5۔ اِنِّیْ خِفْتُ الْمَوَالِیَ۔آپ کو اپنے ان عزیزوں کی طرف سے اندیشہ یہی تھا کہ یہ بدمذہب ،بدعمل لوگ ہیں، ہیکل کی خدمت میں قاصر رہیں گے۔ یہ مراد نہیں کہ میری ملک و جائداد ان کے قبضے میں چلی جائے گی۔(تفسیر ماجدی)

6۔ یَرِثُنِیْ وَ یَرِثُ مِنْ اٰلِ یَعْقُوْبَ۔وراثت سے یہاں مراد مال و دولت کی وراثت نہیں۔حقائق عالیہ اور اخلاق فاضلہ کی میراث ہے۔  ۔۔۔ابن کثیر نے لکھا ہے کہ اول تو حضرت زکریاؑ نجاری سے کسب معیشت کرتے تھے،اور ایسے اہلِ حرفہ عموماً صاحبِ جائداد نہیں ہوتے پھر آپؐ بھی تو پیمبر بھی تھے ،مال دنیوی سے بے تعلقی رکھتے تھے۔۔۔۔اور انبیاء سے مال وجائداد کی وراثت تو چلتی بھی نہیں، جیساکہ حدیث صحیح میں وارد بھی ہوچکا ہے۔۔۔۔صحابیوں، تابعین،اکابرمفسرین سب سے ارث کی تفسیر علومِ نبوت و شریعت منقول ہے اور لفظ ارث کا اطلاق نبوت پر بالکل جائزہے۔(تفسیر ماجدی)

7۔ یحیٰ اللہ کا اپنا تجویز کردہ نام:۔  اللہ تعالیٰ نے دعا قبول کرکے بیٹے کی بشارت دی تو ساتھ ہی نام بھی خود ہی تجویز فرمادیا اور نام بھی ایسا انوکھا کہ پہلے کسی آدمی کا یہ نام نہیں رکھا گیا تھا۔یحیٰ :دعائیہ نام ہے یعنی اللہ کرے تادیر زندہ رہے ۔جیسے ہمارے ہاں جیونا یا جیونی نام رکھتے ہیں اور عرب میں عائش اور عائشہ،نیز اسم بمعنیٰ صفت بھی ہوسکتاہے جیسے وللہ الاسماء الحسنیٰ کے معنیٰ "اللہ کے بہترین نا م"بھی ہوسکتے ہیں اور "بہترین صفات"بھی،اس لحاظ سے اس کا معنی یہ ہوگا کہ ایسی اچھی سیرت والا آدمی پہلے کوئی نہیں ہوا۔(تیسیر القرآن)

10۔نشانی کی درخواست کا مقصد یہ تھا کہ پورا اطمینان ہوجائے کہ یہ بشارت رب ہی کی طرف سے ملی ہے،اس میں نفس یا شیطان کو کوئی دخل نہیں ہے۔ اس سے معلوم ہواکہ ہاتف غیب کی باتیں قبول کرنے کے معاملہ میں انبیائے کرام بڑی احتیاط برتتے تھے۔(ترجمہ: مولانا امین احسن اصلاحیؒ)

ـــــ اس ایک لفظ کے اضافہ سے قرآن مجید کا مقصد انجیل کی اس غلط بیانی کا ازالہ ہے کہ (نعوذباللہ)آپ بطور عتاب عارضی طورپر گونگے کردئیے گئے تھے،ملاحظہ ہو،سورہ آل عمران آیت41،حاشیہ 109۔اور اسی لیے اس لفظ پر اتنے طویل حاشیہ کی بھی ضرورت پڑی۔لیکن آیت کی ایک دوسری ترکیب بھی صحیح ہوسکتی ہے،اور بعض بزرگ اسی طرف گئے ہیں یعنی سویّاکو بجائے ضمیر مخاطب سے متعلق کرنے کے تین راتوں کی صفت قرار دیا جائے اور اس صورت میں سویا مرادف ہوگا متتابعات کے"یعنی تم لوگوں سے بول نہ سکوگے تین راتیں متواتر"۔چنانچہ ابن جریر ہی میں ایک قول حضرت ابن عباسؓ سے اس معنی میں بھی منقول ہے۔(تفسیر ماجدی)

12۔لفظ " حکم" سے مراد حق و باظل میں امتیاز  کی قوت و صلاحیت ہے۔ (تدبرِ قرآن)

13۔ " حنان" کے معنی محبت، ذوق و شوق اور سوز و گداز کے ہیں۔۔۔۔۔ ہیکل میں تقریر کرتے لوگوں کے دل دہل جاتے لیکن اس دنیا سے ان کا تعلق صرف دینے کے لیے تھا اس سے لیا انہوں نے کچھ بھی نہیں۔ جنگل کے شہد اور اس کی ٹڈیوں پر گزارہ کرتے۔ کمبل کی پوشاک سے تن ڈھانکتے اور جس سر کو چھپانے کے لیے اس دنیا میں کوئی چھت نہیں بنائی اس کو خدا کی کتاب کی خاطر کٹوا کر اس دنیا سے رخصت ہوگئے۔ (تدبرِ قرآن)

16۔ (غسل کیلئے یا نماز کیلئے یا کسی اور ضرورت سے)یہ مریم بنت عمران بن ماثان بنی اسرائیل کے ایک شریف ترین گھرانے میں ہیکل سلیمانی کے مجاوروں کے ہاں پیدا ہوئیں ۔والدہ ماجدہ کا نام حنّہ تھا۔،جن کی ایک بہن کے فرزند یحیٰؑ بن زکریاؑ پیمبر تھے۔مریمؑ اپنے والدین کی ضعیفی اولاد تھیں بڑی تمناؤں کے بعد پیدا ہوئی تھیں۔ماں نے نذریہ مانی تھی کہ اولاد کو خدمت ہیکل کیلئے وقف کردوں گی،جب بجائے فرزند کے دختر کی ولادت ہوئی تو انہیں بڑی مایوسی ہوئی ،اس لئے کہ لڑکیوں سے خدمت ہیکل لینے کا دستور نہ تھا، لیکن یہ خلاف دستور لے لی گئیں اور ان کی تربیت حضرت زکریا کے سپرد رہی۔رشد ،سعادت و صالحیت کے آثار بچپن ہی سے نمایاں تھے، عصمت و عفت میں اپنی نظیرآپ تھیں،مسیحی روایتوں کے بموجب شادی قصبۂ ناصرہ کے یوسف نجار کے ساتھ ہوئی ،لیکن ابھی رخصتی نہیں ہوئی تھی کہ ولادت عیسیٰؑ مسیح کی ایک اعجازی طورپر ہوگئی۔اس کے بعد اور بھی اولادیں آپ کے بطن سے ہوئیں ،عہدجدید میں باربارذکر یسوع کے بھائیوں کا آیا ہے ۔(متی 12: 46 و 13: 55 وغیرہ)اور بعض روایتوں میں تصریح چاربھائیوں اور دوبہنوں کی ہے،بھائیوں کے نام بھی۔(متی۔13: 55 میں)یعقوب اور یوسف اور شمعون اور یہوداہ دئیے ہیں ۔یہ بھی روایتوں میں آتاہے کہ حضرت مریمؑ حضرت مسیح ؑ کی مصلوبی کے وقت موجود تھیں ۔تفسیری روایتوں (قرطبی وغیرہ)میں ہے کہ آپ کی عمر تقریباً 50 سال کی ہوئی،مسیحی روایتوں سے اتنا بھی پتا نہیں چلتا۔مسیحی دنیا کے ایک بڑے (مشرقی کلیسا اور رومن کیتھولک کلیسا)کا عقیدہ یہ ہے کہ آپ بعد وفات آسمان پر اٹھالی گیں۔دوسرا گروہ یہ کہتا ہے کہ شہر افسوس میں یا یروشلم میں کوہ زیتون کے دامن میں دفن ہیں۔۔۔۔ مَكَانًا شَرْقِیًّا۔اس کی تعبیر دوطرح سے ممکن ہے۔۔۔اور اصل حقیقت کا حال اللہ ہی کو معلوم ہے۔۔۔ایک یہ کہ آپؑ اپنے والوں سے آڑ تلاش کرکے ہیکل سے اپنے مکان کے مشرقی حصہ میں چلی گئیں ،غالباً تخلیہ میں عبادت کیلئے ۔دوسرے یہ کہ آپ اپنے میکے کے گھر بار کو چھوڑکرسمت مشرق میں اپنی سسرال چلی گئیں۔آپ کے منگیتر یوسف نجار ناصرہ علاقۂ ارض گلیل میں رہتے تھے جو بیت اللحم شمال و مشرق میں واقع ہے۔۔۔۔ انْتَبَذَتْ مِنْ اَهْلِهَا۔مفسرین نے اس انتباذ یا اعتزال کے تحت میں مختلف وجوہ اسباب گنائے ہیں،لیکن چونکہ ایسی تفسیریں جو محض ظن و تخمین پر مبنی ہوں ان میں سے کسی ایک متعین شقِ پر زور دینا اور اسے جزم و وثوق سے بیان کرنا خود ایک غلطی ہے ۔۔۔۔مرشد تھانویؒ نے فرمایا کہ دونوں قصوں کے مجموعہ پر غور کرنے سے معلوم ہوتاہے کہ اللہ تعالیٰ سوال و طلب سے بھی ۔جیسے زکریاؑ کو دیا۔ اور بلا سوال و طلب بھی دیتا ہے جیسے حضرت مریمؑ کو دیا۔ اور اسی سے یہ بات نکلی کہ اللہ کامعاملہ ہر شخص کے ساتھ جدا جدا ہے۔(تفسیر ماجدی)

17۔  سیدہ مریم کی بیت المقدس کے حجرہ میں عبادت:۔  سیدنا یحیٰؑ کی خرق عادت پیدائش کے بعد اب سیدنا عیسیٰؑ کی معجزانہ بغیر باپ پیدائش کا آغاز ہورہاہے۔ سیدہ مریمؑ بیت المقدس کے مشرقی جانب کے ایک حجرہ میں گوشہ نشین ہوکر اللہ کی عبادت میں مشغول رہاکرتیں ۔پھر اس کمرہ میں بھی ایک پردہ ڈال لیا تاکہ دوسرے لوگوں سے بھی الگ تھلگ رہ کر پوری یکسوئی سے ذکر و فکر میں مشغول رہ سکیں اور اس کا دوسرامطلب یہ لیا گیا ہے کہ جب جوان ہوئیں تو انہیں حیض آگیا اور بہت زیادہ شرم محسوس ہوئی تو اس وقت سب لوگوں سے پردہ کرلیا ۔پھر اسی علیحدگی میں غسل حیض بھی کیا۔(تیسیر القرآن)

20۔ حضرت مریمؑ کے یہ الفاظ بائیبل کی اس روایت کی مکمل تردید کرتے ہیں کہ ان کا نکاح یوسف نامی کسی شخص سے ہواتھا۔ سورہ آل عمران کے مطابق مریمؑ اپنی والدہ کی منت کے مطابق ہیکل کی خدمت کے لیے وقف تھیں۔ اس وجہ سے ان کے نکاح اور بیاہ کا سوال ہی پیدا نہیں ہوتا۔(ترجمہ: مولانا امین احسن اصلاحیؒ)

21۔ سیدنا عیسیٰؑ کی پیدائش خود ایک معجزہ تھی:۔   یعنی ناممکن ہونے کے باوجود ممکن ہے اور ایسا ہوکے رہے گا کیونکہ اللہ کیلئے یہ کوئی مشکل کام نہیں۔اور یہ اس لئے ہوگا کہ ہم اس لڑکے کو تمام لوگوں کیلئے ایک زندہ و جاوید معجزہ بنادیں۔ پھر یہ لڑکا ہماری طرف سے تمہارے لئے ازراہ رحم و کرم عطیہ بھی ہے اور تمام لوگوں کیلئے بھی رحمت ثابت ہوگا۔واضح رہے کہ تخلیق کیلئے چار ہی صورتیں  ہوسکتی ہیں۔ایک یہ کہ ماں اور باپ دونوں سے پیدا ہو،یہ صورت عام ہے اور سب انسان یا جاندار ایسے ہی پیدا ہوئے ہیں۔دوسری یہ کہ ماں اور باپ دونوں کے بغیرپیدا ہو۔اس طرح سیدنا آدمؑ کو پیدا کیا گیا ۔تیسری یہ کہ صرف مرد سے پیدا ہو۔جیسے سیدہ حوا کو آدمؑ سے پیدا کیا گیا ۔اور چوتھی یہ کہ صرف عورت سے پیدا ہو۔یہ صورت ابھی تک وجود میں نہ آئی تھی جو سیدنا عیسیٰؑ کی پیدائش سے پوری ہوگئی۔(تیسیر القرآن)

۔ علاوہ بریں اگر کذلک کا مطلب یہ لے لیا جائے کہ بشر تجھے چھوئے گا اور تیرے ہاں اس طرح لڑکا ہوگا جیسے دنیا بھر کی عورتوں کے ہاں ہوا کرتا ہے، تو پھر بعد کے دونوں فقرے بالکل بےمعنی ہوجاتے ہیں۔ اس صورت میں یہ کہنے کی کیا ضرورت رہ جاتی ہے کہ تیرا رب کہتا ہے کہ ایسا کرنا میرے لیئے بہت آسان ہے، اور یہ کہ ہم اس لڑکے کو ایک نشانی بنانا چاہتے ہیں۔ نشانی کا لفظ یہاں صریحاً معجزہ کے معنی میں ہی استعمال ہوا ہے۔ (تفہیم القرآن)

22۔حمل کی وجہ سے سیدہ مریم کا بیت المقدس سے چلے جانا:۔ جب آپ حاملہ ہوگئیں تو اب شرم کے مارے وہاں رہنا گوارانہ کیا اور آپ بیت المقدس کا حجرہ چھوڑ کر دور کسی مقام پر چلی گئیں۔کہتے ہیں کہ یہ مقام بیت اللحم تھا جو وہاں سے تقریباً آٹھ میل دور ہے۔(تیسیر القرآن)

حضرت  یحٰی ؑ  کاتفصیلی تذکرہ : ص 473 تا 476 (تعلیم القرآن)

حضرت مریم اور حضرت  عیسٰی ؑ  کا  تفصیلی تذکرہ  :۔ص 477 تا 483 (تعلیم القرآن)

25۔ اس آیت میں اللہ تعالیٰ نے حضرت مریم علیہا السلام کو کھجور کا درخت ہلانے کا حکم دیا، حالانکہ اس کی قدرت میں یہ بھی تھا کہ بغیر ان کے ہلانے کے خود ہی کھجوریں ان کی گود میں گر جاتیں مگر حکمت یہ ہے کہ تحصیل رزق کے لئے کوشش کرنے کا سبق ملتا ہے اور یہ بھی بتلانا ہے کہ رزق کے حاصل کرنے میں کوشش اور محنت کرنا توکل کے خلاف نہیں۔ (رُوح المعَانی) (معارف القرآن)

29۔  قرآن کی معنوی تحریف کرنے والوں نے اس آیت کا یہ مطلب لیا ہے کہ " ہم اس سے کیا بات کریں جو کل کا بچہ ہے " یعنی ان کے نزدیک یہ گفتگو حضرت عیسیٰ کی جوانی کے زمانے میں ہوئی اور بنی اسرائیل کے بڑے بوڑھوں نے کہا کہ بھلا اس لڑکے سے کیا بات کریں جو کل ہمارے سامنے گہوارے میں پڑا تھا۔ مگر جو شخص موقع و محل اور سیاق وسباق پر کچھ بھی غور کرے گا وہ محسوس کرے گا یہ محض ایک مہمل تاویل ہے جو معجزے سے بچنے کے لیے کی گئی ہے۔(تفہیم القرآن)

33۔گود میں کلام کرنے والے تین بچے:۔   واضح رہے کہ بخاری و مسلم دونوں میں ایک طویل حدیث موجود ہے جس میں یہ مذکور ہے کہ بنی اسرائیل کے تین بچوں نے مہد میں کلام کیا تھا۔ان میں سے ایک تو یہی سیدنا عیسیٰؑ ہیں۔ان کے مخاطب یہود تھے اور آپ کے اس کلام کا مقصود پہلے بیان ہوچکا ہے۔دوسرا ابن جریج راہب کا قصہ ہے جسے بالخصوص مسلم نے بڑی تفصیل سے ذکر کیا ہے۔ابن جریج راہب پر زنا کی تہمت لگائی گئی تو انہوں نے اللہ سے بریت کی دعا کی پھر حرامی نومولودبچہ کو کچوکا لگا کر پوچھا کہ بتاؤکہ تمہارا باپ کون ہے؟ تو بچہ بول اٹھا کہ فلاں چرواہا۔اسی طرح اللہ نے ابن جریج راہب کو زنا کی تہمت سے بری فرمادیا۔اورتیسرے بچہ کی مخاطب اس کی ماں تھی جو سامان دنیاپر ریجھی ہوئی تھی تو بچہ نے بول کر اپنی ماں کی گمراہ کن غلط فہمی کو دور کردیا۔اور مہدمیں کلام کرنے کا مطلب یہ ہے کہ بچہ شیر خوارگی کے عالم میں کلام کرے جب کہ ابھی اس نے کلام کرنا نہ سیکھا ہو۔اور یہ مہد کا کلام تینوں واقعات میں صرف ایک ہی بار وقوع پذیر ہوا۔یہ نہیں کہ ان بچوں نےاس عالم میں متعدد بار کلام کیا ہو۔(تیسیر القرآن)

39۔  یوم حسرت اور موت کو مینڈھے کی شکل میں ذبح کرنا:۔ کافروں کے پچھتانے کے مواقع تو بہت ہونگے مگر آخری موقع غالباً وہ ہوگا جب اہل جنت کو جنت میں جانے کا اور اہل دوزخ کو دوزخ میں جانے کا فیصلہ سنایا جائے گا جیساکہ درج ذیل حدیث میں آیا ہے:"سیدنا ابوسعید خدریؓ کہتے ہیں کہ آپؐ نے  فرمایا: (قیامت کے دن)موت کو ایک چتکبر ےمینڈھے کی شکل میں لے کر آئیں گے۔ پھر ایک پکارنے والا پکارے گا:"اے اہل جنت !"وہ ادھر دیکھیں گے تو فرشتہ کہے گا: "تم اس مینڈھے کو پہنچانتے ہو"وہ کہیں گے (ہاں )یہ موت ہے اور ہم سب اس کا مزہ چکھ چکے ہیں"پھر وہ پکارے گا ،"دوزخ والو!"وہ لوگ بھی گردن اٹھا کر ادھر دیکھنے لگیں گے تو فرشتہ کہے گا:"تم اس مینڈھے کو پہنچانتے ہو؟"وہ کہیں گے "ہاں"یہ موت ہے، ہم سب اس کو دیکھ چکے ہیں۔اس وقت وہ مینڈھا ذبح کردیا جائے گا۔اس کے بعد وہ فرشتہ کہے گا "جنت والو! تمہیں ہمیشہ بہشت میں رہنا ہے اور دوزخ والو!تمہیں ہمیشہ دوزخ میں رہنا ہے ۔اب کسی کو موت نہیں آئے گی۔پھر یہ آیت پڑھی "وَ اَنْذِرْهُمْ یَوْمَ الْحَسْرَةِ۔۔۔۔لَا یُؤْمِنُوْنَ"۔(بخاری، کتاب التفسیر، ترمذی، ابواب التفسیر)اس دن کافر سب کچھ خوب دیکھ رہے ہوں گے  اور سن بھی رہے ہونگےمگر ہر طرف سے ناامیدہوکر حسرت سے اپنے ہاتھ کاٹیں گے۔مگر اس کا کچھ فائدہ نہ ہوگا"۔(تیسیر القرآن)

۔۔۔۔۔ اور بغوی بروایت ابوہریرہ نقل کرتے ہیں کہ رسول اللہ ﷺ نے فرمایا کہ ہر مرنے والے کو حسرت و ندامت سے سابقہ پڑے گا۔ صحابہ کرام نے سوال کیا کہ یہ ندامت و حسرت کس بناء پر ہوگی تو آپ ﷺ نے فرمایا کہ نیک اعمال کرنے والے کو اس پر حسرت ہوگی کہ اور زیادہ نیک اعمال کیوں نہ کر لئے کہ اور زیادہ درجات جنت ملتے اور بدکار آدمی کو اس پر حسرت ہوگی کہ وہ اپنی بدکاری سے باز کیوں نہ آگیا۔ ْ(مظہری) (معارف القرآن)

43۔ (جوتوحید ،ایمان اور نجات کا راستہ ہے) الْعِلْم۔یعنی علم بالوحی جس میں غلطی کا احتمال ہی نہیں۔فقہاء نے یہاں سے مسائل ذیل کا استنباط کیا ہے۔1۔بے علموں پر علماء کی اتباع و اقتداء لازم ہے۔2۔باپ کو بیٹے سے استفادہ و تلمذ جائز ہے۔3۔ فضل نسب، فضل علم و کمال کا ہم سطح نہیں۔(تفسیر ماجدی)

44۔ اصل الفاظ ہیں لا تعبد الشیطن، یعنی " شیطان کی عبادت نہ کریں " اگرچہ حضرت ابراہیم کے والد اور قوم کے دوسرے لوگ عبادت بتوں کی کرتے تھے، لیکن چونکہ اطاعت وہ شیطان کی کر رہے تھے۔ اس لیئے حضرت ابراہیم نے ان کی اس اطاعت شیطان کو عبادت شیطان قرار دیا۔ اس سے معلوم ہوا کہ عبادت محض پوجا اور پرستش ہی کا نام نہیں بلکہ اطاعت کا نام بھی ہے۔۔۔ (تفہیم القرآن)

45۔ حضرت ابراہیمؑ کی تقریر کے بنیادی نکات یہ ہیں کہ کسی کو معبود بنالینا کوئی شوق اور تفریح کی چیز نہیں ہے۔ خدا کو ماننا تو اس لیے ضروری ہے کہ وہی ہماری دعاو فریاد کو سنتااور ہرمشکل میں دستگیری فرماتاہے۔دوسری چیزیں ہماری کون سی احتیاج کو پوراکرتی ہیں؟ پھر خدا کے معاملہ میں یہ طے کرنا کہ اس کا کوئی شریک ہے یا نہیں،محض ظن و گمان سے ممکن نہیں ہے۔اس کے لیے وحی کی رہنمائی ضروری ہے۔شرک میں مبتلا ہونا شیطان کی اطاعت ہے کیونکہ اس نے انسان کو توحید کی صراط مستقیم سے گمراہ کرنے کی قسم کھارکھی ہے۔شیطان اور اس کے پیروؤں کا انجام عذابِ جہنم ہے۔(ترجمہ: مولانا امین احسن اصلاحیؒ)

49۔ ۔۔۔ہمارے نزدیک یہاں حضرت اسماعیل کا ذکر نا کرنے کی وجہ یہ ہے کہ آگے ان کا ذکر مستقلاً آ رہا ہے۔  (تدبرِ قرآن)

50۔ یہ حرف تسلی ہے ان مہاجرین کے لئے جو گھروں سے نکلنے پر مجبور ہوئے تھے۔ ان کو بتایا جا رہا ہے کہ جس طرح ابراہیم ؑ اپنے خاندان سے کٹ کر برباد نہ ہوئے بلکہ الٹے سر بلند و سرفراز ہو کر رہے اسی طرح تم بھی برباد نہ ہو گے بلکہ وہ عزت پاؤ گے جس کا تصور بھی جاہلیت میں پڑے ہوئے کفار قریش نہیں کرسکتے۔ (تفہیم القرآن)

51۔ نبی اور رسول کا فرق:۔  سیدنا اسحاقؑ اور یعقوب ؑ کی اولاد میں سے سیدنا موسیؑ کا ذکر غالبا" اس وجہ سے کیا جارہاہے کہ آپ اولوالعزم پیغمبر،مشرع اعظم اور قد آور شخصیت ہیں اور آپؐ لوگوں سے ان کا ذکر کیجئے ۔آپ اللہ کی اطاعت و فرمانبرادری میں انتہائی مخلص تھے۔ آپؐ نبی بھی تھے اور صاحب شریعت رسول بھی ۔نبی اور رسول میں فرق یہ ہے کہ نبی عام ہے اور رسول خاص۔یعنی ہر رسول نبی تو ہوتا ہے مگر ہر نبی رسول نہیں ہوتا۔روایات کے مطابق رسولوں کی تعدادصرف 313 یا 315 تھی جبکہ انبیاء کی تعداد ایک لاکھ چوبیس ہزار ہے۔ (نبی و رسول میں فرق کیلئے دیکھئے سورۂ مائدہ کی آیت نمبر 67 کا حاشیہ) (تیسیر القر آن)

52۔ سیدنا موسیٰؑ کی اللہ تعالیٰ سے ہمکلامی :۔  قرّبنٰہ نجیّٰا۔کے کئی مفہوم ہوسکتے ہیں ۔ایک یہ کہ ہم نے اسے راز کی بات کہنے کیلئے اپنے پاس بلایا،دوسرا یہ کہ ہم نے راز کی بات کہہ کر اسے اپنا مقرب بنالیا اور تیسرا یہ کہ ہم نے سیدنا موسیٰؑ کو آسمانوں پر اٹھالیا اور انہوں نے قلم چلنے کی آواز سنی جو لوح محفوظ پر چلتی ہے۔سیدنا ابن عباسؓ اور تابعین کی ایک جماعت سے یہی مطلب منقول ہے۔(تیسیر القرآن)

53۔ فرشتے کے واسطہ کے بغیر اللہ تعالیٰ کا حضرت موسیٰؑ سے کلام کرنا ور ان کی مدد کے لیے ایک مستقل نبی کو ان کا وزیر اور شریک کار مقرر کرنا حضرت موسیٰؑ کے دوخاص امتیازات ہیں جن میں کوئی ان کا ہمسر نہیں۔(ترجمہ: مولانا امین احسن اصلاحیؒ)

57۔ قرآن مجید اس باب میں کوئی تصریح نہیں کرتا۔اور نہ کوئی حدیث صحیح آپ کے رفع جسمانی کے بارے میں وارد ہوئی ہے۔بعض مفسرین نے اسرائیلیات سے اس قصۂ  رفع جسمانی کو نقل کیا ہے ،لیکن محققین کا قول یہی ہے کہ رفعۃ اور مکان اور علو سب معنوی ہیں۔ ان سے مراد محض  شرف نبوت اور تقرب عنداللہ ہے جو ہر نبی کو حاصل ہے۔ جسمانی علو ورفعت اس سے ثابت نہیں ہوتا۔ اور روایت جو اس باب میں نقل ہوئی ہے، خود اس کے اندر کمزوری موجود ہے۔۔۔۔اسرائیلی روایات میں آتاہے کہ آپ ہی علم نجوم اور علم  حساب کے اور فن تحریر و کتابت کے اور خیاطی کے موجد ہوئے ہیں۔(تفسیر ماجدی)

59۔ خَلف، یہ لفظ بسکون لام برے قائم بقام بری اولاد کے لئے اور بفتح لام اچھے قائم مقام اور اچھی اولاد کے لئے استعمال ہوتا ہے (مظہری) (معارف القرآن)

64۔ یہ قول حضرت جبرائیلؑ کی زبان سے اداکیا گیا ہے۔ رسول اللہؐ پر محبوب حقیقی کے پیامات کا جو اشتیاق غالب رہتاتھا اس کے تقاضہ سے ایک روز آپؐ نےجبرائیل سے کہا کہ اور زیادہ کیوں نہیں آتے ہو،اس کا جواب یہاں جبرائیلؑ کی زبان سے اداہورہاہے،حدیث صحیح  میں یہی تفسیر آئی ہے۔(تفسیر ماجدی)

65۔ مشرکین اور بت پرستوں نے اگرچہ عبادت میں اللہ تعالیٰ کے ساتھ بہت سے انسانوں، فرشتوں، پتھروں اور بتوں کو شریک کر ڈالا تھا اور ان سب کو الٰہ یعنی معبود کہتے تھے مگر کسی نے لفظ اللہ معبود باطل کا نام کبھی نہیں رکھا۔ (معارف القرآن)

اکیلا ہمارے سامنے آئے گا۔ 81. اور ان لوگوں نے خدا کے سوا اور معبود بنالئے ہیں تاکہ وہ ان کے لئے (موجب عزت و) مدد ہوں۔ 82. ہرگز نہیں وہ (معبودان باطل) ان کی پرستش 70۔۔۔۔آخر ایسا برخود غلط کون ہوسکتا ہے جو اللہ تعالیٰ سے یہ کہہ سکے کہ فلاں کو آپ نہیں جانتے، میں جانتا ہوں، وہ بڑا نیک آدمی ہے، اس وجہ سے اس کو کچھ نہ کہیے بلکہ سیدھے جنت میں بھیج دیجیے۔(تدبرِ قرآن)

71۔ ورود سے مراد دخول نہیں:۔  بعض روایات میں واردکے معنیٰ دخول لیے گئے ہیں یعنی ہر شخص کو کم از کم ایک دفعہ ضرور جہنم میں داخل ہونا ہوگا۔ یہ بات درست نہیں ۔ایک تو ایسی روایات سنداً   ناقابل اعتماد ہیں۔دوسرے خود قرآن کریم اور بہت سی صحیح احادیث کے خلاف ہیں اور تیسرے لغوی لحاظ سے بھی یہ مفہوم غلط ہے ورود کا معنی کسی جگہ پر پہنچنا ہے۔اس میں داخل ہونا نہیں۔ (تیسیر القرآن)

ــــ جہنم میں داخل ہونے کے حکم کے مخاطب وہی مجرمین ہوں گے جن کا ذکر اوپر سے چلاآرہاہے۔ اوپر کی بات بصیغۂ غائب کہی گئی جوعدمِ التفات یا ان کو اہمیت نہ دینے کے مفہوم کی حامل ہے۔یہ بات ان کو مخاطب کرکے کہی جائے گی جو شدتِ عتاب پر دلیل ہے۔ اسلوب کو نہ سمجھنے کے باعث بعض مفسرین آیت کا مفہوم یہ سمجھتے ہیں کہ ہر شخص ،خواہ نیک ہو یا بد ،جہنم پر سے لازماً گزرے گا حالانکہ سورہ انبیاء آیات 101 تا 102 میں صاف ارشاد ہواہے کہ نیکو کار جہنم سے دور رکھے جائیں گے اور وہ اس کا کھٹکا بھی نہیں سنیں گے۔(ترجمہ: مولانا امین احسن اصلاحیؒ)

74۔ جواب ملتاہے کہ یہ ظاہری ساز وسامان ،یہ دولت و حکومت ،یہ زرق برق لباس، تہذیب و تمدن ہی اگر دلیل حقانیت و ثبوت صداقت ہوتاہے،تو آخر بڑی بڑی پرشوکت،پرقوت،پر ثروت ،نافرمان قومیں کیوں غارت ہوگئیں؟ بابل و کلدانیہ کا تمدن کیا ہوگیا؟اہرام مصر والی عمارتیں کیوں زمین کے برابر ہوگئیں؟ شاہان عجم کا کروفر کیا ہوا؟ یونانیوں کا دم خم کہاں چلا گیا ؟ قیصر و کسریٰ کے تاج و تخت کیوں تاراج ہوکر رہے؟ اور آج آنکھوں کے سامنے،دیکھتے دیکھتے زارروس کی حکومت قاہرہ کا تختہ کیسا الٹ کررہا،قیصر ولیم اور اس کے آہنی ارادے کیوں خاک میں مل گئے! ہٹلر مع اپنےسارے سامان چنگیزی اور اتنے دم داعیہ کے کیوں فنا کے گھاٹ اتر گیا؟(تفسیر ماجدی)

۔ ۔۔۔خدا کوئی کمزور ہستی نہیں ہے کہ اس کو اندیشہ ہو کہ فورًا نہ پکڑا تو شکار نکل جائے گا۔ اس کی تدبیر نہایت محکم ہوتی ہے اس وجہ سے وہ برابر رسی دراز کیے جاتا ہے۔۔۔۔ (تدبرِ قرآن)

77۔ (آخرت میں)قال ۔اس کا یہ طریق تمسخر و استہزاء تھا۔صحاح کی حدیثوں میں یہ روایت آتی ہے کہ ایک صحابی کا قرضہ ایک مشرک کے ذمہ باقی تھا(اور یہ معلوم ہے کہ مشرکین مکہ آخرت کے منکر تھے)جب انہوں نے زائد تقاضا کیا تو اس نے کہا کہ تم جب تک محمدؐ کی صداقت سے انکار نہ کروگے۔میں قرض نہ چکا ؤں گا،انہوں نے جواب دیا کہ یہ تو ہونے کا نہیں،چاہے تو مرکر پھر زندہ ہوجائے۔وہ یہ سن کر ازراہ تمسخر و تمرد بولا کہ اچھا جب یہ بات ہے کہ میں مرکر دوبارہ بھی آسکتاہوں تو بس جبھی آنا اور اپنا قرضہ چکا نا۔ میں تو اس وقت بھی صاحبِ مال واولاد ہوں گا۔(تفسیر ماجدی)

78۔ یہ ذکر کسی خاص شخص کا نہیں۔ عربی اسلوب کلام میں کسی خاص ذہنیت کو ممثل و مصور کرنا ہو تو یہ انداز اختیار کیا جاتاہے۔گویا مراد اس ذہنیت کے حامل گروہ کا ہر فرد ہوگا۔ ایسے لوگ نعمتوں کو اللہ کا عطیہ نہیں سمجھتے بلکہ اپنے استحقاق ذاتی یا اپنی قابلیت کا کرشمہ سمجھتے ہیں۔اس وجہ سے اس گھمنڈ میں رہتے ہیں کہ وہ ریاست و امارت کے پیدائشی حقدار ہیں۔اگر آخرت ہوبھی تووہ وہاں بھی کوٹھیوں میں عیش کریں گے اور کاروں میں پھریں گے۔ (ترجمہ: مولاناامین احسن اصلاحیؒ)

83۔۔۔۔ عربی میں جب کہیں گے " ارسل الکلب علی الصید " تو اس کے معنی ہوں گے کتے کو شکار پر چھوڑ دیا۔ اسی اسلوب پر یہاں فرمایا ہے کہ ہم نے ان کافروں پر شیاطین کو چھوڑ دیا ہے کہ وہ ان کو دعوت حق کے خلاف جتنا اکسا سکتے ہیں اکسا لیں۔ " اَزَّ یَؤُزُّ " کے معنی برانگیختہ کرنے، بھڑکانے اور اکسانے کے ہیں۔ (تدبرِ قرآن)

84۔ حضورؐ کا جلدی عذاب چاہنا بعد مایوسی ان کے ایمان لانے کے شاید اس وجہ سے ہوکہ ان کا ضرر کفر دوسروں تک متعدی نہ ہوجاوے۔ پس ایسا استعجال منافی شان ِ رحمت کے نہیں۔"(تھانویؒ) (تفسیر ماجدی)

87۔ شفاعت سے متعلق چند اصولی باتیں:  شفاعت کا مقام صرف انبیائے کرام اور شہدائے امت کو حاصل ہوگا، یہ ایک منصب تکریم و تشریف ہے جس پر اللہ تعالیٰ صرف ان لوگوں کو سرفراز فرمائے گا جو اس اکرام و اعزاز کے سزاوار ہوں گے۔۔۔۔۔۔یہ لوگ بھی خدا کی اجازت سے شفاعت کریں گے اور صرف ان لوگوں کے لیے کریں گے جن کے لیے اللہ تعالیٰ اجازت مرحمت فرمائے۔ یہ نہیں ہوگا کہ یہ کسی کی شفاعت کے لیے خود پیش قدمی کریں یا ان لوگوں کے لیے شفاعت کریں جن کے لیے خدا سے ان کو اجازت حاصل نہ ہو۔۔۔۔۔ یہ اپنی شفاعت میں وہی بات کہیں گے جو بالکل حق ہوگی۔ باطل کو حق یا بدی کو نیکی بنانا نہ ان کے شایان شان ہے نہ خدائے علام الغیوب کے آگے کوئی اس کی جسارت کرسکتا ہے۔۔۔۔۔۔جن لوگوں نے شرک و الحاد کی زندگی گزاری یا ایمان کے تو مدعی رہے لیکن ساری زندگی بطالت اور خدا اور رسول کی نافرمانی  میں گزاری ان کے لیے کوئی شفاعت نہیں۔۔۔۔۔۔۔۔ شفاعت کے بل پر گناہوں کے لیے لیسنس دینے یا حاصل کرنے کی کوئی گنجائش باقی نہیں رہ جاتی۔۔۔۔۔۔۔شفاعت کے بل پر گناہوں ہی کو اوڑھنا بچھونا بنا رکھا ہے اور یہود کی طرح امید وار ہیں کہ " سیغفرلنا " ہم امت مرحومہ ہیں، ہمارے سارے گناہ بخش دیے جائیں گے تو قرآن کی روشنی میں اس خوش فہمی کے لیے کوئی گنجائش نہیں ہے۔ (تدبرِ قرآن)

۔ مَنِ اتَّخَذَ عِنْدَ الرَّحْمٰنِ عَهْدًا، حضرت ابن عباس نے فرمایا کہ عہد سے مراد شہادت لا الہ الا اللہ ہے، بعض نے فرمایا کہ عہد سے مراد حفظ کتاب اللہ ہے خلاصہ یہ ہے کہ شفاعت کرنے کا حق ہر ایک کو نہیں ملے گا بجز ان لوگوں کے جو ایمان کے عہد پر مضبوط رہے۔ (روح) (معارف القرآن)

91۔ یہود کے نزدیک عزیرؑ اللہ کے بیٹے ہیں اور نصاریٰ عیسیٰؑ کو اللہ کا بیٹا کہتے ہیں۔مشرکین مکہ فرشتوں کو اللہ کی بیٹیاں کہتے تھے اور دوسرے مشرکین کے دیوتا اور دیویاں سب اللہ کے بیٹے اور بیٹیاں یا ان کی اولاد ہیں۔(تیسیر القرآن)

96۔ (خلائق کے قلوب میں بلا اسباب ظاہری کے)مشاہدہ یہ ہے کہ بے غرض ،متدین، مخلص،خادم خلق و عبادت گزار سے لوگوں کو محبت پیدا ہوجاتی ہے۔متقیوں کے علاوہ اگر کسی کو کہیں محبوبیت حاصل ہوتی ہے تو وہاں کوئی نہ کوئی دوسرا سبب قریبی اور ظاہری موجود ہوتا ہے۔مثلاًعزیز داری،ذاتی دوستی،ہم وطنی،ہمسائیگی وغیرہ بے غرض و بے لوث محبوبیت صرف اہل صلاح و تقویٰ ہی کو حاصل رہتی ہے ۔"اور اس کا یہ مطلب نہیں کہ اس سے کسی کو بغض نہ ہوگا، بلکہ مقصود قرآن و حدیث کا یہ ہے کہ عام خلائق جن کا نہ کوئی نفع اس مومن سے وابستہ ہے، نہ کوئی ضرر،وہ اس سے محبت کرتے ہیں،چنانچہ مشاہدہ ہے اور اہل انتفاع کا محبت کرنا جیساکہ نفع رساں کفار سے بھی لوگوں کو محبت ہوتی ہے، یا اہلِ تضرر کا بغض کرنا جیساکہ ظالموں کو مسلمانوں سے ہوتاہے،قابل اعتبار نہیں، کیونکہ درحقیقت وہ محبت اور بغض  اپنے نفع اور ضرر سے ہے،اگر دونوں سے قطع نظر کی جاوے،اس وقت مومن کی صفات  میں اثر یہ ہے کہ اس سے عام قلوب کا استجلاب ہوتاہے"۔(تھانوی)(تفسیر ماجدی)

۔۔۔۔۔بخاری، مسلم، ترمذی، وغیرہ نے حضرت ابوہریرہ سے روایت نقل کی ہے کہ رسول اللہ ﷺ نے فرمایا کہ حق تعالیٰ جب کسی بندے کو پسند فرماتے ہیں تو جبرئیل امین سے کہتے ہیں کہ میں فلاں آدمی سے محبت کرتا ہوں تم بھی ان سے محبت کرو۔ جبرئیل امین سارے آسمانوں میں اس کی منادی کرتے ہیں اور سب آسمان والے اس سے محبت کرنے لگتے ہیں پھر یہ محبت زمین پر نازل ہوتی ہے (تو زمین والے بھی سب اس محبوب خدا سے محبت کرنے لگتے ہیں) اور فرمایا کہ قرآن کریم کی یہ آیت اس پر شاہد ہے یعنی (آیت) اِنَّ الَّذِيْنَ اٰمَنُوْا وَعَمِلُوا الصّٰلِحٰتِ سَيَجْعَلُ لَهُمُ الرَّحْمٰنُ وُدًّا (روح المعانی) اور ہرم بن حیان نے فرمایا کہ جو شخص اپنے پورے دل سے اللہ تعالیٰ کی طرف متوجہ ہوجاتا ہے تو اللہ تعالیٰ تمام اہل ایمان کے دل اس کی طرف متوجہ فرما دیتے ہیں۔ (قرطبی) (معارف القرآن)

۔  آیت سے یہ بات صاف ہوجاتی ہے کہ زبان قرآن کو صاحبِ قرآن ہی کی زبان پر رکھنا ،اس غرض سے ہے کہ وہ ان کی فہم عالی میں مع اپنے جلی اور خفی پہلوؤں کے پوری طرح آجائے ۔تاکہ وہ اس کے مطالب کو خوب سمجھ کر ان سے حسب موقع انذاروتبشیر دونوں کا کام لیں۔۔۔۔سورہ میں خود لفظ رحمٰن کا باربار آنا،اور مادہ رحمت  کا تو اس سے بھی زیادہ کثرت کے ساتھ آنا ،اس امر پر گواہ ہے کہ سورت کا مقصود سب سے زیادہ خدائے تعالیٰ کی صفت رحم پر زور دینا ،اور اس کی رحمت کو مطلق اور بلا بدل و معاوضہ مودت میں پیش کرنا ہے۔ مسیحیوں کو سب سے بڑا دھوکا اللہ کی صفت رحمت سے لگاہے،اور اسی ایک صفت کے نہ سمجھنے سے وہ مسیح پرستی کے شرک میں جا پڑے ہیں،مسیحیت کا سارا فلسفہ  دو لفظوں میں یہ ہے کہ بندوں کی گنہگاری دیکھ کر خدا ان سے روٹھ گیا،اور اس کی صفتِ عدل کا تقاضا یہ ہوا کہ سب کو جہنم میں جھونک دینا چاہئے،لیکن اس کا رحم و کرم اس پر آمادہ نہیں ہوتاتھا۔اس کی تدبیر اُس نے یہ کی کہ وہ خود ایک انسان کے قالب میں ظاہر ہوکر دنیا میں آئے،اپنے ایک اقنوم کو اپنا بیٹا بناکر بھیجے ،اور ساری مخلوق کے گناہوں کا بوجھ اپنے اوپر لے کر سب کی طرف سے کفارہ کو تیار ہوجائے یعنی خود صلیب پر موت پاکر ایک مختصر مدت(تین دن)کیلئے دوزخ میں چلا جائے،اور سب کی طرف سے معاوضہ بن کر، کفارہ ہوکر سب کو نجات دلائے۔۔۔گویا خدا، بلامعاوضہ، بلاکفارہ، بلابدل، رحم و مغفرت سے کام لے ہی نہیں سکتا!۔ مسیحیت کے اس سارے بنیادی فلسفہ کی تردید کیلئے قرآن کا ایک لفظ رحمٰن کافی ہے یعنی اسلام کا خدا ایسا خداہے، جو مطلقاً رحم پر قادر ہے۔اس صفت رحمت کے ظہور کیلئے وہ بے بسی اور مجبوری کے ساتھ کفارہ و معاوضہ کا انتظار نہیں کیا کرتا۔(تفسیر ماجدی)