۔ جب صفات کا بیان بغیر حرف عطف کے ہو جس طرح العزیز الحکیم میں ہے تو اس سے یہ بات نکلتی ہے کہ یہ صفات موصوف میں بیک وقت پائی جاتی ہیں۔ (تدبرِ قرآن)

3۔یعنی واقعی حقیقت تو یہ ہے کہ یہ نظام کائنات ایک بےمقصد کھلونا نہیں بلکہ ایک با مقصد حکیمانہ نظام ہے جس میں لازماً نیک و بد اور ظالم و مظلوم کا فیصلہ انصاف کے ساتھ ہونا ہے، اور کائنات کا موجودہ نظام دائمی و ابدی نہیں ہے بلکہ اسکی ایک خاص عمر مقرر ہے جس کے خاتمے پر اسے لازماً درہم برہم ہوجانا ہے، اور خدا کی عدالت کے لیے بھی ایک وقت طے شدہ ہے جس کے آنے پر وہ ضرور قائم ہونی ہے۔(تفہیم القرآن)

۔یہاں ممکن ہے کہ کسی کے ذہن میں یہ سوال پیدا ہو کہ یہ بات تو معقول معلوم ہوتی ہے کہ ہر شخص اپنی نیکی یا بدی کی جزا یا سزا پائے لیکن اس کے لئے یہ کیا ضروری ہے کہ یہ پوری دنیا ایک معین مدت کے بعد ختم ہوجائے کیا یہ ممکن نہیں ہے کہ یہ برابر قائم بھی رہے اور جو مرتے جائیں ان کی عدالت بھی ہوتی رہے ؟ (تدبرِ قرآن)

۔ انسان کا ہر عمل اپنے اندر متعدی ہونے کی خصوصیات رکھتاہے۔ایک شخص نیکی کا تخم بوتاہے جس کی برکت سے صدیوں تک اولاد آدم مستفید ہوتی ہے۔اسی طرح ایک شخص ایک غلط اور گمراہ کن فلسفہ ایجاد کرتاہے جس سے ایک خلق کثیر گمراہ ہوجاتی ہے اور اس کی کئی نسلیں اسی گمراہی کو پروان چڑھاتی ہیں۔ اس صورت حال  کے سبب سے کسی کی نیکی یا بدی کا صحیح اندازہ کرنے کے لیے یہ ضروری ہے کہ اس کے تمام گواہ اور متاثرین ایک ہی وقت میں یکجا ہوں۔اس کے بغیر کامل عدل کا تقاضا پورانہیں ہوسکتا۔اسی لیے یہ ضروری ہوا کہ دنیا ایک معین مدت کے لیے ہو جس کے بعد یہ ختم ہوجائے۔(ترجمہ: مولانا امین احسن اصلاحیؒ)

4۔چونکہ مخاطب ایک مشرک قوم کے لوگ ہیں اس لیے ان کو بتایا جا رہا ہے کہ احساس ذمہ داری کے فقدان کی وجہ سے وہ کس طرح بےسوچے سمجھے ایک نہایت غیر معقول عقیدے سے چمٹے ہوئے ہیں۔ وہ اللہ تعالیٰ کو خالق کائنات ماننے کے ساتھ بہت سی دوسری ہستیوں کو معبود بنائے ہوئے تھے، ان سے دعائیں مانگتے تھے، ان کو اپنا حاجت روا اور مشکل کشا سمجھتے تھے، ان کے آگے ماتھے رگڑتے اور نذر و نیاز پیش کرتے تھے، اور یہ خیال کرتے تھے کہ ہماری قسمتیں بنانے اور بگاڑنے کے اختیارات انہیں حاصل ہیں۔ انہی ہستیوں کے متعلق ان سے پوچھا جا رہا ہے کہ انہیں آخر کس بنیاد پر تم نے اپنا معبود مان رکھا ہے ؟۔۔۔۔۔۔۔اس آیت میں " پہلے آئی ہوئی کتاب " سے مراد کوئی ایسی کتاب ہے جو قرآن سے پہلے اللہ تعالیٰ کی طرف سے بھیجی گئی ہو۔ اور علم کے " بقیہ " سے مراد قدیم زمانے کے انبیاء اور صلحاء کی تعلیمات کا کوئی ایسا حصہ ہے جو بعد کی نسلوں کو کسی قابل اعتماد ذریعہ سے پہنچا ہو۔ اور دونوں ذرائع سے جو کچھ بھی انسان کو ملا ہے اس میں کہیں شرک کا شائبہ تک موجود نہیں ہے۔ تمام کتب آسمانی بالاتفاق وہی توحید پیش کرتی ہیں جس کی طرف قرآن دعوت دے رہا ہے۔ (تفہیم القرآن)

۔  آثار سے کیا مراد ہے؟  علمی اثر سے مراد کتاب اللہ کی وہ تفاسیرو شرح ہیں جو مستند ہوں۔ (جیسے ہمارے پاس کتاب اللہ تو قرآن کریم ہے اور عملی اثر احادیث ہیں۔جن میں سلسلہ اسناد بھی درج ہوتاہے جس سے یہ تحقیق کی جاسکتی ہے کہ فلاں حدیث کس درجہ کی ہے اور آیا وہ مقبول ہے یا مردود )اور اگر تمہارے پاس نہ کوئی عقلی دلیل موجود ہو اور نہ نقلی تو پھر سمجھ لو کہ تمہارے عقائد محض ظن اور اوہام پر مبنی ہیں۔(تیسیر القرآن)

۔ " اَثٰرَة" اس روایت کو کہتے ہیں جو سلف سے منقول ہوتی چلی آرہی ہو۔اس کے ساتھ من علم کی قید اس حقیقت کے اظہار کے لئے ہے کہ اس روایت کی بنیاد محض و ہم و گمان پر نہیں بلکہ علم پر ہو۔۔۔۔مشرکین عرب اپنے باپ دادا کے طریقہ پر ہونے کے مدعی ضرور تھے لیکن قرآن کے بار بار کے چیلنج کے باوجود وہ یہ ثابت کرنے سے قاصر رہے کہ ان کے باپ دادا کے طریقہ کی بنیاد کسی شرعی یا عقلی دلیل پر تھی۔ آخر تک وہ یہی کہتے رہے کہ جس طریقے پر ہم نے اپنے باپ دادا کو پایا ہے اسی پر ہم چلتے رہیں گے، اس سے بحث نہیں کہ انہوں نے یہ طریقہ کہاں سے لیا۔ (تدبرِ قرآن)

5۔ قیامت تک جواب نہ دے سکنے کا مطلب یہ ہے کہ جب تک یہ دنیا باقی ہے اس وقت تک تو معاملہ صرف اسی حد پر رہے گا کہ ان کی دعاؤں کا کوئی جواب ان کی طرف سے نہ ملے گا، لیکن جب قیامت آجائے گی تو اس سے آگے بڑھ کر معاملہ یہ پیش آئے گا کہ وہ معبود اپنے ان عابدوں کے الٹے دشمن ہوں گے، جیسا کہ آگے کی آیت میں آ رہا ہے۔۔۔۔۔۔۔۔اس سلسلے میں یہ بات بھی سمجھ لینی چاہیے کہ اللہ تعالیٰ اپنے نیک بندوں کو دنیا والوں کے سلام اور ان کی دعائے رحمت پہنچا دیتا ہے کیونکہ یہ چیزیں ان کے لیے فرحت کے موجب ہیں، اور اسی طرح وہ مجرموں کو دنیا والوں کی لعنت اور پھٹکار اور زجر و توبیخ سے مطلع فرما دیتا ہے جیسے جنگ بدر میں مارے جانے والے کفار کو ایک حدیث کے مطابق نبی ﷺ کی توبیخ سنوا دی گئی، کیونکہ یہ ان کے لیے اذیت کی موجب ہے۔ لیکن کوئی ایسی بات جو صالحین کے لیے رنج کی موجب، یا مجرمین کے لیے فرحت کی موجب ہو وہ ان تک نہیں پہنچائی جاتی۔ اس تشریح سے سماع موتیٰ کے مسئلے کی حقیقت بخوبی واضح ہوجاتی ہے۔ (تفہیم القرآن)

6۔ سماع موتیٰ کی حقیقت:۔  یہاں ایک اور مسئلہ پیدا ہوتاہے کہ آیا فوت شدہ حضرات دنیا والوں کی پکار سنتے ہیں یا نہیں؟ جسے عرف عام میں سماعِ موتیٰ کا مسئلہ کہا جاتاہے۔سو اس آیت میں اس بات کی مکمل نفی ہے۔کہ وہ قیامت تک بھی دنیاوالوں کی پکار نہیں سن سکتے۔تاہم بعض آیات سےاتنا اور معلوم ہوتاہے کہ اللہ جسے چاہے سناسکتاہے۔نیز صحیح احادیث سے یہ بات ثابت ہے کہ رسول اللہؐ کو امت کا سلام فرشتوں کے ذریعہ پہنچایا جاتاہے۔ اور یہ بھی قرآن میں صراحت سے مذکور ہے ۔کہ مرنے کے بعد نیک لوگوں کی ارواح علیین میں اور بدکاروں کی ارواح سجین میں ہوتی ہیں۔ اوروہا ں وہ دنیاوالوں کی کوئی آواز براہ راست اور بلاواسطہ سن نہیں سکتے کیونکہ وہ عالم ہی دوسرا ہے۔(تیسیر القرآن)

7۔ (جو ہم پرہوجاتاہے، یعنی حقیقت و حقانیت سے معرّا ہے)قرآن مجید کے متعلق ماضی کے"روشن خیال"کی تشخیص یہی تھی، اور حال کے"روشن خیال"کی "تحقیق"اس سے کچھ بھی زیادہ مختلف نہیں،جب وہ یہ کہتاہے کہ"موافق ماحول اور مناسب فضا نے محمدؐ کے کلام و پیام کو اس درجہ مؤثر و کامیاب بنادیا"۔(تفسیر ماجدی)

۔ اس کا مطلب یہ ہے کہ جب قرآن کی آیات کفار مکہ کے سامنے پڑھی جاتی تھیں تو وہ صاف یہ محسوس کرتے تھے کہ اس کلام کی شان انسانی کلام سے بدرجہا بلند ہے۔ (تفہیم القرآن)

8۔کاش اس طرح کی بکثرت آیات کو وہ مسیحی اہل قلم ذرا آنکھیں کھول کے پڑھ لیتے، جنہوں نے بے دھڑک یہ لکھ دیا ہے کہ اسلام کا خدا"قہار"و"جبار"ہے!۔(تفسیر ماجدی)

۔ اس سوالیہ طرز بیان میں سخت تعجب کا انداز پایا جاتا ہے۔ مطلب یہ ہے کہ کیا یہ لوگ اتنے بےحیا ہیں کہ محمد ﷺ پر قرآن خود گھڑ لانے کا الزام رکھتے ہیں ؟   حالانکہ انہیں خوب معلوم ہے کہ یہ ان کا تصنیف کردہ کلام نہیں ہو سکتا، اور ان کا اسے سحر کہنا خود اس امر کا صریح اعتراف ہے  کہ یہ غیر معمولی کلام ہے جس کا کسی انسان کی تصنیف ہونا ان کے اپنے نزدیک بھی ممکن نہیں ہے۔ (تفہیم القرآن)

10۔یعنی اسلام کی مخالفت کے جنون میں آج یہودی اور مسیحی جو حرکتیں چاہیں کریں لیکن بنی اسرائیل کا ایک عظیم شاہد (حضرت عیسیٰؑ)اس حق کی نہایت آشکارا الفاظ میں شہادت دے چکا اور اس پر ایمان لاچکا ہے۔۔۔۔۔انہوں نے آنحضرتؐ کا نام لے کر آپؐ کی بشارت دی۔۔۔۔۔آپؐ کی انہی تعلیمات کے زیر اثر شمعون کے پیروکاروں نے فوراً اسلام قبول کرلیا۔(ترجمہ: مولانا امین احسن اصلاحیؒ)

 ۔ بنی اسرائیل کے شاہد سے مراد عبداللہ بن سلام ہیں:۔  یہ بنی اسرائیل میں سے شہادت دینے والا کون تھا؟درج ذیل احادیث سے معلوم ہوتاہے کہ یہ سیدنا عبداللہ بن سلام تھے۔عبداللہ بن سلام کے بھتیجے سے روایت ہے کہ جب باغیوں نے سیدنا عثمانؓ کے قتل کا ارادہ کیا تو عبداللہ بن سلام ان کے پاس گئے۔سیدنا عثمانؓ نے پوچھا :"کیسے آنا ہوا"عبداللہ نے کہا:"آپؐ کی مدد کو آیا ہوں"سیدنا عثمانؓ نے کہا :"تم باغیوں کے پاس جاؤ اور انہیں مجھ سے دور رکھو۔تمہارا باہر رہنا اندر رہنے سے زیادہ مفید ہے۔"چنانچہ عبداللہ بن سلام لوگوں کے پاس آئے اور کہا :لوگو! جاہلیت میں میرا نام فلاں (حصین)تھا تو رسول اکرمؐ نے میرا نام عبداللہ رکھا۔ اور اللہ کی کتاب میں کئی آیات میرے بارے میں نازل ہوئیں۔چنانچہ آیت "شَهِدَ شَاهِدٌ مِّنْۢ بَنِیْ اِسْرَآءِیْلَ"میرے بارے میں نازل ہوئی ۔نیز یہ آیت"كَفٰى بِاللّٰهِ شَهِیْدًۢا۔۔۔۔مَنْ عِنْدَهٗ عِلْمُ الْكِتٰبِ"سے مراد میں ہوں۔(سنو)اللہ تعالیٰ کی ایک تلوار ہے جو تم سے پوشیدہ ہے۔اور اسی شہر میں فرشتے تمہارے ہمسایہ بنے ہوئے ہیں۔یہ وہی شہر ہے جہاں تمہارے نبی آئے تھے۔لہذا اس شخص (سیدنا عثمانؓ )کو قتل کرنے کے بارے میں اللہ سے ڈرجاؤ ۔اللہ کی قسم! اگر تم نے اسے قتل کیا تو تمہارے ہمسایہ فرشتے  تمہارے ہاں سے رخصت ہوجائیں گے۔اور اگر اللہ کی چھپی ہوئی تلوار نکل آئی تو قیامت تک میان میں نہ جائے گی۔"باغیوں نے حضرت عبداللہ کی تقریر سن کر کہا :"اس یہودی کو بھی مار ڈالو اور عثمان کو بھی مار ڈالو"۔(ترمذی۔ابواب التفسیر)(تیسیر القرآن)

۔  مفسرین کے ایک بڑے گروہ نے اس گواہ سے مراد حضرت عبداللہ بن سلام کو لیا ہے جو مدینہ طیبہ کے مشہور یہودی عالم تھے اور ہجرت کے بعد نبی ﷺ پر ایمان لائے۔ یہ واقعہ چونکہ مدینہ میں پیش آیا تھا اس لیے ان مفسرین کا قول یہ ہے کہ یہ آیت مدنی ہے۔ اس تفسیر کی بنیاد حضرت سعد بن ابی وقاص کا یہ بیان ہے کہ یہ آیت حضرت عبداللہ بن سلام کے بارے میں نازل ہوئی تھی (بخاری، مسلم، نسائی، ابن جریر) ۔۔۔۔مگر دوسری طرف عکرمہ اور شعبی اور مسروق کہتے ہیں کہ یہ آیت عبداللہ بن سلام ؓ کے بارے میں نہیں ہو سکتی کیونکہ یہ پوری سورة مکی ہے۔۔۔۔۔۔بلکہ اس کا مطلب صرف یہ ہے کہ وہ اس آیت کے ٹھیک ٹھیک مصداق ہیں اور ان کے قبول ایمان پر یہ پوری طرح چسپاں ہوتی ہے۔ (تفہیم القرآن)

۔۔۔۔ ہمارے نزدیک یہ اشارہ سیدنا مسیح ؑ کی طرف ہے۔۔۔۔۔ پہلی بات یہ ہے کہ حضرت مسیح ؑ نے اپنی بعثت کا خاص مقصد ہی یہ بتایا ہے کہ میں آنے والے کی راہ صاف کرنے آیا ہوں آپ کے بعد محمد رسول اللہ ﷺ کی بعثت ہوئی اور آپ آخری نبی بھی ہیں  اور آخری رسول بھی اس وجہ سے اس آنے والے سے آنحضرت ﷺ کے سوا کسی اور کو مراد لینے کی کوئی ادنیٰ گنجائش بھی نہیں ہے۔۔۔۔۔  استاذ امام نے خاص اس موضوع پر انگریزی میں ایک رسالہ لکھا ہے کہ انجیلوں کا اصل مقصد آنحضرت ﷺ کی تعریف اور تعارف ہے۔  حضرت مسیح ؑ نے جس آسمانی بادشاہت کا بار بار ذکر کیا ہے اور اس کی جو تمثلیں بیان فرمائی ہیں وہ تمام تر آنحضرت ﷺ اور قرآن کی دعوت ہی پر منطبق ہوتی ہیں۔۔۔۔۔۔۔۔اِنَّ اللّٰهَ لَا یَهْدِی الْقَوْمَ الظّٰلِمِیْنَ    ۧیہ ہدایت و ضلالت کے باب میں اس سنت الٰہی کی طرف اشارہ ہے  جس کا ذکر اس کتاب میں بار بار ہوچکا ہے کہ اللہ تعالیٰ ان لوگوں کو کبھی راہ یاب نہیں کرتا جو اپنی جانوں پر ظلم ڈھانے والے اور اس کی بخشی ہوئی روشنی کی ناقدری کرنے والے ہوتے ہیں۔ (تدبرِ قرآن)

۔ الَّذِیْنَ كَفَرُوْا سے قرینہ دلیل ہے کہ یہاں کفار کے اغنیاء مراد ہیں جن کے استکبار کا اوپر والی آیت میں ذکر ہوا ہے۔ لِلَّذِیْنَ اٰمَنُوْا، سے یہاں غربائے مسلمین مراد ہیں اور ل یہاں فی کے مفہوم میں ہے یہ قرآن میں جگہ جگہ استعمال ہوا ہے۔ وَ اِذْ لَمْ یَهْتَدُوْا بِهٖ، سے یہ بات نکلتی ہے کہ جب انہوں نے ایک بالکل واضح حق کا انکار کیا ہے تو اپنے ضمیر کو تسلی دینے اور لوگوں کو بیوقوف بنانے کے لئے انہیں اور بھی باتیں بنانی پڑیں گی چنانچہ وہ یہ بھی کہیں گے کہ یہ جھوٹ تو بہت پرانا جھوٹ ہے۔ اس کو پرانا جھوٹ قرار دینے میں دلیل کا پہلو، ان کے زعم کے مطابق یہ ہے کہ اس کا جھوٹ ہونا بالکل ثابت ہوچکا ہے۔ اگر قیامت آنے والی ہے تو آخر وہ کہاں غائب ہے ۔ایک مدت دراز سے اس کا چرچا ہے لیکن جہاں تک اس کے ظہور کا تعلق ہے ہنوز روز اول ہے۔ (تدبرِ قرآن)

12۔ ۔۔ لِیُنْذِرَ الَّذِیْنَ ظَلَمُوْا یہ اس کتاب کے نزول کا مقصد بیان ہوا ہے کہ اللہ تعالیٰ نے اس کو اس لئے اتارا ہے کہ جن لوگوں نے شرک و کفر میں مبتلا ہو کر اپنی جانوں پر ظلم ڈھائے ان کو اس کے انجام سے آگاہ کردیا جائے تاکہ جو اپنی اصلاح کرنی چاہیں وہ آخری نتائج کے سامنے آنے سے پہلے اپنی اصلاح کرلیں۔۔۔۔۔۔۔ وَ بُشْرٰى لِلْمُحْسِنِیْنَ یہ اس کتاب کا دوسرا مقصد بیان ہوا ہے اور چونکہ اصل مقصود یہی ہے اس وجہ سے اس کا ذکر بشکل اسم ہے۔ فرمایا کہ یہ عظیم اور دائمی خوش خبری ہے خوب کاروں کے لئے مُحْسِنِیْنَ یہاں الَّذِیْنَ ظَلَمُوْا کے مقابل میں ہے جس کے لفظ کے مفہوم پر روشنی پڑتی ہے کہ اس سے مراد وہ لوگ ہیں جنہوں نے اپنی تمام قوتوں اور صلاحیتوں کی حفاظت کی اور اپنی زندگی کو اپنے خالق کی حدود وقیود کے اندر رکھا۔ (تدبرِ قرآن) 

13 ۔ رَبُّنَا اللّٰهُ کا اقرار  پورا  ایمان  ہے اور  اسپر  استقامت  میں  ایمان  پر  تادم  قیامت قائم رہنا  بھی شامل  ہے ۔ ( کلمہ  پر  موت کی  دعا  )  اور  اسکے  مقتضیات   پر پورا  پورا عمل  بھی ۔(معارف القرآن)

-  ( حم  السجدہ   (فصلت)  میں یہی  الفاظ :آیت  نمبر 30 ( تعلیم القرآن : ص 357 )  

ـــ   "أَلَاإِنَّ أَوْلِيَاءَاللَّهِ لَاخَوْفٌ عَلَيْهِمْ وَلَاهُمْ يَحْزَنُونَ "  (  ۔۔ بقرۃ   :  112 ) 

۔ یہ اس بشارت کی وضاحت بھی ہے جس کا اوپر والی آیت میں ذکر ہوا اور ”محسنین“ کے کردار کے ایک خاص پہلو کی طرف اشارہ بھی فرمایا کہ ہمارے جن بندوں نے قرآن کی دعوت حق قبول کر کے یہ اعلان کردیا ہے کہ ہمارا رب بس اللہ ہی ہے اور اپنے اس اقرار پر وہ تمام مخالفتوں سے بالکل بےخوف ہو کر ڈٹ گئے ہیں ان کے لئے ابدی جنت کی بشارت ہے نہ ان کو مستقبل کا کوئی اندیشہ ہوگا اور نہ ماضی کا کوئی غم۔ وہی جنت کے مالک ہوں گے ہمیشہ کے لئے اور یہ چیز ان کو ان کے اعمال کے صلہ میں ملے گی۔ (تدبرِ قرآن)

15۔   قرآن میں کئی جگہ اللہ  کے حق  کے ساتھ  والدین کے حق کا ذکر فرمایا-  اگر والدین  مشرک  ہوں  تب  بھی  ان کے ساتھ  دنیا  میں  معاملہ  اچھا  رکھنا  چاہیے  خصوصاً  ماں  کی خدمت  گزاری  کہ  بعض وجوہ  سے  اس کا حق  باپ  سے بھی  فائق  ہے ۔  آیت ہذا میں  والد   کا ذکر   ایک دفعہ  لفظ   والدیہ  جبکہ  والدہ  کا تین  بار  یعنی   والدیہ ، حملتہ  امہ  اور  وضعتہ  ۔۔۔۔۔ کم از کم مدت حمل چھ مہینے ہے اور دو برس میں عموماً بچوں کا دودھ چھڑا دیا جاتا ہے اس طرح کل مدت تیس مہینے ہوئے۔ مدت رضاع کا اس سے زائد ہونا نہایت قلیل و نادر ہے۔ (تفسیر عثمانی)

۔ " سورة لقمان میں فرمایا " اور دو سال اس کا دودھ چھوٹنے میں لگے۔ " اور سورة احقاف میں فرمایا " اس کے حمل اور اس کا دودھ چھڑانے میں تیس مہینے لگے "۔ اب اگر تیس مہینوں میں سے رضاعت کے دو سال نکال دیے جائیں تو حمل کے چھ مہینے رہ جاتے ہیں۔۔۔۔۔۔رضاعت کی زیادہ سے زیادہ مدت دو سال ہے۔ اس عمر کے بعد اگر کسی بچے نے کسی عورت کا دودھ پیا ہو تو وہ اس کی رضاعی ماں قرار نہیں پائے گی اور نہ وہ احکام رضاعت اس پر مترتب ہوں گے جو سورة نساء آیت 23 میں بیان ہوئے ہیں۔ اس معاملہ میں امام ابوحنیفہ نے بر سبیل احتیاط دو سال کے بجائے ڈھائی سال کی مدت تجویز کی ہے۔۔۔۔۔ (تفہیم القرآن)

ـــ بَلَغَ اَشُدَّهٗ  سے مراد  اٹھارہ سال  عمر ہے ( ابن عباس رضی اللہ تعالی عنہ )  ۔ چالیس  سال کی عمر  ایک  مستقل  عمر ہو گی جب  عادات  پختہ ہو جاتی ہیں  ۔ (معارف القرآن)

ـــ  ماں  کی جان  بازیاں  اپنی  اولاد  کیلئے  :۔  "حَمَلَتْهُ اُمُّهٗ كُرْهًا وَّ وَضَعَتْهُ كُرْهًا-وَ حَمْلُهٗ وَ فِصٰلُهٗ ثَلٰثُوْنَ شَهْرًا"۔یہ ان چند جاں بازیوں اور قربانیوں کی طرف اشارہ ہے جو ہر ماں کو اپنی اولاد کے لیے لازماً کرنی پڑتی ہیں۔اس اشارے سے مقصود اس حقیقت کی طرف توجہ دلاناہے کہ کوئی اولاد خواہ کچھ ہی کرڈالے لیکن وہ اپنے ماں باپ کے احسان کا حق ادانہیں کرسکتی۔فرمایا کہ اس کی ماں مہینوں نہایت دکھ کے ساتھ اس کو اپنے پیٹ میں اٹھائے پھرتی ہے ،پھر وہ جان کی بازی کھیل کر اس کو جنتی ہے۔اس کے بعد اس کی رضاعت کا دور آتاہے اور پورے دوسال وہ اپنے خون کو دودھ بناکر اس کو پلاتی اور پرورش کرتی ہے۔مطلب یہ ہے کہ کون ہے جو اس کے لیے اتنے دکھ خوشی خوشی جھیل سکے؟ پھر یہ کتنی بڑی ناسپاسی ہوگی اولاد کی اگروہ اس احسان کو بھول جائے اور جب ماں باپ اس کے احسان کے محتاج ہوں تو ان سے بے پروائی برتے!یہاں ایک بات قابل توجہ ہے کہ حسنِ سلوک کا مطالبہ تو ماں باپ دونوں ہی کے لیے کیا گیا ہے لیکن تین قربانیاں جو مذکور ہوئی ہیں وہ صرف ماں ہی کی ہیں ، باپ کی کسی قربانی کا ذکر نہیں ہوا۔اس کے وجوہ ہمارے نزدیک مندرجہ ذیل ہیں۔پہلی وجہ تو یہ  ہے کہ فی الواقع اولاد کی ابتدائی پرورش و پرداخت میں جو حصہ ماں کا ہوتاہے وہ باپ کا نہیں ہوتا۔ چنانچہ ایک حدیث سے بھی معلوم ہوتاہے کہ نبیؐ نے خدمت کے معاملہ میں ماں کا حق باپ کے بالمقابل تین گنارکھا ہے۔یہ حدیث اسی آیت پر مبنی ہے۔دوسری وجہ یہ ہے کہ ماں کا تعلق جنسِ ضعیف سے ہے ۔اس کا یہ پہلو بھی متقاضی ہے کہ اولاد اس کی خدمت و اطاعت باپ سے زیادہ کرے۔تیسر ی وجہ یہ ہے کہ باپ سے بالعموم اولاد کا مادی مفاد وابستہ ہوتاہے ۔ان کو اس سے جائداد اور املاک وراثت میں ملنے والی ہوتی ہیں!اس سبب سے اس کے معاملے میں کوتاہی یا نافرمانی کا اندیشہ کم ہے برعکس اس کے ماں سے عام حالات میں اس طرح کی توقع کم ہی ہوتی ہے اس وجہ سے وہ لوگ ماں کی حقیقی قدر نہیں کرتے جن کے اندر اس کی قربانیوں کا صحیح شعور نہیں ہوتا۔(تدبر قرآن)

ـــ عمر  رشد  متعین  نہیں  کی جاسکتی  ۔ چالیس  سال  آخری  حد  -  اس  عمر  کو پہنچ  کر بھی  اگر  کسی  سلیم الفطرت  انسان  کے اندر  یہ  شعور  نہیں   بیدار  ہوتا  تو  یہ علامت  ہے اس  بات  کی کہ اس شخص  نے  اپنی فطرت   بگاڑلی ۔(تدبر قرآن)

 ــــ  "وَ اَصْلِحْ لِیْ" ( اصلاح  میرے  لئے  ۔ اس  کا فائدہ  مجھے  پہنچے  )  (بیان القرآن)

17۔ ہم اس کتاب میں جگہ جگہ ذکر کرچکے ہیں کہ الذی جب تمثیل کے لئے آتا ہے تو یہ ضروری نہیں ہوتا کہ اس سے لازماً کسی خاص شخص ہی کو مراد لیا جائے بلکہ اس سے مراد ہر وہ شخص ہوگا جس پر تمثیل منطبق ہو۔۔۔۔۔۔۔وَیْلَكَ اٰمِنْ لفظ "ویل" اگرچہ لعنت کے الفاظ میں سے ہے لیکن بعض مواقع میں یہ دل سوزی، شفقت اور درد مندی کے اظہار کے لئے بھی آتا ہے۔ کلام عرب میں اس کی نہایت عمدہ مثالیں موجود ہیں۔ یہاں بھی یہ اسی طرح کے محل میں ہے۔ بعض ماں باپ نہایت دل سوزی کے ساتھ اس کو سمجھاتے ہیں کہ تیرا ناس ہو ! ضد نہ کر، بےراہ روی چھوڑ، ایمان کی راہ اختیار کر اور آخرت سے ڈر۔ لیکن وہ ان کی اس شفقت کی قدر کرنے کی بجائے نہایت نفرت کے ساتھ ان کو جھڑک دیتا ہے۔ (تدبر قرآن)

18۔ یہ ان کا انجام بیان ہوا ہے۔ یہاں اشارے، ضمیریں اور افعال سب جمع استعمال ہوئے ہیں۔ یہاں تک کہ الذِی یہاں الَّذِینَ ہوگیا ہے۔ یہ اس بات کی صاف دلیل ہے کہ اوپر والی آیت میں ذکر کسی خاص شخص کا نہیں بلکہ ایک خاص قماش کے لوگوں کا تھا۔ فرمایا یہ وہ لوگ ہیں جن پر اللہ کی بات پوری ہوگئی۔ اللہ کی بات، سے مراد وہ بات ہے جو اللہ تعالیٰ نے ابلیس کے چیلنج کے جواب میں فرمائی تھی کہ جنوں اور انسانوں میں سے جو بھی تیری پیروی کریں گے میں ان سب کو تیرے سمیت جہنم میں بھر دوں گا۔ (تدبر قرآن)

19۔ ’ كُلّ‘ سے مراد یہاں وہی دونوں گروہ ہیں جن کا اوپر ذکر ہوا ہے۔ فرمایا کہ ان دونوں گروہوں کو ان کے اعمال کے اعتبار سے درجے ملیں گے۔ جنہوں نے اپنے ماں باپ اور اپنے رب کے حقوق پہچانے اور ادا کئے وہ جنت کے مدارج حاصل کریں گے اور جنہوں نے شتر بےمہار زندگی گزاری وہ اپنے اعمال کے اعتبار سے دوزخ کے جس طبقہ کے مستحق ہوں گے، اس میں جائیں گے۔ لفظ دَرَجٰتٌ یہاں علی سبیل التغلیب استعمال ہوا ہے۔ (تدبر قرآن)

20۔ مرشد تھانویؒ نے فرمایا کہ آیت سے دلالت زُہد پر نکلتی ہے، نیز اس طرف  اشارہ کہ لذات ِ دنیوی میں توسع موجب خطر ہے، مگر مطلقاً نہیں بلکہ حب معاصی کے ساتھ۔(تھانوی،ج2/ص: 522)(تفسیر ماجدی)

21۔ احقاف قوم عاد کا مسکن:۔  اَحْقَاف،حقف کی جمع ہے۔ بمعنی ریت کے بڑے بڑے میلوں میں پھیلے ہوئے ٹیلے ۔یہی علاقہ قوم عاد کا مسکن تھا۔ جو کسی زمانہ میں سرسبز اورشاداب علاقہ تھا۔ قوم عادنے اسی جگہ زمین دوز مکان بنارکھے تھے۔ یہ علاقہ جنوبی عرب میں حضرموت کے شمال میں واقع ہے۔ اور آج کل وہاں ریت کے ٹیلے ہیں جو سینکڑوں میل تک پھیلتے چلے گئے ہیں۔اس علاقہ کو آج کل ربع خالی بھی کہتے ہیں۔ کوئی شخص اس صحرا میں داخل ہونے کی جرأت نہیں کرتا۔ اور جو چیز اس ریت میں گرپڑے وہ بھی ریت میں دھنس کر ریت ہی بن جاتی ہے۔جیسے کوئی چیز نمک کی کان میں گر پڑے تو وہ بھی نمک ہی بن جاتی ہے۔(تیسیر القرآن)

۔ وَ قَدْ خَلَتِ النُّذُرُ مِنْۢ بَیْنِ یَدَیْهِ وَ مِنْ خَلْفِهٖۤ یہ سلسلہ کلام کے بیچ میں جملہ معترضہ ہے۔ نذُر یہاں نذیر کی جمع ہے مطلب یہ ہے کہ حضرت ہود ؑ کا انذار کوئی انوکھا انذار نہیں تھا، آگے اور پیچھے کے علاقوں میں بھی اسی طرح کے منذر آ چکے تھے۔  (تدبرِ قرآن)

23۔ قَوْمًا تَجْهَلُوْنَ۔ جہل و جہالت کا اردو میں ایک مفہوم یہ بھی چلا ہواہے کہ وہ ناخواندگی کا مُرادف اور حرف شناسی کی ضد  ہے،عربی کے تجھلون کو اس مفہوم سے کوئی واسطہ نہیں، عربی میں اس کا مفہوم ہے نادانی اور بے مغزی کی باتیں کرنا، ضد یا نفسانیت کی بناپر قبولِ حق سے اغماض کرنا، اور جاہلی مشرکانہ طریق زندگی پر اَڑے رہنا۔(تفسیر ماجدی)

26۔ اس سے حقیقت سامنے آئی کہ کان، آنکھ اور دل کے اندر بھی حقیقی روشنی اللہ تعالیٰ کی آیات ہی سے پیدا ہوتی ہے۔ آیات الٰہی کے نور سے یہ منور نہ ہوں تو ان کی ساری رسائی صرف محسوسات تک محدود رہتی ہے اور ان محسوسات پر بھی وہ اپنا سارا زور محسوس فوائد ہی کے حاصل کرنے کے لئے صرف کرتے ہیں۔ اس محسوس پرستی کا نتیجہ یہ ہوتا ہے کہ انسان کی یہ ساری اصلی صلاحیتیں بالکل کند ہو کے رہ جاتی ہیں۔ (تدبرِ قرآن)

29۔ بعثت محمدی ﷺ سے قبل جنوں کو کچھ آسمانی خبریں معلوم ہوجاتی تھیں۔  جب حضور ﷺ پر وحی آنا شروع ہوئی وہ سلسلہ تقریباً بند ہوگیا اور بہت کثرت سے شہاب کی مار پڑنے لگی۔ جنوں کو خیال ہوا کہ ضرور کوئی نیا واقعہ ہوا ہے جس کی وجہ سے آسمانی خبروں پر بہت سخت پہرے بٹھلائے گئے ہیں۔ اسی کی جستجو کے لیے جنوں کے مختلف گروہ مشرق و مغرب میں پھیل پڑے۔ ان میں سے ایک جماعت " بطن نخلہ " کی طرف گزری۔ وہاں اتفاق سے اس وقت حضور پرنور ﷺ اپنے چند اصحاب کے ساتھ نماز فجر ادا کر رہے تھے۔ اللہ تعالیٰ نے جنوں کی اس ٹکڑی کا رخ قرآن سننے کے لیے ادھر پھیر دیا۔ قرآن کی آواز انہیں بہت عجیب اور موثر و دلکش معلوم ہوئی اور اس کی عظمت وہیبت دلوں پر چھا گئی۔ آپس میں کہنے لگے کہ چپ رہو اور خاموشی کے ساتھ یہ کلام پاک سنو۔ آخر قرآن کریم نے ان کے دلوں میں گھر کرلیا۔ وہ سمجھ گئے کہ یہ ہی نئی چیز ہے جس نے جنوں کو آسمانی خبروں سے روکا ہے۔۔۔۔۔ احادیث سے معلوم ہوتا ہے کہ اس مرتبہ حضور ﷺ کو ان کے آنے جانے اور سننے سنانے کا پتہ نہیں لگا۔ ایک درخت نے باذن اللہ کچھ اجمالی اطلاع آپ ﷺ کو دی اور مفصل حال اس کے بعد وحی کے ذریعہ سے معلوم کرایا گیا۔ کما قال تعالیٰ (قُلْ اُوْحِيَ اِلَيَّ اَنَّهُ اسْتَـمَعَ نَفَرٌ مِّنَ الْجِنِّ فَقَالُوْٓا اِنَّا سَمِعْنَا قُرْاٰنًا عَجَبًا) الجن، رکوع 1 )بعدہ بہت بڑی تعداد میں جن مسلمان ہوئے اور حضور ﷺ سے ملاقات کرنے اور دین سیکھنے کے لیے ان کے وفود حاضر خدمت ہوئے۔ خفاجی نے روایات کی بناء پر دعویٰ کیا ہے کہ چھ مرتبہ آپ ﷺ نے جنوں سے ملاقات کی۔(تفسیر عثمانی)

۔ اور ایک روایت میں ہے کہ یہ جنات مقام نصبین کے رہنے والے تھے اور کل نو یا بعض روایات کے مطابق سات تھے۔ جب انہوں نے اپنی قوم کو یہ خبر سنائی اور ایمان لانے کی ترغیب دی تو پھر ان میں سے تین سو اشخاص اسلام لانے کے لئے حاضر خدمت ہوئے (رواہ ابو نعیم والواقدی عن کعب الاحبار والروایات کلہا فی الروح) اور دوسری حدیثوں میں جنات کے آنے کی روایت دوسری طرح کی بھی آئی ہیں مگر چونکہ یہ متعدد واقعات مختلف اوقات میں پیش آئے ہیں اس لئے کوئی تعارض نہیں اور اس کی تائید اس روایت سے بھی ہوتی ہے جو طبرانی نے اوسط میں اور ابن مردویہ نے حضرت ابن عباس سے نقل کی ہے کہ جنات رسول اللہ ﷺ کی خدمت میں بار بار حاضر ہوئے۔ (معارف القرآن)

ــــ یہ امر  واضح  رہے  کہ  کسی  اچھی  اور سچی  بات  پر  واہ واہ  کردینے   والے  تو  بڑے،  برے  زمانے  میں بھی  نکل  آتے  ہیں  لیکن   اس واہ واہ  کی اس وقت   تک  کوئی  قیمت  نہیں  جب تک  زندگی  کے اندر  اس سے کوئی   عملی  تبدیلی   واقع   نہ ہو  ۔ قرآن  کی فصاحت  و بلاغت  پر سر دھننے  والے   اور اسکی  تعریف  میں زمین  و آسمان  کے قلابے  ملانے  والے  اس زمانے    میں  بھی بہت  ہیں لیکن   اس  پر  عمل  کرنے  والے  اور اسکی  دعوت  کو پھیلانے  والے  عنقا  ہیں ۔  اسکے برعکس  جنات   کلام   سنتے  ہی اسکی  دعوت   پھیلانے  کیلئے   چل پڑے ۔(تدبر قرآن)

ـــ انسان سے پہلے زمین پر جنوں کی آبادی:۔ اللہ تعالیٰ کی ساری مخلوق میں سے دونوع ایسی ہیں جو شریعت الٰہی کی مکلف ہیں۔ایک جن، دوسرے انسان۔پھر انسانوں کی پیدائش سے پہلے جن ہی اس زمین پر آباد تھے۔اور ان کی طرف بھی پیغمبر مبعوث ہوتے تھے۔اور جس طرح انسانوں کی اکثریت اللہ تعالیٰ کی نافرمان رہی ہے۔ اسی طرح جنوں کی اکثریت بھی نافرمان ہی تھی اوراب بھی ہے۔۔۔۔جو روایات  حضرت عبداللہ بن مسعودؓ سے مختلف کتب احادیث میں مذکور ہیں ان سے معلوم ہوتاہے کہ جنوں کی پہلی حاضری کا یہ واقعہ جس کا اس آیت میں ذکر ہے وادی نخلہ میں پیش آیاتھا۔اور ایک دوسری روایت کے مطابق یہ واقعہ اس وقت پیش آیا جب آپ اہل طائف سے مایو س ہوکر مکہ معظمّہ کی طرف واپس آرہے تھے۔ راستہ میں آپ نے وادئ نخلہ میں قیام فرمایا۔ وہاں عشاء یا فجر یا تہجد کی نماز میں آپ قرآن کی تلاوت فرمارہے تھے کہ جنوں کے ایک گروہ کا ادھر سے گزر ہوا اور وہ آپ کی قرأت سننے کے لیے وہاں ٹھہر گیا۔اس موقعہ پر جن رسول اللہؐ کے سامنے نہیں آئے تھے۔نہ آپ نے ان کی آمد کو محسوس کیا تھا بلکہ بعد میں اللہ تعالیٰ نے آپ کو بذریعہ وحی ان کے آنے اور قرآن سننے کی خبردی جیساکہ سیدنا ابن عباسؓ کی روایت یا مذکورہ حدیث نمبر 1 سے معلوم ہوتاہے۔(تیسیر القرآن)

30۔  کیا  حضور ؐ  جنات  کے بھی  اسی طرح  رسول  ہیں     جس طرح   ہمارے  ہیں؟  ۔۔۔۔رسولوں کے باب میں سنتِ الٰہی تو یہ رہی ہے کہ وہ اسی قوم کے اندرسے مبعوث ہوئے ۔۔۔۔۔رسول کی ساری زندگی اس کے متبعین کے لیے نمونہ ہوتی ہے۔۔۔۔۔لازماً جنوں اور انسانوں دونوں کی سرشت ،دونوں کے مزاج، دونوں کی معاشرتی،سماجی اور تمدنی ضروریات اور دونوں کے احکام و شرائع میں بڑا فرق ہوگا۔۔۔۔آنحضرتؐ کو جنوں کے مذکورہ بالا تاثرات کا علم وحی الٰہی کے ذریعہ سے ہوا۔۔۔۔۔بعض مرتبہ جنوں کے وفود آپؐ سے ملے یا ایک آدھ بار آپؐ ان کی دعوت پر ان کے پاس گئے۔۔۔۔۔جہاں تک کلیات ِ دین کا تعلق ہے وہ انسانوں اور جنوں کے درمیان بالکل مشترک ہیں۔۔۔۔۔جس طرح حضرت داؤدؑ کے نغماتِ حمد میں پرندے اور پہاڑ ان کی ہمنوائی کرتے تھے اسی طرح جنوں کے صالحین کی اس پارٹی نے قرآن سنا توعش عش کر اٹھی اور اس نے اپنی قوم کو بھی توحید اور آخرت پر ایمان لانے اور خدا کے عذاب سے ڈرتے رہنے کی دعوت دی۔۔۔۔۔قرآن کی بنیادی دعوت انسانوں اور جنوں دونوں کے لیے یکساں ہے لیکن یہ کہنا صحیح نہیں ہے کہ نبیؐ جنوں کے لیے بھی اسی طرح رسول تھے جس طرح انسانوں کے لیے تھے۔ جن لوگوں نے یہ بات کہی ہے ان کی بات اس سنت الہی کے خلاف ہے جو قرآن میں رسالت سے متعلق نہایت وضاحت سے بیان ہوئی ہے۔۔۔۔۔امام ابوحنیفہؓ سے یہ بات منسوب کی گئی ہے کہ وہ صالحین ِ جن کے لیے دخولِ جنت کے قائل نہیں تھے۔۔۔۔۔امام صاحب نے اگر فرمائی تو یہ بات فرمائی ہوگی  کہ صالحینِ جن اس جنت میں نہیں جائیں گے جو انسانوں کے لیے ہے۔(تدبر قرآن)

۔ اس سے معلوم ہوا کہ یہی جن پہلے سے حضرت موسیٰ اور کتب آسمانی پر ایمان لائے ہوئے تھے۔ قرآن سننے کے بعد انہوں نے محسوس کیا کہ یہ وہی تعلیم ہے جو پچھلے انبیاء دیتے چلے آ رہے ہیں۔ اس لیے وہ اس کتاب اور اس کے لانے والے رسول ﷺ پر بھی ایمان لے آئے۔ (تفہیم القرآن)

ـــ حضرت موسی پر نزول تورات شریعت ہے اور حضرت عیسی پر شریعت کی بجائے حکمت کا نزول ہوا۔(بیان القرآن)

31۔آیت اس باب میں تو صاف و صریح ہے کہ جنات ایمان لے آنے کے بعد عذابِ الٰہی سے بچ جائیں گے، لیکن اس باب میں ناطق و صریح نہیں کہ ایمان لانے پر جنت میں بھی داخل ہوجائیں گے ،ان کے دخولِ جنت کے باب میں خاموشی ہے، امام ابوحنیفہؒ سے اسی غایت احتیاط کی بناپر جنات کے دخولِ جنت کے بارے میں سکوت و توقف منقول ہے۔(تفسیر ماجدی) 

۔ ایک اور موقع پر بھی رات کے وقت حضرت عبداللہ بن مسعود نبی ﷺ کے ساتھ تھے اور مکہ معظمہ میں حجون کے مقام پر جنوں کے ایک مقدمہ کا آپ نے فیصلہ فرمایا۔ اس کے سالہا سال بعد ابن مسعود نے کوفہ میں جاٹوں کے ایک گروہ کو دیکھ کر کہا حجون کے مقام پر جنوں کے جس گروہ کو میں نے دیکھا تھا وہ ان لوگوں سے بہت مشابہ تھا۔ (ابن جریر) (تفہیم القرآن)

35۔ اُولُوا الْعَزْمِ مِنَ الرُّسُلِ۔  اس میں مِنَ الرُّسُلِ کا حرف مِن محققین کے نزدیک بیانیہ ہے تبعیض کے لئے نہیں۔ معنی یہ ہیں کہ تمام رسول جو صاحب عزم و ہمت ہی ہوتے ہیں معلوم ہوا کہ صاحب عزم و ہمت ہونا سبھی انبیاء کی صفت ہے۔ البتہ رسولوں کے درمیان صفات کے درجات میں تفاضل اور کمی بیشی خود قرآن کے ارشاد سے ثابت ہے۔ تِلْكَ الرُّسُلُ فَضَّلْنَا بَعْضَهُمْ عَلٰى بَعْضٍ۔  اس لئے جو انبیاء (علیہم السلام) صفت عزم و ہمت میں دوسروں سے زیادہ امتیاز رکھتے ہیں خاص ان رسولوں کے لئے یہ لقب کے طور پر مشہور ہوگیا اور ان کی تعیین میں بھی اختلاف ہے اور اکثر کا قول یہ ہے کہ لقب اولو العزم جن کو دیا گیا ہے یہ وہ حضرات ہیں جن کا ذکر سورة احزاب کی اس آیت میں ہے۔  وَ اِذْ اَخَذْنَا مِنَ النَّبِیّٖنَ مِیْثَاقَهُمْ وَ مِنْكَ وَ مِنْ نُّوْحٍ وَّ اِبْرٰهِیْمَ وَ مُوْسٰى وَ عِیْسَى ابْنِ مَرْیَمَ ۪ الخ۔ حضرت عائشہ کی روایت ہے کہ رسول اللہ ﷺ نے فرمایا کہ دنیا کی عیش و عشرت اور تنعم محمد اور آل محمد کے شایان نہیں کیونکہ اللہ تعالیٰ اولو العزم سے بجز صبر کے اور کسی چیز پر راضی نہیں اور مجھے یہی حکم دیا ہے کہ فاصْبِرْ كَمَا صَبَرَ اُولُوا الْعَزْمِ مِنَ الرُّسُلِ۔ (معارف القرآن)