یہ استدعا قبول فرمائی اور ان سے وعدہ کیا کہ میں عنقریب تمہارے لیے اپنے رب سے گناہوں کی معافی کے لیے دعا کروں گا۔ (تدبرِ قرآن)

99۔ اَبَوَیْهِ۔حضرت کی والدہ کا توانتقال ہوچکا تھا،پرورش سوتیلی ماں اور حقیقی خالہ نے کی تھی، یہاں مجازاً انہی کو والدہ کہاگیا۔(تفسیر ماجدی)

100۔(اور اس مرتبۂ سلطنت تک پہنچادیا۔)دنیوی نعمتیں اور راحتیں بھی اللہ کے قانون و شریعت میں حقیر و ناقابلِ التفات نہیں ،جیساکہ متشددین اور اہل غلو نے سمجھ رکھا ہے،بلکہ یہ اللہ کے احسانات میں شمار ہونے کے قابل ہیں اور یہاں ایک نبی برحق ان میں سے ایک ایک چیز کا شکریہ بجالارہے ہیں۔شاعروں اور صوفیاء خام کارنے ان کا حلیہ ہی کس قدر بگاڑ رکھاہے۔۔۔کنعان اس وقت مصر کے مقابلے میں جو مرکز تہذیب و تمدن تھا، ایک دیہات ہی کی حیثیت رکھتاتھا۔(تفسیر ماجدی)

۔اگر سجدے سے مراد وہ چیز ہو جسے اسلامی اصطلاح میں سجدہ کہا جاتا ہے، تو وہ خدا کی بھیجی ہوئی کسی شریعت میں کبھی کسی غیر اللہ کے لیے جائز نہیں رہا ہے۔ (تفہیم القرآن)

۔ حضرت یوسف ؑ نے اپنے والدین کو تعظیماً تخت پر جگہ دی۔ بقیہ لوگ حسب دستور عام لوگوں کے بیٹھنے کی جگہ پر بیٹھے ہوں گے۔ اس کے بعد معلوم ہوتا ہے کہ حضرت یوسف نمودار ہوئے اور قاعدے کے مطابق ان کے خدم و حشم ان کی تعظیم کے لیے جھکے تو ماحول سے متاثر ہو کر یہ لوگ بھی بےاختیارانہ ان کی تعظیم کے لیے جھک پڑے۔ (تدبرِ قرآن)

101۔توریت میں حضرت یعقوبؑ کی اس وصیت کا بھی ذکر ہے کہ مجھے سرزمین مصر میں دفن نہ کیا جائے بلکہ کنعان لے جاکر میرے آباواجداد کے پہلو میں دفن کیا جائے۔(تفسیر ماجدی)

۔ ۔۔۔حضرت یوسفؑ کی اس قیمتی تقریر نے بھی بائبل اور تلمود میں کوئی جگہ نہیں پائی ہے۔ ۔۔ (تفہیم القرآن)

۔۔۔۔حمدو ثناکے بعد دوبارہ آپ نے اعتراف فرمایا کہ توہی میرا کارساز،حامی،سرپرست اور نگہبان ہے۔لہذا مجھے اپنی فرمانبرداری پر قائم رکھنا ۔مجھے موت آئے تو تیری فرمانبرداری کی حالت میں آئے اور مرنے کے بعد مجھے نیک لوگوں یعنی میرے آباؤاجداد سیدنا ابراہیم ؑ ،سیدنااسماعیلؑ اور سیدنا یعقوبؑ کے ساتھ ملادینا،نیز اس سے تمام نیک لوگ بھی مراد لیے جاسکتے ہیں، جیساکہ الفاظ کے عموم سے واضح ہوتاہے۔۔۔۔جب تک سیدنا یعقوبؑ زندہ رہے ۔سیدنا یوسفؑ حکومت کرتے رہے ۔لیکن جب والد فوت ہوگئے تو آپ اپنی مرضی سے اقتدار سے دستبردار ہوگئے سیدنا یعقوبؑ نے اپنی وفات کے وقت اپنے بیٹوں کو جو وصیتیں کی تھیں ان کا ذکر سورہ بقرہ میں گذرچکا ہے۔منجملہ ایک یہ بھی تھی کہ میری میت کو شام لے جاکر وہاں آباؤاجداد کے ساتھ دفن کرنا۔چنانچہ سیدنا یوسفؑ خود انہیں دفن کیلئے شام لے گئےاور دفن کے بعد واپس چلے گئے۔ایک دفعہ آپؑ (سیدنا یوسفؑ)نے فرمایا کہ ایک زمانہ آئے گاجب بنی اسرائیل مصر سے نکل جائیں گے ،اس وقت وہ میری میت کو ساتھ لے جائیں چنانچہ تقریباً پانچ سوسال بعد جب موسیٰؑ بنی اسرائیل کو لے کرمصر سے روانہ ہوئے تو سیدنا یوسف کا تابوت بھی ساتھ لے گئے۔۔۔۔سیدنا یوسفؑ کا زلیخا سے نکاح کا افسانہ:۔  بعض مفسرین نے یہ بھی لکھا ہے کہ زلیخا بعد میں مسلمان ہوگئی اور سیدنا یوسفؑ نے ان سے نکاح کرلیا تھا۔ لیکن جس قدر تکلف و تصنع سے اسرائیلی روایات سے کھینچ تان کر یہ بات ثابت کرنے کی کوشش کی جاتی ہے ۔اسی سے معلوم ہوجاتاہے کہ اس میں حقیقت کا حصہ کس قدر ہوسکتا ہے۔قرآن و احادیث اس بارے میں مطلق خاموش ہیں۔ ویسے بھی کسی پیغمبر کے شایان شان نہیں ہوتاکہ زلیخا جیسی حیا باختہ اور مکروفریب کرنے والی عورت سے نکاح کرے۔(تیسیر القرآن)

102۔ یہ امر یہاں ملحوظ رہے کہ تورات میں حضرت یوسف کا قصہ اگر ہے بھی تو آنحضرت ﷺ کے لیے اس سے واقف ہونے کا کوئی ذریعہ نہیں تھا اس لیے کہ آپ امی تھے۔ پھر تورات کے بیان اور قرآن کے بیان میں قدم قدم پر اختلاف ہے اور ان تمام اختلافات پر جو شخص بھی غور کرے گا وہ یہ تسلیم کیے بغیر نہی رہ سکتا کہ قرآن کا بیان بالکل عقل و فطرت کے مطابق ہے اس لیے کہ یہ براہ راست وحی الٰہی پر مبنی ہے۔ (تدبرِ قرآن)

105۔ اوپرے کے گیارہ رکوعوں میں حضرت یوسف کا قصہ ختم ہوگیا، اگر وحی الہی کا مقصد محض قصہ گوئی ہوتا تو اسی جگہ تقریر ختم ہوجانی چاہیے تھی۔ (تفہیم القرآن)

106۔ مشرکین ِ مکہ کا تلبیہ:۔ پھر اس کے ساتھ دوسروں کو شریک  بھی بناتے جاتے ہیں اور یہ بات صرف مشرکین مکہ سے مختص نہیں بلکہ ان سے پہلے بھی یہی ہوتا رہا اور ان کے بعد آج تک بھی یہی صورتحال  ہے۔مشرکین مکہ کے اصل عقیدہ کی وضاحت اس تلبیہ سے صاف واضح  ہوتی جو وہ حج و عمرہ کے احرام باندھتے وقت یوں پکارتے تھے:۔(لبيك لا شريك لك الا شريكا هولك تملكه وما ملك)(مسلم،کتاب الحج،باب التلبیہ۔)یعنی اے اللہ! میں حاضر ہوں، تیرا کوئی شریک نہیں سوائے اس کے جسے تو نے اختیار دے رکھا ہے وہ خود کوئی اختیار نہیں رکھتا۔یہی عقیدہ شرک کی سب سے بڑی بنیاد ہے اور یہ آج بھی ویسے ہی پایا جاتاہے۔ جیساکہ مشرکین ِ مکہ میں یا ان سے بھی پہلے پایا جاتاتھا۔آج بھی لوگ اولیاء اللہ کے تصرفات کے بڑی شدت سے قائل ہیں اور کہتے ہیں کہ یہ تصرفات اور اختیارات انہیں اللہ ہی نے عطاکئے ہوئے ہیں جس کے جواب میں اللہ تعالیٰ نے یہ فرمایا کہ یہ بات تم کسی الہامی کتاب سے دکھلا سکتے ہوکہ اللہ نے فلاں فلاں قسم کے اختیارات فلاں فلاں لوگوں کو تفویض کررکھے ہیں؟(تیسیر القرآن)

109ـــــ کوئی عورت نبیہ نہیں ہوئی:۔ اس آیت میں ضمناً دوباتیں مزید معلوم ہوئیں۔ایک یہ کہ کوئی عورت کسی دور میں نبی نہیں بنائی گئی۔دوسرے یہ کہ کوئی نبی کسی بدوی یا جنگلی علاقہ میں مبعوث نہیں کیا گیا۔ وہ بڑی بستیوں یا شہروں میں ہی پیدا ہوئے اور وہی ان کا مرکز تبلیغ رہا۔(تیسیرالقرآن )

110۔ اللہ کی  مددمیں تاخیر سے مومنوں پر اثر:۔  اس آخری جملہ کی تشریح کیلئے درج ذیل حدیث ملاحظہ فرمائیے:سیدنا عروہ بن زبیرؓ نے سیدہ عائشہؓ سے اس کا مطلب پوچھا تو انہوں نے فرمایا کہ اس کا مطلب یہ ہے کہ پیغمبروں کو جن لوگوں نے مانا اور ان کی تصدیق کی ۔جب ایک مدت دراز تک ان پر آفت اور مصیبت آتی رہی اور اللہ کی مدد آنے میں دیر ہوگئی اور پیغمبر جھٹلانے والوں کے ایمان لانے سے ناامید ہوگئے اور یہ گمان کرنے لگے کہ جو لوگ ایمان لاچکے ہیں اب وہ بھی ہمیں جھوٹا سمجھنے لگیں گے۔اس وقت اللہ کی مدد آن پہنچی۔(بخاری،کتاب التفسیر)۔۔۔۔۔اب جو لوگ ایمان لاکر منکرینِ حق کے ظلم و ستم برداشت کررہے تھے اور ان سے جو وعدہ و نصرت کیا جارہاتھا۔ایک تو وہ پورا نہیں ہورہاتھا۔دوسرے منکرین ِ حق کو یہ یقین ہوگیا کہ نبیوں کے یہ عذاب کے وعدے سب ڈھکوسلے ہیں۔ لہذا ایمان لانے والے بھی یہ سمجھنے لگے کہ ان پیغمبروں نے ہمارے ساتھ کہیں جھوٹ ہی نہ بولا ہو۔یا ایسے وعدے جھوٹے ہی نہ ثابت ہوں ۔ایسے مایوس کن حالات میں بعض دفعہ پیغمبروں کے پائے ثبات میں بھی لغزش آنے لگی ہو جیساکہ سورہ بقرہ میں ہے"وَ زُلْزِلُوْا حَتّٰى یَقُوْلَ الرَّسُوْلُ وَ الَّذِیْنَ اٰمَنُوْا مَعَهٗ مَتٰى نَصْرُ اللّٰهِ"(2: 214)(تیسیر القرآن)

111۔  قرآن کی تین صفات:۔ قرآن کا موضوع ،نوع انسان کی ہدایت ہے۔لہذا جوبات بھی انسان کی ہدایت سے تعلق رکھتی ہے ۔اس کی تفصیل اس کتاب میں آگئی ہے۔تفصیل کل شئی کا یہ مطلب ہرگز نہیں کہ آپ اس میں سے علم طب یا حساب یا جغرافیہ  وغیرہ کی تفصیلات تلاش کرنے لگیں ۔نیز یہ کتاب صرف ان لوگوں کو ہدایت کا کام دیتی ہے جویہ یقین رکھتے ہیں کہ یہ اللہ کی طرف سے نازل شدہ ہے۔ پھر ان لوگوں کیلئے رحمت بھی ہے۔بھلا جس شخص کو بلاکسی معاوضہ اور تکلیف کے زندگی کے ہرپہلو میں بہترین رہنمائی مل جائے اس کیلئے اس سے زیادہ نعمت اور رحمت کیا ہوسکتی ہے؟اور اس میں جو اقوام سابقہ کےاور انبیاء و رسل کے قصے بیان ہوئے ہیں وہ اپنے اندر اہل عقل و خرد کیلئے عبرتوں کے بے شمارپہلو سمیٹے ہوئے ہیں اور یہی چیز اس بات کی دلیل ہے کہ قرآن کسی انسان کی تصنیف کردہ کتاب نہیں۔ بلکہ اللہ تعالیٰ کی طرف سے نازل شدہ ہے۔جو قرون اولیٰ کے صحیح صحیح واقعات بیان کرنے کے ساتھ ان تاریخی واقعات اور قصوں میں بھی ہدایت اور عبرت کیلئے بے شمار اسباق سمودیتاہے۔(تیسیر القرآن)