1۔ قیامت کے بعد جو جہانِ نو وجود میں آئے گا وہ نئے نوامیس و قوانین کے تحت وجود میں آئے گا۔اس وجہ سے اس میں یہ آسمان و زمین جو آج موجود ہیں ختم ہوجائنگے اور ان کی جگہ دوسرے آسمان و زمین نمودار ہوجائیں گے۔۔۔۔۔ اذا السماء النشقت کے الفاظ سے یہاں وہی مضمون بیان ہواہے جو سورۂ انفطار میں اذا السماء انفطرت کے الفاظ سے بیان ہواہے ۔قلعوں اور محلوں پہ نازاں لوگوں کو تنبیہ کہ ایوان اور محل تو درکنار سرے سے یہ آسمان و زمین ہی پاش پاش ہوجائنگے جن کے اندر یہ گھروندے تم نے بنائے ہیں۔(تدبرقرآن)

2۔ حُقَّ لَہُ کے معنی ہیں کہ اس کیلئے واجب ہے کہ وہ ایسا کرے اس کیلئے یہی زیبا ہے کہ وہ یہ کام کرے ۔(تدبرقرآن)

6۔كَدْحٌ کے معنی کسی کام میں پوری مشقت کے ساتھ کوشش کرنے کے ہیں ۔یہ نہایت بلیغ تعبیر ہے اس حقیقت کی کہ انسان جس دن سے وجود میں آتاہے اسی دن سے اس کا سفر خدا کی ٹھہرائی ہوئی منزل یعنی موت کی راہ میں شروع ہوجاتاہے۔اور یہ سفر بلاکسی توقف کے جاری رہتاہے ۔ موسم سخت ہو یا نرم، آدمی مریض ہو یا صحتمند ،حالات مساعد ہوں یا نامساعد، کسی حال میں بھی یہ منقطع نہیں ہوتا،ولادت سے لیکر موت تک بچپن ،مراہقہ ، جوانی، ادھیڑ پن ،پیری اور ناتوانی کے مختلف  مراحل آتے ہیں لیکن اس میں ایک منٹ بلکہ ایک سیکنڈ کیلئے بھی وقفہ نہیں ہوتا انسان قانونِ قدرت کی زنجیروں میں ایسا جکڑا ہواہے کہ وہ اس راہ میں نہ بھی چلنا چاہے جب بھی اس کو چلنا پڑے گا اور اس بے بسی میں شاہ اور گدا ، شریف اور وضیع ،امیر و مامور، نیک و بد سب یکساں ہیں ۔(تدبر قرآن)

-فَمُلٰقِیہِ۔یہ اس سفر کی غایت بیان ہوئی ہے ۔فرمایا کہ انسان اس دنیا میں شترِ بے مہار نہیں ہے ۔اس وجہ سے ضروری ہواکہ سب کشاں کشاں اپنے خالق کے حضور میں پہنچیں اور ا س کے آگے پیش ہوں ۔اس پیشی کا مقصد ظاہر ہے کہ یہی ہوسکتاہے اللہ تعالیٰ نے جس مقصد سے ان کو دنیا میں پیدا کیا اس سے متعلق ان سے سوال ہو کہ وہ انہوں نے پورا کیا یا نہیں ۔چنانچہ آگے اس کی تفصیل ہےکہ بامقصد لوگوں کے اعمال نامے دائیں ہاتھ میں اور بے مقصد لوگوں کے بائیں ہاتھ میں ہونگے۔(تدبرقرآن)

ـــــ رب تک پہنچنے سے پہلے ہر آدمی اپنی استعدادکے مطابق مختلف قسم کی جدوجہد کرتاہے ۔کوئی اس کی اطاعت میں محنت و مشقت اٹھاتاہے، کوئی بدی اور نافرمانی میں جان کھپاتاہے ۔پھر خیر کی جانب میں ہویا شر کی طرح طرح کی تکلیفیں سہہ کر آخر پروردگار سے ملتااور اپنے اعمال کے نتائج سے دوچار ہوتاہے ۔(تفسیر عثمانی)

ـــــ یہ وہ کیفیت ہے جس آس پہ ایک مومن پوری زندگی گزاردیتاہے ۔اللہ کے احکام کی سربلندی کیلئے اس کو نہ تو جیل میں کوئی مشکل نظرآتی ہے اور نہ کوئی اور مشقت و مصیبت ۔ایک اللہ والے کو بادشاہِ وقت نے ڈرایا کہ ہم تجھے سخت ترین سزادیں گے ۔اس نے کہاکہ اگر تو مجھے جیل میں ڈال دے تو یہ میرا اعتکاف ہوگا ۔اگر تو مجھے ملک سے دیس نکال دے دے تو یہ میری ہجرت ہوگی اور حضورؐ کی سنت پر عمل ۔اگر تو مجھےقتل کردے تو  میری تو زندگی ہی اس شہادت کی آرزو میں گزررہی ہے۔تم میرا کیا بگاڑ سکتے ہوکیونکہ ہرسزا میرا عین مقصود و مطلوب ہے۔(انوار القرآن)

18۔اقسامِ قرآنی کے لیے ملاحظہ ہو سورۃ الحجر (آیت 76)کا ایک حاشیہ۔(تفسیر ماجدی)

19۔یعنی ایک حالت پر نہیں  رہنا ہے بلکہ جوانی سے بڑھاپے، بڑھاپے سے موت، موت سے برزخ، برزخ سے دوبارہ زندگی، دوبارہ زندگی سے میدانِ حشر، پھر حساب و کتاب اور پھر جزا و سزا کی بے شمار منزلوں سے لازماً تم کو گزرنا ہو گا۔ (تفہیم القرآن)

21۔ عرب اورمصر میں یہ روایت تھی کہ جب لوگ کسی کی بات کی عظمت اور صداقت کا سچے جوش و جذبہ کے ساتھ اعتراف کرنا چاہتے تو اس کو سنتے ہی بے تحاشا سجدے میں گرپڑتے ۔فرمایا کہ یہ لوگ قرآن کی تصدیق میں بطور شکر سجدہ میں گرنے کی بجائے اس کی تکذیب کررہے ہیں۔خدا ان کے احوال سے اچھی طرح واقف ہے۔(ترجمہ: مولانا امین احسن اصلاحیؒ)