3۔رسول کی دعوت تین ارکان پر مبنی ہوتی ہے: توحید،شریعت الٰہی کی پابندی اور رسول کی اطاعت۔جب تک کوئی قوم ان پر استوار رہتی ہے اس کے قدم جادۂ مستقیم پر استوار رہتے ہیں۔(ترجمہ: مولانا امین احسن اصلاحیؒ)

۔یہ تین باتیں تھیں جو حضرت نوح ؑ نے اپنی رسالت کا آغاز کرتے ہوئے اپنی قوم کے سامنے پیش کیں۔ ایک، اللہ کی بندگی۔ دوسرے، تقویٰ۔ تیسرے، رسول کی اطاعت۔ اللہ کی بندگی کا مطلب یہ تھا کہ دوسروں کی بندگی و عبادت چھوڑ کر اور صرف اللہ ہی کو اپنا معبود تسلیم کر کے اسی کی پرستش کرو اور اسی کے احکام بجا لاؤ۔ تقویٰ کا مطلب یہ تھا کہ ان کاموں سے پرہیز کرو جو اللہ کی ناراضی اور اس کے غضب کے موجب ہیں، اور اپنی زندگی میں وہ روش اختیار کرو جو خدا ترس لوگوں کو اختیار کرنی چاہیے۔ رہی تیسری بات کہ " میری اطاعت کرو "، تو اس کا مطلب یہ تھا کہ ان احکام کی اطاعت کرو جو اللہ کا رسول ہونے کی حیثیت سے میں تمہیں دیتا ہوں۔ (تفہیم القرآن)

4۔اس دوسرے وقت سے مراد وہ وقت ہے جو اللہ نے کسی قوم پر عذاب نازل کرنے کے لیے مقرر کردیا ہو۔ اس کے متعلق متعدد مقامات پر قرآن مجید میں بات بصراحت بیان کی گئی ہے کہ جب کسی قوم کے حق میں نزول عذاب کا فیصلہ صادر ہوجاتا ہے اس کے بعد وہ ایمان بھی لے آئے تو اسے معاف نہیں کیا جاتا۔ (تفہیم القرآن)

۔ اجل کے معنے مدت اور مسمّٰی سے مراد متعین کردہ۔۔۔۔۔۔۔۔یعنی مقررہ مدت عمر سے پہلے تمہیں کسی دنیاوی عذاب میں پکڑ کر ہلاک نہ کریگا۔۔۔۔۔۔۔۔معلوم ہوا کہ عمر کی مدت مقررہ میں بعض اوقات کوئی شرط ہوتی ہے  کہ اس نے فلاں کام کرلیا تو اس کی عمر مثلاً اسی سال ہوگی اور نہ کیا تو ساٹھ سال میں موت مسلط کردی جائے گی یا منفی کا موں میں اللہ کی ناشکری سے عمر گھٹ جانا اور شکر گزاری سے عمر بڑھ جانا، اسی طرح بعض اعمال مثلاً والدین کی اطاعت و خدمت سے عمر میں ترقی ہونا جو احادیث صحیحہ سے ثابت ہے اس کا بھی یہی مطلب ہے۔۔۔۔۔۔۔۔۔اس کی تشریح تفسیر مظہری میں یہ ہے کہ تقدیر اور قضائے الٰہی کی دو قسمیں ہیں ایک مبرم یعنی قطعی، دوسری معلق  یعنی جو کسی شرط پر معلق ہو۔ یعنی لوح محفوظ میں اس طرح لکھا جاتا ہے کہ فلاح شخص نے اگر اللہ کی اطاعت کی تو اس کی عمر مثلاً ستر سال ہوگی اور نہ کی تو پچاس سال میں مار دیا جائے گا اس دوسری قسم تقدیر میں شرط نہ پائے جانے پر تبدیلی ہو سکتی ہے۔ قرآن کریم میں ان دونوں قسم کی قضا و تقدیر کا ذکر اس آیت میں ہے یَمْحُوا اللّٰهُ مَا یَشَآءُ وَ یُثْبِتُ وَ عِنْدَهٗ اُمُّ الْكِتٰبِ۔ یعنی اللہ تعالیٰ لوح محفوظ میں محو و اثبات یعنی ترمیم و تبدیل کرتا رہتا ہے  اور اللہ کے پاس ہے اصل کتاب، اصل کتاب سے مراد وہ کتاب ہے جس میں تقدیر مبرم لکھی ہوئی ہے کیونکہ تقدیر معلق میں جو شرط لکھی گئی ہے اللہ تعالیٰ کو پہلے ہی سے یہ بھی معلوم ہے کہ وہ شخص یہ شرط پوری کرے گا یا نہیں، اس لئے تقدیر مبرم میں قطعی فیصلہ لکھا جاتا ہے۔ (معارف القرآن)

5۔بیچ میں ایک طویل زمانے کی تاریخ چھوڑ کر اب حضرت نوح ؑ کی وہ عرضداشت نقل کی جا رہی ہے جو انہوں نے اپنی رسالت کے آخری دور میں اللہ تعالیٰ کے حضور پیش کی۔ (تفہیم القرآن)

7۔کانوں میں انگلیاں دے لینا، اپنے اوپر چادریں لپیٹ لینا اور اپنے شرک پر اڑجانا قوم کے تکبر کا نتیجہ تھا۔ان کے پاس حضرت نوحؑ کی باتوں کا کوئی جواب نہ تھا لہذا انہوں نے سلامتی گریز و فرارہی میں سمجھی تاکہ اپنے مجرم ضمیر کو احساسِ جرم کی اذیت سے بچا سکیں۔(ترجمہ: مولانا امین احسن اصلاحیؒ)

10۔استغفار سے حاصل ہونے والے دنیوی فوائد :۔ اور جہاں تک میرے سمجھانے کا تعلق ہے تو میں ان کی مجلسوں میں بھی جاتاہوں اور ان کے گھروں میں بھی۔ان سے نجی محفلیں بھی کرتاہوں۔انہیں برملا بھی سمجھاتاہوں اور خیرخواہی کے لہجہ میں انفرادی ملاقاتوں میں انہیں یہ بات سمجھانے کی کوشش کرتاہوں کہ اس وقت جو تم پر قحط مسلط ہے، بارشیں نہیں ہورہی ہیں،اگر تم اللہ کی طرف رجوع کرلو۔اور اس سے اپنے گناہوں کی معافی مانگ لوتو تم پر سے یہ قحط دور ہوجائے گا۔ اللہ کی مہربانی سے خوب بارشیں ہوں گی۔ اور تمہارے اموال اور اولاد میں اللہ تعالیٰ خوب برکت عطا فرمائے گا" واضح رہے کہ استغفار کے دنیا میں حاصل ہونے والے ایسے فوائد کا ذکر قرآن میں اور بھی کئی مقامات پر آیا ہے۔مثلاً سورۂ مائدہ میں فرمایا:اور اگر اہل کتاب تورات،انجیل اور جوکچھ ان کے پروردگار کی طرف سے ان پر نازل کیا گیا تھا ،پر عمل پیرارہتےتو ان کے اوپر سے بھی رزق برستااور نیچے سے بھی نکلتا(5: 66)اور سورۂ اعراف میں فرمایا:اگر بستیوں کے لوگ ایمان لاتے اور تقویٰ اختیار کرتے تو ہم ان پر آسمان اور زمین سے برکتوں کے دروازے کھول دیتے۔(7: 96)ان آیات سے واضح طورپر معلوم ہوتاہے کہ استغفار کا دنیا میں بھی یہ فائدہ ہوتاہے کہ اس سے تنگدستی اور کئی دوسری پریشانیاں دور ہوجاتی ہیں۔چنانچہ حسن بصریؒ سے ایک شخص نے قحط کا شکوہ کیا،دوسرے نے محتاجی کا اور تیسرے نے اولاد نہ ہونے کا تو آپ نے ان تینوںکو استغفار کا حکم دیا۔کسی نے کہا کہ ان کے شکوے تو الگ الگ ہیں لیکن آپ ہر ایک کو استغفار کا ہی حکم دے رہے ہیں؟اس کے جواب میں آپ نے یہی آیات(نمبر 10 تا 12)پڑھ کر اسے مطمئن کردیا۔بلکہ بعض علماء تو کہتے ہیں کہ ہر مقصد کے حصول کے لئے اللہ کے حضوراستغفار کرنا چاہئے۔چنانچہ ایک دفعہ سیدنا عمرؓ  بارش کی دعا کرنے کے لئے باہر نکلے اور صرف استغفار پر اکتفا فرمایا۔کسی نے عرض کیا: امیر المومنین! آپ نے بارش کے لئے دعا تو کی ہی نہیں ؟فرمایا: میں نے آسمان کے ان دروازوں کوکھٹکھٹادیا ہے جہاں سے بارش نازل ہوتی ہے پھر آپ نے سورۂ نوح کی یہی آیات لوگوں کو پڑھ کرسنادیں۔(تیسیر القرآن)

13۔ حضرت نوحؑ سرزنش فرمانے لگے کہ اگر کوئی مالدار آدمی تمہارے پاس آتاہے ،تم اٹھ کرسلام کرتے ہو۔ اگر کسی علاقے کا سردار آجائے تو اس کا احترام کرتے ہو۔ اللہ تعالیٰ کی ہی ایک ایسی ذات ہے جس کا تمہیں کوئی لحاظ نہیں ۔(ضیاء القرآن)

ــــ   اللہ تعالیٰ میں جمال کی صفات کے ساتھ جلال کی صفات  بھی ہیں جو ان لوگوں کیلئے ظاہر ہوتی ہیں جو اس کے رسولوں کی نافرمانی کرتے اور ان کے آگے اکڑتے ہیں ۔صراطِ مستقیم پر استوار رہنے کیلئے ضروری ہے کہ انسان ان دونوں ہی قسموں کی صفات کی یادداشت تازہ رکھے ۔اگر ان میں عدمِ توازن پیدا ہوجائے تو آدمی کا ذہن صفاتِ الٰہی کے باب میں غیر متوازن ہوجاتاہے  جس سے اس کی ساری زندگی کا توازن بگڑ جاتاہے۔(تدبر قرآن)

22۔مکر سے مراد ان سرداروں اور پیشواؤں کے وہ فریب ہیں جن سے وہ اپنی قوم کے عوام کو حضرت نوح ؑ کی تعلیمات کے خلاف بہکانے کی کوشش کرتے تھے۔ مثلاً وہ کہتے تھے کہ نوح تمہی جیسا ایک آدمی ہے۔۔۔۔۔۔۔نوح کی پیروی تو ہمارے اراذل نے بےسوچے سمجھے قبول کرلی ہے۔۔۔۔۔۔۔خدا کو اگر بھیجنا ہوتا تو کوئی فرشتہ بھیجتا۔۔۔۔۔۔ نوح اور اس کے پیرو وں میں آخر کونسی کرامت نظر آتی ہے۔۔۔۔۔۔یہ شخص دراصل تم پر اپنی سرداری جمانا چاہتا ہے۔۔۔۔۔۔۔اس شخص پر کسی جن کا سایہ ہے۔۔۔۔۔۔ قریب قریب یہی باتیں تھیں جن سے قریش کے سردار نبی ﷺ کے خلاف لوگوں کو بہکایا کرتے تھے۔ (تفہیم القرآن)

23۔ امام بغوی ؒ نے نقل کیا ہے کہ یہ پانچوں دراصل اللہ کے نیک و صالح بندے تھے جو آدمؑ اور نوحؑ کے درمیانی زمانے میں گزرے تھے ان کے بہت سے لوگ معتقد اور متبع تھے ان لوگوں نے ان کی وفات کے بعد بھی ایک عرصہ دراز تک انہی کے نقش قدم پر عبادت اور اللہ کے احکام کی اطاعت جاری رکھی۔ کچھ عرصہ بعد شیطان نے ان کو سمجھایا کہ تم اپنے جن بزرگوں کے تابع عبادت کرتے ہو اگر ان کی تصویریں بنا کر سامنے رکھا کرو تو تمہاری عبادت بڑی مکمل ہو جائے گی اور  خشوع و خضوع حاصل ہو گا۔ یہ لوگ اس فریب میں آ کے ان کے مجسمے بنا کے عبادت گاہ میں رکھنے اور ان کو دیکھ کر بزرگوں کی یاد تازہ ہو جانے سے ایک خاص کیفیت محسوس کرنے لگے یہاں تک کہ اسی حال میں یہ لوگ سب یکے بعد دیگرے  مرگئے اور بالکل نئی نسل نے ان کی جگہ لے لی تو شیطان نے ان کو یہ پڑھایا کہ تمہارے بزرگوں کے خدا اور معبود بھی بت تھے وہ انہی کی عبادت کیا کرتے تھے یہاں سے بت پرستی شروع ہو گئی اور ان پانچ بتوں کی عظمت چونکہ ان کے دلوں میں سب سے زیادہ بیٹھی ہوئی تھی اس لیے باہمی معاہدے میں ان کا نام خاص طور سے لیا گیا ۔ضیاء القرآن میں بھی ، اور تفسیر عثمانی میں بھی یہی صورت بیان کی گئی ہے۔(معارف القرآن)

ــــ  ان بتوں کی سخت جانی قابلِ داد ہے کہ طوفان نے قومِ نوحؑ کا ایک ایک نقش مٹا دیا لیکن ان بتوں کی خدائی پھر بھی باقی رہی۔(تدبرقرآن)

ــــ نوح کی قوم کے بت عرب میں کیسے رائج ہوگئے:۔  اس آیت کی تفسیر کے لیے درج ذیل حدیث ملاحظہ فرمائیے:۔سیدنا ابن عباسؓ کہتے ہیں کہ جو بت نوحؑ کی قوم میں پوجے جاتے تھے،وہی بعد میں عرب میں آگئے ،ودّ کلب قبیلے کا بت تھا جو دومۃ الجندل میں تھا۔ سواع ہذیل قبیلے کا بت تھا،یغوث پہلے مُرارے قبیلے کا بت تھا پھر بنی غُطف کا اور یہ سبا شہر کے پاس جوف میں تھا، یعوق ہمدان قبیلے کا تھا اور نسر حمیر قبیلے کا، جو ذی الکلاع(بادشاہ)کی اولادتھے۔یہ نوحؑ کی قوم میں سے چند نیک لوگوں کے نام تھے۔جب وہ مرگئے تو شیطان نے انہیں یہ پٹی پڑھائی کہ جہاں یہ لوگ بیٹھا کرتے تھے وہاں ان کے مجسمے بناکر (یادگار کے طورپر)نصب کردو اور ان کے وہی نام رکھو جو ان بزرگوں کے تھے۔اس وقت ان کی عبادت نہیں کی جاتی تھی۔ لیکن جب وہ لوگ گزرگئے تو بعد والوں کو یہ شعور نہ رہا اور وہ ان کی پرستش کرنے لگے۔(بخاری۔کتاب التفسیر)یہاں سوال پیدا ہوتاہے کہ ان بتوں کے پجاری یا نوحؑ کی قوم کے سب مشرک تو طوفانِ نوح میں غرق کر دئیے گئے تھے جو باقی بچے تھے وہ سب مومن اور موحد تھے پھر بعد میں انہی بتوں کی پوجا کیسے شروع ہوگئی؟تو اس کا جواب یہ ہے کہ جس طرح شیطان نے بچے ہوئے موحدین کے آباء و اجداد کو چکمہ دے کر ان سے ان صالحین کی آہستہ آہستہ پرستش شروع کرادی تھی۔ شیطان کی وہی چال بعد میں کامیاب رہی۔موحدین نے اپنی اولاد کو طوفان نوح کا قصہ اور اس کی وجہ بیان کی۔ چند پشتیں گزرنے کے بعد انہی بتوں سے لوگوں میں عقیدت پیدا ہوگئی جن کی وجہ سے قومِ نوح پر عذاب آیا تھا۔(تیسیر القرآن)

25۔یہ آیت بھی ان آیات میں سے ہے جس سے برزخ کا عذاب ثابت ہوتا ہے۔ (تفہیم القرآن)

۔یعنی یہ لوگ اپنی خطاؤں اور کفر و شرک کی وجہ سے پانی میں غرق کئے گئے تو یہ آگ میں داخل ہوگئے۔ یہ متضاد عذاب کہ ڈوبے پانی میں اور نکلے آگ میں، حق تعالیٰ کی قدرت سے کیا بعید ہے اور ظاہر ہے کہ یہاں جہنم کی آگ تو مراد نہیں کیونکہ اس میں داخلہ تو قیامت کے حساب کتاب کے بعد ہوگا یہ برزخی آگ ہے جس میں داخل ہونے کی قرآن کریم نے خبر دی ہے۔(معارف القرآن)

26-28: حضرت نوحؑ کی پرزور اور پُراثر دعا۔(بیان القرآن)

28۔’وَلِمَنْ دَخَلَ بَیْتِیَ مُؤْمِنًا‘ سے معلوم ہوتا ہے کہ آخری مرحلہ میں حضرت نوحؑ نے یہ اعلان بھی فرما دیا تھا کہ جو عذاب سے پناہ کے طالب ہوں وہ اس کے ظہور سے پہلے پہلے ان کے گھر میں پناہ گیر ہو جائیں۔ (تدبرِ قرآن)