1۔ ۔۔۔۔ان کے بارے میں آگے پیغمبر ﷺ  کو مخاطب کر کے فرمایا بھی ہے  کہ ان کے لیے تم مغفرت مانگو  بھی تو اللہ ان کی مغفرت کرنے  والا نہیں ہے۔  بلکہ دوسرے مقام میں یہاں تک فرمایا ہے  کہ اگر تم ستر بار بھی انکے لیے مغفرت مانگو جب بھی اللہ ان کی مغفرت فرمانے والا نہیں ہے۔۔۔۔۔۔۔فرمایا کہ یہ منافقین جب تمہارے پاس (پیغمبر ﷺ  کے پاس)  آتے ہیں تو قسم کھا کر اقرار کرتے ہیں  کہ آپ اللہ کے رسول ہیں  لیکن اللہ بھی قسم کھا کر کہتا ہے  کہ یہ منافقین بالکل جھوٹے ہیں۔  ہم دوسرے مقام میں  واضح کرچکے ہیں  کہ عربی میں  نشھد اور واللہ یشھد کے  الفاظ قسم کے مفہوم کے حامل  ہوتے ہیں۔ (تدبرِ قرآن)

4۔حضرت عبداللہ بن عباس بیان کرتے ہیں کہ عبداللہ بن ابی بڑے ڈیل ڈول کا، تندرست، خوش شکل اور چرب زبان آدمی تھا۔ اور یہی شان اس کے بہت سے ساتھیوں کی تھی۔ یہ سب مدینہ کے رئیس لوگ تھے۔ جب رسول اللہ ﷺ کی مجلس میں آتے تو دیواروں سے تکیے لگا کر بیٹھتے اور بڑی لچھے دار باتیں کرتے۔ ان کے جُثّے بشرے کو دیکھ کر اور ان کی باتیں سن کر کوئی یہ گمان تک نہ کرسکتا تھا کہ بستی کے یہ معززین اپنے کردار کے لحاظ سے اتنے ذلیل ہوں گے۔۔۔۔۔۔یہ نہیں بتایا گیا کہ ان کو ایمان سے نفاق کی طرف الٹا پھر انے والا کون ہے۔ اس کی تصریح نہ کرنے سے خود بخود یہ مطلب نکلتا ہے کہ ان کی اس اوندھی چال کا کوئی ایک محرک نہیں ہے بلکہ بہت سے محرکات اس میں کار فرما ہیں۔ شیطان ہے۔ برے دوست ہیں۔ ان کے اپنے نفس کی اغراض ہیں۔ کسی کی بیوی اس کی محرک ہے۔ کسی کے بچے اس کے محرک ہیں۔ کسی کی برادری کے اشرار اس کے محرک ہیں۔ کسی کو حسد اور بغض اور تکبر نے اس راہ پر ہانک دیا ہے۔ (تفہیم القرآن)

6۔ اس کی تشریح کے لیے سورۂ توبہ کی آیات نمبر 80 اور 84 کے حواشی دیکھ لیے جائیں جو اس موقعہ پر نازل ہوئی تھیں۔جب عبداللہ بن ابی کی وفات واقع ہوئی تھی۔(تیسیر القرآن)

7۔  عبداللہ بن ابی کے اسلام لانے کی وجوہ:۔عبداللہ بن ابی کے ان حالات میں اسلام لانے کی مجبوریاں تین تھیں ایک یہ کہ بدر کی فتح نے عرب بھر میں مسلمانوں کی دھاک بٹھادی تھی۔ عبداللہ بن ابی بھی ایسے موقع شناس لوگوں میں سے تھا۔جو چڑھتے سورج کو سلام کرنے کے عادی ہوتے ہیں۔دوسرے یہ کہ مدینہ میں اگرچہ یہود و مشرکین بھی آباد تھے مگر بااثر مسلمان ہی تھے تیسرے یہ کہ عبداللہ بن ابی کا اپنا بیٹا، اس کا نام بھی عبداللہ ہی تھا، مسلمان ہوچکا تھا اور وہ سچا مسلمان تھا۔۔۔۔۔(تیسیر القرآن)

8۔6ہجری میں غزوہ بنی مصطلق کے موقع پر ایک مہاجر اور ایک انصاری کے درمیان جھگڑا ہوگیا تو منافقوں کے سردار عبدااللہ بن ابی نے انصار کو اکسانے کے لیے کہا کہ مدینہ کی سرزمین پر عزت و اقتدار ہمارا حق ہے۔۔۔۔۔اگرہم ان کی امداد سے ہاتھ کھینچ لیں گے تو یہ مدینہ سے بھاگ کھڑے ہوں گے۔(ترجمہ: مولانا امین احسن اصلاحیؒ)

۔ حضرت زید بن ارقم کہتے ہیں کہ جب میں نے عبداللہ بن ابی کا یہ قول رسول اللہ ﷺ تک پہنچایا، اور اس نے آ کر صاف انکار کردیا اور اس پر قسم کھا گیا، تو انصار کے بڑے بوڑھوں نے اور خود میرے اپنے چچا نے مجھے بہت ملامت کی، حتیٰ کہ مجھے یہ محسوس ہوا کہ حضور ﷺ نے بھی مجھے جھوٹا اور عبداللہ بن ابی کو سچا سمجھا ہے۔ اس چیز سے مجھے ایسا غم لاحق ہوا جو عمر بھر کبھی نہیں ہوا اور میں دل گرفتہ ہو کر اپنی جگہ بیٹھ گیا۔ پھر جب یہ آیت نازل ہوئی  تو رسول اللہ ﷺ نے مجھے بلا کر ہنستے ہوئے میرا کان پکڑا اور فرمایا لڑکے کا کان سچا تھا، اللہ نے اس کی خود تصدیق فرما دی (ابن جریر۔ ترمذی میں بھی اس سے ملتی جلتی روایت موجود ہے)۔ (تفہیم القرآن)