1۔ فِی الْاٰخِرَةِ کے دومطلب ہیں ایک یہ کہ اس دنیا میں اگر کسی انسان کے کارناموں کی تعریف کی جائے تو وہ بلآخر  اللہ کی ہی تعریف ہوگی کیونکہ انسان کو ہر طرح کی قوت، صلاحیت اور استعداد عطاکرنے والا اللہ ہی ہے۔یعنی فی الآخرۃ کا لفظ یہاں بالآخر کا معنی دے رہاہے ۔اور دوسرا مطلب یہ ہے کہ اس دنیا میں تو کچھ اسباب ظاہرہیں جو سب کو دکھائی دیتے یا محسوس  ہوتے ہیں لیکن کچھ اسباب ایسے بھی ہیں جن پر پردہ پڑا ہواہے۔آخرت میں ایسے سب پردے اور حجابات اٹھ جائیں گے اور ہر ایک کو یہ نظر آئے گا کہ قابل تعریف ذات تو صرف اللہ ہی کی ہے۔(تیسیر القرآن)

2۔مَا یَلِجُ فِی الْاَرْضِ ۔زمین کے اندر داخل ہونے والی چیزیں  مثلاًبارش یا تخم نباتات وغیرہا۔مَا یَخْرُ جُ مِنْهَا۔ زمین سے باہر نکلنے والی چیزیں مثلاً نباتات،معدنیات وغیرہا۔مَا یَنْزِلُ مِنَ السَّمَآءِ۔ آسمان سے اترنے والی چیزیں مثلاً ملائکہ ،احکامِ الٰہی وغیرہا۔ مَا یَعْرُجُ فِیْهَا۔آسمان پر چڑھے والی چیزیں مثلاً ملائکہ ،اعمال انسانی، دعائیں۔(تفسیر ماجدی)

3۔ زمین میں داخل ہونے والی ،زمین سے نکلنے والی، زمین پر اترنے والی اور زمین سے چڑھنے والی اشیاء:۔زمین میں داخل ہونے والی چیزیں یہ ہیں: ہر قسم کی نباتات کے بیج، بارش کا پانی،تمام جانوروں کے مردہ اجسام۔ اور حشرات الارض وغیرہ اور زمین سے نکلنے والی چیزیں مثلاً کھیتی، پودے، درخت،معدنیات۔کئی قسم کے تیل اور گیسیں وغیرہ اور آسمان سے اترنے والی چیزیں مثلاً بارش اللہ کی رحمت و برکت ،وحی الٰہی،فرشتے وغیرہ اور جو آسمان کی طرف چڑھنے والی چیزیں مثلاً دعا، فرشتے،انسانوں کے اعمال وغیرہ ان سب انواع اور ان کی جزئیات سب کچھ اللہ کے علم میں ہے۔(تیسیر القرآن)

ــــ یعنی علاوہ حق تعالیٰ کے علم ذاتی کے وہ خدائی رجسڑ میں بھی باضابطہ درج ہے۔ کتاب مبین۔یعنی لوح محفوظ۔(تفسیر ماجدی)

6۔ یعنی جن کو علم حقیقی کی روشنی عطا ہوئی ۔مثلاً اچھے اہل کتاب یا سلیم الفطرت لوگ ،جیسے عرب کے دینِ حنیفی کے پیرو ۔یہ علم خدا کی معرفت اور آخرت کا علم ہے۔ اسی کےحاملین کو قرآن نے علماء کہا ہے۔(ترجمہ: مولانا امین احسن اصلاحیؒ)

9۔ یہ ان کی بات کا دوسرا جواب ہے۔ اس جواب کو سمجھنے کے لیے یہ حقیقت نگاہ میں رہنی چاہیے کہ کفار قریش جن وجوہ سے زندگی بعد موت کا انکار کرتے تھے ان میں تین چیزیں سب سے زیادہ نمایاں تھیں۔ ایک یہ کہ وہ خدا کے محاسبے اور باز پرس کو نہیں ماننا چاہتے تھے کیونکہ اسے مان لینے کے بعد دنیا میں من مانی کرنے کی آزادی ان سے چھن جاتی تھی۔ دوسرے یہ کہ وہ قیامت کے وقوع اور نظام عالم کے درہم برہم ہوجانے اور پھر سے ایک نئی کائنات بننے کو ناقابل تصور سمجھتے تھے۔ تیسرے یہ کہ جن لوگوں کو مرے ہوئے سینکڑوں ہزاروں برس گزر چکے ہوں اور جن کی ہڈیاں تک ریزہ ریزہ ہو کر زمین، ہوا اور پانی میں پراگندہ ہوچکی ہوں ان کا دوبارہ جسم و جان کے ساتھ جی اٹھنا ان کے نزدیک بالکل بعید از امکان تھا۔ اوپر کا جواب ان تینوں پہلوؤں پر حاوی ہے۔۔۔۔۔۔۔ (تفہیم القرآن)

10۔وہ بزرگی یہ تھی کہ آپ پچپن میں محض ایک گڈریے تھے۔اور بکریاں چرایا کرتے تھے۔پھر اللہ نے آپ کو حکومت بھی عطافرمائی اور نبوت بھی۔اور یہ تفصیل پہلے سورہ بقرہ کی آیات نمبر 251 کے تحت گزرچکی ہے۔۔۔۔۔آپ کی خوش الحانی ،پہاڑوں اور پرندوں کی آپ سے ہم آہنگی کے لئے (سورۂ انبیاء کی آیت نمبر 79 کا حاشیہ نمبر 67 ملاحظہ کیجئے)۔۔۔۔۔آپ کے ہاتھ میں لوہے کا نرم ہونا اور آپ کے لوہے کی زرہیں بنانے کے لیے (دیکھئے سورہ انبیاء کی آیت نمبر 80 حاشیہ 68)(تیسیر القرآن)

ــــ امام رازیؒ نے بھی یہی مطلب لیا ہے کہ تسبیح میں معیت انھی دومخلوق تک محدود نہیں، بلکہ جبال و طیور کا ذکر صرف انتہائی نمونوں کے طورپر کیا گیا ہے۔(تفسیر ماجدی)

11۔ حضرت داؤدؑ ایک طرف نبوت و رسالت اور دوسری طرف حکومت و سلطنت کے باوجود اپنا مستقل ذریعۂ معاش صنعت زرہ سازی کو بنائے ہوئے تھے، اور اسی کی تجارت کرتے تھے۔تو آیت سے یہ مسئلہ بھی نکل آیا کہ صناعی و دست کاری منصب نبوت کے بھی منافی نہیں، چہ جائے کہ مرتبۂ ولایت کے۔۔۔۔۔مرشد تھانویؒ نے فرمایا کہ آیت سے تین مسئلے نکلے :ایک خرق عادت کا اثبات ،دوسرے دست کاری  سے کمانے کی فضیلت، تیسرے ہرکام میں اعتدال ،انتظام و تناسب کی رعایت یہاں تک کہ امورِ حسی و دنیوی میں بھی۔(تھانوی،ج2/ص:330)(تفسیر ماجدی)

12۔اس کی تشریح کے لئے دیکھئے(سورہ انبیاء کی آیت نمبر 81 کا حاشیہ 69)۔۔۔۔۔جنوں کا آپ کے لئے مزدوروں کی طرح کام کرنا:۔کہتے ہیں کہ ان جنوں پر اللہ تعالیٰ نے ایک فرشتہ مقرر کردیا تھا  جس کے ہاتھ میں آگ کا کوڑا ہوتا۔جوکوئی جن سیدنا سلمانؑ کی نافرمانی کرتا یہ فرشتہ اس کو کوڑا مارکرجلا دیتا تھا۔ (تیسیر القرآن)

ــــ یعنی تانبے کو اس  کے معدن میں رقیق سیال کردیا تھا تاکہ اس سے بلا مدد آلات مصنوعات کے بنانے میں سہولت ہو، پھر وہ منجمد ہوجاتا۔یوں بھی کہا جاسکتاہے کہ زیر زمین جہاں گرم اور رقیق تانبے کے چشمے ہیں، وہ آپ پر منکشف کردیے گئےتھے۔(تفسیر ماجدی)

13۔ کہتے ہیں کہ اس حکم کے بعد داؤدؑ نے دن اور رات کے پورے اوقات اپنے گھروالوں پر تقسیم کررکھے تھے اور کوئی وقت ایسا نہ ہوتاتھا جبکہ آپ کے گھر کا کوئی نہ کوئی فرد  اللہ کی عبادت میں مصروف نہ رہتاہو۔(تیسیر القرآن)

ــــ تمثَال۔جس قسم کی مُورت کو کہتے ہیں، اسی کو آج کی اصطلاح میں مجسمہ سے موسوم کرتے ہیں۔اگلی شریعتوں میں یہ چیز حرام نہ تھی۔۔۔۔ایک روایت یہ بھی نقل ہوئی ہے کہ یہ مجسمے انبیاء ، ملائکہ و صالحین کے تھے اور حضرت سلیمانؑ کی دعا سے ان میں جان پڑگئی تھی۔ لیکن بقول صاحب روح ھذا من العجب العجاب ولاینبغی اعتقاد صحتہ وماھوا الاحدیث خرافۃ،یہ حکایت بہت ہی عجیب و غریب ہے، ہرگز یقین کرنے کے قابل نہیں، یہ محض ایک لغو روایت ہے۔(روح،ج22/ص:118-119)۔۔۔۔۔حضرت سلیمانؑ اور ان کے متعلقین مراد ہیں، یہ انہیں مخاطب کرکے حکم ہوا تھا۔(تفسیر ماجدی)

۔ ۔۔۔(تفسیر کشاف) تمثال ہر اس تصویر کو کہتے ہیں جو کسی دوسری چیز کی صورت کے مماثل بنائی گئی ہو، خواہ وہ جان دار ہو یا بےجان "۔ اس بنا پر قرآن مجید کے اس بیان سے یہ لازم نہیں آتا کہ حضرت سلیمان ؑ کے لیے جو " تماثیل " بنائی جاتی تھیں وہ ضرور انسانوں اور حیوانوں کی تصاویر یا ان کے مجسمے ہی ہوں گے۔ ہوسکتا ہے کہ وہ پھول پتیاں اور قدرتی مناظر اور مختلف قسم کے نقش و نگار ہوں جن سے حضرت سلیمان نے اپنی عمارتوں کو آراستہ کرایا ہو۔۔ غلط فہمی کا منشا بعض مفسرین کے یہ بیانات ہیں کہ حضرت سلیمان ؑ نے انبیاء اور ملائکہ کی تصویریں بنوائی تھیں۔ ۔۔۔ یہ بات ہر شخص کو معلوم ہے کہ حضرت موسیٰ ؑ کے بعد حضرت عیسیٰ ؑ تک بنی اسرائیل میں جتنے انبیاء بھی آئے ہیں وہ سب تورات کے پیرو تھے ان میں سے کوئی بھی نئی شریعت نہ لایا تھا جو تورات کے قانون کی ناسخ ہوتی۔ اب تورات کو دیکھیے تو اس میں بار بار بصراحت یہ حکم ملتا ہے کہ انسانی اور حیوانی تصویریں اور مجسمے قطعاً حرام ہیں (تفہیم القرآن)

۔دیکھ لیجئے اس میں نہایت واضح الفاط میں صورت یا مورت بنانے کی ممانعت ہے۔ اس وجہ سے یہ خیال صحیح نہیں ہے کہ پچھلی شریعتوں میں یہ چیزیں جائز تھیں، صرف اسلام میں یہ حرام قرار دی گئی ہیں۔ یہ چیزیں پہلے بھی ناجائز تھیں اور حضرت سلیمان ؑ کے متعلق یہ گمان نہیں کیا جاسکتا کہ انہوں نے تورات کے کسی حکم کی خلاف ورزی کی۔ اس وجہ سے ہمارا خیال یہ ہے کہ انہوں نے اسی قسم کی تماثیل بنوائی ہوں گی جن کا تعلق مجرد آرٹ سے ہے اور مذہبی تقدس کا جن کے اندر کوئی شائبہ نہیں تھا۔ لیکن جب یہود میں مورت پرستی کا رواج ہوا ہوگا تو اس قسم کی چیزیں ان کے بادشاہوں نے بنوائی ہوں گی اور ان کو سند جواز دینے کے لئے ان کو حضرت سلیمان ؑ کی طرف منسوب کردیا گیا ہوگا۔ آخر تمام علوم سفلیہ بھی تو حضرت سلیمان ؑ ہی کی طرف یہود نے منسوب کیے جس کی تردید سورة بقرہ میں گزر چکی ہے۔ اسی طرح کی خرافات ان کی طرف کتاب سلاطین میں بھی منسوب کردی گئی ہیں۔ یہ امر واضح رہے کہ یہود نے حضرت سلیمان ؑ کو ایک پیغمبر کی حیثیت سے نہیں بلکہ ایک بالکل دنیا دار بادشاہ کی حیثیت سے پیش کیا ہے اور ان کی سیرت ہر پہلو سے انہوں نے داغدار کرنے کی کوشش کی ہے۔(تدبرِ قرآن)

14۔۔۔۔اسی حالت میں تقریباً چارماہ گزرگئے۔چار ماہ بعد ادھر بیت المقدس کی تعمیر مکمل ہوئی۔(تیسیر القرآن)

15۔سلسلۂ بیان کو سمجھنے کے لیے رکوع اول کے مضمون کو نگاہ میں رکھنا ضروری ہے۔ اس میں یہ بتایا گیا ہے کہ کفار عرب آخرت کی آمد کو بعید از عقل سمجھتے تھے۔ اور جو رسول اس عقیدے کو پیش کر رہا تھا اس کے متعلق کھلم کھلا یہ کہہ رہے تھے کہ ایسی عجیب باتیں کرنے والا آدمی یا تو مجنون ہوسکتا ہے، یا پھر وہ جان بوجھ کر افترا پردازی کر رہا ہے۔ اس کے جواب میں اللہ تعالیٰ نے پہلے چند عقلی دلائل ارشاد فرمائے جن کی تشریح ہم حواشی نمبر 7۔ 8۔ 12 میں کرچکے ہیں۔ اس کے بعد رکوع دوم میں حضرت داؤد و سلیمان (علیہما السلام) کا قصہ اور پھر سبا کا قصہ ایک تاریخی دلیل کے طور پر بیان کیا گیا ہے جس سے مقصود یہ حقیقت ذہن نشین کرنا ہے کہ روئے زمین پر خود نوع انسانی کی اپنی سرگزشت قانون مکافات کی شہادت دے رہی ہے۔ انسان اپنی تاریخ کو غور سے دیکھے تو اسے معلوم ہوسکتا ہے کہ یہ دنیا کوئی اندھیر نگری نہیں ہے جس کا سارا کارخانہ اندھا دھند چل رہا ہو بلکہ اس پر ایک سمیع وبصیر خدا فرمانروائی کر رہا ہے جو شکر کی راہ اختیار کرنے والوں کے ساتھ ایک معاملہ کرتا ہے اور ناشکری و کافر نعمتی کی راہ چلنے والوں کے ساتھ بالکل ہی ایک دوسرا معاملہ فرماتا ہے۔ کوئی سبق لینا چاہے تو اسی تاریخ سے یہ سبق لے سکتا ہے کہ جس خدا کی سلطنت کا یہ مزاج ہے اس کی خدائی میں نیکی اور بدی کا انجام کبھی یکساں نہیں ہو سکتا۔ اس کے عدل و انصاف کا لازمی تقاضا یہ ہے کہ ایک وقت ایسا آئے جب نیکی کا پورا اجر اور بدی کا پورا بدلہ دیا جائے۔ (تفہیم القرآن)

۔ ان باغوں میں ہر طرح کے درخت اور ہر قسم کے پھل اس کثرت سے پیدا ہوتے تھے کہ ائمہ سلف قتادہ وغیرہ کے بیان کے مطابق ان باغوں میں ایک عورت اپنے سر پر خالی ٹوکری لے کر چلتی تو درختوں سے ٹوٹ کر گرنے والے پھلوں سے خود بخود بھر جاتی تھی، اس کو ہاتھ بھی لگانا نہ پڑتا تھا۔ (ابن کثیر) (معارف القرآن)

۔ جو علاقہ اب یمن کہلاتاہے وہی پہلے سبا کا علاقہ تھا اس کے باشندوں نے اللہ تعالیٰ کے فضل کی قدر نہیں کی جس کی پاداش میں اللہ نے ان پر ایک سیلاب بھیجا جس سے پورا ملک تباہ ہوگیا۔(تدبر قرآن)

ـــ حضرت داؤد ؑ ،حضرت سلیمان اورقو م سبا:۔ حضرت داؤدؑ کو اللہ تعالیٰ نے بڑی نعمتوں سے نوازا تھا ۔وہ بیت اللحم کے رہنے والے ایک قبیلے کے معمولی نوجوان تھے۔بنی اسرائیل کی مشرکین کے خلاف ایک جنگ میں جبکہ یہ ابھی کم سن تھے عین اس وقت پہنچے جب کہ مشرکین کی فوج کا سپہ سالار جالوت جو بڑا طاقتور پہلوان تھا بنی اسرائیل کو دعوت مبارزت دے رہاتھا۔اور بنی اسرائیل میں سے کسی کی ہمت نہ پڑتی تھی کہ اس کے مقابلہ کیلئے نکلے ۔حضرت داؤد یہ رنگ  دیکھ کربے محابا اس کے مقابلے میں میدان میں جاپہنچے اور اسے قتل کردیا۔اس واقعے نے انہیں تمام اسرائیلیوں کی آنکھوں کا تارا بنا دیا۔طالوت نے اپنی بیٹی ان سے بیاہ دی۔یہاں سے ان کا عروج  شروع ہوا۔طالوت کی وفات  کے بعد تمام اسرائیلیوں نے مل کر انہیں اپنا بادشاہ منتخب کرلیا۔انہوں نے یروشلم فتح کیا اوران کی قیادت میں ایک خداپرست سلطنت تاریخ میں پہلی مرتبہ وجود میں آئی ۔جس کے حدود خلیج عقبہ سے دریائے فرات کے مغربی کناروں تک پھیلے ہوئے تھے۔ ان عنایات پر مزید فضل خداوندی وہ ہے جو انہیں خداترسی ،علم وحکمت ،عدل و انصاف اور بندگئ رب کی صورت میں نصیب ہوا۔حضرت داؤد ؑ کو اللہ نے بڑی خوش آوازی دی تھی ۔جب وہ اللہ کی حمد و ثناکے گیت گاتےتھے تو ان کی بلند اورسریلی آواز سے پہاڑ گونج اٹھتے تھے اور پرندے ٹھہرجاتے تھے ۔ایک سماں بندھ جاتاتھا۔حضرت داؤدؑ کو اللہ تعالیٰ نے لوہے کے استعمال پر قدرت عطاکی تھی اور خاص طورپر جنگی اغراض کیلئے زرہ سازی کا طریقہ سکھایا تھا۔صنعت کاری انبیاء کی سنت ہے۔۔۔۔۔حضرت سلیمانؑ کیلئے ہواکواللہ تعالیٰ نے ان کے حکم کے تابع کردیا تھا ۔ان کی مملکت سے ایک ماہ کی مسافت باآسانی طے کی جاسکتی تھی ،جاتے ہوئے بھی ہوا موافق ملتی تھی  اور واپسی پر بھی۔حضرت سلیمانؑ نے اپنے دور حکومت میں بہت بڑے پیمانے پر بحری تجارت کا سلسلہ شروع کیا تھا۔ان کے بحری بیڑے دور دراز تک جاتے تھے ۔ان دنوں بحری سفر کا انحصار بادِ موافق ملنے پر تھا۔اللہ نے ہوا کو ان کے حکم کےتابع کردیا تھا۔ان کے بحری تجارتی جہاز جدھر جاتے ان کو ہوا موافق ملتی تھی۔۔۔۔۔حضرت سلیمانؑ کے دور میں تانبے کو پگھلانے اور اس سے طر ح طرح کی چیزیں بنانے کاکام اتنے بڑے پیمانے پر کیا گیا گویا وہاں تانبے کے چشمے بہ رہے تھے۔۔۔۔اللہ تعالیٰ نے جن حضرت سلیمانؑ کے تابع کردئیے تھے۔وہ اللہ کے حکم سے ان سے کام لیتے تھے۔جوحکم نہیں مانتا تھااس کو سزا دی جاتی تھی۔حضرت سلیمانؑ کے ہاں بہت بڑے پیمانے پر مہمان نوازی ہوتی تھی۔اس لیے بڑے بڑے حوض جیسے لگن بنوائے جاتے تھےتاکہ ان میں لوگوں کیلئے کھانا نکال کر رکھاجاسکے۔اور بھاری دیگیں اس لیے بنوائی گئی تھیں تاکہ ان میں بیک وقت ہزاروں آدمیوں کا کھانا پک سکے۔۔۔۔۔اے داؤدؑ کی اولاد ! شکر کرو ،شکر کے طریقے پر کام کرو ،زبان سے بھی شکر اداکرو اور عملی شکر بھی کرو یعنی اللہ کی دی ہوئی نعمتوں کو اللہ کی مرضی کے مطابق استعمال کرو۔۔۔۔۔۔حضور پاکؐ نے فرمایا کہ تین کام ایسے ہیں جو ان کو پورا کرلے تو جو فضیلت آل داؤدؑکو دی گئی تھی اس کو بھی مل جائےگی۔ رضا اور غضب دونوں حالتوں میں انصاف کرے ، غنااور فقر دونوں حالتوں میں میانہ روی اختیار کرے۔خفیہ اور اعلانیہ اللہ سے ڈرے۔۔۔۔۔حضرت سلیمانؑ کی حکومت انسانوں پر ہی نہیں بلکہ جنات، طیور اور ہوا پر بھی تھی۔بے شمار سروسامان کے باوجود موت سے ان کو بھی مفر نہ تھا۔وہ اپنے وقت مقررہ پر آگئی۔بیت المقدس کی تعمیر کا کام حضرت داؤد ؑ کے دور میں شروع ہوا،حضرت سلیمان کے دور میں مکمل ہوا ۔تعمیر کا کچھ کام رہتا تھا کہ موت کا وقت آگیا۔تعمیر کا کام جنات کے سپرد تھااور ان کی طبیعت میں سرکشی تھی۔وہ صرف حضرت سلیمانؑ سے ڈرتے تھے ۔کام مکمل کرانا ضروی تھا۔اس کا انتظام حضرت سلیمانؑ نے اللہ کے حکم سے اس طر ح کیا کہ جب موت کا وقت آیاتو اس کی تیاری کرکے اپنے کمرے میں چلے گئے  جو صاف و شفاف شیشے کا بناہواتھا۔باہر سے اندر کی ساری چیزیں نظر آتی تھیں ،اور اپنے معمول کے مطابق عبادت کیلئے سہارالیکر کھڑے ہوگئے۔عصا کے سہارے کھڑے تھے کہ رو ح اپنے وقت مقررہ پر پرواز کر گئی۔وہ باہر سے عبادت میں مشغول نظر آتے تھے۔جنات کی یہ مجال نہ تھی کہ وہ پاس آکر دیکھ  سکتے۔وہ حضرت کو زندہ سمجھ کر کام میں مشغول رہے۔یہاں تک کہ ایک سال گزرگیا اور تعمیر کاکام مکمل ہوگیا۔اللہ کے حکم سے دیمک نے عصا کو اندر سے کھوکھلاکردیا اور حضرت سلیمانؑ گرگئے۔اس وقت جنات کو ان کی موت کی خبر ہوئی۔مشرکین عرب جنات کو اللہ کا شریک قرار دیتے تھے،انہیں اللہ کی اولاد سمجھتے تھےاور ان سے پناہ مانگاکرتے تھے،انہیں عالم الغیب سمجھتے تھے۔غیب کی خبریں معلوم کرنے کیلئے ان کی طرف رجوع کرتے تھے۔اللہ مشرکین کے ان عقائد کی تردید کیلئے حضرت سلیمانؑ کی موت کا یہ واقعہ سنارہاہے کہ اگر جن عالم الغیب ہوتے تو ان کو حضرت سلیمانؑ کی موت کی خبر ہوجاتی۔۔۔سبا کی قوم  کیلئے ان کی بستی میں نشانی تھی ،مطلب یہ ہے کہ اس بات کا واضح ثبوت تھا تا کہ اس سرسبز و شاداب بستی کو کوئی پیدا کرنے والا ہے۔یہ خود پیدا کرنے والے نہیں ہیں۔اور اس بات کی نشانی موجود تھی کہ یہ ساری دولت لازوال نہیں بلکہ یہ جس طرح آئی ہے اسی طرح جابھی سکتی ہے۔وہ باغ تھے یعنی سارا ملک زرخیز تھا،ہر طرف باغ ہی باغ نظر آتے تھے۔ترمذی نے   حضورؐ سے روایت نقل کی ہے سباعرب کا ایک شخص تھا جس کی نسل سے عرب کے کئی قبائل پیدا ہوئے۔۔۔۔۔یہ قوم یمن کے علاقے میں آبادتھی۔حضرت سلیمانؑ کے زمانے میں یہ دولتمند قوم کی حیثیت سے مشہور ہوچکی تھی۔آغاز میں یہ ایک بت پرست قوم تھی پھر جب اس کی ملکہ حضرت سلیمانؑ کے ہاتھ پر ایمان لائی تو اس قوم کی اکثریت مسلمان ہوگئی۔بعد میں پھر اس قوم میں بت پرستی شروع ہوگئی۔قوم سبا بہت دولت مند قوم تھی۔اس کی دولت کے قصے بہت مشہور تھے۔ان کی دولت کے قصے سن سن کر لوگوں کے منہ میں پانی بھر آتاتھا،یہ سونے اور چاندی کے برتن استعمال کرتے تھے۔ان کے گھروں کی دیواروں ،چھتوں اور دروازوں پر سونے چاندی اور جواہر کا کام بناہوتا  تھا۔ان کے باغات رسیلے پھلوں سے اور کھیت غلوں سے بھرے ہوئے تھے۔ان کے ہاں مویشیوں کی کمی نہ تھی۔یہ لوگ اتنے عیش پر ست ہوگئے تھے کہ جلانے کی لکڑی کی بجائے دار چینی،صندل اور دوسری خوشبودارلکڑیاں جلاتے تھے۔یونانی مؤرخین لکھتے ہیں کہ ملک کے پاس سے جو بحری جہاز گزرتے تھے ان تک خوشبو کی لپٹیں پہنچتی تھیں۔جب تک اللہ کا  فضل شامل حال رہا ان پر دولت برستی رہی ۔جب اس قوم نے اللہ کی بندگی سے منہ پھیر لیا،کفران نعمت کی تو تجارت ٹھپ ہوگئی،آب پاشی کا نظام درہم برہم ہوگیا اور اس قوم کا نام و نشان تک مٹ گیا۔۔۔رسیلے پھل کی بجائے کڑوا کسیلا پھل پیدا ہونے لگا۔۔۔لوگ رزق کی تلاش میں ملک سے نکل گئے۔کوئی کسی طرف چلا گیا اور کوئی کسی طرف۔۔۔پوری قوم منتشر ہوگئی۔۔۔۔۔ ( تعلیم القرآن )

۔  یعنی اس امر کی نشانی کہ جو کچھ ان کو میسر ہے وہ کسی کا عطیہ ہے نہ کہ ان کا اپنا آفریدہ۔ (تفہیم القرآن)

ــــ یہاں نشانی سے مراد تاریخی شہادت ہے اور وہ یہ ہے کہ جب تک کوئی قوم اللہ کی فرمانبرداراور شکر گذار بن کر رہتی ہے وہ پھلتی پھولتی اور ترقی کی منازل طے کرتی جاتی ہے اور جب وہ اللہ کی نافرمانی اور ناشکری کرنے لگے تو اسے بتدریج زوال آناشروع ہوجاتاہے اور اگروہ اپنا رویہ نہ بدلے تو اسے صفحہ ہستی سے مٹادیا جاتاہے یہی حال قوم سبا کا ہواتھا۔قوم سبا کے حالات:۔ قوم سبا کا عرب کا جنوب مغربی علاقہ تھا۔اور یہی علاقہ آج کل یمن کا علاقہ کہلاتا ہے۔سبادراصل ایک شخص کا نام تھا جس کے دس بیٹے تھے۔بعد میں یہی دس قبیلے بن گئے انہی میں سے چار بیٹے اپنے خاندان سمیت شام کی طرف منتقل ہوگئے تھے۔ اس قوم کے عروج وزوال کا زمانہ تیرہ صدیوں پر محیط ہے(800ق م تا 450ء)ایک زمانہ تھا جب تہذیب و تمدن کے لحاظ سے اسی قوم کا طوطی بولتا تھا اور روم اور یونان کی تہذیبیں ان کے سامنے ہیچ تھیں۔زراعت اور تجارت کے میدان میں ان لوگوں نے بارش کا پانی روکنے اور ذخیرہ رکھنے کے لئے بند بنارکھے تھے۔ان کا دارالخلافہ مآرب تھا اور سب سے اعلیٰ اور بڑا عظیم الشان بند بھی اسی جگہ تعمیر کیا گیا تھا جو سدمآرب کے نام سے معروف تھا۔ ان کے علاقہ کے دونوں طرف پہاڑوں کے دامن میں باغات کا سینکڑوں میلوں میں پھیلا ہوا سلسلہ موجود تھا اور انسان کو یوں معلوم ہوتا تھا کہ جس جگہ وہ کھڑا ہے اس کے دونوں طرف باغات ہی باغات ہیں۔(تیسیر القرآن)

16۔ حضرت داؤد ؑ اور حضرت سلیمان ؑ کی شکر گزاری کے تذکرے کے بعد ایک ناشکر گزار قوم، قوم سبا کا تذکرہ ہے ۔جس پر سیل عرم یعنی بند ٹوٹنے کاعذاب آیا۔ان کا سب سے مشہور بند سدمآرب تھا جو ان کے دارالحکومت مآرب کے قریب واقع تھا ۔یہ بند تقریباً ایک سو پچاس فٹ لمبی اور پچاس فٹ چوڑی دیوار پر مشتمل تھا ۔ارنارڈ،ایک یورپین سیاح نے ایک مضمون اس پر فرنچ ایشیا ٹک سوسائٹی کے جرنل میں لکھا ہے( مشرق و مغرب دوبڑے بڑے دروازے اور کئی کھڑکیاں ۔تین اوپر نیچے دروازے) (دیوار پر جابجا کتبے)ایک اور مغربی سیاح ( باغوں کی خوشبو دوردور تک جنت کی خوشبو سے کم نہیں)بعد ازاں جھاڑ جھنکاڑ اور کسیلے پھل۔(تفسیر عثمانی)

ــــ کہتے ہیں وقتاً فوقتاً ان کی طرف تیرہ انبیاء علیھم السلام مبعوث ہوئے تھے۔(تیسیر القرآن)

ــــ سدّ مارب،ایک مشہور تاریخی بند ہے جو پہاڑوں کے پانی کے ذخیرے کے لیے بنایا گیا تھا، مارب ملک سبا کا دارالسلطنت تھا، موجودہ شہر صنعاء سے کوئی 60 میل مشرق میں اور سطح سمندر سے کوئی 3900 فٹ بلند ۔۔۔قوم سبا ایک بڑی متمدن قوم تھی۔اس کا یہ کئی میل کا لانبا چوڑا بند سبا کے انجینئروں کی فنکاری کا اعلیٰ نمونہ تھا، یہ عظیم الشان بند ظہورِ اسلام سے کچھ قبل ٹوٹا ہے تخمیناً 542ء میں۔اس کی تباہ کاریوں کے آثار صدیوں بعد تک قائم رہے ۔چنانچہ ایک سیاح نے 848ء میں معائنہ کیا، طول میں یہ بند 150 فٹ اور عرض میں 50 فٹ تھا۔(تفسیر ماجدی)

18۔ " برکت والی بستیوں " سے مراد شام و فلسطین کا علاقہ ہے جسے قرآن مجید میں عموماً اسی لقب سے یاد کیا گیا ہے۔۔۔۔۔۔نمایاں بستیوں سے مراد ہیں ایسی بستیاں جو شاہراہ عام پر واقع ہوں، گوشوں میں چھپی ہوئی نہ ہوں، اور یہ مطلب بھی ہوسکتا ہے کہ وہ بستیاں بہت زیادہ فاصلے پر نہ تھیں بلکہ متصل تھیں۔۔۔۔۔۔سفر کی مسافتوں کو ایک اندازے پر رکھنے سے مراد یہ ہے کہ یمن سے شام تک کا پورا سفر مسلسل آباد علاقے میں طے ہوتا تھا جس کی ہر منزل سے دوسری منزل تک کی مسافت معلوم و متعین تھی۔ آباد علاقوں کے سفر اور غیر آباد صحرائی علاقوں کے سفر میں یہی فرق ہوتا ہے۔(تفہیم القرآن)

19۔یعنی نعمتوں کے حقوق تو کیا اداکرتے ، ان کی ظاہری قدر بھی نہ کی، اور الٹی تمنا یہ کرنے لگے کہ سفر کی منزلیں دور دور ہوتیں ،تو کچھ مزہ بھی آتا۔یہ کیا کہ وطن و مسافرت میں کچھ فرق ہی نہیں۔۔۔۔یہ (Adventure)کی حرص تمدن جدید کا بھی ایک عام مرض ہے اور فرنگیوں میں قابل فخر عادت سمجھی جاتی ہے۔۔۔۔روایتوں میں آتاہے کہ انصارمدینہ یعنی قبائل اوس و خزرج انھی اہلِ سبا کی اولاد میں سے تھے۔(تفسیر ماجدی)

۔   علاوہ بریں آیت (رَبَّنَا بٰعِدْ بَيْنَ اَسْفَارِنَا) (خدایا ہمارے سفر دور دراز کردے) کے الفاظ سے کچھ یہ بات بھی مترشح ہوتی ہے کہ شاید سبا کی قوم کو اپنی آبادی کی کثرت کھلنے لگی تھی اور دوسری نادان قوموں کی طرح اس نے بھی اپنی بڑھتی ہوئی آبادی کو خطرہ سمجھ کر انسانی نسل کی افزائش کو روکنے کی کوشش کی تھی۔۔۔۔۔۔۔یعنی سبا کی قوم ایسی منتشر ہوئی کہ اس کی پراگندگی ضرب المثل ہوگئی۔ آج بھی اہل عرب اگر کسی گروہ کے انتشار کا ذکر کرتے ہیں تو کہتے ہیں " تفرقوا ایدی سبا " وہ تو ایسے پراگندہ ہوگئے جیسے سبا کی قوم پراگندہ ہوئی تھی۔ " اللہ تعالیٰ کی طرف سے جب زوال نعمت کا دور شروع ہوا تو سبا کے مختلف قبیلے اپنا وطن چھوڑ چھوڑ کر عرب کے مختلف علاقوں میں چلے گئے۔ غسانیوں نے اردن اور شام کا رخ کیا۔ اوس و خزرج کے قبیلے یثرب میں جا بسے۔ خزاعہ نے جدے کے قریب تہامہ کے علاقہ میں سکونت اختیار کی۔ اَزد کا قبیلہ عمان میں جا کر آباد ہوا۔ لخم اور جذام اور کندہ بھی نکلنے پر مجبور ہوئے۔ حتی کہ " سبا " نام کی کوئی قوم ہی دنیا میں باقی نہ رہی۔ صرف اس کا ذکر افسانوں میں رہ گیا۔ (تفہیم القرآن)

23۔یہ فرشتوں کی عام حالت کا بیان ہے"جب کوئی حکم حضرت حق سے سنتے ہیں تو اُن کے مجمع میں ہلچل پڑجاتی ہے،حواس باختہ ہوجاتے ہیں۔اپنی فہم ،اپنے حفظ کسی چیزپر اعتماد نہیں باقی رہ جاتا،گھبراگھبرا کر ایک دوسرے سے پوچھ پاچھ شروع کردیتے ہیں،اور ایک دوسرے کی تسکین و تقویت قلب کا باعث بنتے ہیں کہ جو کچھ ارشاد ہوا،حق ہی ارشاد ہواہے"۔جس مخلوق کی یہ حالت ہو،وہ ابتداء ً خطاب کرنے کی جرأت بھلا کس طرح کرسکتی ہے،اور جب یہ حال ملائکہ جیسی مقبول ترین ہستیوں کا ہے تو غیر مقبولین کا ذکر ہی کیا ہے!۔۔۔۔۔(اس کی عظمت و ہیبت سے فرشتوں کے اس قدر گھبراجانے میں حیرت کی کوئی بات ہی نہیں)بعض نے یہ پورا فقرہ فرشتوں ہی کا مقولہ قراردیا ہے۔(تفسیر ماجدی)

27۔ اَرُوْنِی۔یعنی شرک پر کوئی دلیل تو قائم کرکے لاؤ،کوئی حجت تو پیش کرکے دکھاؤ۔یہ مراد نہیں کہ آنکھ سے دکھلاؤ۔(تفسیر ماجدی)

28۔ہرقل اور ابوسفیان کا مکالمہ:۔ قیصر نے پوچھا: تم میں اس پیغمبر کا خاندان کیساہے؟ میں نے کہا: اس کا نسب اچھا ہے۔قیصر : تم میں سے پہلے بھی کسی نے پیغمبری کا دعویٰ کیا تھا؟ میں نے کہا:نہیں۔قیصر: اس کے بزرگوں میں کوئی بادشاہ گزراہے؟میں نے کہا نہیں۔قیصر : اس کی پیروی امیر لوگ کررہے ہیں یا غریب؟ میں نے کہا:غریب لوگ۔قیصر: اس کے پیروکار بڑھ رہے ہیں یا گھٹتے جاتے ہیں؟میں نے کہا:بڑھتے جاتے ہیں۔قیصر :کوئی شخص اس پر ایمان لاکر پھر اسے براسمجھ کر پھربھی جاتاہے؟ میں نے کہا نہیں۔قیصر: نبوت کے دعویٰ سے پہلے تم نے اسے کبھی جھوٹ سے متہم کیاہے؟ میں نے کہا نہیں۔۔۔۔۔یہ کہ کر بادشاہ نے آپ کا نامہ مبارک سب کے سامنے پڑھ کرسنایا۔جب درباریوں اورامیروں ،وزیروں نے بادشاہ کو اس حدتک اسلام کی طرف مائل دیکھا تو غصہ سے ان کے نتھنے پھولنے اور آنکھیں سرخ ہونے لگیں۔شورمچا اور آوازیں بلند ہونے لگیں۔ابوسفیان اور اس کے ساتھیوں کو وہاں سے نکال دیا گیا۔ابوسفیان کہتے ہیں کہ میں نے اپنے ساتھیوں سے کہا ابوکبشہ کے بیٹے (یہ آپ کے رضاعی  باپ کی کنیت تھی اور ابوسفیان نے ازراہِ حقارت یہ نام لیا تھا)کا تو بڑا درجہ ہوگیا۔ اس سے تو رومیوں کا بادشاہ ڈرتاہے۔اس دن سے مجھے یقین ہوگیا کہ محمدؐ غالب ہوں گے۔ تاآنکہ اللہ نے مجھے مسلمان کردیا۔(بخاری۔باب کیف کان بدء الوحی)۔۔۔۔۔تبلیغی خطوط کے اندرون و بیرون  عرب  اثرات۔۔۔۔۔2۔ ان تبلیغی خطوط سے بعض حکمران اور ان کی رعایا اسلام لے آئے جیسے حبشہ، یمن ،عمان اور بحرین کے حکمرانوں نے اسلام قبول کرلیا۔رعایا میں سے بھی بہت سے مسلمان ہوگئے۔اور کچھ حکمران اسلام کے قریب ہوگئے ۔تاہم اسلام کی آواز عرب سے باہر دوردور تک پہنچ گئی۔۔۔۔۔(تیسیر القرآن)

ــــ اتنی صراحت کے ساتھ اپنے پیام ہدایت کی عالم گیری کا دعویٰ دنیا کے کسی  دین نے بھی نہیں کیا ہے۔ یہ خصوصیت آسمانی کتابوں میں صرف قرآن کی ہے۔ قرآن ہی اعلان کے ساتھ کہتاہے کہ پیامِ محمدیؐ ہر ملک، ہرقوم، ہرطبقۂ انسانیت اور ہرزمانے کی ہدایت کے لیے ہے۔اسلام کے دودعوے ایسے ہیں، جن میں دنیا کا کوئی دوسرا دین اس کا شریک نہیں۔ دونوں دعوے اسلام کے امتیازات خصوصی میں سے ہیں: ایک یہ کہ باربار تصریح ووضاحت کے ساتھ کہنا کہ میری تعلیم ساری دنیا کے لیے ہے۔(دوسرے مذاہب جیسے اپنی قوم یا ملک کے باہر کسی کو جانتے ہی نہیں)دوسرے پیغمبر اسلام کوسلسلۂ انبیاء کا خاتم قراردینا۔(تفسیر ماجدی)

۔ ۔۔۔صحیح بخاری و مسلم وغیرہ میں حضرت جابر سے روایت ہے کہ رسول اللہ ﷺ نے فرمایا کہ مجھے پانچ چیزیں ایسی عطا کی گئی ہیں جو مجھ سے پہلے کسی کو نہیں ملیں۔ ایک یہ کہ میری مدد اللہ تعالیٰ نے مجھے ایسا رعب دے کر فرمائی کہ ایک مہینہ کی مسافت تک لوگوں پر میرا رعب چھا جاتا ہے۔ دوسرے یہ کہ میرے لئے پوری زمین کو مسجد اور طہور قرار دے دیا گیا ہے۔ (پچھلے انبیاء کی شریعتوں میں ان کی عبادت خالص عبادت گاہوں ہی میں ہوتی تھی، ان کی مساجد سے باہر میدان یا گھر میں عبادت نہ ہوتی تھی، اللہ تعالیٰ نے امت محمدیہ کے لئے پوری زمین کو اس معنی میں مسجد بنادیا کہ ہر جگہ نماز ادا ہو سکتی ہے۔ اور زمین کی مٹی کو پانی نہ ملنے یا پانی کا استعمال مضر ہونے کی صورت میں طہور یعنی پاک کرنے والا بنادیا کہ اس سے تیمم کرلیا جائے تو وضو کے قائم مقام ہوجاتا ہے)۔ تیسرے یہ کہ میرے لئے مال غنیمت حلال کردیا گیا، مجھ سے پہلے کسی امت کے لئے یہ مال حلال نہیں تھا (بلکہ یہ حکم تھا کہ جنگ میں جو مال کفار کا ہاتھ آتا اس کو جمع کر کے ایک جگہ رکھ دیں، وہاں ایک آسمانی آگ بجلی وغیرہ آ کر اس کو جلا دے گی، اور یہ جلا دینا ہی اس جہاد کی مقبولیت کی علامت ہوگی۔ امت محمدیہ کے لئے مال غنیمت کو قرآن کے بتلائے ہوئے اصول کے مطابق تقسیم کرلینا اور اپنی ضروریات میں صرف کرنا جائز کردیا گیا) چوتھے یہ کہ مجھے شفاعت کبریٰ کا مقام دیا گیا (یعنی حشر کے میدان میں جس وقت کوئی پیغمبر شفاعت کی ہمت نہ کرے گا، مجھے اس وقت شفاعت کا موقع دیا جائے گا) پانچویں یہ کہ مجھ سے پہلے ہر نبی اپنی مخصوص قوم کی طرف بھیجا جاتا تھا، مجھے تمام اقوام عالم کی طرف پیغمبر بنا کر بھیجا گیا ہے۔ (ابن کثیر) (معارف القرآن)

31۔ ’ وَ لَا بِالَّذِیْ بَیْنَ یَدَیْهِ‘ کی دو تاویلیں لوگوں نے کی ہیں۔ ایک یہ کہ اس سے مراد قرآن سے پہلے نازل ہونے والے آسمانی صحیفے ہیں، دوسری یہ کہ یہ اس عذاب اور قیامت کی طرف اشارہ ہے جس سے قرآن ان کو آگاہ کر رہا تھا۔ ہمارے نزدیک یہ دوسرا قول سیاق وسباق سے زیادہ موافق ہے۔  (تدبرِ قرآن)

32۔ یعنی وہ کہیں گے کہ ہمارے پاس ایسی کوئی طاقت نہ تھی جس سے ہم چند انسان تم کروڑوں انسانوں کو زبردستی اپنی پیروی پر مجبور کردیتے۔ اگر تم ایمان لانا چاہتے تو ہماری سرداریوں اور پیشوائیوں اور حکومتوں کا تختہ الٹ سکتے تھے۔ ہماری فوج تو تم ہی تھے۔ ہماری دولت اور طاقت کا سر چشمہ تو تمہارے ہی ہاتھ میں تھا۔ تم نذرانے اور ٹیکس نہ دیتے تو ہم مفلس تھے۔ تم ہمارے ہاتھ پر بیعت نہ کرتے تو ہماری پیری ایک دن نہ چلتی۔ تم زندہ باد کے نعرے نہ مارتے تو کوئی ہمارا پوچھنے والا نہ ہوتا۔ تم ہماری فوج بن کر دنیا بھر سے ہمارے لیے لڑنے پر تیار نہ ہوتے تو ایک انسان پر بھی ہمارا بس نہ چل سکتا تھا۔ اب کیوں نہیں مانتے کہ دراصل تم خود اس راستے پر نہ چلنا چاہتے تھے جو رسولوں نے تمہارے سامنے پیش کیا تھا۔ تم اپنی اغراض اور خواہشات کے بندے تھے اور تمہارے نفس کی یہ مانگ رسولوں کی بتائی ہوئی راہ تقویٰ کے بجائے ہمارے ہاں پوری ہوتی تھی۔ تم حرام و حلال سے بےنیاز ہو کر عیش دنیا کے طالب تھے اور وہ ہمارے پاس ہی تمہیں نظر آتا تھا۔۔۔۔۔۔ (تفہیم القرآن)

33۔ دوسرے الفاظ میں ان عوام کا جواب یہ ہوگا کہ تم اس ذمہ داری میں ہم کو برابر کا شریک کہاں ٹھہرائے دے رہے ہو۔ کچھ یہ بھی یاد ہے کہ تم نے اپنی چال بازیوں، فریب کاریوں اور جھوٹے پروپیگنڈوں سے کیا طلسم باندھ رکھا تھا، اور رات دن خلق خدا کو پھانسنے کے لیے کیسے کیسے جتن تم کیا کرتے تھے۔ (تفہیم القرآن)

۔ ندامت کی وجہ یہ ہوگی کہ فی الحقیقت انہوں نے بالکل اپنے ضمیر کے خلاف اپنے لیڈروں کی پیروی کی تھی۔ جو آدمی اپنے ضمیر کے خلاف کسی باطل کی پیروی کرتاہے تو اس کا نتیجہ سامنے آنے پر وہ اس نتیجہ کی تلخی ہی سے بدمزہ نہیں ہوتا بلکہ اپنے ضمیر کی لعنت سے بھی دوچار ہوتاہے۔(ترجمہ: مولانا امین احسن اصلاحیؒ)

39۔اس مضمون کو بتکرار بیان کرنے سے مقصود اس بات پر زور دینا ہے کہ رزق کی کمی و بیشی اللہ کی مشیت سے تعلق رکھتی ہے نہ کہ اس کی رضا سے۔ (تفہیم القرآن)

۔صحیح مسلم میں حضرت ابوہریرہؓ کی حدیث ہے کہ رسول اللہ صلی اللہ علیہ وسلم نے فرمایاکہ ہر روز جب لو گ صبح میں داخل ہوتے ہیں دو فرشتے آسمان سے اترتے ہیں اور یہ دعا ء کرتے ہیں اللّٰھم  اعط منفقا خلفاً واعط ممسکاً تلفاً،یعنی "یا اللہ خرچ کرنے والے کو اس کا بدل عطا فرمااور بخل کرنے والے کا مال ضائع کردے"اور ایک دوسری حدیث میں ہے کہ رسول اللہؐ نے فرمایا کہ اللہ تعالیٰ نے مجھ سے ارشاد فرمایا ہے کہ آپ لوگوں پر خرچ کریں میں آپؐ پر خرچ کروں گا۔(معارف القرآن)

40۔ قدیم ترین زمانے سے آج تک ہر دور کے مشرکین فرشتوں کو دیوی اور دیوتا قرار دے کر ان کے بت بناتے اور ان کی پرستش کرتے رہے ہیں۔ (تفہیم القرآن)

41۔  لیکن ہوسکتاہے کہ مشرک قومیں آج جن دیوتاؤں کی پوجا کررہی ہیں یہ اپنے زمانے کے پُر قوت جنات رہے ہوں،اور آیت میں اشارہ بھی اسی جانب ہو۔(تفسیر ماجدی)

44۔ (اور اس لیے اب جب انہیں پہلی با رنبوت اور کتاب کی دولت ملی تو انہیں نعمت کی قدر اور زیادہ کرنا چاہئے تھی) هُمْ۔ ھم ضمیر یں بنی اسمٰعیل یا قوم عرب کی جانب ہیں کہ انہی میں نبوت پہلی بار آئی تھی۔ قوم کے مورث ِ اعلیٰ مراد نہیں کہ ان میں تو ابراہیم ، اسمٰعیل،ہود، صالح علیھم السلام وغیرہ متعدد انبیاء پیدا ہوچکے تھے۔ آیت کا یہ مطلب بھی لیا گیا ہے کہ ہم نے کوئی کتاب ان پر نازل نہیں کی، جس کے اندر شرک کی تعلیم ہو اور نہ کوئی رسول بھیجا جس نے یہ پیام دیا ہوکہ شرک نہ کرنے پر عذاب آئے گا۔(تفسیر ماجدی)

45۔ وَ مَا بَلَغُوْا مِعْشَارَ مَا اٰتَیْنٰهُمْ، لفظ معشار بعض نے بمعنی عشر کہا ہے۔ یعنی دسواں حصہ اور بعض علماء نے عشرالعشر یعنی سوواں حصہ اور بعض نے عشرالعشیر یعنی ہزارویں حصہ کو معشار کہا ہے۔ اور یہ ظاہر ہے کہ اس لفظ میں بہ نسبت عشر کے مبالغہ ہے، معنی آیت کے یہ ہیں کہ دنیا کی ثروت و دولت و حکومت اور عمر طویل اور صحت قوت وغیرہ، جو پچھلی امتوں کو دی گئی تھی اہل مکہ کو اس کا دسواں بلکہ ہزارواں حصہ بھی حاصل نہیں، اسی لئے ان کو چاہئے کہ ان پچھلی اقوام کے حالات اور انجام بد سے عبرت حاصل کریں کہ وہ لوگ رسولوں کی تکذیب کر کے خدا تعالیٰ کے عذاب میں مبتلا ہوئے اور وہ عذاب آ گیا تو ان کی قوت و شجاعت اور مال و دولت اور محفوظ قلعے کچھ کام نہ آسکے۔(معارف القرآن)

46۔ اَنْ تَقُوْمُوْا۔کھڑے ہوجاؤ، یعنی مستعد و آمادہ ہوجاؤ،یہ مراد نہیں کہ اپنے دونوں پیروں پر کھڑے ہو۔(تفسیر ماجدی)

49۔ ہم حق کو باطل پر ماریں گے پس وہ اس کا بھیجا نکال کے رکھ دیگا(الانبیا:18)فتح مکہ کے موقع پر حضورؐ نے فرمایا ، جَآءَ الْحَقُّ وَ زَهَقَ الْبَاطِلُ  اِنَّ الْبَاطِلَ كَانَ زَهُوْقًا (حق آگیا اور باطل نابود ہوگیا بے شک باطل نابود ہونے والی چیز ہے) )تدبر قرآن(

۔ زَھَقَ البَاطِلُ کے الفاظ محذوف ہیں اس کا متبادل مایبدی الباطل وما یعید۔یادرکھیں کہ ان کے دیوتاؤں کے اختیار میں نہ کسی چیز کا ابداء ہے نہ اعادہ ،یہ امر یہاں ملحوظ رہے کہ مشرکین ِ عرب اس کائنات کے ابداء میں کسی کو شریک نہیں مانتے تھے لیکن وہ اس بات کے قائل تھے کہ اگر آخرت کا مرحلہ پیش آیا تو ان کی واپسی ان کے معبودوں کی طرف ہوگی جو اپنی سفارشوں سے وہاں بھی ان کو اعلیٰ مراتب دلوادیں گے۔)تدبر قرآن(

54۔ 'ہم مشربوں'سے اشارہ عاد، ثمود، اہل مدین اور فرعون وغیرہ کی طرف ہے۔(ترجمہ: مولانا امین احسن اصلاحی)