2۔ 'پاس کے علاقہ'سے مراد شام و فلسطین کی سرزمین ہے۔اس پر اس زمانے میں رومیوں کی حکومت تھی جو نصرانیت کے پیرو ہونے کے باعث دین و عقیدہ کے اعتبار سے مسلمانوں سے قریب تھے۔ان کے اندرونی خلفشا رسے فائدہ اٹھا کر 614ء میں ایرانیوں نے، جو دین شرک کے پیروتھے،اس علاقہ پر قبضہ کرلیا۔(ترجمہ: مولانا امین احسن اصلاحیؒ)

۔  (اہل ایران سے، تقریباً 614ء و 615 ء میں)الروم  سے مراد قدیم  "رومن امپائر"  کا وہ مشرقی حصہ ہے، جو 398ء میں اس سے کٹ کر خود ایک مستقل سلطنت بن گیا تھا۔ مسیحیوں کے قبضہ میں یہ سلطنت 1454ء تک رہی ،اس کے بعد ترکوں کے قبضہ میں آگئی،اس کا دارالسلطنت استانبول یا قسطنطنیہ تھا۔ اس کو بیزنطینی سلطنت بھی کہتے تھے، اور اس کا ایک قدیم نام جدید رومہ بھی ہے، شام، فلسطین، ایشائے کوچک کے علاقے سب اسی میں شامل تھے۔(تفسیر ماجدی)

3۔ مسلمانوں کی ہمدردیاں روم کے ساتھ اور کفار کی ایران کے ساتھ ۔(i) ایرانیوں نے اسے مجوسیت اور عیسائیت کی لڑائی کا رنگ دے دیا تھا(ii) چونکہ ابھی آپکی دعوت بیرونِ عرب نہیں پہنچی تھی اس لئے مسلمان عیسائیوں کو کافر نہیں کہتے تھے البتہ یہودیوں کو کافر کہتے تھے کیونکہ انہوں نے حضرت عیسیٰ کو ماننے سے انکار کردیا تھا۔پھر ایرانیوں کے مقابلہ میں عیسائی توحید پرست تھے۔(iii)آغاز اسلام میں عیسائیوں کی طرف سے مسلمانوں کے ساتھ ہمدردی کا برتاؤ ہواتھا۔ مثلاً حبش کے بادشاہ نجاشی کا ہمدردانہ رویہ۔)تفہیم القرآن(

4۔ یعنی پہلے جب ایرانی غالب آئے تو اس بنا پر نہیں کہ معاذ اللہ خداوند عالم ان کے مقابلے میں شکست کھا گیا، اور بعد میں جب رومی فتح یاب ہوں گے تو اس کے معنی یہ نہیں ہیں کہ اللہ تعالیٰ کو اس کا کھویا ہوا ملک مل جائے گا۔ فرمانروائی تو ہر حال میں اللہ ہی کی ہے۔ پہلے جسے فتح نصیب ہوئی اسے بھی اللہ ہی نے فتح دی اور بعد میں جو فتح پائے گا وہ بھی اللہ ہی کے حکم سے پائے گا۔۔۔۔۔ ابن عباس، ابو سعید خدری، سفیان ثوری اور سدی ؓ  وغیرہ حضرات کا بیان ہے کہ ایرانیوں پر رومیوں کی فتح اور جنگِ بدر میں مشرکین پر مسلمانوں کی فتح کا زمانہ ایک ہی تھا۔اس لئے دوہری خوشی حاصل  ہوئی ۔ )تفہیم القرآن(

۔ روایات حدیث سے معلوم ہوتا ہے کہ یہ واقعہ ہجرت سے پانچ سال پہلے پیش آیا ہے اور پورے سات سال ہونے پر غزوہ بدر کے وقت رومی دوبارہ فارس پر غالب آگئے۔۔۔۔۔ صدیق اکبر نے ابی بن خلف سے شرط لگائی کہ تین سال کے اندر رومی غالب نہ آ گئے تو تمہیں دس اونٹنیاں دوں گا۔ یہ کہہ کر صدیق اکبر حضورﷺ کے پاس آئے اور اس واقعہ کا ذکر کیا۔ حضورؐ نے فرمایاکہ قرآن میں اس کے لیے لفظ بضع سنین مذکور ہے جس کا اطلاق تین سے نو سال تک ہو سکتا ہے۔ تم جاؤ اور اس سے کہو کہ میں دس اونٹنیوں کی بجائے سو اونٹنیوں کی شرط لگاتا ہوں مگر مدت تین سال کی بجائے نو سال مقرر کرتا ہوں۔ رومیوں کی فتح کے وقت ابی بن خلف مر چکا تھا۔ صدیق اکبر نے اس کے وارثوں سے اپنی شرط کے مطابق سو اونٹنیوں کا مطالبہ کیا، انہوں نے اونٹیاں دے دیں۔ (معارف القرآن)

- جو قوم اپنے نظریات و عقائد اور فکر و فلسفہ میں اسلام سے جتنی قریب ہوگی بین الاقوامی میدان میں مسلمانوں کی ہمدردیاں دوسروں کے مقابلہ میں ان کے ساتھ اتنی زیادہ ہوں گی۔ )تدبر قرآن(

5۔ نظمِ عبارت کے اعتبار سے ظاہر ہے کہ یہاں نصر اور مدد سے مراد رومیوں کی نصرت و امداد ہے ۔اور یہ بھی احتمال ہے کہ نصرت سے مراد یہاں مسلمانوں کی نصرت ہو۔اولاً مسلمانوں نے رومیوں کے غلبہ کو قرآن کی سچائی اور اسلام کی حقانیت کی دلیل بناکر پیش کیا تھا۔ثانیاً کفار کی دوبڑی طاقتیں باہم لڑ کر کمزور ہوئیں اور بلآخر مسلمانوں کو اس کا فائدہ ہوا ۔ )معارف القرآن(

8۔ یہ آخرت پر بجائے خود ایک مستقل استدلال ہے۔۔۔۔۔انسان کی تین امتیازی خصوصیات ایسی ہیں جو اس کو زمین کی دوسری موجودات سے ممیز کرتی ہیں۔۔۔۔۔۔ ایک یہ کہ زمین اور اس کے ماحول کی بیشمار چیزیں اس کے لیے مسخر کردی گئی ہیں۔۔۔۔۔۔ دوسرے یہ کہ اسے اپنی راہ زندگی کے انتخاب میں آزاد چھوڑ دیا گیا ہے۔۔۔۔۔ تیسرے یہ کہ اس میں پیدائشی طور پر اخلاق کی حس رکھ دی گئی ہے۔۔۔۔۔یہ تینوں خصوصیتیں جو انسان کے اپنے وجود میں پائی جاتی ہیں اس بات کی نشان دہی کرتی ہیں کہ کوئی وقت ایسا ہونا چاہیے جب انسان سے محاسبہ کیا جائے۔۔۔۔۔اس فقرے میں آخرت کی دو مزید دلیلیں دی گئی ہیں۔۔۔۔ ایک یہ کہ یہ کائنات برحق بنائی گئ ہے۔ یہ کسی بچے کا کھیل نہیں ہے کہ محض دل بہلانے کے لیے اس نے ایک بےڈھنگا سا گھروندا بنا لیا ہو جس کی تعمیر اور تخریب دونوں ہی بےمعنی ہوں۔۔۔۔دوسری حقیقت جو اس کائنات کے نظام کا مطالعہ کرنے سے صاف نظر آتی ہے وہ یہ ہے کہ یہاں کسی چیز کے لیے بھی ہمیشگی نہیں ہے۔۔۔۔ (تفہیم القرآن)

9۔  یہ آخرت کے حق میں تاریخی استدلال ہے۔ مطلب یہ ہے کہ آخرت کا انکار دنیا میں دو چار آدمیوں ہی نے تو نہیں کیا ہے۔ (تفہیم القرآن)

16۔ دوسرا نکتہ یہ ہے کہ مؤمنین کی جزائے خیر کے موقع پر ایمان کے ساتھ اعمال صالحہ کا بھی اضافہ کیا ہے۔ اس سے دوباتیں معلوم ہوئیں: ایک یہ کہ عمل صالح معتبر وہی ہے جو ایمان پر مبنی و متفرع ہو۔دوسرے گویا اس امر کو صاف کردیا ہے کہ مراتب عالیہ کے لیے اعمال صالحۃ بھی ضروری ہیں۔گونفس نجات کے لیے مجرد ایمان کافی ہے۔ بخلاف اس کے کافروں کی سزا کے سلسلے میں اعمال سیئہ کا کوئی ذکر نہیں، اس سے معلوم ہوا مجرد کفر انتہائی سزا کے لیے کافی ہے۔(کبیر،ج25/ص91)(تفسیر ماجدی)

17۔۔۔۔۔اور اگر ان دو آیات سے چار نمازوں کا ہی وقت سمجھا جائے تو سورۂ ہود کی آیت نمبر 14،بنی اسرائیل کی آیت نمبر 78 اور سورۂ طہٰٰ کی آیت نمبر 130 کو سامنے رکھا جائے تو قرآن سے ہی پانچ نمازوں کے اوقات کی صراحت ثابت ہوجاتی ہے۔(تیسیر القرآن)

18۔ یہاں ذرا تھوڑی دیر ٹھہر کر منکرین حدیث کی اس جسارت پر غور کیجیے کہ وہ " نماز پڑھنے " کا مذاق اڑاتے ہیں اور کہتے ہیں کہ یہ نماز جو آج مسلمان پڑھ رہے ہیں یہ سرے سے وہ چیز ہی نہیں ہے جس کا قرآن میں حکم دیا گیا ہے۔ ان کا ارشاد ہے کہ قرآن تو اقامت صلوٰۃ کا حکم دیتا ہے اور اس سے مراد نماز پڑھنا نہیں بلکہ " نظام ربوبیت " قائم کرنا ہے۔ اب ذرا ان سے پوچھیے کہ وہ کون سا نرالا نظام ربوبیت ہے جسے یا تو طلوع آفتاب سے پہلے قائم کیا جاسکتا ہے یا پھر زوال آفتاب کے بعد سے کچھ رات گزرنے تک ؟ اور وہ کون سا نظام ربوبیت ہے جو خاص جمعہ کے دن قائم کیا جانا مطلوب ہے ؟ اِذَا نُوْدِيَ للصَّلٰوةِ مِنْ يَّوْمِ الْجُمُعَةِ فَاسْعَوْا اِلٰى ذِكْرِ اللّٰهِ (الجمعہ، آیت9) اور نظام ربوبیت کی آخر وہ کون سی خاص قسم ہے کہ اسے قائم کرنے کے لیے جب آدمی کھڑا ہو تو پہلے منہ اور کہنیوں تک ہاتھ اور ٹخنوں تک پاؤں دھو لے اور سر پر مسح کرلے ورنہ وہ اسے قائم نہیں کرسکتا ؟ اِذَا قُمْتُمْ اِلَى الصَّلٰوةِ فَاغْسِلُوْا وُجُوْهَكُمْ وَاَيْدِيَكُمْ اِلَى الْمَرَافِقِ  (المائدہ، آیت 6) اور نظام ربوبیت کے اندر آخر یہ کیا خصوصیت ہے کہ اگر آدمی حالت جنابت میں ہو تو جب تک وہ غسل نہ کرلے اسے قائم نہیں کرسکتا ؟ وَلَا جُنُبًا اِلَّا عَابِرِيْ سَبِيْلٍ حَتّٰى تَغْتَسِلُوْا  (النساء، آیت 43) اور یہ کیا معاملہ ہے کہ اگر آدمی عورت کو چھو بیٹھا ہو اور پانی نہ ملے تو اس عجیب و غریب نظام ربوبیت کو قائم کرنے کے لیے اسے پاک مٹی پر ہاتھ مار کر اپنے چہرے اور منہ پر ملنا ہوگا ؟ اَوْ لٰمَسْتُمُ النِّسَاۗءَ فَلَمْ تَجِدُوْا مَاۗءً فَتَيَمَّمُوْا صَعِيْدًا طَيِّبًا فَامْسَحُوْا بِوُجُوْهِكُمْ وَاَيْدِيْكُمْ مِّنْهُ (المائدہ، آیت 6) اور یہ کیسا عجیب نظام ربوبیت ہے کہ اگر سفر پیش آجائے تو آدمی اسے پورا قائم کرنے کے بجائے آدھا ہی قائم کرلے ؟ وَاِذَا ضَرَبْتُمْ فِي الْاَرْضِ فَلَيْسَ عَلَيْكُمْ جُنَاحٌ اَنْ تَقْصُرُوْا مِنَ الصَّلٰوةِ (النساء، آیت 101 ) پھر یہ کیا لطیفہ ہے کہ اگر جنگ کی حالت ہو تو فوج کے آدھے سپاہی ہتھیار لیے ہوئے امام کے پیچھے " نظام ربوبیت " قائم کرتے رہیں اور آدھے دشمن کے مقابلے میں ڈٹے رہیں، اس کے بعد جب پہلا گروہ امام کے پیچھے " نظام ربوبیت " قائم کرتے ہوئے ایک سجدہ کرلے تو وہ اٹھ کر دشمن کا مقابلہ کرنے کے لیے چلا جائے اور دوسرا گروہ اس کی جگہ آکر امام کے پیچھے اس " نظام ربوبیت " کو قائم کرنا شروع کردے وَاِذَا كُنْتَ فِيْهِمْ فَاَقَمْتَ لَھُمُ الصَّلٰوةَ فَلْتَقُمْ طَاۗىِٕفَةٌ مِّنْھُمْ مَّعَكَ وَلْيَاْخُذُوْٓا اَسْلِحَتَھُمْ ۣفَاِذَا سَجَدُوْا فَلْيَكُوْنُوْا مِنْ وَّرَاۗىِٕكُمْ ۠ وَلْتَاْتِ طَاۗىِٕفَةٌ اُخْرٰى لَمْ يُصَلُّوْا فَلْيُصَلُّوْا مَعَكَ (النساء، آیت 102 ) قرآن مجید کی یہ ساری آیات صاف بتارہی ہیں کہ اقامت صلوۃ سے مراد وہی نماز قائم کرنا ہے جو مسلمان دنیا بھر میں پڑھ رہے ہیں، لیکن منکرین حدیث ہیں کہ خود بدلنے کے بجائے قرآن کو بدلنے پر اصرار کیے چلے جاتے ہیں۔ حقیقت یہ ہے کہ جب تک کوئی شخص اللہ تعالیٰ کے مقابلے میں بالکل ہی بےباک نہ ہوجائے وہ اس کے کلام کے ساتھ یہ مذاق نہیں کرسکتا جو یہ حضرات کر رہے ہیں۔ یا پھر قرآن کے ساتھ یہ کھیل وہ شخص کھیل سکتا ہے جو اپنے دل میں اسے اللہ کا کلام نہ سمجھتا ہو اور محض دھوکا دینے کے لیے قرآن قرآن پکار کر مسلمانوں کو گمراہ کرنا چاہتا ہو۔ (اس سلسلہ میں آگے حاشیہ 50 بھی ملاحظۃ ہو) (تفہیم القرآن)

19۔یہاں سے آگے وہ دلائل بیان ہوئے ہیں جن سے توحید اور بعث و قیامت کا اثبات ہوتاہے۔(ترجمہ: مولانا امین احسن اصلاحیؒ)

چھ آیات ِ قدرت۔

پہلی آیتِ قدرت: انسان کو مٹی سے پیداکرنا۔دوسری آیت قدرت: انسان ہی کی جنس سے سکون اور محبت و رحمت کےلئے عورتیں پیداکرنا۔ اِنَّ فِیْ ذٰلِكَ لَاٰیٰتٍ لِّقَوْمٍ یَّتَفَكَّرُوْنَ۔تیسری آیت قدرت: آسمان و زمین کی تخلیق اور انسانوں کے مختلف طبقات کی زبانیں ،لب و لہجہ اور رنگوں میں امتیاز۔ اِنَّ فِیْ ذٰلِكَ لَاٰیٰتٍ لِّلْعٰلِمِیْنَ۔چوتھی آیت قدرت: رات اور دن میں انسان کا سونا اور تلاشِ معاش۔ اِنَّ فِیْ ذٰلِكَ لَاٰیٰتٍ لِّقَوْمٍ یَّسْمَعُوْنَ۔ پانچویں آیت قدرت: بجلی کا کوندنا(گرکر نقصان پہنچانے کا خطرہ بھی اور بارش کی امید بھی )۔ اِنَّ فِیْ ذٰلِكَ لَاٰیٰتٍ لِّقَوْمٍ یَّعْقِلُوْنَ۔چھٹی آیت قدرت: آسمان و زمین کا قیام ،ان کی توڑ پھوڑ اور حشر کا برپاہونا۔)معارف القرآن(

سورۂ النحل (ر۔2) یہی انداز یعنی آیات ترجیع۔تمام سابقہ آیات کا ماحصل اور مقصد ۔اس لئے هُوَ الْعَزِیْزُ الْحَكِیْمُ۔

22۔کائنات میں کثرت کے اندر و حدت مضمر ہے۔قوموں کی زبانیں الگ اور ناک نقشہ مختلف ہے۔ اس اختلاف و تنوع کے باوجود وہ مختلف خالقوں کی مخلوق نہیں بلکہ یہ سب اللہ ہی کی حیرت انگیز کاریگری کا کرشمہ ہے۔(ترجمہ: مولانا امین احسن اصلاحیؒ) 

28۔ ان کے اصل عقیدہ کا اظہار تلبیہ سے لبیک الھم لبیک ۔لاشریک لک الا شریکا ھو لک تملکہ وماملک۔ میں حاضر ہوں میرے اللہ میں حاضر ہوں۔تیرا کوئی شریک نہیں سوائے اس شریک کے جو تیرا اپنا ہے تو اس کا بھی مالک ہے اور جو کچھ اس کی ملکیت ہے اس کا بھی تو مالک ہے (طبرانی عن ابن عباسؓ)

ـــ  بعض کفار کی اس "لبیک"کو اور اس آیت کو پڑھ کر ہم اہل سنت پر یہ الزام لگاتے ہیں کہ تمہارا بھی یہی عقیدہ ہے جو کفار کا اپنے بتوں کے بارے میں تھا۔آیت کی اس سادہ توضیح کے بعد آپ خود فیصلہ فرمالیں کہ یہ لوگ یہ الزام لگانے میں کتنی زیادتی کرتے ہیں۔(کیا کوئی کلمہ گو کسی کو خواہ اس کا مرتبہ کتنا بلند اور اس کی شان کتنی ارفع ہوکیا کسی چیز میں کسی پہلو سے کسی حیثیت سے اللہ تعالیٰ کا ہم پلہ خیال کرتاہے۔اور تو اور ہم تو اپنے آقا و مولیٰ ؐ کے متعلق بھی یہ عقیدہ رکھتے ہیں کہ حضور محبوب رب العالمین،رحمۃ العالمین،شفیع المذنبین  سیدالاولین والآخرین ،صاحبِ مقام محمود ،حاملِ لواء الحمد ہونے کے باوجود اللہ تعالیٰ کے بندے اور اس کے رسول ہیں ۔اشھد انّ محمداً عبدہ ورسولہ۔) (ضیاء القرآن)

30۔ یعنی فطرتِ سلیم پر قائم رہنا ہی سیدھا اور صحیح طریقہ ہے۔ (تفہیم القرآن)

ــــ  تمام انسانوں کی فطرت۔  اول یہ کہ فطرت سے مراد اسلام ہے اور مطلب یہ ہے کہ اللہ تعالیٰ نے ہر انسان اپنی فطرت اور جبلت کے اعتبار سے مسلمان پیدا کیا ہے۔اگر اس کو گردوپیش اور ماحول میں کوئی خراب کرنے والا خراب نہ کردے تو ہر پیدا ہونے والا بچہ مسلمان ہی ہوگا۔مگر عادۃً ہوتایہ ہے کہ ماں باپ اس کو بعض اوقات اسلام کے خلاف چیزیں سکھا دیتے ہیں،جس کے سبب وہ اسلام پر قائم نہیں رہتا ۔جیساکہ صحیحین کی ایک حدیث میں مذکور ہے۔قرطبی نے اسی قول کو جمہور سلف کا قول قراردیا ہے۔دوسرا قول یہ ہے کہ فطرت سے مراد استعداد ہے۔ یعنی تخلیق انسانی میں اللہ تعالیٰ نے یہ خاصیت رکھی ہے کہ ہر انسان میں اپنے خالق کو پہچاننے اور اس کو ماننے کی صلاحیت و استعداد موجود ہے جس کا اثر اسلام کا قبول کرنا ہوتاہے،بشرطیکہ اس استعداد سے کام لے۔ مگر قول پر متعدد اشکالات ہیں، اول یہ کہ خو داسی آیت میں یہ بھی آگے مذکور ہے لاتبدیل لخلق اللہ اور یہاں خلق اللہ سے مراد وہی فطرۃ اللہ ہے  جس کا اوپر ذکر ہواہے  اس لئے معنی اس جملے کے یہ ہیں کہ اللہ کی اس فطرت کو کوئی تبدیل نہیں کرسکتا،حالانکہ حدیث صحیحین میں خود یہ آیاہے کہ پھر ماں باپ بعض اوقات بچے کو یہودی یا نصرانی بنادیتے ہیں۔۔۔۔دوسرے حضرت خضرؑنے جس لڑکے کو قتل کیا تھا اس کے متعلق صحیح حدیث میں ہے کہ اس لڑکے کی فطرت میں کفر تھا،اس لئے خضرؑ نے اس کو قتل کیا، یہ حدیث بھی اس کے منافی ہے کہ ہر انسان اسلام پر پیدا ہوتاہو۔۔۔۔۔تیسرا شبہ یہ ہے کہ اگر اسلام کوئی ایسی چیز ہے جو انسان کی فطرت میں اس طرح رکھ  دیا گیا ہے جس کی تبدیلی پر بھی اس کو قدرت نہیں تو وہ کوئی اختیاری فعل نہ ہوا پھر اس پر آخرت کا ثواب کیسا؟کیونکہ ثواب تو اختیاری عمل پر ملتاہے۔۔۔۔چوتھا شبہ یہ ہے کہ احادیث ِ صحیحہ کے مطابق فقہاء ِ امت کے نزدیک بچہ بالغ ہونے سے پہلے ماں باپ کے تابع سمجھا جاتاہے،اگر ماں باپ کافرہوں تو بچے کو بھی کافر قراردیا جائے گا۔اس کی تجہیز و تکفین اسلامی طرز پر نہیں کی جائے گی۔۔۔۔۔اور حضرات سلف سے جو پہلا قول منقول ہے بظاہر اس کی مراد بھی اصل اسلام نہیں، بلکہ یہی استعداد ِ اسلام اور اس کی قابلیت و صلاحیت ہے۔ محدث دھلویؒ نے لمعات شرح مشکوٰۃ میں جمہور کے قول کا یہی مطلب بیان فرمایا ہے۔اور اسی کی تائید اس مضمون سے ہوتی ہے جو حضرت شاہ ولی اللہ دہلویؒ نے حجۃ اللہ البالغہ میں تحریر فرمایا ہے،۔۔۔۔شہد کی مکھی میں یہ مادّہ رکھ دیا کہ وہ درختوں اور پھولوں کو پہچانے اور انتخاب کرے پھر اس کے رس کو اپنے پیٹ میں محفوظ کرکے اپنے چھتّے میں لاکر جمع کرے، اسی طرح انسان کی فطرت جبلت میں ایسا مادّہ اور استعداد رکھ دی ہے کہ وہ اپنے پیدا کرنے والے کو پہچانے ،اس کی شکر گذاری اور اطاعت شعاری کرے، اسی کا نام اسلام ہے۔۔۔۔۔اس کو غلط ماحول کافرتوبناسکتاہے مگر اس کی استعدادِ قبولِ حق کو بالکل فنا نہیں کرسکتا۔۔۔۔اہل باطل کی صحبت اور غلط ماحول سے الگ رہنا فرض ہے:۔۔۔۔۔انسان کو ایسے اسباب سے بہت پرہیز کرنا چاہئے جو اس قبولِ حق کی استعداد کو معطل یا کمزور کردیں۔ اور وہ اسباب بیشتر غلط ماحول اور بُری صحبت ہے ،یا اہل باطل کی کتابیں دیکھنا جب کہ خود اپنے مذہب اسلام کا پورا عالم اور مبصّر نہ ہو۔(معارف القرآن)

32۔  یہ اشارہ ہے اس چیز کی طرف کہ نوع انسانی کا اصل دین وہی دین فطرت ہے جس کا اوپر ذکر کیا گیا ہے۔ یہ دین مشرکانہ مذاہب سے بتدریج ارتقاء کرتا ہوا توحید تک نہیں پہنچا ہے، جیسا کہ قیاس و گمان سے ایک فلسفہ مذہب گھڑ لینے والے حضرات سمجھتے ہیں، بلکہ اس کے برعکس یہ جتنے مذاہب دنیا میں پائے جاتے ہیں یہ سب کے سب اس اصلی دین میں بگاڑ آنے سے رونما ہوئے ہیں۔۔۔۔۔۔ (تفہیم القرآن)

34۔۔۔۔ اس کے بعد نہایت تند لہجہ میں مخاطب کرکے فرمایا کہ اچھا کچھ دن ہماری نعمتوں سے اپنی اس ناسپاسی و ناشکری کے باوجود، فائدہ اٹھا لو، عنقریب تمہاری اس حرکت کا خمیازہ تمہارے سامنے آنے والا ہے۔ (تدبرِ قرآن)

38۔ انفاق فی سبیل اللہ ۔امیروں کا قرض اور غریبوں کا حق۔ آیت میں "حقه" کا لفظ بڑا غور طلب ہے یعنی اپنے غریب رشتہ داروں اور مسافروں اور دوسرے محتاج انسانوں کو جو کچھ تم دے رہے ہو وہ کوئی انعام نہیں کہ دے کر تم ان پر احسان جتلاتے پھرو اور ان کو ہر محفل میں رسواکرتے رہو۔ بلکہ یہ انکا حق ہے جو تمہارے ذمہ واجب الاداء ہے اور جو تمہیں ضرور اداکرنا چاہئے۔وہ تم سے بھیک نہیں مانگ رہے بلکہ اپنا حق لے رہے ہیں۔علامہ آلوسی فرماتے ہیں کہ حضرت امام اعظم ابوحنیفہؒ نے فرمایا کہ آیت سے ثابت ہوتاہے کہ ہر غریب اور مفلس رشتہ دار کی ضروریات کی بہم رسانی اس کے متمول رشتہ دار پر فرض ہے ۔۔۔۔۔نیز یہاں مال زکوٰۃ کی ادائیگی کا حکم نہیں دیا جارہاہے بلکہ ان لوگوں کا زکوٰۃ کے علاوہ بھی متمول لوگوں کے اموال میں حق ہے۔۔۔۔۔مجاہداور قتادہ فرماتے ہیں،اللہ تعالیٰ نے صلہ رحمی کو فرض کیا ہے۔مجاہد نے تو یہاں تک فرمایا کہ اس آدمی کا صدقہ قبول نہیں ہوتاجس کا کوئی رشتہ دار محتاج ہو۔"(ضیاء القرآن)

ــــ فقہائے حنفیہ نے آیت سے استنباط کیا ہے کہ قریب کے حاجت مند عزیزوں کا نفقہ واجب ہے۔۔۔۔۔نظام معاشیات کو ان ضوابط الٰہی کے ماتحت چلانے والے انفرادی طورپر بھی فلاح یاب رہیں گے اور اجتماعی طور پر بھی۔دنیا میں بھی اور آخرت میں بھی۔(تفسیر ماجدی)

39۔ یہاں سے سود کے متعلق صرف اتنا کہنے پر اکتفا کیا گیا ہے کہ یہ وہ چیز نہیں جس سے دولت کی افزائش ہوتی ہو بلکہ حقیقی افزائش زکوٰۃ سے ہوتی ہے ۔اس کے بعد سود در سود سے منع کیا گیا (آل عمران:130)اور سب سے آخر میں بجائےخود  سود ہی کی قطعی حرمت کا فیصلہ کردیاگیا (البقرۃ: 275) ۔۔۔۔۔اس سے بڑھوتری کےلئے کوئی حد مقرر نہیں ۔جتنی خالص نیت اور جتنے گہرے جذبۂ ایثار اور جس قدر شدید طلبِ رضا الٰہی کے ساتھ کوئی شخص راہِ خدا میں مال صرف کرے گا اسی قدر اللہ تعالیٰ اس کا زیادہ سے زیادہ اجر دے گا ۔چنانچہ ایک صحیح حدیث میں آیا ہے کہ اگر ایک شخص راہِ خدا میں ایک کھجور بھی دے تو اللہ تعالیٰ اس کو بڑھا کر احد پہاڑ کے برابر کردیتاہے۔(تفہیم القرآن)

ــــ نوتہ کی رسم۔ پنجابی میں نیو ندرہ۔گھرداگھر اور وادھا۔ایسی مقامی رسومات میں اگر  واپسی کی بجائے صدقہ کی نیت ہو تو کار ثواب ہے۔ (معارف القرآن)

ــــ (اور پھر بڑھ کر اپنے ہی پاس واپس آجائے) ربًا۔ ربایہاں اپنے وسیع و عام لغوی معنی میں ہے۔۔۔۔یعنی دنیا میں بھی برکت انفرادی، اجتماعی، ہرحیثیت سے اسی مال سے حاصل ہوگی،اور آخرت میں بھی اجر کئی گنایہی مال دلائے گا۔۔۔یہی مال جو رضا ئے الٰہی کی نیت سے اداکیا گیا تھا،نہ کہ سودی کاروبار اور نمایشی داد دہش ،حالانکہ ظاہراً پُرمنفعت تمام تر وہی معلوم ہوتاہے۔(تفسیر ماجدی)

40۔(قیامت میں)یعنی ایجاد ،ابقا و فنا تینوں صفات کا مالک صرف وہی ہے،پیدا کرنے والا،پالنے والا، فنا کرنے والا، سب صرف وہی ایک ہے، الگ الگ اور تین تین ہستیاں نہیں، جیساکہ ہندومذہب کا عقیدہ ہے۔اور پھرقیامت میں اٹھانے کا وصف بھی اسی کے لئے مخصوص ہے۔یہ حقیقت بھی یہاں کھل کر بیان ہوگئی کہ(1)پیدا کرنے والا بھی وہی ہے۔۔۔قانونِ تخلیق کے سلسلے کی چھوٹی بڑی کڑیاں سب اسی کے ہاتھ میں ہیں۔(2)رزق دینے والا بھی وہی ہے۔۔۔۔معاشی خدا بھی وہی ہے،سلسلۂ رزاقیت کے سارے مرتبے اور مرحلے اسی کے بس میں ہیں۔(3)موت لانے والا بھی وہی ہے۔۔۔۔موت کے سارے اسباب و متعلقات کی کنجی اسی کے ہاتھ میں ہے۔(4)دوبارہ اٹھانے والا بھی وہی ہے۔۔۔۔الٰہ المعاد بھی وہی ہے، معاد آخرت میں بھی ساری حکومت اور سارے اختیارات اس کے ہیں۔(تفسیر ماجدی)

41۔یہ پھر اس جنگ کی طرف اشارہ ہے جو اس وقت روم و ایران کے درمیان برپا تھی جس کی آگ نے پورے شرق اوسط کو اپنی لپیٹ میں لے لیا تھا۔ " لوگوں کے اپنے ہاتھوں کی کمائی " سے مراد وہ فسق و فجور اور ظلم و جور ہے جو شرک یا دہریت کا عقیدہ اختیار کرنے اور آخرت کو نظر انداز کردینے سے لازمًا انسانی اخلاق و کردار میں رونما ہوتا ہے۔ " شاید کہ وہ باز آئیں " کا مطلب یہ ہے کہ اللہ تعالیٰ آخرت کی سزا سے پہلے اس دنیا میں انسانوں کو ان کے تمام اعمال کا نہیں، بلکہ بعض اعمال کا برا نتیجہ اس لیے دکھاتا ہے کہ وہ حقیقت کو سمجھیں اور اپنے تخیلات کی غلطی کو محسوس کر کے اس عقیدہ صالحہ کی طرف رجوع کریں جو انبیاء (علیہم السلام) ہمیشہ سے انسان کے سامنے پیش کرتے چلے آرہے ہیں، جس کو اختیار کرنے کے سوا انسانی اعمال کو صحیح بنیاد پر قائم کرنے کی کوئی دوسری صورت نہیں ہے۔ یہ مضمون قرآن مجید میں متعدد مقامات پر بیان ہوا ہے۔ مثال کے طور پر ملاحظہ ہو، التوبہ، آیت 126۔ الرعد آیت 31۔ السجدہ 21۔ الطور 47۔ (تفہیم القرآن) 

42۔ یعنی روم و ایران کی تباہ کن جنگ آج کوئی نیا حادثہ نہیں ہے۔ پچھلی تاریخ بڑی بڑی قوموں کی تباہی و بربادی کے ریکارڈ سے بھری ہوئی ہے۔ اور ان سب قوموں کو جن خرابیوں نے برباد کیا ان سب کی جڑ یہی شرک تھا جس سے باز آنے کے لیے آج تم سے کہا جارہا ہے۔  (تفہیم القرآن)

 ۔۔۔۔۔صاحب ْروح المعانی نے لکھا ہے کہ شر مقصود بالذات نہیں ہوتا، اس کی حیثیت نشتر کی ہے، یعنی جس طرح نشتر کا زخم مقصود بالذات نہیں ہوتا،مقصود و مطلوب تو صحت ہوتی ہے،نشتر تو اس کا محض ذریعہ ہوتاہے۔(روح، ج2/ص:115)(تفسیر ماجدی)

46۔ہواؤں کے فائدے:۔ قرآن میں جہاں بھی ارسال الریاح کے الفاظ مذکور ہوں (یعنی ریح کا لفظ جمع کے صیغہ میں ہو)تو اس سے مرادخوشگوار ہوائیں ہوتی ہیں۔۔۔۔۔(تیسیر القرآن)

۔ یہ ایک اور قسم کی ہواؤں کا ذکر ہے جو جہاز رانی میں مددگار ہوتی ہیں۔ قدیم زمانہ کی بادبانی کشتیوں اور جہازوں کا سفر زیادہ تر باد موافق پر منحصر تھا اور باد مخالف ان کے لیے تباہی کا پیش خیمہ ہوتی تھی۔ اس لیے بارش لانے والی ہواؤں کے بعد ان ہواؤں کا ذکر ایک نعمت خاص کی حیثیت سے کیا گیا ہے۔۔۔۔۔ یعنی تجارت کے لیے سفر کرو۔ (تفہیم القرآن)

47۔ وہ روشن دلیلیں کیا تھیں؟ وہ اللہ کی کتاب تھی،رسولوں کی اپنی پاکیزہ سیرت تھی جسے اللہ تعالیٰ نے ان کی نبوت کے ثبوت کے طورپر پیش کیا۔ پھر ان نبیوں نے ایک ایسا معاشرہ قائم کیا جو احکامِ الٰہی کا چلتا پھرتا عملی نمونہ تھا۔اللہ کی کتاب میں  اللہ کی ہر سو بکھری ہوئی نشانیوں میں غور و فکر کی دعوت دی گئی تھی۔کتاب کی آیات کائنات کی آیات کی تائید کرتی تھیں اور کائناتی آیات کتاب کی آیات کی تائید کرتی تھیں۔یہ دونوں قسم کی نشانیاں ایک دوسری کی تائید و تصدیق کرتی تھیں۔پھر بھی لوگ اس نبی پر ایمان نہ لائے اور اکڑگئے۔الٹا ایمان لانے والوں پر ستم ڈھانا شروع کردئیے۔پھر جب ان کی سرکشی بڑھتی ہی گئی تو ہم نے ایمانداروں کو تو بچا لیا اور انہیں پچالینا ہی ہماری ذمہ داری بھی تھی۔ اور مجرم لوگوں کو تباہ کرڈالا۔(تیسیر القرآن)

ــــ فانتقمنا۔  بعض نافہموں نے"انتقام"حق کو اللہ تعالیٰ کی شان کے منافی اور اس سے پست سمجھا ہے۔ یہ نتیجہ ہے تمام تر"انتقام"اور "کینہ پروری"کے درمیان خلط مبحث کردینے کا۔انتقام جس کے معنی مجرموں کو کیفر کردار تک پہنچانے کے ہیں،وہ تو قیام عدل کے لیے لازمی ہے، ورنہ پھر نظام عدل کو سرے سے خیرباد کہہ دیا جائے۔(تفسیر ماجدی)

48۔ بارش برسنے کے عمل میں اللہ کی قدرتیں اور حکمتیں:۔ اس ایک آیت میں اللہ تعالیٰ نے اپنی کئی نشانیاں بیان فرمادیں مثلاً ہوا جو ایک کنکر کا بوجھ بھی برداشت نہیں کرسکتی اور کنکر زمین پر آپڑتاہے مگریہ ہوا آبی بخارات کو ایک کاغذ کے پرزے کی طرح اپنے دوش پر اٹھائے پھرتی ہیں۔وہ آبی بخارات جن میں کروڑوں ٹن پانی موجود ہوتاہے۔اور اس وزن کا اندازہ زمین کے اس رقبہ سے لگایا جاسکتاہے جس میں یہ بارش ہوئی اور جتنے انچ بارش ہوئی۔دوسری یہ کہ ان باربردار ہواؤں کا رخ طبعی طورپر متعین نہیں ہوتا بلکہ اللہ تعالیٰ جس طرف خود چاہے اسی طرف ہی موڑ دیتاہے اس لئے جہاں چاہتاہے وہیں بارش ہوتی ہے دوسرے علاقہ میں نہیں ہوتی۔تیسری یہ کہ جب یہ بادل کسی ایسے ٹھنڈے فضائی علاقے تک پہنچتے ہیں جو آبی بخارات کو پھر سے پانی میں منتقل کرسکیں تو وہاں بھی بادلوں کا سارا پانی یک لخت پانی بن کر زمین پر نہیں گر پڑتا، بلکہ قطرہ قطرہ بن کر گرتاہے ۔حتیٰ کے اگر برودت زیادہ ہو تو بھی وہ قطرے ہی اولے بن کر گرتے ہیں ۔یہ نہیں ہوتاکہ زیادہ سردی کی وجہ سے یک لخت سارا پانی بن کر ایک ہی دفعہ کسی جگہ گر پڑے ۔اور اس میں اللہ کی بہت سی حکمتیں ہیں۔(تیسیر القرآن)

ــ اس قسم کی جتنی بھی آیتیں قرآن مجید میں تکوینات سے متعلق ہیں، ان کے پہلو دو دو اور رخ دہرے ہیں: ایک رخ  تو رد الحاد کا ہے، یعنی یہ ساری مشین خود بہ خود چلتی نہیں رہتی ہے، بلکہ چھوٹے بڑے ہرتغیر ، ہر سکون اور ہر حرکت کی ڈور ایک فعال اور صاحب الارادہ کے ہاتھ میں ہے، جو اپنی حسبِ حکمت اسے گھماتاچلاتا رہتاہے ۔اور دوسرا رخ رد شرک کا ہے،یعنی ہر ہر صیغۂ موجودات کے حاکم و متصرف الگ الگ اور مستقل نہیں، ایک ہی حاکم ، مقتدر اعلیٰ سب کا ہے، وہی ایک ہے جو پانی سے بخارات اٹھاتاہے،اور چلاتاہے۔بادلوںکو کہیں کثیف و دبیز کہیں لطیف و خفیف رکھتاہے۔جب اور جہاں اور جتنا چاہتاہے پانی برساتاہے یا بارش کو روکے رہتاہے،اس ایک کے سوا کوئی دیوی دیوتااس نظام کائنات میں ذرہ بھر بھی مؤثر نہیں۔(تفسیر ماجدی)

50۔   یہاں جس انداز سے نبوت اور بارش کا ذکر یکے بعد دیگرے کیا گیا ہے اس میں ایک لطیف اشارہ اس حقیقت کی طرف بھی ہے کہ نبی کی آمد بھی انسان کی اخلاقی زندگی کے لیے ویسی ہی رحمت ہے جیسی بارش کی آمد اس کی مادی زندگی کے لیے رحمت ثابت ہوتی ہے۔ (تفہیم القرآن)

53۔ اس سورہ کی آیات نمبر 52،53 اور سورۂ نمل کی آیات نمبر 80، 81 کے الفاظ تک آپس میں ملتے جلتے ہیں۔لہذا انہی آیا ت کے حواشی ملاحظہ فرمالئے جائیں۔(تیسیر القرآن)

 اس کے برخلاف قبر کے سوال و جواب میں احادیث صحیحہ میں مذکور ہے کہ جب کافر سے پوچھا جائے گا کہ تیرا رب کون ہے اور محمد مصطفیٰ ﷺ کون ہیں ؟ تو وہ کہے گا، ھاہ ھاہ لا ادری، یعنی ہائے ہائے میں کچھ نہیں جانتا۔  اگر وہاں جھوٹ بولنے کا اختیار ہوتا تو کیا مشکل تھا، کہہ دیتا کہ میرا رب اللہ ہے اور محمد ﷺ اللہ کے رسول ہیں۔ تو یہ ایک عجیب بات ہے کہ کافر لوگ اللہ کے سامنے تو جھوٹ بولنے پر قادر ہوں اور فرشتوں کے سامنے جھوٹ نہ بول سکیں۔ مگر غور کیا جائے تو کچھ تعجب کی بات نہیں وجہ یہ ہے کہ فرشتے نہ تو عالم الغیب ہیں نہ ان کو یہ اختیار ہے کہ ہاتھ پاؤں کی گواہی لے کر اس پر حجت تمام کردیں، اگر ان کے سامنے جھوٹ بولنے کا اختیار ہوتا تو سب کافر فاجر عذاب قبر سے بےفکر ہوجاتے، بخلاف اللہ جل شانہ کے کہ وہ دلوں کے حال سے بھی واقف ہیں اور اعضاء وجوارح کی شہادت سے اس کا جھوٹ کھول دینے پر قادر بھی ہیں۔ اس لئے محشر میں یہ آزادی دے دینا عدالتی انصاف میں کوئی خلل پیدا نہیں کرتا۔ واللہ اعلم۔ (معارف القرآن)