1۔ سیدنا عبداللہ بن عباسؓ کہتے ہیں کہ ایک دفعہ آپؐ اپنے چند اصحاب کے ساتھ عکاظ کے بازار جانے کے ارادہ سے روانہ ہوئے۔ان دنوں شیطانوں کو آسمان کی خبر ملنا بند ہوگئی تھی اور ان پر انگارے پھینکے جاتے تھے۔۔۔۔۔۔اس وقت آپؐ نخلہ میں تھے اور عکاظ کے بازار جانے کا قصد رکھتے تھے۔۔۔۔۔جنوں کی یہ گفتگو آپؐ کو وحی کے ذریعہ معلوم ہوئی۔(بخاری۔ کتاب التفسیر)۔۔۔۔جنوں کا مختلف  موقعوں پر قرآن سننا:۔ اس سے پیشتر سورۂ احقاف کی آیات 29 تا32 میں بھی جنوں کے قرآن سننے کا ذکر گزرچکا ہے۔سورۂ احقاف میں بیان شدہ واقعہ کے مطابق سننے والے جن مشرک نہیں تھے بلکہ وہ سیدنا موسیٰؑ پر اور تورات پر ایمان رکھتے تھے۔(تیسیر القرآن)

۔اور علامہ خفاجی نے فرمایا کہ احادیث معتبرہ سے ثابت ہوتا ہے کہ جنات کے وفود نبی کریم ﷺ کی خدمت میں چھ مرتبہ حاضر ہوئے ہیں اسلئے ان دونوں باتوں میں کوئی تضاد نہیں کہ سورة جن والے واقعہ میں آپ کو جنات کے آنے اور قرآن سننے کی خبر بھی نہ تھی جب تک بذریعہ وحی آپ کو بتلایا نہ گیا اور یہ کہ یہ واقعہ مقام نخلہ کا اور طائف سے واپسی کے وقت کا ہے اور دوسری روایات جن سے معلوم ہوتا ہے کہ شہر مکہ کے قریب ہی کے جنگل میں آپ بالقصد اسی کام کے لئے تشریف لے گئے کہ جنات کو دعوت اسلام دیں اور قرآن سنائیں یہ اس کے بعد پیش آیا (مظہری) (معارف القرآن)

ــــ نَفَرٌ مِّنَ الْجِنِّ۔نفر ایک چھوٹی سی جماعت یا ٹولی کو کہتے ہیں جس کے افراد کی تعداد تین اور دس کے درمیان ہو۔۔۔۔۔اُوْحِیَ اِلَیَّ اَنَّهُ۔ان الفاظ استنباط یہ کیا گیا ہے کہ جب تک وحی سے رسول اللہؐ کو مطلع نہیں کیا گیا،آپ کو خود بھی کوئی علم جنات کے سماعِ قرآن کا نہ تھا۔(تفسیر ماجدی)

2۔اس سے کئی باتیں معلوم ہوئیں۔ ایک یہ کہ جن اللہ تعالیٰ کے وجود اور اس کے رب ہونے کے منکر نہیں ہیں۔ دوسرے یہ کہ ان میں بھی مشرکین پائے جاتے ہیں جو مشرک انسانوں کی طرح اللہ کے ساتھ دوسروں کو خدائی میں شریک ٹھہراتے ہیں، چنانچہ جنوں کی یہ قوم جس کے افراد قرآن سن کر گئے تھے مشرک ہی تھے۔ تیسرے یہ کہ نبوت اور کتب آسمانی کے نزول کا سلسلہ جنوں کے ہاں جاری نہیں ہوا، بلکہ ان میں سے جو جن بھی ایمان لاتے ہیں وہ انسانوں میں آنے والے انبیاء اور ان کی لائی ہوئی کتابوں پر ہی ایمان لاتے ہیں۔ یہی بات سورة احقاف آیات 29۔ 31 سے بھی معلوم ہوتی ہے جن میں بتایا گیا ہے کہ وہ جن جنہوں نے اس وقت قرآن سنا تھا، حضرت موسیٰ کے پیرو ؤں میں سے تھے اور انہوں نے قرآن سننے کے بعد اپنی قوم کو دعوت دی تھی کہ اب جو کلام خدا کی طرف سے پچھلی کتب آسمانی کی تصدیق کرتا ہوا آیا ہے اس پر ایمان لاؤ۔ سورة رحمان بھی اسی بات پر دلالت کرتی ہے، کیونکہ اس کا پورا مضمون ہی یہ ظاہر کرتا ہے کہ رسول اللہ ﷺ کی دعوت کے مخاطب انسان اور جن دونوں ہیں۔ (تفہیم القرآن)

3۔اس سے دو باتیں معلوم ہوئیں۔ ایک یہ کہ یہ جن یا تو عیسائی جنوں میں سے تھے۔ یا ان کا کوئی اور مذہب تھا جس میں اللہ تعالیٰ کو بیوی بچوں والا سمجھا جاتا تھا۔ دوسرے یہ کہ اس وقت رسول اللہ ﷺ نماز میں قرآن پاک کا کوئی حصہ پڑھ رہے تھے جسے سن کر ان کو اپنے عقیدے کی غلطی معلوم ہوگئی اور انہوں نے یہ جان لیا کہ اللہ تعالیٰ کی بلندو برتر ذات کی طرف سے بیوی بچوں کو منسوب کرنا سخت جہالت اور گستاخی ہے۔(تفہیم القرآن)

4۔ یَقُوْلُ سَفِیْهُنَا۔ یعنی ایسی نامعقول بات کوئی سفیہ (بے وقوف)ہی اپنی زبان سے نکال سکتا ہے۔سفیہ بطور اسم جنس کے آیا ہے یعنی سفیہ لوگ۔(تفسیر ماجدی)

5۔یعنی ان کی غلط باتوں سے ہمارے گمراہ ہونے کی وجہ یہ تھی کہ ہم کبھی یہ سوچ ہی نہیں سکتے تھے کہ انسان یا جن اللہ کے بارے میں جھوٹ گھڑنے کی جرات بھی کرسکتے ہیں، لیکن اب یہ قرآن سن کر ہمیں معلوم ہوگیا ہے کہ فی الواقع وہ جھوٹے تھے۔ (تفہیم القرآن)

ــــ معلوم ہوتاہے کہ جنات کی اس جماعت کا تعلق ان کے عوام سے تھا اور ان کا لیڈر ان کو غلط راہ پر چلاتاتھا۔قرآن سننے کے بعد وہ حقیقت سے آگاہ ہوئے تو اپنے لیڈر کی حماقت پر انہیں افسوس ہوا۔(ترجمہ: مولانا امین احسن اصلاحیؒ)

6۔ابن عباس ؓ کہتے  ہیں کہ جاہلیت کے زمانے میں جب عرب کسی سنسان وادی میں رات گزارتے تھے تو پکار کر کہتے " ہم اس وادی کے مالک جن کی پناہ مانگتے ہیں "۔ عہد جاہلیت کی دوسری روایات میں بھی بکثرت اس بات کا ذکر ملتا ہے۔ مثلاً اگر کسی جگہ پانی اور چارہ ختم ہوجاتا تو خانہ بدوش بدو اپنا ایک آدمی کوئی دوسری جگہ تلاش کرنے کے لیے بھیجتے جہاں پانی اور چارہ مل سکتا ہو، پھر اس کی نشان دہی پر جب یہ لوگ نئی جگہ پہنچتے تو وہاں اترنے سے پہلے پکار پکار کر کہتے " کہ ہم اس وادی کے رب کی پناہ مانگتے ہیں تاکہ یہاں ہم ہر آفت سے محفوظ رہیں "۔ ان لوگوں کا عقیدہ یہ تھا کہ ہر غیر آباد جگہ کسی نہ کسی جن کے قبضے میں ہے اور اس سے پناہ مانگے بغیر وہاں کوئی ٹھہر جائے تو وہ جن یا تو خود ستاتا ہے یا دوسرے جنوں کو ستانے دیتا ہے۔ اسی بات کی طرف یہ ایمان لانے والے جن اشارہ کر رہے ہیں۔ ان کا مطلب یہ ہے کہ جب زمین کے خلیفہ انسان نے الٹا ہم سے ڈرنا شروع کردیا اور خدا کو چھوڑ کر وہ ہم سے پناہ مانگنے لگا تو ہماری قوم کے لوگوں کا دماغ اور زیادہ خراب ہوگیا، ان کا کبر و غرور اور کفر و ظلم اور زیادہ بڑھ گیا، اور وہ گمراہی میں زیادہ جری ہوگئے۔ (تفہیم القرآن)

۔تفسیر مظہری میں ہے کہ ہواتف الجن میں سند کے ساتھ حضرت سعید بن جبیر سے یہ نقل کیا ہے کہ رافع بن عمیر صحابی نے اپنے اسلام قبول کرنے کا ایک واقعہ یہ بتلایا ہے کہ میں ایک رات ایک ریگستان میں سفر کر رہا تھا۔ اچانک مجھ پر نیند کا غلبہ ہوا میں اپنی اونٹنی سے اترا اور سو گیا اور سونے سے پہلے میں نے اپنی قوم کی عادت کے مطابق یہ الفاظ کہہ لئے اِنی اعوذ بعظیم ھذا الوادی من الجن یعنی میں پناہ لیتا ہوں اس جنگل کے جنات کے سردار کی۔ میں نے خواب میں دیکھا کہ ایک شخص کے ہاتھ میں ایک ہتھیار ہے اس کو وہ میری ناقہ کے سینہ پر رکھنا چاہتا ہے، میں گھبرا کر اٹھا اور دائیں بائیں کچھ نہ پایا تو میں نے دل میں کہا کہ یہ شیطانی خیال ہے۔ خواب اصلی نہیں اور پھر سو گیا اور بالکل غافل ہوگیا۔ تو پھر وہی خواب دیکھا پھر میں اٹھا اور اپنی ناقہ کے چاروں طرف پھرا کچھ نہ پایا مگر ناقہ کو دیکھا کہ وہ کانپ رہی ہے۔ میں پھر جا کر اپنی جگہ سو گیا تو پھر وہی خواب دیکھا میں بیدار ہوا تو دیکھا کہ میری ناقہ تڑپ رہی ہے اور پھر دیکھا ایک نوجوان ہے جس کے ہاتھ میں حربہ ہے ۔یہ وہی شخص تھا جس کو خواب میں ناقہ پر حملہ کرتے دیکھا تھا اور ساتھ ہی یہ دیکھا کہ ایک بوڑھے آدمی نے اس کا ہاتھ پکڑ رکھا ہے جو ناقہ پر حملہ کرنے سے اس کو روک رہا ہے۔ اسی عرصہ میں تین گورخر سامنے آئے تو بوڑھے نے اس نوجوان سے کہا ان تینوں میں سے جس کو تو پسند کرے وہ لے لے اور اس انسان کے ناقہ کو چھوڑ دے۔ وہ جوان ایک گورخر لے کر رخصت ہوگیا پھر اس بوڑھے نے میری طرف دیکھ کر کہا کہ اے بیوقوف جب تو کسی جنگل میں ٹھہرے اور وہاں کے جنات و شیاطین سے خطرہ ہو تو تو یہ کہا کر اعوذ باللہ رب محمد من ھول ھذا الوادی یعنی میں پناہ پکڑتا ہوں رب محمد ﷺ کی اس جنگل کے خوف اور شر سے اور کسی جن سے پناہ نہ مانگا کر۔ کیونکہ وہ زمانہ چلا گیا جب انسان جنوں کی پناہ لیتا تھا۔ میں نے اس سے پوچھا کہ وہ کون ہیں۔ اس نے کہا کہ یہ نبی عربی ﷺ ہیں، نہ شرقی نہ غربی، پیر کے روز یہ مبعوث ہوئے ہیں۔ میں نے پوچھا کہ یہاں کہاں رہتے ہیں، اس نے بتلایا کہ وہ یثرب میں رہتے ہیں جو کھجوروں کی بستی ہے۔ میں نے صبح ہوتے ہی مدینہ کا راستہ لیا اور سواری کو تیز چلایا یہاں تک کہ مدینہ طیبہ پہنچ گیا۔ رسول اللہ ﷺ نے مجھے دیکھا تو میرا سارا واقعہ مجھے سنا دیا ۔ اس سے پہلے کہ میں آپ ﷺ سے کچھ ذکر کروں اور مجھے اسلام کی دعوت دیں  میں مسلمان ہوگیا۔ سعید بن جبیر اس واقعہ کو نقل کر کے فرماتے تھے کہ ہمارے نزدیک اسی معاملہ کے متعلق قرآن میں یہ آیت نازل ہوئی ہے۔وَ اَنَّهٗ كَانَ رِجَالٌ مِّنَ الْاِنْسِ یَعُوْذُوْنَ بِرِجَالٍ مِّنَ الْجِنِّ فَزَادُوْهُمْ رَهَقًاۙ ۔ (معارف القرآن)

11۔ ابن حجر نے کہا ہے کہ اس سورہ میں جتنے فقرے ان مکسورسے شروع ہوئے ہیں وہ جنات کے ہیں، اور جو أن مفتوح سے شروع ہوئے ہیں، وہ سب براہِ راست کلام الٰہی ہے۔(تفسیر ماجدی)

12۔مطلب یہ ہے کہ ہمارے اسی خیال نے ہمیں نجات کی راہ دکھا دی۔ ہم چونکہ اللہ سے بےخوف نہ تھے اور ہمیں یقین تھا کہ اگر ہم نے اس کی نافرمانی کی تو اس کی گرفت سے کسی طرح بچ نہ سکیں گے۔۔۔۔۔(تفہیم القرآن)

13۔حق تلفی سے مراد یہ ہے کہ اپنی نیکی پر وہ جتنے اجر کا مستحق ہو اس سے کم دیا جائے۔ اور ظلم یہ ہے کہ اسے نیکی کا کوئی اجر نہ دیا جائے اور جو قصور اس سے سرزد ہوں ان کی زیادہ سزا دے ڈالی جائے۔۔۔۔۔ (تفہیم القرآن)

16۔اوپر جنوں کی بات ختم ہوگئی۔ اب یہاں سے اللہ تعالیٰ کے اپنے ا رشادات شروع ہوتے ہیں۔ (تفہیم القرآن)

19۔  ہجرتِ مدینہ سے قبل اپنے قیام ِ مکہ کے زمانے میں جب آپؐ مشرکینِ قریش کی طرف سے مایوس ہوکر مکہ کی تفریح گاہ شہر طائف کو تبلیغ کے لیے تشریف لے گئے تو وہاں کے لوگ آپؐ کے ساتھ  بدتمیزی سے پیش آئے۔یہاں اشارہ اسی کی طرف ہے۔(تفسیر ماجدی)

20۔"یاروں نے بت شکن کو بت ہی بناکے چھوڑا"کا معاملہ رہبرانِ عالم کی تاریخ میں بارہادہرایا جاتارہاہے، قرآن مجید اسی فتنے کے خطرے میں باربار تصریح و تاکید رسول اللہؐ کے عبد محض ہونے کی کرتاجاتاہے۔(تفسیر ماجدی)

22۔ اِنِّیْ۔۔۔۔مُلْتَحَدًا۔یہ سب چیزیں محض اس مفروضہ پر مبنی و مشروط ہیں کہ رسولؐ اگر خدانخواستہ خود ہی احکامِ الٰہی سے سرتابی کرنے لگیں۔۔۔۔قرآن مجید نے ایسے بعید ترین احتمالات کو جابجا فرض کرلیاہے۔(تفسیر ماجدی)

23۔یعنی میرا یہ دعویٰ ہرگز نہیں ہے کہ خدا کی خدائی میں میرا کوئی دخل ہے، یا لوگوں کی قسمتیں بنانے اور بگاڑنے کا کوئی اختیار مجھے حاصل ہے۔ میں تو صرف ایک رسول ہوں اور جو خدمت میرے سپرد کی گئی ہے وہ اس سے زیادہ کچھ نہیں ہے کہ اللہ تعالیٰ کے پیغامات تمہیں پہنچا دوں۔ باقی رہے خدائی کے اختیارات، تو وہ سارے کے سارے اللہ ہی کے ہاتھ میں ہیں۔ کسی دوسرے کو نفع یا نقصان پہنچانا تو درکنار، مجھے تو خود اپنے نفع و نقصان کا اختیار بھی حاصل نہیں۔ اللہ کی نافرمانی کروں تو اس کی پکڑ سے بچ کر کہیں پناہ نہیں لے سکتا، اور اللہ کے دامن کے سوا کوئی ملجا و ماویٰ میرے لیے نہیں ہے (مزید تشریح کے لیے ملاحظہ ہو تفہیم القرآن، جلد چہارم، الشوریٰ ، حاشیہ: 7) (تفہیم القرآن)

۔یادرہے کہ ان آیات کے اصل مخاطب مشرکین مکہ ہیں ۔ جو شرک سے کسی قیمت پر باز نہیں آتے تھے اور یہی ان کی اللہ اور اس کے رسول کی نافرمانی تھی۔ ایسے مشرکوں کی سزا واقعی ابدی جہنم ہے۔لیکن مسلمان جو کم از کم شرک سے پاک ہوں۔ان سے اگر اللہ اور اس کے رسول کی نافرمانی کا کوئی کام سرزد ہوجائے تو ان کی سزا ابدی جہنم نہیں ہے۔بلکہ اللہ انہیں مناسب سزادینے کے بعد جہنم سے نکال لے گا۔ اور یہ بھی ممکن ہے کہ اگر وہ مناسب سمجھے تو معاف ہی فرمادے۔(تیسیر القرآن)

26-27: حضورؐ کا علمِ غیب:  (i) ذاتی نہیں عطائی ہے(ii) قدیم نہیں حادث ہے (iii) محدود ہے غیر محدود نہیں۔ڈاکٹر اسرار کی بریلوی علماء سے ملاقات اور حمایت جو کچھ بھی اللہ نے حضورؐ کو دیا ہے ،ہم اس کو ناپ نہیں سکتے۔ (بیان القرآن)

ــــ  جلد سوم، سورۂ نمل،آیت:65کا حاشیہ(ص458)حضورؐ کا علم قدیم نہیں حادث ہے یعنی پہلے نہیں تھا ۔ذاتی نہیں بلکہ عطائی ہے یعنی اللہ کے سکھانے سے حاصل ہوا۔ غیر محدود اور غیرمتناہی نہیں بلکہ متناہی و محدود ہے ۔اللہ کے علمِ محیط کے ساتھ حضورؐ فخر موجودات کے علم کی نسبت اتنی بھی نہیں جتنی پانی کے ایک قطرہ کو دنیا بھر کے سمندر سے ۔۔۔۔ــــ  اپنے رسولوں کو جتنا چاہتا ہے علومِ غیبیہ عطافرمادیتاہے ۔یہ "جتنا" کتنا ہے وہ لینے والا جانے یا دینے والا۔علامہ پانی پتی فرماتے ہیں کہ انبیا و رسل کا علم قطعی اور یقینی ہوا کرتاہے اس میں شک و شبہ کی کوئی گنجائش نہیں ہوتی لیکن اولیاء کا علم انبیاکے علم کی طرح قطعی اور یقینی نہیں ہوتا( نہ وہ انبیاء کی طرح معصوم ہوتے ہیں)(ضیاء القرآن)

ــــ قاضی ثناء اللہ پانی پتی صوفی بھی، مفسر بھی،جید عالم بھی اور مرشد بھی(بیان القرآن)

ــــ پیغمبروں کو (اپنے علوم و اخبار میں) عصمت حاصل ہے اوروں کو نہیں۔ انبیاء کی معلومات میں شک و شبہ کی قطعاً گنجائش نہیں ہوتی ۔دوسروں کی معلومات میں کئی طرح کے احتمال ہیں۔(تفسیر عثمانی)

ــــ مقصود اس کلام سے علمِ غیب کلی کا جس سے جہان کا کوئی ذرہ مخفی نہ ہو اُس کی غیر اللہ سے نفی اور صرف اللہ کیلئے اثبات۔ اس لئے آگے آیت میں ایک استثناء کا ذکر فرمادیا۔کہ علم غیب کلی کی نفی سے ہر غیب کی نفی مطلقاً مراد نہیں بلکہ منصبِ رسالت کیلئے جس قدر علمِ غیب کی خبروں اور غیب کی چیزوں کا علم کسی رسول کو دینا ضروری ہےوہ ان کو منجانب اللہ بذریعہ وحی دیدیا جاتاہے اور وہ ایسے محفوظ طریقے سے دیا جاتاہے کہ جب اللہ کی طرف سے کوئی وحی نازل ہوتی ہے تو اس کے ہر طرف  فرشتوں کا پہرہ ہوتاہے۔ بعض ناواقف غیب اور انباء الغیب میں فرق نہیں سمجھتے اس لئے وہ انبیاء اور خصوصاً خاتم الانبیاء کیلئے علم غیب کلی ثابت کرتے ہیں اور آپؐ کو بالکل اللہ کی طرح عالم الغیب کہنے لگتے ہیں جو کھلا ہوا شرک اور رسول کو خدا کا درجہ دینا ہے۔(معارف القرآن)

- اہلِ نحو اس کو استثنائے منقطع کہتے ہیں جو سابق سے الگ بات ہوتی ہے۔(تدبرقرآن)

27۔محافظوں سے مراد فرشتے ہیں۔ مطلب یہ ہے کہ جب اللہ تعالیٰ وحی کے ذریعہ سے غیب کے حقائق کا علم رسول کے پاس بھیجتا ہے تو اس کی نگہبانی کرنے کے لیے ہر طرف فرشتے مقرر کردیتا ہے تاکہ وہ علم نہایت محفوظ طریقے سے رسول تک پہنج جائے اور اس میں کسی قسم کی آمیزش نہ ہونے پائے۔ یہ وہی بات ہے جو اوپر آیات 8۔ 9 میں بیان ہوئی ہے کہ رسول اللہ ﷺ کی بعثت کے بعد جنوں نے اپنے لیے عالم بالا تک رسائی کے تمام دروازے بند پائے اور انہوں نے دیکھا کہ سخت چوکی پہرے لگ گئے ہیں جن کے باعث کہیں ذرا سی سن گن لینے کا موقع بھی ان کو نہیں ملتا۔ (تفہیم القرآن)