2۔ حضرت ابوھریرہؓ سے روایت ہے کہ ایک شخص نے رسول اللہ سے عرض کیا کہ یا رسول اللہؐ میں کوئی صدقہ خیرات کرتا ہوں جس میں نیت اللہ کی رضا بھی ہو اور یہ بھی کہ لوگ میری تعریف کریں۔حضورؐ نے فرمایا کہ اللہ کوئی ایسی چیز قبول نہیں فرماتے جس میں کسی کو شریک ٹھہرایا گیا ہواور یہ آیت بھی پڑھی۔(معارف القرآن)

- یہ بالکل بے تکی بات ہے کہ عبادت کا حقدار کوئی ہو،اطاعت کا حقدار کوئی اور بن جائے۔جس طرح عبادت کا خالص ہونا لازمی ہے اسی طرح اطاعت بھی بے آمیز ہونی چاہئے۔

              یاراں عجب انداز دورنگی دارند                                                مصحف بہ بغل دین فرنگی دارند(تدبرقرآن)

- عبادت کا مادہ عبدہے۔۔۔ایک پوجا اور پرستش۔۔۔۔صرف اللہ تعالیٰ کی پُوجا اور پرستش ہی کا نہیں ہے بلکہ اس کے احکام کی بے چون و چرا اطاعت اور اس کے قانون ِ شرعی کی برضا و رغبت پیروی ،اور اُس کے امر و نہی کی دل و جان سے فرمانبرداری کا بھی ہے۔دین کا لفظ عربی میں متعدد مفہومات کا حامل ہے:۔۔۔ایک مفہوم ہے غلبہ و اقتدار، مالکانہ اور حاکمانہ تصرُف،سیاست و فرمانروائی اور دوسروں پر فیصلہ نافذ کرنا۔۔۔۔دوسرا مفہوم ہے اطاعت، فرمانبرداری اور غلامی۔۔۔۔تیسرا مفہوم ہے وہ عادت اور طریقہ جس کی انسان پیروی کرے۔۔۔۔اور دین کو اللہ کے لیے خالص  کرکے اس کی بندگی کرنے کا مطلب یہ ہے کہ"آدمی اللہ کی بندگی کے ساتھ کسی دوسرے کی بندگی میں شامل نہ رہے،بلکہ اسی کی پرستش،اسی کی ہدایت کا اتباع اور اسی کے احکام و اوامر کی اطاعت کرے۔"(تفہیم القرآن)

ـــ اَنْزَلْنَا۔ابھی ابھی قرآن مجید کے لیے تنزیل آچکاہے،جس کے مفہوم میں تدریج داخل ہے اور اب صیغۂ انزال آگیا۔جس سے بظاہر دفعۃً نزول معلوم ہوتاہے۔امام رازیؒ نے از خود یہ سوال پیدا کرکے اس کا جواب یہ دیا ہے کہ جہاں انزال آیا ہے وہاں مراد یہ ہے کہ آپؐ پر کتاب نازل کرنے کا حکم ایک کلی صورت میں ہوگیا،اور جہاں تنزیل ہے وہاں مراد یہ ہے کہ واقعۃً و عملاً کتاب کا نزول تدریج ہی کے ساتھ ہواہے۔ (کبیر،ج26/ص:208)(تفسیر ماجدی)

3۔ مشرکین مکہ کا عقیدہ کہ جیسے شاہی مقرب کسی سے خوش ہوں تو وہ بادشاہ کے پاس ان کی سفارش کردیتے ہیں ۔ان کا کام کروادیتے ہیں یا بادشاہ کا مقرب بنوادیتے ہیں اسی طرح فرشتے ،جنات یا ان کے بت ان کے اس دنیا کے کاموں کیلئے بھی سفارش اور آخرت کیلئے بھی سفارش ۔سفارش کا اصول: وَكَمْ مِنْ مَلَكٍ فِي السَّمَاوَاتِ لَا تُغْنِي شَفَاعَتُهُمْ شَيْئًا إِلَّا مِنْ بَعْدِ أَنْ يَأْذَنَ اللَّهُ لِمَنْ يَشَاءُ وَيَرْضَىٰ۔(النجم:26)  (معارف القرآن)

ــــ اللہ تعالیٰ کوئی  عمل بھی قبول نہیں کرتا جب تک وہ خالص اُسی کے لیے نہ ہو"۔اس کے بعد حضورؐ نے یہی آیت تلاوت فرمائی۔(تفہیم القرآن)

ــــ دین کا لفظ چارمعنوں میں آتاہے۔ (1)اللہ تعالیٰ کی مکمل سیاسی اور قانونی حاکمیت کو تسلیم کیا جائے۔(2)دوسرا معنی اس کے بالکل برعکس ہے یعنی اپنے آپ کو ہمہ وقتی اللہ کا غلام سمجھا جائے اور صرف اسی کی عبادت کی جائے،(3)قانون جزا وسزا(4)اور اس قانون جزاوسزا کے مطابق اچھے اور برے لوگوں کو بدلہ دینا۔ آیت نمبر 2 اور 3  میں دین کا لفظ اپنے پہلے دونوں معنوں میں استعمال ہواہے۔(تیسیر القرآن)

4۔ انسان کو اولاد کی ضرورت اور خواہش جن جن اغراض سے بھی ہوتی ہے ،حق تعالیٰ ان سب سے پاک و برترہے۔(تفسیر ماجدی)

6۔تین تاریکیوں سے مراد پیٹ، رحم اور بچے کے غلاف کے تہ بہ تہ تاریکیاں ہیں۔(ترجمہ: مولاناامین احسن اصلاحیؒ)

۔ مویشی سے مراد ہیں اونٹ، گائے، بھیڑ اور بکری۔ ان کے چار نر اور چار مادہ مل کر آٹھ نر و مادہ ہوتے ہیں۔۔۔۔ تین پردوں سے مراد ہے پیٹ، رحم اور مَشِیْمَہ (وہ جھلی جس میں بچہ لپٹا ہوا ہوتا ہے)۔۔۔۔۔۔ یہ الفاظ قابل غور ہیں۔ یہ نہیں فرمایا کہ تم کدھر پھرے جا رہے ہو۔ ارشاد یہ ہوا ہے کہ تم کدھر سے پھرائے جا رہے ہو۔ (تفہیم القرآن)

7۔تکویر کا ترجمہ افسوس ہے کہ اردو مترجمین قرآن نے"لپیٹنے سے کردیاہے،حالانکہ تکویر کا جو مفہوم عربی میں ہے،وہ محض یا مطلق "لپیٹنے "سے ادانہیں ہوتا،بلکہ گھما کر لپیٹنے ،یا گھمانے اور اس کے ایک حصہ کو دوسرے سے ملانے سے اداہوتاہے ،جیسے عمامہ پیچ دے کر لپیٹا جاتاہے،اور اسی کو عربی میں"کوّرالعمامۃ"کہتے ہیں ۔(راغب،ص:494)(تفسیر ماجدی)

۔کفر کے مقابلے میں یہاں ایمان کے بجائے شکر کا لفظ استعمال کیا گیا ہے۔ اس سے خود بخود یہ بات مترشح ہوتی ہے کہ کفر در حقیقت احسان فراموشی و نمک حرامی ہے، اور ایمان فی الحقیقت شکر گزاری کا لازمی تقاضا ہے۔ (تفہیم القرآن)

8۔ یعنی خود گمراہ ہونے پر اکتفا نہیں کرتا بلکہ دوسروں کو بھی یہ کہہ کہہ کر گمراہ کرتا ہے کہ جو آفت مجھ پر آئی تھی وہ فلان حضرت یا فلاں دیوی یا دیوتا کے صدقے میں ٹل گئی۔ (تفہیم القرآن)

9۔ قنُوت کا اصل مفہوم اللہ تعالیٰ کیلئے تواضع ،عاجزی  اور نیاز مندی ہے ۔یہ ایک قلبی حالت ہے جس کا بہترین اظہارنماز بالخصوص شب کی نمازوں سے ہوتاہے۔              امام شافعی۔(تدبرقرآن)

ـــ بند ےکا اپنے رب سے تعلق اسی وقت تک متوازن رہتاہے جب تک وہ خوف اور رجا کے بین بین رہے ۔اگر ان میں سے کسی ایک کا بھی زیادہ غلبہ ہو جائے تو توازن بگڑ جاتا ہے۔ رجائیت غالب آ جائے تو انسان عدل سے بے پروا ۔خوف غالب آجائے تو مایوسی اور قنوطیت راہ پاتی ہے ۔ (تدبرقرآن)

12۔ مسلمانوں کو بشارت دینے کے بعد یہ مخالفوں سے بے نیازی اور بے تعلقی کا اعلان کہ اب ان کی زیادہ ناز برداری کی ضرورت نہیں بلکہ ان کو فرمادیجئے کہ مجھے تو یہ حکم ملا ہے کہ میں اللہ ہی کی بندگی اور اطاعت کروں اور سب سے پہلا اسلام لانے والا بنوں ۔تم جو چاہو کرتے پھرو۔ (تدبرقرآن)

15۔ دیوالہ عرف عام میں اس چیز کو کہتے ہیں کہ کاروبار میں آدمی کا لگایا ہوا سارا سرمایہ ڈوب جائے اور بازار میں اس پر دوسروں کے مطالبے اتنے چڑھ جائیں کہ اپنا سب کچھ دے کر بھی وہ ان سے عہدہ برآ نہ ہو سکے۔ یہی استعارہ کفار و مشرکین کے لیے اللہ تعالیٰ نے یہاں استعمال کیا ہے۔ انسان کو زندگی، عمر، عقل، جسم، قوتیں اور قابلیتیں، ذرائع اور مواقع، جتنی چیزیں بھی دنیا میں حاصل ہیں، ان سب کا مجموعہ دراصل وہ سرمایہ ہے جسے وہ حیات دنیا کے کاروبار میں لگاتا ہے۔ یہ سارا سرمایہ اگر کسی شخص نے اس مفروضے پر لگا دیا کہ کوئی خدا نہیں ہے۔ یا بہت سے خدا ہیں جن کا میں بندہ ہوں، اور کسی کو مجھے حساب نہیں دینا ہے، یا محاسبے کے وقت کوئی دوسرا مجھے آ کر بچالے گا، تو اس کے معنی یہ ہیں کہ اس نے گھاٹے کا سودا کیا اور اپنا سب کچھ ڈبو دیا۔ (تفہیم القرآن)

16۔ جن صوفیاء نے شاعری کا لباس پہن کر خوف دوزخ پر مضحکہ کیا ہے،کاش وہ اس قسم کی ساری آیات قرآنی کو پیش نظر رکھتے!۔ یعنی آج تو زمین سورج کی روشنی سے منور ہوتی ہے مگر میدانِ محشر کے لئے جو زمین تیار کی جائے گی۔وہ براہ راست اپنے پروردگار کے نور سے جگ مگ جگمگ کررہی ہوگی۔(تفسیر ماجدی)

17۔ طاغوت کا مفہوم:۔ طاغوت کا معنی عموماً بت یا شیطان کرلیا جاتاہے۔ان الفاظ سے اس لفظ کا پورا مفہوم ادانہیں ہوتا۔طاغوت سے مراد ہر وہ چیز ہے جس کی اللہ کے مقابلہ میں اطاعت یا عبادت کی جاتی ہو یا وہ خود اللہ کے مقابلہ میں اپنی اطاعت یا عبادت لوگوں سے کروانا پسند کرتاہو،گویا طاغوت سے مراد دنیا دار چودھری اور حکمران بھی ہوسکتے ہیں کوئی ادارہ یا پارلیمنٹ بھی ہوسکتی ہے۔بت، شیطان اور جن بھی ہوسکتے ہیں اور ایسے پیر فقیر بھی ہوسکتے ہیں جو اللہ کے مقابلہ میں اپنی اطاعت کروانا پسند فرماتے ہیں اور شریعت پر طریقت کو ترجیح دیتے ہیں۔(تیسیر القرآن)

18۔ اور بہت سے حضرات مفسرین نے اس جگہ قول سے مراد عام لوگوں کے اقوال لئے ہیں جن میں توحید و شرک، کفر و اسلام، حق و باطل پھر حق میں حسن اور احسن اور راجح و مرجوح سب داخل ہیں۔ مطلب آیت کا اس تفسیر پر یہ ہے کہ یہ لوگ باتیں تو سب کی سنتے ہیں۔ کفار کی بھی مومنین کی بھی۔ حق بھی، باطل بھی، اچھی بھی اور بری بھی لیکن اتباع صرف اسی بات کا کرتے ہیں جو احسن ہے۔ (معارف القرآن)

21۔ السَّمَآء۔سابق کے حاشیوں میں کئی بار یہ امر صاف کیا جاچکاہے کہ السمآء کی وسعت مفہوم کا کوئی لفظ اردو میں موجود نہیں۔ بارش کے سلسلے میں جہاں جہاں یہ لفظ قرآن میں آیا ہے، بے تکلف معنی بادل کے لیے جاسکتے ہیں۔سمآء عربی میں ہر اس چیز کو کہتے ہیں ،جو انسان کے اوپر واقع ہو، یہاں تک کہ مکان کی چھت بھی۔(تفسیر ماجدی)

22۔ حضرت عبداللہ بن مسعودؓ سے روایت ہے کہ ہم نے شرح صدر کا مفہوم پوچھا تو حضورؐ نے فرمایا کہ جب نور ایمان انسان کے قلب میں داخل ہوتاہے تو اس کا قلب وسیع ہوجاتاہے۔(معارف القرآن)

- شرحِ صدر کے مقابلے میں انسانی قلب کی دوہی کیفیتیں ہوسکتیں ہیں۔ایک ضیقِ صدر (سینہ تنگ ہوجانے اور دل بھچ جانے )کی کیفیت جس میں کچھ نہ کچھ گنجائش اس بات کی رہ جاتی ہے کہ حق اُس میں نفوذ کرجائے اور دوسری قساوتِ قلب( دل کے پتھر ہوجانے) کی کیفیت ۔جس میں حق کیلئے نفوذ یا سرایت کرنے کی کوئی گنجائش نہیں رہتی  ۔(تفہیم القرآن)

ــــ یعنی وہ کتاب اللہ پر عمل کرنے لگتے ہیں، اور اعمال قلب و اعمال جوارح میں خشوع و انقیاد کے ساتھ مشغول ہوجاتے ہیں۔۔۔۔۔بہت سے صوفیہ ایسے ہیں جن پر شاعروں کاکلام سن کر  وجد طاری ہوجاتاہے،اور قرآن مجید کی آیتوں سے نہیں ہوتا۔(تفسیر ماجدی)

23۔ (i) مُتَشَابِه اور مَثَانِی کا مطلب یہ لیا ہے کہ بعض آیات میں ایک ہی طرح کے مضمون کا سلسلہ دور تک چلاگیا ہے وہ متشابہ ہوئیں اور بعض جگہ ایک نوعیت کے مضمون کے ساتھ دوسرے جملے میں اس کے مقابل کی نوعیت کا  مضمون بیان کیا جاتاہے(مثانی یعنی دہرائی ہوئی)(تفسیر عثمانی)

- (ii) اس میں ایسی ہمہ گیروحدت ہے کہ آپ جہاں سے بھی دیکھیں گے قرآن کا اصلی جمال آپ کی نگاہ کے سامنے آجائیگا(مختلف زاویوں سے مشاہدہ)۔(تدبر قرآن)

اَللّٰهُ نَزَّلَ اَحْسَنَ الْحَدِيْثِ كِتٰبًا مُّتَشَابِهًا مَّثَانِيَ۔ اس سے پہلی آیت میں اللہ کے مقبول بندوں کا یہ حال ذکر کیا گیا تھا کہ (آیت) َ یَسْتَمِعُوْنَ الْقَوْلَ فَیَتَّبِعُوْنَ اَحْسَنَهٗ، اس آیت میں بتلا دیا کہ پورا قرآن ہی احسن الحدیث ہے۔ حدیث کے لفظی معنی اس کلام یا قصے کے ہیں جو بیان کیا جاتا ہے۔ قرآن کو احسن الحدیث فرمانے کا حاصل یہ ہے کہ انسان جو کچھ کہتا بولتا ہے اس سب میں احسن الکلام قرآن ہے۔ آگے قرآن کی چند صفات ذکر فرمائی ہیں۔ ایک کتاباً متشابہاً۔ متشابہ سے مراد اس جگہ متماثل ہے۔ یعنی مضامین قرآنیہ ایک دوسرے سے مربوط اور مماثل ہیں کہ ایک آیت کی تشریح و تصدیق دوسری آیت سے ہوجاتی ہے۔ اس کلام میں تضاد وتعارض کا نام نہیں ہے۔ دوسری صفت مثانی ہے جو مثنیٰ کی جمع ہے جس کے معنی مکرر کے ہیں۔ مطلب یہ کہ قرآن کریم میں ایک مضمون کو ذہن نشین کرنے کے لئے بار بار دہرایا جاتا ہے تیسری صفت یہ بیان فرمائی کہ (آیت) تَقْشَعِرُّ مِنْهُ جُلُوْدُ الَّذِيْنَ يَخْشَوْنَ رَبَّهُمْ ۔ یعنی اللہ کی عظمت سے متاثر ہو کر ڈرنے والوں کا قرآن پڑھ کر خشیت وہیبت کا یہ عالم ہوتا ہے کہ ان کے بدن پر بال کھڑے ہوجاتے ہیں۔ چوتھی صفت یہ ہے کہ (آیت) ثُمَّ تَلِيْنُ جُلُوْدُهُمْ وَقُلُوْبُهُمْ اِلٰى ذِكْرِاللّٰهِ۔ یعنی تلاوت قرآن کا اثر کبھی عذاب کی وعید سن کر یہ ہوتا ہے کہ بدن کے بال کھڑے ہوجاتے ہیں اور کبھی رحمت و مغفرت کی آیات سن کر یہ حال ہوتا ہے کہ بدن اور قلب سب اللہ کی یاد میں نرم ہوجاتے ہیں۔ حضرت اسماء بنت ابی بکر فرماتی ہیں کہ صحابہ کرام کا عام حال یہی تھا کہ جب ان کے سامنے قرآن پڑھا جاتا تو ان کی آنکھوں میں آنسو آجاتے اور بدن پر بال کھڑے ہوجاتے۔ (قرطبی) (معارف القرآن)

ــــ تورات کی ترتیب اس سے بالکل مختلف ہے۔اس میں آدمی ہرسورہ سے نئے مضامین پاتااور پچھلی سورتوں سے بالکل بے تعلق ہوجاتاہے۔(ترجمہ: مولانا امین احسن اصلاحیؒ)

۔۔قرآن سننے پر حال پڑنا محض ریاکاری ہے:۔ سیدنا عبداللہ بن زبیر ؓ  نے اپنی والدہ سیدہ اسماء بنت ابی بکرؓ سے پوچھا کہ جب قرآن پڑھاجاتاتو رسول اللہؐ کے صحابہ کا کیا حال ہوتاتھا۔وہ کہنے لگیں کہ"ان کی آنکھوں میں آنسو آجاتے اور بدن پر رونگٹےکھڑے ہوجاتے "عبداللہ بن زبیر ؓ کہنے لگے کہ "ہمارے زمانہ میں تو بعض لوگ ایسے ہیں کہ قرآن سننے سے ان کو غش آجاتاہے"سیدہ اسماء نے کہا اللہ کی پناہ شیطان مردود سے" اور جلدوں اور دلوں کے نرم پڑنے کا اثر یہ ہوتاہے کہ وہ بڑی خوش دلی اور رغبت کے ساتھ اللہ کی عبادت بجالاتےہیں۔یہ تو صحابہ کرام اور ان لوگوں کی صفات ہیں جو فی الواقع قرآن کی تاثیر قبول کرتے ہیں۔ پھر کچھ لوگوں نے تصنع سے ایسے طریقے ایجاد کرلئے کہ قران سننے سے غش آجائے اور وہ گرپڑیں جسے ہماری زبان میں حال پڑنا یا حال کھیلنا کہتے ہیں۔ریاکار اور مصنوعی پیر قسم کے لوگ عام لوگوں پر اپنی بزرگی کی دھاک بٹھانے کے لئے ایسے کام کرتے ہیں۔چنانچہ سیدنا عبداللہ بن عمرؓ عراق کے ایک ایسے شخص پرسے گزرے جو مدہوش گراہوا تھا۔انہوں نے پوچھا:  اسے کیا ہوا؟لوگوں نے کہا :"جب یہ قرآن سنتاہے تو اس کا یہی حال ہوجاتاہے"سیدنا عبداللہ کہنے لگے:"ہم بھی اللہ سے ڈرتے ہیں مگر گرتے نہیں اور ایسے لوگوں کے پیٹ میں شیطان ہوتاہے۔رسول اللہؐ کے اصحاب کا یہ طریقہ نہ تھا اور ابن سیرین سے کسی نے پوچھا :"کچھ لوگ قرآن سن کر گرجاتے ہیں۔ انہوں نےکہا :ایسے لوگوں کو ایک چھت پر ا س طرح بٹھا ؤ کہ وہ نیچے کی طرف دیوار کے ساتھ پاؤں لٹکائے ہوئے ہوں پھر انہیں قرآن سناؤ۔اگر وہ نیچےگر  پڑیں تب وہ سچے ہیں ورنہ وہ جھوٹے اور ریاکار ہیں۔(تیسیر القرآن)

24۔ یعنی آخرت کے دن مستکبرین کے پاس کوئی چیز بھی ایسی نہیں ہوگی جسکو وہ عذاب سے بچنے کے لیے سپر بناسکیں۔اس وجہ سے وہ اپنے چہرے اس کے آگے کرنے پر مجبور ہوں گے۔(ترجمہ: مولانا امین احسن اصلاحیؒ)

۔ کسی ضرب کو آدمی اپنے منہ پر اس وقت لیتا ہے جبکہ وہ بالکل عاجز و بےبس ہو۔ ورنہ جب تک وہ مدافعت پر کچھ بھی قادر ہوتا ہے وہ اپنے جسم کے ہر حصے پر چوٹ کھاتا رہتا ہے مگر منہ پر مار نہیں پڑنے دیتا۔ اس لیے یہاں اس شخص کی انتہائی بےبسی کی تصویر یہ کہہ کر کھینچ دی گئی ہے کہ وہ سخت مار اپنے منہ پر لے گا۔ (تفہیم القرآن)

28۔ معتقدوں کا نہیں، بلکہ منکروں کا بیان ہے کہ "قرآن دنیا میں سب سے زیادہ پڑھی جانے والی کتاب ہے"۔(انسائیکلوپیڈیا برٹانیکا،مقالہ"قرآن"طبع یازدہم)(تفسیر ماجدی)

29۔۔۔۔یہاں الحمد للہ کی معنویت سمجھنے کے لیے یہ نقشہ ذہن میں لایئے کہ اوپر کا سوال لوگوں کے سامنے پیش کرنے کے بعد مقرر نے سکوت کیا، تاکہ اگر مخالفین توحید کے پاس اس کا کوئی جواب ہو تو دیں۔ پھر جب ان سے کوئی جواب نہ بن پڑا اور کسی طرف سے یہ آواز نہ آئی کہ دونوں برابر ہیں، تو مقرر نے کہا الحمد للہ۔ یعنی خدا کا شکر ہے کہ تم خود بھی اپنے دلوں میں ان دونوں حالتوں کا فرق محسوس کرتے ہو اور تم میں سے کوئی بھی یہ کہنے کی جرأت نہیں رکھتا کہ ایک آقا کی بندگی سے بہت سے آقاؤں کی بندگی بہتر ہے یا دونوں یکساں ہیں۔۔۔۔۔۔ توحید کا مسلک اختیار کرنے کی دو شکلیں۔۔۔۔(i) انفرادی حیثیت میں خدائے واحد کا بندہ بن کر رہنے کا فیصلہ (زمانہ بتونہ سازد تو بزمانہ ستیز)(ii)پورا معاشرہ اس توحید کی بنیاد پر قائم ہوجائے (نہ ہو تو اس کے قیام کی کوشش)۔۔۔۔۔۔  (تفہیم القرآن)

30۔  اِنَّكَ مَيِّتٌ وَّاِنَّهُمْ مَّيِّتُوْنَ۔ لفظ میت بتشدید الیاء اس کو کہتے ہیں جو زمانہ مستقبل میں مرنے والا ہو اور میت بسکون الیاء اس کو کہتے ہیں جو مر چکا ہو۔ اس آیت میں رسول اللہ ﷺ کو مخاطب کر کے فرمایا گیا ہے کہ آپ بھی مرنے والے ہیں اور آپ کے دشمن اور احباب بھی سب مرنے والے ہیں۔ مقصد اس کے بیان کرنے سے سب کو فکر آخرت کی طرف متوجہ کرنا اور عمل آخرت میں لگنے کی ترغیب دینا ہے۔ اور ضمناً یہ بھی بتلا دینا ہے کہ افضل الخلائق اور سید الرسل ہونے کے باوجود موت سے رسول اللہ ﷺ بھی مستثنیٰ نہیں۔ تاکہ آپ کی وفات کے بعد ان لوگوں میں اس پر اختلاف پیدا نہ ہو۔ (از قرطبی) (معارف القرآن)

31۔ اور طبرانی نے ایک معتبر سند کے ساتھ حضرت ابو ایوب انصاری سے روایت کیا ہے کہ رسول اللہ ﷺ نے فرمایا کہ سب سے پہلے جو مقدمہ اللہ تعالیٰ کی عدالت میں پیش ہوگا وہ مرد اور اس کی بیوی کا ہوگا اور بخدا کہ وہاں زبان نہیں بولے گی۔ بلکہ عورت کے ہاتھ پاؤں گواہی دیں گے کہ وہ اپنے شوہر پر کیا کیا عیب لگایا کرتی تھی اور اسی طرح مرد کے ہاتھ پاؤں اس پر گواہی دیں گے کہ وہ کس طرح اپنی بیوی کو تکلیف و ایذا پہنچایا کرتا تھا۔ اس کے بعد ہر آدمی کے سامنے اس کے نوکر چاکر لائے جائیں گے ان کی شکایات کا فیصلہ کیا جائے گا۔ پھر عام بازار کے لوگ جن سے اس کے معاملات رہے تھے وہ پیش ہوں گے اگر اس نے ان میں سے کسی پر ظلم کیا ہے تو اس کا حق دلوایا جائے گا۔۔۔۔۔۔۔تفسیر مظہری میں مذکورہ سب روایات حدیث نقل کرنے کے بعد لکھا ہے کہ مظلوموں کے حقوق میں ظالم کے اعمال دے دینے کا جو ذکر آیا ہے، اس سے مراد ایمان کے علاوہ دوسرے اعمال ہیں، کیونکہ جتنے مظالم ہیں وہ سب عملی گناہ ہیں، کفر نہیں ہیں اور عملی گناہوں کی سزا محدود ہوگی بخلاف ایمان کے کہ وہ ایک غیر محدود عمل ہے۔ اس کی جزا بھی غیر محدود یعنی ہمیشہ جنت میں رہنا ہے اگرچہ وہ گناہوں کی سزا بھگتنے اور کچھ عرصہ جہنم میں رہنے کے بعد ہو۔ اس کا حاصل یہ ہے کہ جب ظالم کے اعمال صالحہ علاوہ ایمان کے سب مظلوموں کو دے کر ختم ہوجائیں گے۔ صرف ایمان رہ جائے گا تو ایمان اس سے سلب نہیں کیا جائے گا بلکہ مظلوموں کے گناہ اس پر ڈال کر حقوق کی ادائیگی کی جائے گی، جس کے نتیجہ میں یہ گناہوں کا عذاب بھگتنے کے بعد پھر بالآخر جنت میں داخل ہوگا اور پھر یہ حال اس کا دائمی ہوگا۔ صاحب تفسیر مظہری نے فرمایا کہ امام بیہقی نے بھی ایسا ہی فرمایا ہے۔ (معارف القرآن)

32۔ بعض اکابر نے کہا ہے کہ آیت اپنے عمومی لفظ سے ان لوگوں کو بھی شامل ہے، جو دعوئے ولایت میں کاذب ہیں، اور شریعت کو پس پشت ڈال کر اسے محض قشر بتاتے ہیں۔(تفسیر ماجدی)

34۔ یہ بات ملحوظ رہے کہ یہاں فی الجنّۃ (جنت میں) نہیں بلکہ عِنْدَ رَبِّھِمْ (ان کے رب کے ہاں) کے الفاظ ارشاد ہوئے ہیں۔ اور ظاہر ہے کہ اپنے رب کے ہاں تو بندہ مرنے کے بعد ہی پہنچ جاتا ہے۔ اس لیے آیت کا منشا یہ معلوم ہوتا ہے کہ جنت میں پہنچ کر ہی نہیں بلکہ مرنے کے وقت سے دخول جنت تک کے زمانے میں بھی مومن صالح کے ساتھ اللہ تعالیٰ کا معاملہ یہی رہے گا۔ وہ عذاب برزخ سے، روز قیامت کی سختیوں سے، حساب کی سخت گیری سے، میدان حشر کی رسوائی سے، اپنی کوتاہیوں اور قصوروں پر مواخذہ سے لازماً بچنا چاہے گا اور اللہ جل شانہ اس کی یہ ساری خواہشات پوری فرمائے گا۔ (تفہیم القرآن)

۔ یہ نہایت جامع الفاظ میں ان کا صلہ بیان فرما دیا کہ ان کے لئے وہ سب کچھ ان کے رب کے پاس ہوگا جو وہ چاہیں گے ان کی خواہشوں اور چاہتوں کی راہ میں کوئی رکاوٹ باقی نہیں رہ جائے گی۔ اللہ تعالیٰ ان کی ہر آرزو پوری کر دے گا۔ عندربھم کے الفاظ سے یہ بات نکلی کہ بندوں کے لئے سب سے اونچا مرتبہ خدا کا قرب ہے نہ کہ اس کی ذات میں ضم ہوجانا جیسا کہ صوفیوں کے ایک گروہ نے سمجھا ہے۔ ذٰلِكَ جَزٰٓؤُا الْمُحْسِنِیْنَ یہ ایک تنبیہ ہے کہ یہ صلہ جو بیان ہوا ہے خوب کاروں کے لئے ہے۔ قرآن پر ایمان کا ہر مدعی اس کا حقدار  نہیں ہوگا۔ اس کے حق دار صرف وہی ہوں گے جو ایمان کے ساتھ احسان کا حق ادا کرنے والے ہوں گے۔ (تدبرِ قرآن)

35۔ اس میں  رد نکل آیاایک تو ان غالی صوفیہ و مشائخ کا جواولیاء و صالحین کو ذنوب و معاصی سے ماوراء و منزہ سمجھنے لگتے ہیں اور دوسری طرف ان خارجی اور نیم خارجی فرقوں کا جو ز لات و معاصی کی بناپر  مؤمنین کو دائرہ ایمان سے خارج کردیا کرتے ہیں!جنتی ہونے، بلکہ جنت میں اعلیٰ سے اعلیٰ مرتبہ پر بھی فائز ہونے سے یہ لازم ہر گز نہیں آتاکہ یہ لوگ دنیا میں معصوم اور ہرگناہ سے پاک رہے تھے۔(تفسیر ماجدی)

36۔ یہ آنحضرت ﷺ کے لئے تسلی ہے کہ یہ مشرکین تمہاری دعوت توحید پر تم کو اپنے اصنام و آلہہ کے قہر و غضب سے ڈراتے ہیں کہ تم نے ان کی مخالفت جاری رکھی تو وہ کسی مصیبت میں پھنسا دیں گے۔ کیا ان نادانوں کے نزدیک اللہ اپنے بندے کی حفاظت و کفالت کے لئے کافی نہیں ہے۔  (تدبرِ قرآن)

38۔ مشرکین کا تضاد فکر:  یعنی یہ لوگ تضاد فکر میں مبتلا ہیں۔ ایک طرف تو ان کا حال یہ ہے کہ ان سے سوال کرو کہ آسمانوں اور زمین کا خالق کون ہے تو اس کا جواب دیں گے کہ اللہ ! دوسری طرف یہ اللہ کے سوا دوسروں کو اللہ کی خدائی میں شریک بنائے بیٹھے ہیں اور ان سے تم کو بھی ڈرا رہے ہیں۔ گویا ان کے خیال میں خدا خالق تو ہے لیکن اپنی پیدا کی ہوئی دنیا کا مالک اور اس میں متصرف نہیں ہے۔ ان نادانوں سے پوچھو کہ خدا مجھے کوئی گزند پہنچانا چا ہے تو کیا تمہارے یہ فرضی دیوی دیوتا مجھے اس سے بچالیں گے ؟ اسی طرح اگر وہ مجھے اپنے کسی فضل سے نوازنا چاہے تو کیا تمہاری اینٹ پتھر کی یہ مورتیاں اس کا ہاتھ پکڑ لیں گی۔ لفظ اَفَرَءَیْتُمْ پر دوسری جگہ ہم بحث کرچکے ہیں کہ اس سیاق وسباق میں جب یہ آتا ہے تو تحقیر اور اظہار تعجب کے لئے آتا ہے۔ قُلْ حَسْبِیَ اللّٰهُ-عَلَیْهِ یَتَوَكَّلُ الْمُتَوَكِّلُوْنَ فرمایا کہ ان نادانوں کو بتا دو کہ میرے لئے اللہ کافی ہے نہ اس کے سوا مجھے کسی کا ڈر ہے نہ اس کے سوا مجھے کسی سے امید ہے۔ میری ہر ضرورت کا وہی کفیل ہے اس وجہ سے میں اسی پر بھروسہ رکھتا ہوں اور بھروسہ کرنے والے اسی پر بھروسہ کرتے ہیں جو اس کی جگہ دوسروں پر بھروسہ کرتے ہیں ان کی امیدوں کی ساری عمارت ریت پر قائم ہے۔ (تدبرِ قرآن)

42۔اس آیت  سے درج ِ ذیل امور کا پتہ چلتاہے بالفاظ دیگر اس میں مندرجہ ذیل نشانیاں موجود ہیں۔1۔ روح حیوانی اور روح نفسانی :۔  روح کی دو  قسمیں ہیں۔ایک روح حیوانی جس کا تعلق دوران خون سے ہوتاہے ۔اور یہ نیند کی حالت میں بھی جسم کے اندر موجود رہتی ہے۔دوسری روح نفسانی یا نفس ناطقہ ہے جو نیند یا خواب کی حالت میں بدن کو چھوڑ کر سیر کرتی پھرتی ہے اور ہر طرح کے واقعات سے خواب میں ہی دوچار ہوتی رہتی ہے۔اسی روح کو اللہ تعالیٰ مخاطب فرماتے ہیں۔۔۔۔۔دوام روح نفسانی کو ہے:۔ اور اسی روح کو دوام ہے یہ روح جب بدن کو چھوڑ دیتی ہے تو انسان کے حواس خمسہ میں نمایاں کمی واقع ہوجاتی ہے۔نیند کے دوران انسان کی قوت باصرہ،لامسہ اور ذائقہ کی کارکردگی تو سوال ہی پیدا نہیں ہوتا۔قوت سامعہ بھی ماند پڑجاتی ہے۔ہاں اگر غل غپاڑہ ہو یا کوئی دوسرا آدمی سوئے ہوئے کو بلند آواز سے پکار کر جگا دے تو روح نفسانی دوبارہ اپنے جسم میں لوٹ آتی ہے۔اس روح کو اپنے جسم سے عشق کی حدتک محبت ہوتی ہے۔کیونکہ یہی جسم اس روح کی آرزؤں کی تکمیل کا ذریعہ بنتاہے۔2۔عذاب قبر کی ماہیت :۔  ان دونوں قسم کی روحوں کا آپس میں نہایت گہرا اور قریبی تعلق ہوتاہے کیونکہ یہ ایک ہی اکائی کے دوجز ہوتے ہیں۔روح نفسانی اگر خواب میں کسی بات پر یا کسی چیز سے لطف اندوز ہوتی ہے تو انسان جاگنے پر ہشاش بشاش نظر آتاہے۔اور اگر اس روح نفسانی کو خواب میں کوئی ناگوار حادثہ  پیش آجائے تو بعض دفعہ انسان سوتے میں ہی چیخنے چلانے لگتاہے اور جاگتاہے تو سخت اندوہناک ہوتاہےاور کہیں مار پٹے تو حیرت کی بات ہے کہ اس مار پٹائی کے اثرات اور نشانات بعض دفعہ انسان کے جسم پر نمودار ہوجاتے ہیں۔جنہیں جاگنے کے بعد انسان خود بھی مشاہدہ کرسکتاہے۔اس حقیقت سے عذابِ قبر یا عالمِ برزخ کے عذاب کی ماہیت کو کسی حدتک سمجھا جاسکتاہے۔3۔ روح حیوانی موت کے ساتھ ہی فنا ہوجاتی ہے:۔روح حیوانی کا تعلق محض بدن سے ہے۔ بدن نہ ہو تو اس روح کا کوئی وجود نہیں رہتا۔بلکہ یہ روح تو بدن کے بوسیدہ ہونے یا فنا ہونے کا بھی انتظار نہیں کرتی بلکہ موت کے ساتھ ہی ختم ہوجاتی ہے۔اس کے ختم ہونے سے بدن بدن نہیں کہلاتاہے بلکہ جسد، میت، لاش اور نعش کہلاتاہے۔4۔ ان دونوں قسم کی روحوں میں سے کسی بھی ایک قسم کی روح کے خاتمہ سے دوسری قسم کی روح کا از خود جسم سے تعلق ختم ہوجاتاہےاس کی مثال یوں سمجھئے کہ ایک شخص سوتے میں کوئی خواب دیکھ رہاہے کہ کسی دوسرےشخص نے اسے سوتے میں قتل کردیا۔تو اب روح نفسانی خواہ کہیں بھی سیر کرتی ہوگی،دوبارہ اس جسم میں داخل نہیں ہوگی بلکہ اللہ تعالیٰ اسے وہیں قبض کرلے گا ۔اس کے برعکس صورت یہ ہے کہ اگر اللہ تعالیٰ کسی انسان کی روح نفسانی کو خواب میں قبض کرلیں تو بستر پر سونے والا آدمی بغیر کسی حادثہ یا بیماری کے مرجائے گا۔5۔نیند آدھی موت  ہوتی ہے:۔اللہ تعالیٰ موت کی حالت میں بھی روح نفسانی کو قبض کرتاہے اور نیند کی حالت میں بھی۔ اور یہی وہ روح ہے جسے انا یا (EGO)کہا جاتاہے۔اس لحاظ سے نیند بھی بہت حدتک موت کے مشابہ ہوتی ہے ۔اسی لئے سوتے وقت ہمیں جو دعا سکھائی گئی ہے۔وہ یہ ہے۔(اللّھم باسمک اموت واحیٰ)"یعنی اے اللہ ! میں تیرے ہی نام سے مرتاہوں اور تیرے ہی نام سے زندہ ہوجاؤں گا"اور بیدار ہوتے وقت یہ دعا سکھائی گئی ہے۔(الحمد للہ الذی أحیانا بعدما اماتنا والیہ النشور)"سب طرح کی تعریف اس  اللہ کو سزا وار ہے جس نے ہمیں مارنے کے بعد دوبارہ زندہ اٹھا دیا اور اسی کے حضور حاضر ہونا ہے۔"6۔نیند سے اٹھنے اور دوبارہ اٹھنے میں مماثلت:۔وہ اللہ جو ہمیں ہر روز سلاکر موت کا نمونہ دکھاتااور پھر اس کے بعد زندہ کرتارہتاہے وہ اس بات پر بھی پوری قدرت رکھتاہے کہ حقیقی موت کے بعد دوبارہ زندہ کردے ۔(تیسیر القرآن)

45۔ یہ شرک و شفاعت کے وجود میں آنے کے ایک بہت بڑے سبب کی طرف اشارہ ہے کہ چونکہ آخرت خدا کے عدل کامل اور جزاء و سزا کے ظہور کا دن ہے اور اس کے ماننے سے انسان پر نہایت بھاری ذمہ داریاں عائد ہوجاتی ہیں اس وجہ سے جو لوگ ان ذمہ داریوں سے گریز اختیار کرنا چاہتے ہیں وہ شرک و شفاعت کی آڑ لیتے ہیں وہ ایمان و عمل کے تقاضے پورے کرنے کا نہ حوصلہ رکھتے اور نہ اپنے نفس کی خواہشوں پر کوئی پابندی ہی قبول کرنے کے لئے تیار ہیں اس وجہ سے اول تو وہ آخرت کو مانتے ہی نہیں اور اگر مانتے بھی ہیں تو شرک و شفاعت کا عقیدہ ایجاد کر کے اس کے تمام خطرات سے اپنے زعم کے مطابق وہ اپنے آپ کو محفوظ کرلیتے ہیں۔ ان لوگوں کا سارا اعتماد اپنے مزعومہ شفعاء کی شفاعت پر ہوتا ہے اس وجہ سے اگر ان کے سامنے توحید کا ذکر آئے تو ان کے دل بھینچنے لگتے ہیں اس لئے کہ پھر آخرت ان کے سامنے اپنی پوری ہولناکی کے ساتھ آن کھڑی ہوتی ہے۔۔۔۔۔۔شفاعتِ باطل کا عقیدہ آخرت کی باز پرس سے فرار کیلئے ایک چوردروازہ ہے۔(تدبرقرآن)

49۔ مال کی آزمائش بڑی سخت ہے۔بحرین کے جزیہ کی رقم کی تقسیم:۔ یہ دنیا دار الامتحان ہے اور  اس دنیا میں ہر انسان کی ہرحال میں آزمائش ہورہی ہے اور ہروقت ہورہی ہے ۔ اور جن چیزوں سے انسان کا امتحان ہورہاہے ان میں سے ایک نہایت اہم چیز مال و دولت کی فراوانی ہے۔ یہ انسان کے لئے کتنی بڑی آزمائش ہے؟ درج ذیل احادیث سے اس بات کا اندازہ لگایا جاسکتاہے: 1۔ رسول اللہؐ نے سیدنا ابوعبیدہ بن الجراحؓ کو بحرین سے جزیہ لانے کے لیے بھیجا ۔جب ابوعبیدہ ؓ جزیہ کامال لے کر واپس آئے  تو اگلے دن صبح کی نماز میں معمول سے زیادہ لوگ شریک ہوئے اور سلام پھیرتے ہی (حسن طلب کے طور پر) آپ کے سامنے آئے۔آپؐ بات سمجھ کر مسکرادئیے اور فرمایا: تم خوش ہوجاؤ اور خوشی کی امید رکھو۔(یعنی تم کو روپیہ ضرورملے گا)پھر فرمایا:"اللہ کی قسم! مجھ کو تمہاری محتاجی کا ڈر نہیں ہے بلکہ مجھ کو تو یہ ڈرہے کہ تم پر سامانِ زیست کی یوں فراوانی ہوجائے جیسے اگلے لوگوں پر ہوئی اور تم بھی اسی طرح دنیا کے پیچھے پڑجاؤجس طرح وہ پڑگئے اور یہ مال کی کشادگی تمہیں آخرت سے اسی طرح غافل نہ کردے جس طرح ان لوگوں کو کیا تھا"(بخاری۔ کتاب الرقاق۔باب مایحذر من زھرۃ الدنیا والتنافس فیھا)2 ۔ آپؐ نے فرمایا:"اللہ کی قسم!مجھے یہ ڈر نہیں کہ تم میرے بعد شرک کرنے لگ جاؤگے بلکہ میں تو اس بات سے ڈرتاہوں کہ تم دنیا پر ریجھ نہ جاؤ"۔3۔ نیز آپؐ نے فرمایا: "ہرامت کی ایک آزمائش ہے اور میری امت کی آزمائش مال ہے"(ترمذی۔بحوالہ مشکوٰۃ۔کتاب الرقاق۔دوسری فصل)۔(تیسیر القرآن)

53۔  تحریف معنوی کی ایک مثال:۔  اس آیت کی بعض لوگوں نے بہت عجیب سی تاویل کی ہے۔ یعنی اللہ تعالیٰ اپنے نبی سے کہہ رہاہے کہ آپؐ لوگوں سے کہہ دیجئے کہ اے میرے بندو! یعنی بندے اللہ کے نہیں بلکہ رسول اللہؐ کے ہیں۔یہ تاویل دراصل تاویل نہیں بلکہ بدترین قسم کی تحریف ہے۔ کیونکہ یہ تاویل قرآن کی ساری تعلیم کے برخلاف  ہے۔نیز اس سے رسول اللہؐ کی شان بڑھتی نہیں بلکہ ان پر سخت الزام آتاہے۔آپ اس لئے مبعوث ہوئے تھے کہ سب لوگوں کو دوسرے معبودوں کی بندگی سے ہٹا کر خالص اللہ کے بندے بنائیں۔نہ یہ کہ اپنے ہی بندے بنانا شروع کردیں۔ آپؐ خود بھی اللہ کے بندے تھے اور اس بندگی کا اقرار کرنے سے ہی ایک شخص اسلام میں داخل ہوسکتاہے اور اس بندگی کا اقرار ہم سب نمازوں میں کئی بار کرتے ہیں۔اس تاویل کو دیکھ کر بے اختیار ڈاکٹر اقبالؒ کے یہ شعر یاد آجاتے ہیں:

زمن بر صوفی و ملا سلامے۔۔۔۔۔کہ پیغام خدا گفتند مارا                 ولے تاویل شاں  درحیرت انداخت۔۔۔۔خدا وجبرئیل و مصطفیٰؐ را

(ترجمہ:میری طرف سے صوفی و ملا کو سلام ہو جنہوں نے ہمیں اللہ کا پیغام پہنچایا ۔لیکن ان کی تاویل نے اللہ ، جبرئیل اور رسول اللہؐ سب کو حیرت میں ڈال دیا(کہ ہم نے کیا کہاتھا اور ان لوگوں نے اس کا کیا مطلب لے لیا ہے)(تیسیر القرآن)

۔ حضرت عبداللہ بن عمر ؓنے فرمایا کہ یہ آیت گناہگاروں کیلئے قرآن کی سب آیتوں سے زیادہ امید افزاء ہے مگر حضرت عبداللہ بن عباسؓ نے فرمایا کہ سب سے زیادہ امید و رجا کی آیت ہے۔ وَ اِنَّ رَبَّكَ لَذُوْ مَغْفِرَةٍ لِّلنَّاسِ عَلٰى ظُلْمِهِمْ۔(معارف القرآن)

- بعض لوگوں نے ان الفاظ کی عجیب تاویل کی ہے کہ اللہ تعالیٰ نے خود نبیؐ کو "اے میرے بندو" کہہ کرلوگوں سے خطاب کرنے کا حکم دیا ہے۔۔۔۔ان کو اللہ نے رب نہیں رسول بناکر بھیجا ۔۔۔۔آخر کسی صاحب عقل انسان کے دماغ میں یہ بات کس طرح سما سکتی ہے کہ محمد ؐ نے توحید کا اعلان کرتے کرتے اچانک ایک دن اعلان کردیا ہوگا کہ تم عبدالعزی یا عبد الشمس کی بجائے عبدِ محمد ہو۔ (تفہیم القرآن)

۔ عبداللہ بن عمرؓ اور حضرت علیؓ دونوں سے منقول ہے کہ قرآن مجید بھر میں سب سے زیادہ پُرامید اور تسلی والی آیت گناہ گناروں کے حق میں یہی ہے۔۔۔۔۔اور یہی اس سیاہ محرّر سطور کا بھی عین ایمان و ایقان ہے ،رزاق و احد اللہ ہی ہے،چنانچہ وہ اپنے وارثوں سے وصیت  کیے جاتاہے کہ اس کی قبر پر بطور کتبہ کے یہی آیت کندہ کردی جائے۔(تفسیر ماجدی)

 ۔آخری دو رکوع توحید ِ عبادت کو بڑے زور دار انداز میں پیش کرتے ہیں ۔(بیان القرآن)

ــــ میزانِ عدل اور فیصلے کے بعد جنتی اور جہنمی اپنے اپنے راستوں پر روانہ ہونگے۔(بیان القرآن)

66۔خٰسرون اور خاسرین۔ابھی دوجگہ آچکاہے،دونوں جگہ(اور اسی طرح اور بھی جہاں قرآن مجید میں آیاہے) مراد ہمیشہ "خسران"اخروی ہی ہے،اسی سے ظاہر ہے کہ قرآن نے دنیوی، مادی نقصان مال کا کیا درجہ رکھاہے،اسے کتناہلکا سمجھا ہے، اور آخرت کو اس دنیا کے مقابلے میں کتنا زیادہ اہم قراردیاہے۔(تفسیر ماجدی)

67۔ بعض احادیث میں ہے وکلتا یدیہ یمین (اس کے دونوں ہاتھ داہنے ہیں) تجسیم و جہت کی نفی ہوئی ۔(تفسیر عثمانی)

- اور علمائے متاخرین نے اس آیت کو ایک تمثیل و مجاز قرار دیکر یہ معنی بیان کئےکہ کسی چیز کا مٹھی میں ہونا اور داہنے ہاتھ میں ہونا کنایہ ہوتاہے اس پر پوری طرح قبضہ و قدرت سے ۔(معارف القرآن)

ــــ یعنی ان جاہلوں نے خدا کی شان بالکل نہیں سمجھی۔۔۔۔۔خدا کی عظمت کا حال تو یہ ہے کہ وہ ایک دن آسمان و زمین سب کی بساط اپنے ہاتھ میں لپیٹ لے گا۔(ترجمہ: مولانا امین احسن اصلاحیؒ)

68۔ نفخۂ صور کی بے ہوشی سے کون مستثنیٰ ہوگا؟ اس سے معلوم ہوتاہے کہ کچھ ایسی مخلوق بھی ہے جو بے ہوش نہیں ہوگی ۔بعض نے اس استثناء سے چاروں بزرگ فرشتے یعنی جبرائیل ،میکائیل،اسرافیل اور عزرائیل مراد لیے ہیں۔بعض نے ان میں حاملینِ عرش کو بھی شامل کیا ہے اور بعض نے انبیاء و صلحاء اور شہداء کو بھی ۔ لیکن اگلے حاشیہ میں مندرج حدیث سے معلوم ہوتاہے کہ انسانوں میں سے کوئی بھی اس بے ہوشی سے نہ بچے گا۔جب رسول اللہؐ بھی بے ہوش ہوں گے تو دوسرے کیسے بچے رہ سکتے ہیں۔البتہ موسیٰؑ کو آپؐ نے مستثنیٰ کیا۔  وہ بھی اس صورت میں کہ شاید وہ مجھ سے پہلے ہوش میں آگئے ہوں  یا بے ہوش ہوئے ہی نہ ہوں۔اس لئے کہ وہ دنیا میں ایک بار بے ہوش ہوچکے ۔۔۔۔۔اس آیت سے واضح طورپر معلوم ہوتاہے کہ صور دوبارپھونکا جائے گا۔درج ذیل  احادیث  اسی آیت کی تفسیر پیش کرتی ہیں:1۔نفخۂ صور دوبار یا تین بار:۔  "سیدنا ابوہریرۃؓ سے روایت ہے کہ آپؐ نے فرمایا کہ دونوں نفخۂ صور میں چالیس کا فاصلہ ہوگا۔لوگوں نے پوچھا:"ابوہریرۃ ؓ کیا چالیس دن کا؟"انہوں نے کہا :یہ میں نہیں کہہ سکتا" پھر لوگوں نے کہا:"کیا چالیس برس کا؟ "کہنے لگے یہ میں نہیں کہہ سکتا"پھر لوگوں نے کہا "کیا چالیس ماہ کا"کہنے لگے "یہ میں نہیں کہہ سکتا"اور آپؐ نے فرمایا کہ انسان کا سارا جسم (مٹی)گھل جاتاہےماسوائے ریڑھ کی ہڈی کے سرے کے۔(جورائی کے دانہ برابر ہوتی ہے)اسی سے تمام خلقت کو ترکیب دے کراٹھا کھڑا کیا جائے گا۔(بخاری۔ کتاب التفسیر)۔۔۔۔۔2۔سیدنا ابوہریرۃؓ کہتے ہیں کہ آپؐ نے فرمایا: دوسری دفعہ صور پھونکنے پر سب سے پہلے میں سر اٹھاؤں گا تو دیکھوں گا کہ موسیٰؑ عرش تھامے لٹک رہے ہیں۔ اب میں نہیں جانتا کہ وہ پہلےصور پر بے ہوش ہی نہ ہوں گے یا دوسرے صور پر مجھ سے پہلے ہوش میں آجائیں گے۔ (کیونکہ دنیا میں وہ ایک دفعہ بے ہوش ہوچکے ) لیکن سورہ نمل کی آیت87 میں ایک اور نفخۂ کا بھی ذکر آیاہے۔جسے سن کر زمین و آسمان کی ساری مخلوق دہشت زدہ ہوجائے گی۔پھر اس کی بعض احادیث سے بھی تائید ہوجاتی ہے اسی لئے بعض علماء کہتے ہیں کہ نفخہ صور تین بار ہوگا۔پہلے نفخہ پر صرف گھبراہٹ واقع ہوگی دوسرے نفخہ پر لوگ بے ہوش ہو کر گرپڑیں گے اور مرجائیں گے۔ اور تیسرے نفخہ پر سب انسان جی اٹھیں گے اور اپنی قبروں سے نکل کر اپنے پروردگار کے حضور چل کر کھڑے ہوں گے۔(تیسیر القرآن)

- مسند احمد، بخاری، مسلم، نسائی، ابن ماجہ ، ابن جریر وغیرہ میں حضرت عبداللہ بن عمر ؓ اور حضرت ابوھریرہؓ کی روایات منقول ہوئی ہیں کہ ایک مرتبہ نبیؐ منبر پر خطبہ ارشاد فرمارہے تھے۔ دوران ِ خطبہ یہ آیت تلاوت فرمائی اور فرمایا" اللہ تعالیٰ آسمانوں اور زمینوں (یعنی سیاروں) کو اپنی مٹھی میں لیکر اس طرح پھرائے گا جیسے ایک بچہ گیند پھراتاہے اور فرمائے گا میں ہوں خدائے واحد ، میں ہوں بادشاہ، میں ہوں جبار، میں ہوں کبریائی کا مالک،کہاں ہیں زمین کے بادشاہ ؟ کہاں ہیں جبار ؟ کہاں ہیں متکبر؟ یہ کہتے ہوئے حضورؐ پر ایسا لرزہ طاری ہوا کہ ہمیں خطرہ ہونے لگا کہ کہیں آپؐ منبر سمیت گرنہ پڑیں۔(تفہیم القرآن)

69۔ گواہوں میں انبیاء کرام، فرشتے، امت محمدیہ،  انسان کے اعضاو جوارح وغیرہ۔(معارف القرآن)

- الارض سے مراد وہ زمین ہے جو نئے نوامیس و قوانین کے ساتھ قیامت کے دن ظہور میں آئے گی۔ہماری زمین سورج کی روشنی سے روشن ہوتی ہے اس وجہ سے اس میں ہمارا مشاہدہ محسوسات و مرئیات تک ہوتاہے مگر جب زمین اللہ کے نور سے روشن ہوگی اس وجہ سے اس میں تمام معانی و حقائق بھی لوگو ں کے سامنے آجائیں گے۔(تدبرقرآن)

- حضرت ابوبکرؓ کی دعوت سے چھ عشرہ مبشرہ مسلمان ہوئے۔(بیان القرآن)

ــــ یعنی آج تو زمین سورج کی روشنی سے منور ہوتی ہے مگر میدانِ محشر کے لئے جو زمین تیار کی جائے گی۔وہ براہ راست اپنے پروردگار کے نور سے جگ مگ جگمگ کررہی ہوگی۔(تیسیر القرآن)

ــــ قرآن مجید میں وجد آفریں ٹکڑے ایک دو نہیں ،بہت سے ہیں،لیکن اس بے علم راقم السطور کا جن چند مقامات کی فصاحت و بلاغت پر بے اختیار جھوم جانے اور وجد کرنے کو جی چاہتاہے ،ان میں سے ایک مقام اسی سورۃ کا یہاں سے آخر تک کا حصہ ہے!۔ (تفسیر ماجدی)

73۔ جنت کے درجات :۔ جس طرح کفر کے بہت سے درجات اور اقسام ہیں اسی طرح ایمان اور تقویٰ کے بھی بہت سے درجات ہیں۔اور ایک حدیث کے مطابق جنت کے سو درجات ہیں جس کا دوسرا مطلب یہ ہے کہ ایمان و تقویٰ کے بھی اتنے ہی درجات ہیں۔ان متقین کی بھی درجوں کے لحاظ سے گروہ بندی کی جائے گی۔انہیں بڑی عزت و تکریم کے ساتھ جنت کی طرف لے جایا جائے گا۔جب یہ گروہ جنت کے پاس پہنچیں گے۔تو ان کے پہنچنے سے پہلے ہی جنت کے دروازے کھول دئیے جائیں گے۔جنت کے محافظ فرشتے ان کے استقبال کو آگے بڑھ کر ان پر سلام پیش کریں گے۔انہیں داخلہ کی بشارت اور مبارک باد دیں گے اور اعلان عام ہوگا کہ اب ہمیشہ ہمیشہ کے لئے داخل ہوجاؤ۔ (تیسیر القرآن)

74۔یوں بھی أرض کا مفہوم عربی میں نہایت وسیع ہے، اورجس طرح سمآء کے اندر ہر وہ چیز داخل ہے جو سر کے اوپر ہو،اسی طرح أرض کے اطلاق میں ہر وہ چیز شامل ہے ،جو پیروں کے نیچے ہو۔اس لیے قرآن مجید میں کہیں اگر أرض یا الأ رض سے مراد کوئی اور زمین ہو(ارض جنت، ارض ماہتاب،ارض کواکب وغیرہ)تو اس سے فرط استعجاب کی بناپر انکار ہرگز نہ ہونا چاہیے۔(تفسیر ماجدی)

۔ وارث بنانے میں ایک لطیف تلمیح اس بات کی طرف ہے کہ یہ جنت ہمارے باپ آدم کو ملی تھی لیکن شیطان نے ان کو ورغلا کر اس سے محروم کردیا تھا اور اس کو دوبارہ حاصل کرنے کے لئے اللہ تعالیٰ نے یہ شرط ٹھہرائی تھی کہ اولاد آدم دنیا میں جا کر شیطان سے مقابلہ کرے تو جو شیطان سے جیت جائیں گے وہ اس جنت کے وارث ٹھہریں گے اور جو شیطان کے فتنوں میں پھنس جائیں گے وہ شیطان کے ساتھ دوزخ میں پڑیں گے۔ مطلب یہ ہے کہ یہ اللہ تعالیٰ کا شکر ہے کہ اس امتحان میں ہم کو کامیابی حاصل ہوئی اور ہم نے اپنے باپ کی کھوئی ہوئی جنت پھر حاصل کرلی۔(تدبرِ قرآن)

75۔ وَ قِیْلَ الْحَمْدُ لِلّٰهِ رَبِّ الْعٰلَمِیْنَ۔اس نعرۂ مسرت و انبساط میں فرشتے اور انسان سب ہی شریک ہوں گے،اور عجب نہیں جو اسی پر اجلاس عدالت برخواست ہو۔۔۔۔دنیوی بادشاہوں کے بھی دربار جم سکتے ہیں تو کچھ اسی قسم کا اعلان ہے،ان بادشاہوں کی جے لگادی جاتی ہے۔(تفسیر ماجدی)

ــــ معلوم ہواکہ اللہ تعالیٰ کو جو چیز سزاوار حمد بناتی ہے وہ لوگوں کے درمیان اس کا عدل اور نیک و بد کے درمیان اس کا فرق و امتیاز ہے۔اگر یہ چیز  نہ ہوتو یہ دنْیا ایک اندھیرنگری ہے اور ایک اندھیر نگری کے خالق کو کوئی حمد و شکر کا سزاوار نہیں مان سکتا۔(ترجمہ: مولانا امین احسن اصلاحیؒ)