2۔ قرآن مجید سے رسول اللہ ؐکے تعب اور مشقت اٹھانے کی خاص صورتیں دو ثابت ہیں ۔ایک یہ کہ آپؐ کافروں کے ردّو انکار پر غم و حزن بہت زیادہ کیا کرتے تھے۔دوسرے یہ کہ شب میں آپؐ قرأت قرآن کے وقت قیام بہت زیادہ طویل فرماتے تھے،یہاں تک کہ پائے مبارک پر ورم بھی آجاتاتھا۔(تفسیر ماجدی)

5۔ عَلَى الْعَرْشِ اسْتَوٰى۔عرش الٰہی کے متعلق جو کچھ نصوص سے ثابت ہے وہ یہ ہے کہ اس کے پائے ہیں۔جنہیں خاص فرشتے اٹھائے ہوئے ہیں۔اور بالخصوص قیامت کے دن آٹھ فرشتے اسے اٹھائے ہوئے ہوں گے اور یہ عرش سب آسمانوں کے اوپر ہے اور انہیں قبہ کی طرح گھیرے ہوئے ہے۔(تیسیر القرآن)

6۔ اللہ کی مخلوق کہاں کہاں ہے؟۔  ثریٰ کے لغوی معنیٰ صرف گیلی مٹی ہے جو زمین کی تہوں میں ہے۔اور یہ لفظ عموماً ثریا (کہکشاں)کے مقابلہ میں آتاہے ۔ثریا سے مراد انتہائی بلندی اور ثریٰ سے مراد انتہائی پستی یا گہرائی لی جاتی ہے۔(تیسیر القرآن)

7۔ اخفیٰ اور سرّ کا لغوی فرق:۔  اخفیٰ   کا لفظ سرّ سے زیادہ ابلغ ہے۔ سرّکا معنی پوشیدہ یا راز کی بات ہے۔جو آپ کسی دوسرے سے کہہ دیں اور اسے تاکید کردیں کہ وہ اور کسی کو نہ بتائے۔اور اخفیٰ سے مراد وہ بات یا وہ خیال ہے جو کسی کے دل میں آئے لیکن وہ کسی سے بھی اس کا ذکر تک نہ کرے ۔اس سے پہلی آیت میں اللہ کی وسعت قدرت و تصرف اور اختیار بیان کیا گیا تھا ۔اس آیت میں لامحدود وسعت علم کا بیان ہواہے۔یعنی قریش کو بتایا جارہاہے کہ اللہ تمہاری سب  سازشوں ،شرارتوں  اور کارستانیوں سے پوری طرح واقف ہیں۔(تیسیر القرآن)

8۔ الْاَسْمَآءُ الْحُسْنٰى۔  اسماء سے مراد نام ہیں۔ اور احادیث صحیحہ میں ننانوے نام مذکور ہیں۔جبکہ کتاب و سنت کا استقصاء کرنے پر کئی اور نام بھی ملتے ہیں ۔اور اسماء سے مراد صفات بھی ہیں اور اللہ تعالیٰ کے یہ سب نام اللہ تعالیٰ کی صفات ہی کا اظہار کرتے ہیں۔بالفاظ دیگر یہ سب صفاتی نام ہیں ۔مگر ان میں سے دونام ایسے ہیں جو صرف اللہ ہی کے ساتھ مخصوص ہیں،کسی دوسری مخلوق کے یہ نام نہیں ہوسکتے ایک اللہ اور دوسرا رحمٰن۔(تیسیر القرآن)

9۔ قرآن کے انداز بیان سے یہ معلوم ہوتاہے کہ اس قدر تفصیل کے ساتھ موسیٰؑ کا قصہ پہلی بار اسی سورہ میں بیان ہواہے اور قرآن کے مخصوص طرز بیان کی بناپر اس میں قریش کےکئی اعتراضات کے جوا ب از خود آگئے ہیں جو وہ وقتاً فوقتاً کرتے رہتے تھے۔(تیسیر القرآن)

10۔امْكُثُوْا۔ نحاس نحوی نے کہاہے یہاںلفظ امکثوا آیا ہے نہ کہ اقیموا ۔اس لئے کہ اقامۃ آتاہے مستقل قیام کیلئے ۔۔۔۔یہ خیال ضعیف ساہے لیکن اغلب یہ ہے کہ علاوہ زوجۂ محترمہ کے کوئی چھوٹا سا قافلہ ساتھ ہو جیساکہ ابن حبان وغیرہ کی رائے ہے، اور صیغۂ جمع کا اطلاق حقیقت پر ہو ۔حقیقت کو چھوڑ کر مجاز تسلیم کرنے کیلئے تو کوئی وجہ بھی قوی ہونا چاہئے ۔۔۔۔روایت توریت سے بھی اسی آخری خیال کی تائید ہوتی ہے،آپ جب چلے ہیں تو آپ کے ساتھ بکریوں کا گلہ بھی تھا اور جب گلہ تھا تو کچھ گلہ بان بھی ضرور ہمراہ ہوں گے۔۔۔۔اٰتِیْكُمْ۔میں جمع کا صیغۂ مخاطب اسی قول کو اغلب بتاتاہے کہ ایک پورا قافلہ ساتھ میں تھا۔ صوفیہ کہتے ہیں کہ ممکن  ہے صاحبِ کشف خود اپنے کشف کی حقیقت سے بے خبر ہو،حضرت موسیٰؑ کو ایک آگ کی سی روشنی مکشوف ہوئی اور وہ اسے متعارف آگ ہی سمجھے۔(تفسیرماجدی)

12۔۔۔۔لہٰذا ان احادیث سے استدلال کر کے اگر کوئی شخص آج کی مسجدوں کے فرش پر جوتے لے جانا چاہے تو یہ صحیح نہ ہوگا۔ البتہ گھاس پر یا کھلے میدان میں جوتے پہنے پہنے نماز پڑھ سکتے ہیں۔ رہے وہ لوگ جو میدان میں نماز جنازہ پڑھتے وقت بھی جوتے اتارنے پر اصرار کرتے ہیں، وہ در اصل احکام سے ناواقف ہیں۔ (تفہیم القرآن)

20۔ عصائے موسیٰ کو کہا کہ یہ تیرے ہاتھ میں کیا ہے؟ وہ بولا عصا،پھر اس نے کہا اسے زمین پر پھینک دے، اس نے زمین پر پھینک دیا، اور وہ سانپ بن گیا:"۔(خروج۔ 4: 2-4)یہ واضح رہے کہ مصر میں جہاں موسیٰؑ کو تبلیغ کرنی تھی ،سانپ کی حیثیت ایک دیوتا کی تھی، اور اس کی پوجا ہواکرتی تھی۔(تفسیر ماجدی)

21۔ عصائے موسیٰ کے سانپ کے نام اور اوصاف:۔  لاٹھی کے اس طرح سانپ بن جانے کیلئے قرآن نے مختلف مقامات پر تین الفاظ استعمال کئے ہیں(1)اس مقام پر حیۃ کا لفظ ہے جو ہر قسم کے سانپ کیلئے بولا جاسکتاہے ۔(2)جانّ یعنی سفید پتلا اور لمبا سا سانپ ،سانپ کی سٹک(27: 10)اور(3)بہت بڑا سانپ۔اژدھا(7: 107)یعنی لاٹھی جب پھینکی جاتی تو پہلے و ہ پتلا سا سانپ بنتی تھی۔ پھر لحظہ بہ لحظہ اس کے جسم میں اضافہ بھی ہونے لگتا تھا تاآنکہ وہ بہت بڑا سانپ بن جاتی تھی۔(تیسیرا لقرآن)

ـــــ ایسے سرکش و جابر حکمران کی طرف بھیجا جارہاتھا جو شخصی اور قومی، دونوں اعتبار سے حضرت موسیٰؑ کا جانی دشمن تھا۔ دعوت کے آغاز ہی میں اس پر یہ بات واضح کرنا ضروری تھا کہ اس نے کوئی غلط اقدام کیا تو موسیٰؑ بھی خالی ہاتھ نہیں آئے ہیں۔(ترجمہ: مولانا امین احسن اصلاحیؒ)

25۔  یعنی  میرے  دل  میں  اس عظیم مذہب  کو سنبھالنے  کی ہمت  پیدا  کردے  اور میرا   حوصلہ  بڑھادے۔  چونکہ  یہ ایک  بہت  بڑا  کام حضرت  موسیٰ ؑ   کے سپرد  کیا جا رہا تھا  جس کیلئے  بڑے  دل  گردے  کی ضرورت  تھی  اس لئے  آپؑ  نے دعا  کی  کہ  مجھے  وہ صبر  ، ثبات  ، تحمل  ،  بے  خوفی اور  عزم عطا کر جو اس  کام کیلئے  ضروری  ہے ۔ (تفہیم القرآن)

28۔  تلمود میں  ایک  لمبی  چوڑی  کہانی  - فرعون  کا تاج  اتار  کر اپنے  سر پر  رکھ  لیا  ( کہیں  ڈاڑھی  کھینچی  اور طمانچہ  مارا  ،  کہیں  ایک  چھڑی  سر پر ماری) ۔ ہیرے  اور آگ  ۔ یہ بات  عقل  کے خلاف  ہے  کہ اللہ تعالی  کسی ہلکے  یا توتلے  آدمی  کو اپنا  رسول  مقرر  فرمائے  ۔ رسول  ہمیشہ   شکل   و صورت   ، شخصیت  اور صلاحیتوں  کے  لحاظ  سے بہترین  لوگ  ہوئے  ہیں ۔  قرآن  اور بائبل   میں  حضرت   موسیٰ  ؑ  کی  بعد  والی  تقریر یں  کمال  فصاحت  اور  طلاقت  لسانی  کی شہادت  دیتی  ہیں  ۔(تفہیم القرآن)

-  یہ امر  یہاں  ملحوظ  رہے  کہ اس دور میں  ابلاغ  کا واحد  ذریعہ  صرف  کسی خطیب  کی خطابت  و زبان آوری  ہی تھی ۔  یہی  وجہ  ہے کہ  اس زمانے  میں خطیبوں  کو سوسائٹی  میں سب  سے  زیادہ  عزت  حاصل   تھی ۔۔۔۔۔عرب  میں  تو یہ حال  تھا  کہ جو شخص  قبیلہ  کا خطیب  ہوتا  وہ اس  کا قائد  ہوتا۔  اب   پریس کی ایجاد  نے قلم  کی اہمیت   بڑھادی  ہے  ۔۔۔۔۔ اسی وجہ  سے  حضرت  ہارون  کو اپنا  شریک  کا ر بنانے  کی دعا  کی جو زور  دار  خطیب  تھے ۔  ان  آیات  سے یہ  بات  تو  ضرور معلوم ہوتی  ہے   کہ حضرت  موسیٰ ؑ  کوئی  زبان  آور  اور   زوردار  خطیب  نہیں تھے  لیکن  یہ بات  کہیں  سے   نہیں نکلتی  کہ ان  کی زبان  میں  لکنت  تھی ۔ جو اسرائیلیات  ید بیضا  کو برص  کا نتیجہ  قرار دے سکتے  ہیں  وہ  لکنت  کا عیب  بھی  تلاش  کر سکتے  ہیں۔ (تدبر قرآن)

30۔ بائیبل کی روایت کے مطابق حضرت ہارون حضرت موسیٰ سے تین برس بڑے تھے (خروج) (تفہیم القرآن)

40۔ مفصل قصہ سورہ قصص میں آئے گا۔ مرشد  تھانوی ؒ نےفرمایا کہ آیت میں دلالت ہے کاملین سے لغزش صادر ہونے پر اور اس پر بھی کہ اس کی ایک نئی شان  ہوتی ہے۔۔۔۔حضرت موسیٰؑ کو اس واقعۂ  قتل غیر عمد کے بعد فکر و تردد دوطرح کا لاحق ہوا ،ایک تو خوف عتابِ الٰہی  سو وہ تو اس طرح دور ہوا کہ استغفار کی توفیق ہوئی اور اسے قبول کیا گیا۔ دوسرے خوف انتقام ِ حکومت تو اس سے نجات یوں حاصل ہوئی کہ مصر سے مدین پہنچا دیا گیا۔مرشد تھانوی نے فرمایا کہ اکابر کی لغزش اگرچہ عقاب و مواخذہ نہیں ہوتی ،مگر اس کے باوجود بھی ان پر ندامت غالب ہوتی ہے۔۔۔۔یٰموسیٰ۔مکالمہ خداوندی میں باربار یا موسیٰؑ کا آنا عجب نہیں دلدہی و اکرام کیلئے ہو۔(تفسیر ماجدی)

۔ ۔۔۔اللہ تعالیٰ نے حضرت موسیٰ کی والدہ کو جب یہ ہدایت فرمائی کہ بچہ کو دریا میں ڈال دو تو ساتھ ہی یہ اطمینان بھی دلادیا کہ ہم بچے کو پھر تمہارے پاس واپس لائیں گے۔ (تدبرِ قرآن)

45۔ معلوم ہوتا ہے کہ یہ اس وقت کی بات ہے جب حضرت موسیٰ مصر پہنچ گئے اور حضرت ہارون عملاً ان کے شریک کار ہوگئے۔ اس وقت فرعون کے پاس جانے سے پہلے دونوں نے اللہ تعالیٰ کے حضور یہ گزارش کی ہوگی۔ (تفہیم القرآن)

47۔ فرعون کو دعوت دینے کے پانچ نکات:۔ گویا فرعون کے سامنے دعوت کا پانچ نکاتی پروگرام ان پیغمبروں کو دیا گیا ان میں سے چار تو دعوت دین کے بنیادی نکات اور ایک مطالبہ ہے۔پہلی بات یہ تھی کہ اسے کہنا کہ ہم تمہارے پروردگار کے رسول ہیں۔ اس میں دونکات آگئے ۔ایک یہ کہ لوگوں کے پروردگار تم نہیں بلکہ وہ ذات ہے جو ہر چیز کا، ہمارا اور خصوصاً تمہارا بھی پروردگار ہے،دوسرا نکتہ یہ تھا کہ ہم دونوں اسی پروردگار کے بھیجے ہوئے تیرے پاس آئے ہیں خود نہیں آئے۔گویا اس ایک جملہ میں توحید و رسالت کا ذکر آگیا ۔تیسرا نکتہ یہ تھا کہ بنی اسرائیل پر ظلم کرنا چھوڑ دے اور انہیں اپنی غلامی سے آزاد کر اور انہیں ہمارے ہمراہ کردے تاکہ وہ آزادانہ زندگی بسر کرسکیں اور یہ تیسرا نکتہ خاص اس قوم کے حالات کے مطابق تھا۔چوتھا نکتہ یہ تھا کہ جو شخص اس راہ ہدایت یعنی اللہ کی توحید اور ہماری رسالت پرایمان لے آئے گااور اللہ ہی کی عبادت اور ہماری اطاعت کرے گا اس کیلئے اس دنیا میں امن اور سلامتی ہوگی اور آخرت میں بھی۔اورپانچواں نکتہ یہ تھا کہ ہمیں بذریعہ وحی اس بات کی خبردی گئی ہے کہ جو شخص ہماری دعوت سے منہ پھیرے گا آخرت میں اس کیلئے عذاب ہوگا۔ گویا چوتھے اور پانچویں نکتہ میں ایمان کے نہایت اہم جزء ایمان بالآخرت کی دعوت پیش کی گئی تھی۔اور ساتھ ہی یہ بات کہہ دینا کہ ہمارا یہ دعویٰ رسالت بے دلیل نہیں بلکہ ہم تیرے پاس تیرے رب کی نشانی لیکر آئے ہیں۔(تیسیر القرآن)

۔ فارسل معنا بنی اسرائیل ولاتعذبھم اس آیت کی تفسیر سورة اعراف کی آیات 105-104 کے تحت گزر چکی ہے۔ وہاں ہم نے وضاحت کے ساتھ یہ بھی بتایا ہے کہ حضرت موسیٰ بنی اسرائیل کو کہاں لے جانا چاہتے تھے اور ان لوگوں کے خیال کی تردید بھی کی ہے جنہوں نے حضرت موسیٰ کی دعوت کو ایک قوم پرست لیڈر کی تحریک آزادی کا رنگ دینے کی کوشش کی ہے۔ (تدبرِقرآن)

48- اس واقعے کو بائیبل اور تلمود میں جس طرح بیان کیا گیا ہے اسے بھی ایک نظر دیکھ لیجیے تاکہ اندازہ ہو کہ قرآن مجید انبیاء (علیہم السلام) کا ذکر کس شان سے کرتا ہے اور بنی اسرائیل کی روایات میں ان کی کیسی تصویر پیش کی گئی ہے۔ بائیبل کا بیان ہے کہ پہلی مرتبہ جب خدا نے موسیٰ سے کہا کہ " اب میں تجھے فرعون کے پاس بھیجتا ہوں کہ تو میری قوم بنی اسرائیل کو مصر سے نکال لائے " تو حضرت موسیٰ نے جواب میں کہا " میں کون ہوں جو فرعون کے پاس جاؤں اور بنی اسرائیل کو مصر سے نکال لاؤں "۔ پھر خدا نے حضرت موسیٰ کو بہت کچھ سمجھایا، ان کی ڈھارس بندھائی، معجزے عطا کیے، مگر حضرت موسیٰ نے پھر کہا تو یہی کہا کہ اے خداوند، میں تیری منت کرتا ہوں کسی اور کے ہاتھ سے جسے تو چاہے یہ پیغام بھیج " (خروج  4)تلمود کی روایت اس سے بھی چند قدم آگے جاتی ہے۔ اس کا بیان یہ ہے کہ اللہ تعالیٰ اور حضرت موسیٰ کے درمیان سات دن تک اسی بات پر رد و کد ہوتی رہی۔ اللہ کہتا رہا کہ نبی بن، مگر موسیٰ کہتے رہے کہ میری زبان ہی نہیں کھلتی تو میں نبی کیسے بن جاؤں۔ آخر اللہ میاں نے کہا میری خوشی یہ ہے کہ تو ہی نبی بن۔ اس پر حضرت موسیٰ نے کہا کہ لوط کو بچانے کے لیے آپ نے فرشتے بھیجے، ہاجرہ جب سارہ کے گھر سے نکلی تو اس کے لیے پانچ فرشتے بھیجے، اور اب اپنے خاص بچوں (بنی اسرائیل) کو مصر سے نکلوانے کے لیے آپ مجھے بھیج رہے ہیں۔ اس پر خدا ناراض ہوگیا اور اس نے رسالت میں ان کے ساتھ ہارون کو شریک کردیا اور موسیٰ کی اولاد کو محروم کر کے کہانت کا منصب ہارون کی اولاد کو دے دیا۔۔۔۔۔ یہ کتابیں ہیں جن کے متعلق بےشرم لوگ کہتے ہیں کہ قرآن میں ان سے یہ قصے نقل کرلیے گئے ہیں۔ (تفہیم القرآن)

49۔۔۔۔ سورة المؤمن آیات 28 تا 34 اور سورة زخرف آیت 53 کو غور سے دیکھیے۔ یہ آیتیں اس بات کی شہادت دیتی ہیں کہ اللہ تعالیٰ اور فرشتوں کی ہستی سے اس کو انکار نہ تھا۔ البتہ جس چیز کو ماننے کے لیے وہ تیار نہ تھا وہ یہ تھی کہ اس کی سیاسی خدائی میں اللہ کا کوئی دخل ہو اور اللہ کا کوئی رسول آ کر اس پر حکم چلائے۔ (تفہیم القرآن)

50۔۔۔۔  اور انسان کی شعوری زندگی کے لیے رہنمائی کی وہ شکل موزوں نہیں ہو سکتی جو مچھلی اور مرغی کی رہنمائی کے لیے موزوں ہے۔ اس کی موزوں ترین شکل یہ ہے کہ ایک ذی شعور انسان اس کی طرف سے انسانوں کی ہدایت پر مامور ہو اور وہ ان کی عقل و شعور کو اپیل کر کے انہیں سیدھا راستہ بتائے۔ (تفہیم القرآن)

51۔۔۔۔۔۔یعنی وہ خود بھی اس بات پر جھلا گیا ہو کہ اس مذہب سے ہمارے تمام بزرگوں کی گمراہی لازم آتی ہے، اور ساتھ ساتھ اس کا مقصد یہ بھی ہو کہ اپنے اہل دربار اور عام اہل مصر کے دلوں میں حضرت موسیٰ کی دعوت کے خلاف ایک تعصب بھڑکا دے۔ (تفہیم القرآن)

52۔ یہ ایک نہایت ہی حکیمانہ جواب ہے۔۔۔۔۔فرعون کا مقصد، جیسا کہ اوپر بیان ہوا، سامعین کے، اور ان کے توسط سے پوری قوم کے دلوں میں تعصب کی آگ بھڑکانا تھا۔۔۔۔۔آپ نے فرمایا کہ وہ لوگ جیسے کچھ بھی تھے، اپنا کام کر کے خدا کے ہاں جا چکے ہیں۔۔۔۔ان سے جو کچھ بھی معاملہ خدا کو کرنا ہے اس کو وہی جانتا ہے۔ (تفہیم القرآن)  

56۔ یعنی آفاق و اَنفُس کے دلائل کی نشانیاں بھی، اور وہ معجزات بھی جو حضرت موسیٰ کو دیے گئے تھے۔۔۔۔ (تفہیم القرآن)  

63 – 64  -  اعلیٰ  کلچر  کے تحفظ  کا خبط   ۔(بیان القرآن)

63۔ یہ وہ بات نقل ہوئی ہے جو خفیہ مجلس میں فرعون اور اس کے اعیان نے جادوگروں کو حضرت موسیٰ اور حضرت ہارون کے خلاف بھڑکانے کے لئے کی۔ پہلی بات تو انہوں نے جادوگروں کے اندر پیشہ ورانہ رقابت کا جذبہ بھڑکانے کے لئے یہی کہی کہ یہ دونوں ماہر جادوگر ہیں۔ مقصد یہ کہ یہ اسی ہتھیار کے ساتھ میدان میں آئے ہیں جو تمہارے پاس بھی ہے تو اگر تم نے ان کے مقابلہ میں کمزوری دکھائی تو سب سے زیادہ ہوا خیزی تمہاری ہی ہوگی۔ دوسری بات یہ سمجھائی کہ یہ اپنے جادو کے زور سے ہم پر اپنا رعب جمانا اور بنی اسرائیل کو منظم کر کے تمہیں، تمہارے ملک سے بےدخل کرنا چاہتے ہیں۔ تیسری بات یہی کہی کہ اس وقت تمہاری نہایت اعلیٰ اور شاندار تہذیب، جو تم نے اتنی محنت سے فروغ دی ہے، سخت خطرے میں ہے۔ اگر موسیٰ و ہارن اپنے ارادوں میں کامیاب ہوگئے تو اس اعلیٰ تہذیب و تمدن کا یک قلم خاتمہ کردیں گے۔ ان باتوں پر غور کیجیے تو معلوم ہوگا کہ ارباب اقتدار اہل حق کے مقابلہ میں ہمیشہ اسی طرح کے حربے استعمال کر تے رہے ہیں جس قسم کے حربے فرعون اور اس کے اعیان نے حضرت موسیٰ اور حضرت ہارون کے خلاف استعمال کرنے کی کوشش کی۔ یہ امر بھی ملحوظ رہے کہ تمہارا ملک اور تمہاری تہذیب کے الفاظ میں خطاب محض عوام فریبی کے لئے ہے ورنہ فرعونی حکومت اور فرعونی تہذیب میں ایک مخصوص ارسٹوکریسی کے سوا دوسروں کی حیثیت صرف غلاموں اور قلیوں کی تھی لیکن ارباب اقتدار جب عوام کو اپنے کسی مقصد کے لئے استعمال کرنا چاہتے ہیں تو اسی طرح ان کو نشہ پلاتے اور بیوقوف بناتے ہیں۔ (تدبرِ قرآن)

66۔ اس سےقطع نظر کہ توریت میں عصابجائے موسیٰؑ کے ہارونؑ کے ہاتھ میں دے دیا گیا ہے، تو ریت و قرآن  مجید کے بیان میں بڑا فرق یہ ہے کہ توریت میں سحر کے اثر سے رسیوں کا اور لاٹھیوں کا سانپ بن جاناہے۔بہ خلاف اس کے قرآن میں صرف اتنا ہے کہ ساحروں کی نظر بندی کے اثر سے حضرت موسیٰؑ کو (یا اور دیکھنے والوں کو بھی)وہ رسیاں اور لاٹھیاں دوڑتی پھرتی نظر آئیں،ان کے واقعۃً سانپ بن جانے کا قرآن مدعی نہیں۔(تفسیر ماجدی)

69۔  معجزہ اور سحر کا ذوق:   ۔۔۔۔حضرات انبیاء سے جو معجزے صادر ہوتے ہیں ان کے اندر ایک سطوت و جلالت ہوتی ہے۔۔۔۔۔یہ لوگ جب دنیا سے رخصت ہوتے ہیں تو تاریخ کا ورق الٹ کر رخصت ہوتے ہیں۔۔۔۔۔بتائیے کون ساحر ہے جس کا انسانی زندگی کے کسی شعبہ میں کوئی ادنیٰ سے ادنیٰ کارنامہ بھی ہو۔۔۔۔(تدبرِ قرآن)

72۔ ۔۔۔دیکھا آپ نے ایمان کا کرشمہ ! یہی وہی جادوگر ہیں جن کا حال قرآن میں دوسری جگہ یہ بیان ہوا ہے کہ جب وہ مقابلہ کے لئے بلائے گئے تو انہوں نے بڑی لجاجت کے ساتھ فرعون سے اپنی کامیابی کی صورت میں انعام کی درخواست کی یا اب ایمان کے نور نے ان کے دلوں کو اس طرح منور کردیا کہ خدا اور آخرت کے سوا اس دنیا کی کسی چیز کی ان کی نگاہوں میں کوئی وقعت باقی نہیں رہی ہے یہاں تک کہ وہ اپنے ایمان کی حفاظت کی راہ میں اپنی زندگی بھی قربان کرنے کے لئے بالکل تیار ہیں۔ (تدبرِ قرآن)

78۔ بنی اسرائیل کو ملک چھوڑنے کی اجازت فرعون نے دے دی تھی لیکن ان کی روانگی کے بعد اس کی رائے بدل گئی اور اس نے اپنے سرداروں اور فوج کے ساتھ ان کا تعاقب کیا۔یہ تعاقب اس نے سمندر میں بننے والے خشک راستے میں بھی جاری رکھا۔جب بنی اسرائیل دوسرے کنارے پر جاپہنچے تو اللہ تعالیٰ کے حکم سے سمندر کا پانی ،جو دوحصوں میں منقسم تھا،پھر مل گیا ور فرعون اپنی فوج سمیت سمندر کی بے پناہ موجوں کی لپیٹ میں آگیا۔(ترجمہ: مولانا امین احسن اصلاحیؒ)

ــ سیدنا موسیٰؑ اور بنو اسرائیل کی ہجرت:   ۔۔۔۔وہاں سے ہجرت کرکے آپ شام و فلسطین کی طرف جانا چاہتے تھے۔جو بنی اسرائیل کا آبائی وطن تھا وہ سیدنا یوسفؑ کے زمانہ میں یہاں آکر آباد ہوئے تھے اور اس دور تک ان کی نسل کے افراد ایک لاکھ سے بہت زیادہ ہوچکے تھے ۔سیدنا موسیٰؑ نے اس قافلہ کو لے کر بحر احمر کا رخ اختیار کیا۔ان دنوں نہر سویز موجود نہیں تھی اور آپ کا ارادہ یہ تھا کہ بحر احمر کے کنارے کنارے چل کر جزیرہ نمائے سینا میں داخل ہوجائیں گے۔۔۔۔اس طرح اللہ تعالیٰ نے بنواسرائیل پر بیک وقت تین احسان فرمائے(1)فرعونیوں سے نجات،(2)سرپر کھڑی موت کے بعد زندگی ،(3)دشمن کی مکمل طورپر ہلاکت۔یہ واقعہ 10 محرم کو پیش آیا تھا۔(تیسیر القرآن)

81۔ ۔۔۔محض کثیر المغفرت ہونا تو ظاہرہی ہے لیکن امام رازی نے یہاں یہ نکتہ لکھاہے کہ جس طرح بندہ کیلئے اس کی کثرت ذنوب کی بناپر تین درجے ہوسکتے ہیں، ایک ظالم ،دوسرا ظلوم، تیسرا  ظلّام۔حق تعالیٰ نے اس کے مقابل تین نام رکھے  ہیں ،ایک غافر دوسرے غفور اور تیسرے غفار۔(تفسیر ماجدی)

82۔ یعنی مغفرت کے لیے چار شرطیں ہیں۔ اول توبہ، یعنی سرکشی و نافرمانی یا شرک و کفر سے باز آجانا۔ دوسرے، ایمان، یعنی اللہ اور رسول اور کتاب اور آخرت کو صدق دل سے مان لینا۔ تیسرے عمل صالح، یعنی اللہ اور رسول کی ہدایات کے مطابق نیک عمل کرنا۔ چوتھے اہتداء، یعنی راہ راست پر ثابت قدم رہنا اور پھر غلط راستے پر نہ جا پڑنا۔ (تفہیم القرآن)

84۔سیدنا موسیٰؑ کا طورپر پہنچ جانا:۔اللہ تعالیٰ نے موسیٰؑ سے وعدہ فرمایا تھا کہ کوہ طورکے دامن میں پہنچ کر چالیس راتیں وہاں بسر کرنا تو تمہیں بنی اسرائیل کی ہدایت کیلئے کتاب ٍتورات  عطا کی جائے گی۔چنانچہ موسیٰؑ نے بنی اسرائیل میں سے ستر آدمی اپنے ہمراہ لئے اور طور کی جانب روانہ ہوگئے۔لیکن آپ کو اللہ تعالیٰ سے ملاقات اور ہم کلامی کا کچھ اتنازیادہ اشتیاق تھا کہ آپ اپنے ہمراہیوں کو پیچھے چھوڑ کر سب سے پہلے منزل ِ مقصود پر جاپہنچے۔اللہ تعالیٰ نے پوچھا کہ "تمہیں اتنی کیا جلدی تھی کہ اپنے ہمراہیوں کو پیچھے چھوڑ کر پہلے ہی یہاں آپہنچے؟"عرض کیا وہ لوگ بھی میرے پیچھے پیچھے یہاں پہنچ رہے ہیں اور مجھے تیری ملاقات کا اشتیاق ان سے پہلے یہاں کھینچ لایاہے۔پھر اسی موقعہ پر آپ نے اپنے پروردگار سے درخواست کی تھی کہ اے میرے پروردگار! مجھے اپنا آپ دکھا دے اور یہ واقعہ سورۂ بقرہ میں بیان ہوچکاہے۔(تیسیر القرآن)

85۔ اللہ تعالیٰ نے حضرت موسیٰؑ کو تورات عطاکرنے کے لیے کوہ طور کی مبارک وادی میں بلایا اور ان کی تربیت کے لیے تیسن دن کی مدت مقرر کی۔حضرت موسیٰؑ فرط شوق میں اور خدا کی رضا طلبی کے لیے عجلت کرکے وقت موعود سے پہلے پہنچ گئے۔یہ عجلت ان کی قوم کے لیے ایک سخت فتنہ بن گئی۔ اس واقعہ کونمایاں کرکے یہ تعلیم دینا مقصود ہے کہ اقامت دین کی جدوجہد کی راہ میں صبر اورانتظار ہی کی روش مصلحت الٰہی ہے۔ نیک سے نیک ارادہ کے ساتھ کی جانے والی عجلت بہتوں کے لیے مزلۂ قدم بن جاتی ہے۔۔۔۔۔ سامری ایک فتنہ پرواز منافق تھا جو اپنے مفسدانہ اغراض کے لیے حضرت موسیٰؑ کی جماعت میں گھساہواتھا۔یہ کشف و کرامت کا ڈھونگ رچانے کے فن سے واقف تھا۔ حضرت موسیٰؑ کی غیر حاضری میں اس نے بت پرستانہ ذہنیت رکھنے والے تمام لوگوں کو جمع کرکے ان کو بچھڑے کا ایک مجسمہ بناکردیا اور وہ لوگ اس کی پوجا میں لگ گئے۔(ترجمہ: مولانا امین احسن اصلاحیؒ)

ـــــ  (نہ کہ معاذ اللہ ہارون نبی نے )سامری اس شخص کا نام نہیں،لقب سے منسوب ہے۔ہمارے قدیم مفسرین کی تحقیق کے بہ موجب قریہ سامرہ کی طرف، یعنی وہاں کا باشندہ "ممکن ہے کہ اس کا باپ دادا سامرہ سے بنی اسرائیل میں آبسا ہو،اور بعد الحاق انہی میں شمار کیا جاتاہو۔"(تھانوی)۔۔۔۔بعض جدید محققین کا خیال ہے کہ قدیم مصری زبان میں سمر کہتے ہیں پردیسی ،غیر ملکی ،بیرونی کو ۔سامری سے مراد ہے کوئی شخص جو غیر اسرائیلی تھا، اور مصر سے اسرائیلیوں کے ساتھ ہوگیا ۔یہود کے ہاں کے ایک مستقل فرقہ کا نام بھی سامریہ(SAMRITIANO)ہے۔ان کی توریت اور سارے مذہبی صحیفے یہود کے مسلم و متعارف توریت اور دوسرے صحیفوں سے کسی قدر مختلف ہیں، اور انہیں ناز اپنی توحید خالص پر ہے۔ہوسکتاہے کہ قرآن کے السامری اور اس  فرقہ کے  درمیان بھی کوئی علاقہ ہو،لیکن یہ فرقہ جہاں تک تاریخ یہود سے پتہ چلتاہے ،حضرت موسیٰؑ کا معاصر نہیں، بہت بعد کے زمانہ کی پیداوار ہے۔(تفسیر ماجدی )

۔ مشہور یہ ہے کہ سامری کا نام موسیٰ ابن ظفر تھا۔ ابن جریر نے حضرت ابن عباس سے روایت کیا ہے کہ موسیٰ سامری پیدا ہوا تو فرعون کی طرف سے تمام اسرائیلی لڑکوں کے قتل کا حکم جاری تھا اس کی والدہ کو خوف ہوا کہ فرعونی سپاہی اس کو قتل کردیں گے تو بچہ کو اپنے سامنے قتل ہوتا دیکھنے کی مصیبت سے یہ بہتر سمجھا کہ اس کو جنگل کے ایک غار میں رکھ کر اوپر سے بند کردیا (کبھی کبھی اس کی خبر گیری کرتی ہوگی) ادھر اللہ تعالیٰ نے جبرئیل امین کو اس کی حفاظت اور غذا دینے پر مامور کردیا وہ اپنی ایک انگلی پر شہد ایک پر مکھن ایک پر دودھ لاتے اور اس بچہ کو چٹا دیتے تھے یہاں تک کہ یہ غار ہی میں پل کر بڑا ہوگیا اور اس کا انجام یہ ہوا کہ کفر میں مبتلا ہوا اور بنی اسرائیل کو مبتلا کیا پھر قہر الٰہی میں گرفتا ہوا۔ اسی مضمون کو کسی شاعر نے دو شعروں میں اس طرح ضبط کیا ہے۔ (از روح المعانی)

           اذا المرء لم یخلق سعیدا تحیرت عقول مربیہ و خاب المومل۔۔۔۔۔فموسی الذی رباہ جبریل کافر و موسیٰ الذی رباہ فرعون مرسل

(ترجمہ) جب کوئی شخص اصل پیدائش میں نیک بخت نہ ہو تو اس کے پرورش کرنے والوں کی عقلیں بھی حیران رہ جاتی ہیں اور اس سے امید کرنے والا محروم ہوجاتا ہے۔ دیکھو جس موسیٰ کو جبرائیل امین نے پالا تھا وہ تو کافر ہوگیا اور جس موسیٰ کو فرعون لعین نے پالا تھا وہ خدا کا رسول بن گیا۔(معارف القرآن)

86۔دوسرا ترجمہ یہ بھی ہوسکتا ہے کہ " کیا وعدہ پورا ہونے میں بہت دیر لگ گئی کہ تم بےصبر ہوگئے ؟ " پہلے ترجمے کا مطلب یہ ہوگا کہ تم پر اللہ تعالیٰ ابھی ابھی جو عظیم الشان احسانات کرچکا ہے، کیا ان کو کچھ بہت زیادہ مدت گزر گئی ہے کہ تم انہیں بھول گئے ؟ کیا تمہاری مصیبت کا زمانہ بیتے قرنیں گزر چکی ہیں کہ تم سرمست ہو کر بہکنے لگے ؟ دوسرے ترجمے کا مطلب صاف ہے کہ ہدایت نامہ عطا کرنے کا جو وعدہ کیا گیا تھا، اس کے وفا ہونے میں کوئی تاخیر تو نہیں ہوئی ہے جس کو تم اپنے لیے عذر اور بہانہ بنا سکو۔ (تفہیم القرآن)

87۔(آگ میں سامری کے کہنے کے مطابق)یہ زیور وہی تھے جو بنی اسرائیل مصر سے نکلتے وقت اہلِ مصر سے مانگ کر لائے تھے۔توریت میں ہے:۔"اور انہوں نے مصریوں سے روپے کے برتن اور سونے کے برتن اور کپڑے عاریت لئے ،اور خداوند نے ان لوگوں کو مصریوں کی نگاہ میں ایسی عزت بخشی کہ انہوں نے انہیں عاریت دی۔(خروج12: 35، 26)"فرعون اور فرعونیوں کی غرقابی کے بعد شریعت اسرائیلی کی روسے یقیناً بنی اسرائیل ان زیوروں کے مالک ہوگئے ہوں گے۔(تفسیر ماجدی)

91۔  تورات کے راویوں نے بچھڑے کے سارے فتنے کو حضرت ہارونؑ کی طرف منسوب کردیا ہے۔قرآن نے جہاں فتنہ کے اصل بانی، سامری کا پتادیا وہاں حضرت ہارونؑ کو بھی اس تہمت سے بری کیا ہے۔فرمایا کہ انہوں نے لوگوں کو فتنہ پردازوں کی شرارت سے آگاہ کردیا لیکن ان کی کسی نے ایک نہ سنی ۔(ترجمہ: مولانا امین احسن اصلاحیؒ)

96۔  یہ تحقیق ہونے کے بعد کہ فتنہ کا بانی سامری ہے حضرت موسیٰؑ نے اس کی جواب طلبی کی۔اس نے بات یہ بنائی کہ مجھے ایک کشف ہوا جو دوسروں کو نہیں ہوا۔ میں نے یہ خاک ایک بچھڑا بناکر اس کے اندرڈال دی ہے جس سے وہ بولنے لگاہے۔ میں نے جو کچھ کیا اس کشف کے زیر اثر کیا۔(ترجمہ: مولانا امین احسن اصلاحیؒ)

ــــــ بعض علماء نے یہاں رسول سے مراد خود موسیٰؑ لئے ہیں۔اس صورت میں یہ جواب سامری کی انتہائی مکاری پر دلالت کرتاہے ،کہ اس طرح اس نے سیدنا موسیٰؑ کی خوشامد کرکے انہیں بھی اپنے حق میں نرم کرلینے کی ایک کوشش کی تھی۔(تیسیر القرآن)

ــ الرسول سے مراد۔  بہ اتفاق مفسرین حضرت جبرائیلؑ ہیں۔ اور یہی تفسیر تابعین و صحابہؓ سے بھی مروی ہے۔۔۔۔۔اختلاف صرف ایک ابو مسلم اصفہانی سے منقول ہے ان کے اقوال تفسیر کبیر میں درج ملیں گے۔۔۔۔بعض اہل باطل بھی بڑے مرتاض ہوتے ہیں، اور ریاضتوں سے کشف و اشراق حاصل ہوجاتاہے کچھ اس طرح یہ شخص سامری معلوم ہوتاہے۔۔۔روایتوں میں آتاہے کہ اس نے حضرت جبرائیلؑ کو گھوڑے پر سوار دیکھ لیا تھا۔ اور یہ بھی دیکھ لیا تھا کہ جہاں ان کے گھوڑے کا سُم پڑتاہے ،گھاس تروتازہ ہوجاتی ہے۔اپنی فراست سے کام لے کر اس نے نتیجہ یہ نکالا کہ ان کی سواری کے نقش قدم کی مٹی میں تازہ حیات بخشی کی تاثیر ہے۔محققین صوفیہ کہتے ہیں کہ کشف و تصرف پر ناز کرنے کی کیسی ممانعت اس آیت سے نکل رہی ہے۔(تفسیر ماجدی)

۔۔۔۔۔ دوسری روایت یہ ہے کہ دریا سے پار ہونے کے بعد حضرت موسیٰ ؑ کو طور پر آنے کی دعوت دینے کے لئے جبرئیل امین گھوڑے پر سوار تشریف لائے تھے ان کو سامری نے دیکھ لیا دوسرے لوگوں کو معلوم نہ ہوسکا اس کی وجہ حضرت ابن عباس کی ایک روایت میں یہ ہے کہ سامری کی پرورش خود جبرئیل امین کے ذریعہ ہوئی تھی جس وقت اس کی ماں نے اس کو غار میں ڈال دیا تھا تو جبرئیل امین روزانہ اس کو غذا دینے کے لئے آتے تھے اس کی وجہ سے وہ ان سے مانوس تھا اور پہچانتا تھا دوسرے لوگ نہیں پہچان سکے۔ (بیان القرآن) (معارف القرآن)

97۔ سامری کی دنیا میں سزا:۔  یعنی اس کو موسیٰؑ نے اچھوت قراردیاکہ کوئی شخص اس سے کسی قسم کا بھی تعلق نہ رکھے۔پھر اس کیلئے مزید سزا یہ تھی کہ وہ خود دوسروں سے کہتاتھا کہ مجھ سے پرے رہنا ،مجھ سے بچ کر رہنا،مجھے ہاتھ نہ لگانا، میں ناپاک ہوں لہذا مجھے نہ چھونا۔بعض مفسرین کہتے ہیں کہ اگر کوئی سامری کو ہاتھ لگاتا یا اسے چھوتا تو سامری اور چھونے والے دونوں کو تپ چڑھ جاتی تھی۔لہذا سامری اس بات پر مجبور تھا کہ دوسروں سے کہے کہ مجھے ہاتھ نہ لگانا،ساتھ ہی موسیٰؑ نے اسے یہ بھی بتادیا کہ یہ نہ سمجھنا کہ تمہارے اس جرم کی سزا پوری ہوچکی بلکہ آخرت میں جو تجھے عذاب ہونے والا ہے وہ بھی کبھی ٹل نہ سکے گا۔(تیسیر القرآن)

ــ چند اشارات: آریا  جو تقریبا  ساڑھے  تین  ہزار  سال قبل  ہندوستان   آئے   تقریبا  وہی  زمانہ  جب  بنی اسرائیل  مصر  سے  نکلے  - آریا   حضرت  ہام کی نسل  سے لیکن  ان میں  کچھ  اسرائیلی  -  برہمن   وہی ہیں  ۔۔۔۔۔جو حضرت موسٰی ؑ   نے  سامری  کے بچھڑے  سے  کیا ان کا  مردہ  کو جلانا  اور راکھ  کو سمندر  یا دریا  میں  بہادینا   ۔ آج کا ہندو اپنے مردوں کے ساتھ یہی کر رہا ہے۔۔۔۔Lost tribes of House of Israel ۔۔۔۔۔گیروا رنگ      (گہرے  زرد رنگ  کی گائے  جو ذبح  کی گئی )  ہنومان  کا پہاڑ   کو اٹھانا – گوسالہ  پرستی  -  اچھوت(Untouchable)   ۔ صحف  ابراھیم  و موسٰی  - موسیٰؑ کے صحیفے    تو ہیں  ۔  صحف  ابراھیم   کہاں ۔ اُپنشد  ( صحف  ابراھیم کا احتمال )  ۔ توحید  کے اثرات  ۔(بیان القرآن)

99۔اس سورۃ کا آغاز بھی کاذکر سے کیا گیا تھا۔یعنی ہم نے یہ ذکر اس لئے نہیں نازل کیا کہ آپ مشقت میں پڑجائیں بلکہ یہ تو  ڈرنے والوں کیلئے یاددہانی ہے۔یہاں اسی اصل موضوع کی طرف عود کیاگیا ہے۔جو کہ نوع انسان کی ہدایت ہے۔درمیان میں جو سیدنا موسیٰؑ کا قصہ ذکر کیا گیا تو اس میں بھی یہی رنگ غالب نظر آتاہے۔(تیسیر القرآن)

102۔صور کے معنیٰ اور اس کی ترقی یافتہ شکلیں:۔  صور کے معنی،قرنا،نرسنگھا اور بوق ہے اور یہ چیزیں دورنبویؐ میں رائج تھیں ۔ضروری نہیں کہ صور کی بھی یہی شکل و صورت ہو بلکہ قرآن ایسے لفظ استعمال کرتاہے جس سے انسانی ذہن اس اصل چیز سے قریب ترکسی چیز سے متعارف ہو۔اسی غرض کیلئے فوج میں بگل استعمال ہوتاہے جس سے لشکر کو اکٹھا یا منتشر کیا جاتاہے۔ہوائی حملہ کے خطرہ کے دوران سائرن کا جواز ہے یا نہیں؟ بعض علماء نے اسے ناجائز قرار دیاہے۔بہر حال افطاری اور سحری کے وقت بگل یا ناقوس کہ بجائے اذان کہنا ہی مسنون ہے ۔سائرن سے ملتی جلتی یا اس سے بھی ترقی یافتہ شکل نفخہ صور کی ہوگی۔۔۔۔اس کا ایک معنی تو یہ ہے کہ جب دہشت کے مارے آنکھیں پتھراجاتی ہیں تو ان پر نیلگوں سفیدی غالب آجاتی ہے ۔اور دوسرا معنی یہ ہے سارابدن ہی نیلگوں ہوجائے گا۔یعنی دہشت کے مارے خون تو خشک ہوجائے گا اور جسم پرنیلا ہٹ غالب آنے لگے گی۔(تیسیر القرآن)

ــــ (فرط دہشت و خوف سے)قرآن کے مخاطبین اول قوم عرب میں نیلی آنکھ خاص طورپر مبغوض و مکروہ سمجھی جاتی تھی،اس لئے کہ ان کے دشمن  بنی احمر یا اہلِ روم (یورپ والے)نیلی آنکھیں رکھتے تھے۔ اور اسی لئے ازرق العین ان کے ہاں دشمن کا عام لقب پڑگیاتھا۔(تفسیر ماجدی)

105۔  (کہ قیامت کے دن ان کا کیا حشر ہوتاہے؟)جاہلوں اور جاہلیوں کا ایک سوال رسول اللہؐ سے یہ بھی رہتاتھا کہ قیامت کے دن آپ کا اللہ آخر پہاڑ جیسی ٹھوس اور اٹل چیزوں کا کیا کرےگا۔(تفسیر ماجدی)

107۔نفخۂ صور اول کے اثرات:۔ یعنی پہاڑوں کو پیوند خاک بنادیاجائے،سمندروں کو پاٹ دیا جائےگا۔زمین کے سب نشیب و فراز ختم کردئیے جائیں گےاور وہ ایک بالکل ہموار اور وسیع میدان کی طرح بن جائے گی۔اسی بات کو اللہ تعالیٰ نے دوسرے مقام پر فرمایا"یَوْمَ تُبَدَّلُ الْاَرْضُ غَیْرَ الْاَرْضِ"(14: 48)"یعنی اس دن یہ زمین ایسی نہ رہے گی جیسی تم آج دیکھ رہے ہو،بلکہ اس میں تبدیلی پیدا کردی جائےگی"۔(تیسیر القرآن)

۔ ۔۔۔۔(واضح رہے کہ صحابہ وتابعین میں سے ابن عباس ؓ اور قتادہ بھی اس بات کے قائل ہیں کہ جنت اسی زمین پر ہوگی، اور سورة نجم کی آیت عِنْد سِدْرَۃِ الْمُنْتَھٰی ہ عِنْدَھَا جَنَّۃُ الْمأویٰ ، کی تاویل وہ یہ کرتے ہیں کہ اس سے مراد وہ جنت ہے جس میں اب شہداء کی ارواح رکھی جاتی ہیں)۔ (تفہیم القرآن)

108۔ نفخۂ صور ثانی کے اثرات:۔ یہ داعی اللہ کا مقرر کردہ فرشتہ اسرافیل ہوگا۔ اس دنیا میں تو ان لوگوں نے اللہ کے داعی کی بات کو سننا بھی گوارا نہ کیا بلکہ اس کی مخالفت ہی کرتے رہے مگر اس دن اللہ کے داعی کی آواز پر سراپا عمل بن جائیں گےاور جو کچھ وہ کہے گا ٹھیک اسی طرح کرتے جائیں گے۔وہ کہے گا کہ چلو میدان حشر کی طرف تو سب دوڑ پڑیں گے اور اس داعی کی آواز اور حکم کو پوری طرح سمجھ بھی رہے ہوں گے۔(تیسیر القرآن)

109۔۔۔۔ یعنی جو شفاعت کرے گا وہ بھی خدا کی اجازت سے کرے گا اور جس کے لئے شفاعت کی جائے گی وہ بھی بایں شرط مشروط ہے کہ خدا اس کے بارے میں کسی کے سفارش کرنے کو پسند فرمائے۔ مطلب یہ ہے کہ کام آنے والی شفاعت بیک وقت ان دو شرطوں کے ساتھ مشروط ہے۔ اگر کسی نے شفاعت سے متعلق ان شرائط سے قطع نظر کر کے کوئی اپنا نظریہ ایجاد کر رکھا ہے تو وہ محض اس کا واہمہ ہے جس کی حقیقت قیامت کے دن اس کے سامنے آجائے گی۔ (تدبرِ قرآن)

114۔ اس آیت کا صحیح مفہوم ذہن نشین کرنے کے لئے سورة مریم کی آیات 65-64 کے تحت ہم جو کچھ لکھ آئے ہیں اس پر ایک نظر ڈال لیجیے مخالفین کی تمام مخالفتوں اور ژاژخائیوں کے مقابلہ کے لئے آنحضرت صلعم کے پاس واحد ہتھیار قرآن ہی تھا۔ اس وجہ سے قدرتی طور پر اس کے اترنے کے لئے آپ کے اندر ایک بےقراری اور بےچینی پائی جاتی تھی۔ اسی سے مشکلات میں آپ کو رہنمائی ملتی تھی، یہی چیز الجھنوں اور پریشانیوں میں تسلی کا ذریعہ بنتی تھی اور مخالفین جو نت نئے مطالبات و اعتراضات روز روز پیش کرتے ان کے فیصلہ کن جواب بھی قرآن ہی دے سکتا تھا۔ ان وجوہ سے اس سپاہی کی طرح جو دشمنوں کی دل بادل فوج کے مقابل میں نبرد آزما ہو، آپ کو ہر وقت اس آسمانی کمک کا انتظار رہتا۔ حضور کی اسی پریشانی کو دور کرنے کے لئے ارشاد ہوا کہ تم قرآن کے اتارے جانے کے لئے جلدی نہ کرو۔۔۔۔۔یہ مضمون قرآن میں جگہ جگہ بیان ہوا ہے اور ہر جگہ اسی سیاق وسباق کے ساتھ بیان ہوا ہے۔ ہمارے مفسرین نے ان آیات کو اس محدود مفہوم میں لیا ہے کہ حضرت جبریل جب آنحضرت کو وحی سناتے تو آپ اس کو سیکھنے میں عجلت کردیتے جس پر آپ کو ٹوکا گیا اگرچہ یہ بات بجائے خود صحیح ہے کہ جس چیز کے لئے شوق و بےقراری ہو، جذبہ شوق اس کے لئے جلد باز بنا دیتا ہے۔ (تدبرِ قرآن)

115۔ ۔۔۔۔یہی عجلت آدم کے لئے مزلہ قدم ثابت ہوئی۔۔۔۔۔۔اوپر حضرت موسیٰ کی سرگزشت میں بھی یہ حقیقت واضح فرمائی گئی کہ ان کی عجلت بھی ان کو راس نہیں آئی بلکہ ان کے اور ان کی قوم کے لئے ایک سخت آزمائش بن گئی۔ ان واقعات کے پردے میں آنحضرت کو یہ تعلیم دی گئی ہے کہ آپ بھی اپنی دعوت کے معاملے میں جلدی نہ کریں۔۔۔۔۔۔ (تدبرِ قرآن)

117۔(کہ تم ہی دونوں کے معاملہ میں اسے مردود ہونا پڑا تھا، اوراس وقت سے اس نے اپنا مقصدِ حیات ہی تم کو گمراہ کرنا بنالیاہے) لَكَ وَ لِزَوْجِكَ۔سوال یہ پیدا ہواہے کہ حرف ل مکررکیوں آیا ہے،جبکہ ایک ہی ل کافی ہوسکتاتھا۔اس کے دوجواب دئیے گئے ہیں،ایک یہ کہ قاعدہ نحوی اس کا مقتضی تھا کہ دو مجروروں کے درمیان حالتِ عطف میں حرف جاربھی دوبار لایا جائے۔دوسراجواب یہ ہے کہ ل کی تکرار اس اظہار کیلئے ہوئی ہے کہ ابلیس کی دشمنی زوجہ آدم کے ساتھ بھی مستقل تھی ضمناً و تبعاً نہ تھی۔(تفسیر ماجدی)

119۔(اور جنت سے باہر ان سب مصیبتوں سے دوچار ہونا پڑے گا۔اس لئے ان امور کو پیش نظر رکھ کر اپنے اس موذی دشمن کی طرف سے خوب ہوشیار و خبردار رہنا) ابن قیمؒ نے یہاں یہ نکتہ لکھا ہے کہ بہ ظاہر تقابل بھوک اور پیاس میں معلوم ہوتاہے اور بے لباس اور بے سایہ رہنے میں ،لیکن قرآن مجید نے بڑی دقیقہ سنجی سے کام لے کر تقابل بھوک اور بے لباسی کے درمیان پیدا کیا ہے کہ بھوک ایک الم باطنی ہے اور بے لباسی ایک الم ظاہری ۔اور دونوں میں ایک معنوی مناسبت ہے۔اسی طرح دوسرا تقابل پیاس اور آفتاب زدگی کے درمیان رکھاہے۔اس لئے کہ پیاس نام ہے حرارت باطنی کا، اور آفتاب زدگی حرارت ظاہری کا۔اور اس طرح جنت سے تمام آلام ظاہری و باطنی کی نفی کردی ہے۔بعض اور اہل تفسیر بھی اسی طرف گئے ہیں۔(تفسیر ماجدی)

120۔یہاں یہ بات قابل ذکر ہے کہ اس مقام پر شیطانی وسوسہ کی نسبت صرف سیدنا آدمؑ کی طرف کی گئی ہے اور ایک دوسرے مقام پر دونوں کی طرف کی ہے۔ اس لئے کہ اس معاملہ میں حوا کی حیثیت صرف بالتبع تھی۔ لیکن بائبل کی روایت یوں ہے کہ شیطان نے پہلے سیدہ حواکو بہکایا ۔پھر حوا نے سیدنا آدمؑ کو پھل کھانے پر آمادہ کرلیا ۔بائبل کی اس روایت کو بعض مفسرین نے بھی نقل کردیا ۔جب کہ یہ روایت قرآن کی اس آیت کے مطابق غلط قرار پاتی ہے۔(تیسیر القرآن)

۔یہاں قرآن صاف تصریح کرتا ہے کہ آدم و حوا میں سے اصل وہ شخص جس کو شیطان نے وسوسے میں ڈالا آدم ؑ تھے نہ کہ حضرت حوا۔۔۔۔ (تفہیم القرآن)

121۔ ایک بحث یہ اٹھائی گئی ہے کہ حضرت آدمؑ تو پیمبر تھے۔اور پیمبر کے کسی فعل پر عصیان اور غوایت کا اطلاق کہاں تک جائز ہے۔امام رازیؒ نے اس کا ایک جواب اور صحیح جواب یہ دیا ہے کہ حضرت آدمؑ کو  نبوت تو زمین پر آکر ملی اور یہ ذکر اس زمانہ سے قبل کا ہے۔مرشد تھانویؒ نے فرمایا کہ اس میں ذکر ہے خطاء اجتہادی کے صدور کاکاملین سے نیز اس پر مواخذہ کا برخلاف عوام کے کہ انہیں اس پر احیاناً اجرمل جاتاہے۔(تفسیر ماجدی)

123۔کون کس کا دشمن ؟ فریق کون کون ہیں؟۔  اس مقام پر تثنیہ استعمال ہواہے۔ جس کے دومطلب ہوسکتے ہیں ایک مطلب ترجمہ میں واضح ہے کہ ایک فریق آدم و حواتھے اور دوسرا فریق شیطان اور خطاب کے لحاظ سے ان فریقوں میں ان کی اولاد بھی شامل ہے۔اور دوسرا مطلب یہ ہے کہ ایک فریق آدم ،دوسرا حوا ہو،جمیعاً  کا معنی سب کے بجائے "مل کر، اکٹھے یا ایک ساتھ"کیا جائے اور خطاب آدم و حواکی اولاد سے ہو۔اور ان کی اولاد میں دشمنی اس طرح ہوگی کہ ان کی اولاد میں سے ایک فریق اللہ کا فرمانبردار بن کر رہے گا اور دوسرا شیطان کا تابع فرمان ۔ان دونوں فریقوں میں حق و باطل کی جنگ جاری اور دشمنی قائم رہے گی۔۔۔۔یشقیٰ کے بھی دو مطلب ہیں ایک یہ کہ وہ جنت کی راہ سے بہکے گا نہیں اور نہ اس سے محروم ہوکر دوزخ کی تکلیفیں اٹھائے گا۔بلکہ سیدھا جنت میں پہنچ جائے گا جو اس کا اصل وطن ہے اور اس لفظ کا دوسرا مطلب یہ ہے کہ وہ بدبختی میں مبتلا نہ ہوگا۔دنیا میں بھی اس کا مقدر اسے ضرور ملے گا اور آخرت میں تو وہ بہرحال خوش نصیب ہوگا۔(تیسیر القرآن)

124۔ مَعِیْشَةً ضَنْكًا۔ سے مراد عذاب قبر لی گئی ہے۔ اور عالم برزخ کے وجود پر قرآن سے استدلال منجملہ اور آیتوں کے اس آیت سے بھی کیا گیا ہے۔(تفسیر ماجدی)

ـــــ ضیق کی زندگی سے مراد وہ زندگی ہے جو سکون و طمانیت اور فراغ خاطر و شرح صدر کی نعمت سے محروم ہو۔انسان کا حال یہ ہے کہ وہ اپنے لیے جو اسباب و سامان بھی مہیاکرلے لیکن اگر وہ خدا پر ایمان اور اس کی ہدایت سے محروم ہے تو وہ غیر مطمئن ،ڈانواڈول،اندیشہ  ناک،مضطرب اور اندرونی خلفشار میں مبتلا رہتاہے۔نفس مطمئنہ کی بادشاہی صرف سچے اور پکے ایمان ہی سے حاصل ہوتی ہے۔(ترجمہ: مولانا امین احسن اصلاحیؒ)

125۔ اعمال کا بدلہ ممثل شکل میں:۔ یعنی اس کا اعتراض یہ تھا کہ دنیا میں بینا تھا اور ہر چیز کو دیکھ سکتاتھا آج اندھا بناکر کیوں اٹھایا جارہاہے۔ اس کو جواب یہ دیا جائے گا کہ تو دنیامیں میری آیات دیکھنے سے اندھا رہاتھا۔آنکھیں عطاکرنے کا مقصدصرف یہ ہی نہیں تھاکہ تو اپنے مطلب کی چیزیں دیکھے۔ بلکہ اصل مطلب یہ تھا کہ تو اللہ کی آیات کو دیکھے ۔اس لحاظ سے تو دنیا میں اندھا ہی بنارہا۔تیرے اس فعل کا نتیجہ ہی ممثل شکل میں تیرے سامنے آیا ہے۔تو اب تعجب کیوں کرتاہے۔واضح رہے کہ یہ ابتدائے حشر کا ذکر ہے۔بعد میں اس کی آنکھیں کھول دی جائیں گی تو وہ دوزخ اور احوال محشر کا ٹھیک ٹھیک معائنہ کرسکے گا۔(تیسیر القرآن)

130۔  قَبْلَ طُلُوْعِ الشَّمْسِ وَ قَبْلَ غُرُوْبِهَا-  فجر  اور  عصر  کی نمازیں    " مِنْ اٰنَآئِ الَّیْلِ-  مغرب   اور  عشاء   ( بعض  کے نزدیک   تہجد  بھی ) 

۔اَطٗرافَ النّھار  -نماز  ظھر ۔۔۔۔۔سات  سال   کی عمر  میں پیارسے  اور دس  سال کی عمر  میں   مارکر۔(تفسیر عثمانی )

۔ پانچوں نمازوں کے اوقات:۔ حمد کے ساتھ تسبیح اور محض تسبیح دونوں سے یہاں مراد نماز ہے کہ یہ عرب میں عام دستور ہے کہ کسی چیز کا کوئی خاص جزء بول کر اس سے مراد کل لیا جاتاہے اور اس کی مثالیں بہت ہیں۔سورج کے طلوع سے پہلے سے مراد فجر کی نماز ہے اور غروب سے پہلے کی نماز عصر ہے۔رات کے کچھ اوقات  سے مراد نماز عشاء ہے اور نماز تہجد بھی جو آپ پر فرض تھی لیکن دوسروں کیلئے سنت مؤکدہ ہے۔اور ان کے کنارے تین ہی ہوسکتے ہیں ،صبح، شام اور زوال آفتاب ،صبح سے مراد فجر کی نماز ہے جس کا ذکر پہلے ہی آچکا ،شام سے مراد نماز مغرب اور زوال آفتاب سے مراد ظہر کی نماز ہے۔گویا اس ایک آیت سے ہی پانچوں  فرض نمازیں اور ان کے اوقات ثابت ہوجاتے ہیں اور اس آیت کا ایک مطلب یہ بھی ہوسکتاہےکہ آپ کو کسی وقت بھی اللہ کی یاد اور تسبیح و تہلیل سے غافل نہ رہنا چاہئے۔(تیسیر القرآن)

۔اس آیت سے ان لوگوں کے خیال کی نہایت واضح طور پر تردید ہوتی ہے جو کہتے ہیں کہ نمازوں کے اوقات قرآن میں مذکور نہیں ہیں۔ قرآن میں صرف فرض نمازوں ہی کے نہیں بلکہ اشراق اور تہجد کے اوقات بھی مذکور ہیں۔ نبی ﷺ نے انہی اوقات کو اپنے عمل سے منضبط کر کے ان کی حد بندی فرما دی۔ مختلف نمازوں کی شکلیں بھی معین فرما دیں اور یہ بھی بتا دیا کہ ان میں سے کن نمازوں کی حیثیت فرض و      واجب کی ہے اور کن کی حیثیت نوافل کی۔ ظاہر ہے کہ ان تمام تفصیلات کا بتانا اور ہر نماز کے حدود و اطراف کا معین کرنا نبی ﷺ ہی کا کام تھا اس لئے کہ آپ صرف قرآن کے سنا دینے والے ہی نہیں بلکہ اس کے معلم بھی تھے۔۔۔۔۔۔ آپ کے واسطہ سے امت کو وہ تدبیر بتائی گئی ہے جو مشکلات و مصائب میں ثابت قدم رکھنے والی اور خدا کی رحمت و نصرت کا حق دار بنانے والی ہے۔ اس طرح کے حالات میں صرف فرض نمازوں ہی کا اہتمام مطلوب نہیں ہے بلکہ نوافل کا اہتمام بھی مطلوب ہے۔ قرآن، نبی ﷺ کے ارشادات اور سلف صالحین کے عمل، ہر چیز سے ہمارے اس خیال کی تائید ہوتی ہے۔ عام حالات میں تو تہجد و اشراق کی نمازوں کی حیثیت بہرحال نفلی نمازوں ہی کی ہے لیکن مشکلات و مصائب میں خواہ  وہ      انفرادی ہوں یا اجتماعی، ان کا اہتمام ضروری ہے ۔ ع۔ حدی راتیز ترمی خواں چو محمل راگراں بینی ! ۔۔۔۔۔اس مسئلہ پر انشاء اللہ سورة مزمل کی تفسیر میں ہم وضاحت سے بحث کریں گے اور کسی موزوں مقام پر ان مصالح پر روشنی ڈالیں گے جو اوقات نماز کے تعین میں ملحوظ ہیں۔ (تدبرِ قرآن)

131۔ زَهْرَةَ الْحَیٰوةِ الدُّنْیَا۔زھرۃ کے معنی لغت میں تازگی اور زیب و زینت کے ہیں۔۔۔۔حدیث کی کتابیں ابواب الزہد وغیرہ کے ماتحت اس قسم کے مضامین سے بھری پڑی ہیں۔ بخاری کی مشہور حدیث ہے، کن فی الدنیا کانّک غریب او عابر سبیل ،دنیا میں اس طرح رہوکہ گویا غریب الوطن ہو یا مسافر راہ رو۔(تفسیر ماجدی)

 132۔ لَا نَسْــٴَـلُكَ رِزْقًا-  یعنی  ہم  تم سے  یہ  مطالبہ  نہیں کرتے  کہ تم  اپنا  اور اپنے   اہل  و عیال  کا رزق  اپنے  زور  علم و عمل  سے  پیدا  کرو  بلکہ  یہ معاملہ  ہم نے  اپنے  ذمہ  لے  رکھا  ہے  ۔ ( ترمذی  اور ابن  ماجہ  نے ابو ہریرہ رضی اللہ تعالی عنہ  سے  یہ  روایت  نقل  کی ہے  کہ  اللہ تعالی  فرماتا ہے   کہ  اے ابن آدم  تو میری  عبادت  کیلئے  اپنے  آپکو  فارغ  کرلے  تو  میں تیرے  سینے  کو  غنا    و استغنا  سے  بھردوں گا  اور  تیری  محتاجی  کو دور  کردوں گا  ۔ اگر  تونے  ایسا نہ کیا  توتیرا  سینہ  فکر  اور  شغل  سے بھردونگا  اور محتاجی  دور  نہ کروں گا  ( یعنی  جتنا  مال  بڑھتا  جائے  گا  حرص  بھی   اتنی  ہی  بڑھتی  چلی جائے گی  اس لئے  ہمیشہ  محتاج  ہی  رہے گا)     ( ابن کثیر ) ۔(معارف القرآن)

۔ یہاں ظاہر پرستوں کو یہ بات بہت عجیب معلوم ہوگی کہ نماز بھلا آدمی کے رزق کی ضامن کس طرح ہوسکتی ہے اس میں شبہ نہیں کہ یہ حقیقت ان لوگوں کو نہیں سمجھائی جاسکتی جو نہ خود نماز کی روح سے آشنا ہیں اور نہ انہیں کسی حقیقی نماز آشنا سے آشنائی ہوئی۔ یہ چیز سمجھانے کی نہیں بلکہ جاننے اور سمجھنے کی ہے۔ صرف تجربہ ہی اس کا یقین پیدا کرسکتا ہے جو نماز کے لذت آشنا ہیں وہی جانتے ہیں کہ اس میں کیا ہے۔ میری اس بات کو ادعا پر محمول نہ فرمائیے۔ میں خود ایک بےعمل آدمی ہوں لیکن میں نے خود اپنی آنکھوں سے تاریخ کے صفحات میں بھی اور چلتے پھرتے انسانوں میں بھی ایسی پیشانیاں دیکھی ہیں جن کے سجدوں کے نشانات کی تابناکی آفتاب کو بھی شرماتی تھی اور جن کے استغفار کا یہ عالم تھا کہ تخت جمشید کو بھی پائے استحقار سے ٹھکرا دینے والے تھے۔ (تدبرِ قرآن)

ــــ نماز  خزائن  رحمت کی  کلید  ہے  -  حضور  ؐ حضرت  خاتون  جنت  رضی اللہ تعالی عنہا  اور شیر خدا   رضی اللہ  تعالی عنہ  کو نماز  صبح کیلئے  خود  بیدار  کرتے تھے   ( حضرت  ابراھیم  ؑ  کی  اپنی  نماز  اور  اپنی  اولاد  کی نماز  کیلئے  دعا ) رَبِّ اجْعَلْنِیْ مُقِیْمَ الصَّلٰوةِ وَ مِنْ ذُرِّیَّتِیْ- افسوس  ! کہ آج سادات  کرام  کی ایک کثیر  تعداد  کو  اس حکم کی اہمیت  کا احساس  نہیں  بلکہ   وہ سمجھتے  ہیں  کہ وہ  اس حکم  سے  مستثنی  ہیں گو یا  ایک  بیگار  اور سزا  تھی جو انہیں  معاف  کردی گئی ۔ عام مسلمان بھی  نماز  کو ایک  بیگار  سمجھتے  ہیں اور خیال  کرتے  ہیں  کہ یہ  ایک  سزا  ہے   جو   مسلمان  ہونے  کے جرم میں  دی گئی  ہے ۔ حالانکہ  اس سے  رحمت  کے دروازے  کھلتے  ہیں  اور  مصیبتوں  کے سیلاب  کے سامنے  بند  بندھ جاتا ہے   بقول  علامہ  اقبال  :

                            وہ  ایک سجدہ  جسے  تو گراں  سمجھتا ہے               ہزار  سجدے  سے دیتا  ہے آدمی کو  نجات            (ضیاءالقرآن)

ـــــ   آیت  زیر  بحث  میں  بھی  اھل سے  وہ تما م لوگ  مراد  ہیں جو نبی ؐ   پر ایمان لائے  تھے  ۔ غور  کیجئے  کہ لفظ  " اھل  " نے  غربائے مسلمین  کی کتنی  عزت  بڑھادی  ہے ۔(تدبرقرآن)

ـــــ اَهْلَكَ۔اھل کے لفظ میں اہل خاندان ،اور عام مومنین دونوں کا مفہوم شامل ہے۔اور خطاب چونکہ رسول اللہؐ سے ہے اس لئے مراد آپ کی امت ہوگی اور اہل بیت خصوصاً۔۔۔۔فقہاء نے یہاں سے یہ استنباط کیا ہے کہ امر بالمعروف ،خصوصاً تاکید نماز اپنے متعلقین پر واجب ہے۔ (تفسیر ماجدی)

133۔ عظیم الشان معجزہ  قْرآن  جو اگلی  کتابوں  کے مضامین  کا محافظ   ۔(تفسیر عثمانی)

ــــ   ان سوالات  کیلئے   وسوسہ  اندازی  کرنے  والے  اور سوالات  کو  پیش  کرنے  والوں  کو الگ  الگ  جواب  - اہل کتاب  کو یہ جواب  کہ   کیا  ان کیلئے  یہ نشانی  کافی  نہیں  کہ پچھلے   صحیفوں میں  جس آخری  رسول  کی بعثت  کی بشارتیں  تھیں  ان کا  مظہر  مصداق  آ گیا – دوسرے   ( مشرکین )  کو یہ جواب   کہ  اگر   ہم  رسول ؐکے بھیجنے  سے پہلے  ان پر  عذاب  بھیج  دیتے  تو قیامت  کے  روز  یہ اعتراض  کرتے  کہ اگر  رسول  ہمارے  پاس  آتا  تو  ہم  تیری  آیات  کی پیروی  کرتے  ۔ (تدبرِ قرآن)

135۔ یعنی جب سے یہ دعوت تمہارے شہر میں اٹھی ہے، نہ صرف اس شہر کا بلکہ گرد و پیش کے علاقے کا بھی ہر شخص انتظار کر رہا ہے کہ اس کا انجام آخر کار کیا ہوتا ہے۔ (تفہیم القرآن)